Skip to Content

Monday, September 26th, 2022

دڵشاد عه‌‌بدوڵڵا

Closed

 

 

ژووره‌‌كه‌‌م كه‌‌شتییه‌‌كه‌‌ به‌‌سه‌‌ر پشتی ته‌‌نیاییه‌‌وه‌‌
له‌‌ به‌‌نده‌‌ری ڕووناكییه‌‌وه‌‌
ته‌‌كان ده‌‌دا بۆ كوێ تاریكه‌‌

له‌‌ هه‌‌ر كوێوه‌‌ ده‌‌یكه‌‌یته‌‌وه‌‌… ئه‌‌وێ ده‌‌رگایه‌‌تی
كلیل گومان ده‌‌كا
له‌‌ كردنه‌‌وه‌‌ی

بۆنی واهیمه‌‌ ڕژاوه‌‌
هی منه‌‌، تێكه‌‌ڵی
داروپه‌‌ردووی بووه‌‌

ژووره‌‌كه‌‌م هه‌‌ر خۆمم تێیدا
كه‌‌چی به‌‌رده‌‌وام ده‌‌نگی چه‌‌ند كه‌‌سێك دێ
كه‌‌لوپه‌‌ل كۆده‌‌كه‌‌نه‌‌وه‌‌
جانتایان ئاماده‌‌ ده‌‌كه‌‌ن
هه‌‌ندێك سه‌‌فه‌‌ر ده‌‌كه‌‌ن و هه‌‌ندێك دێنه‌‌وه‌‌
ئه‌‌وه‌‌ی به‌‌رده‌‌وام لێره‌‌یه‌‌
ته‌‌نیاییمه‌‌.

٢
زۆر به‌‌ دوای خۆمدا گه‌‌ڕاوم
له‌‌ خه‌‌یاڵ و واقیعدا
له‌‌ ناو خۆم و كه‌‌سی تر و شتی تردا

شه‌‌ڕكه‌‌رێك له‌‌ ناو گه‌‌مێیه‌‌كدا
ئه‌‌وه‌‌ منم له‌‌ كۆنه‌‌وه‌‌
له‌‌ ته‌‌رواده‌‌ دێمه‌‌وه‌‌
هه‌‌ر شه‌‌پۆلم جێ نه‌هێشتووه‌‌ له‌‌ دوای خۆمدا
جه‌‌نگێكی بێ ئامانیش
به‌‌ دوامه‌‌وه‌‌ ده‌‌كشێ

ڕۆژ نه‌‌یتوانی پشتم بچه‌‌مێنێته‌‌وه‌‌
شه‌‌و داڵده‌‌می دا
ده‌‌ركه‌‌وتم له‌‌ ناو ئه‌‌ستێره‌‌كانی

بێده‌‌نگیم
گه‌‌وره‌‌تره‌‌ له‌‌ شه‌‌به‌‌نگی زمانم
ئازادییه‌‌ك بۆته‌‌ خولیام بێ وڵاته‌‌

ئه‌‌لبووم پڕه‌‌ له‌‌ وێنه‌‌ی شكست و سه‌‌ركه‌‌وتنه‌‌كانم
هه‌‌میشه‌‌ دیمه‌‌نی یه‌‌كه‌‌میانم جوانه‌‌
پووچ و بێ مانان سه‌‌ركه‌‌وتنه‌‌كانم

له‌‌ دوا دیمه‌‌ندا
باڵنده‌‌یه‌‌كی هه‌‌ڵكوڕماوی سه‌‌ر ته‌‌لی ئێواره‌‌كانم
گاڵته‌‌جاڕییه‌‌ چریكه‌‌ی ئاوازه‌‌كانم

٣ 
منداڵی داری هه‌‌رمێیه‌‌
هه‌‌موو ساڵ جارێك زه‌‌رد ده‌‌بێ  

ئاگر نۆ مانگی ته‌‌واوكرد له‌‌ ناخمدا
نه‌‌وه‌‌یه‌‌كی تازه‌‌ی ده‌‌بێ

كه‌‌ ئاوڕ ده‌‌ده‌‌مه‌‌وه‌‌
دنیا كوپه‌‌یه‌‌كی شه‌‌رابه‌‌
تا لێی نه‌‌خۆیه‌‌وه‌‌ تامی نازانی

ژنێك گوڵێكی به‌‌ ده‌‌سته‌‌وه‌‌یه‌‌
هه‌‌ردووكیان سیس بوون به‌‌ دیار منه‌‌وه‌‌

شاره‌‌كه‌‌م پیر بووه‌‌ له‌‌ دووری مندا
چۆن ببم به‌‌ گۆچانی؟

گه‌‌ڕه‌‌كه‌‌كه‌‌مان هی من نه‌‌بوو به‌‌ منداڵی
ئێستا كه‌‌ كه‌‌سی نه‌‌ماوه‌‌
بزگوڕی هێناوه‌‌ته‌‌وه‌‌ لای من 

ماڵه‌‌كه‌‌مان له‌‌ كه‌‌لاوه‌‌یه‌‌كدا
نامناسێته‌‌وه‌‌
له‌‌ ناخمدا به‌‌ خوڕ ده‌‌گری
فرمێسكی ده‌‌ڕژێته‌‌ گلێنه‌‌ی شیعره‌‌وه‌‌ 

ئای له‌‌ شیعری منداڵی و سه‌‌رده‌‌می پیری
ئای له‌‌ دنیای تام گرتوو
له‌‌ كۆشی وشه‌‌كانیدا

٤ 
دیمه‌‌نێكی دوور:
خانوویه‌‌كم دروستكرد له‌‌ ناو گوڵێكدا
تاپۆم كرد له‌‌سه‌‌ر په‌‌پووله‌‌
ئێستا من كرێچیی ئه‌‌وم
له‌‌ گوڵستان
دیمه‌‌نێكی نزیك:
ژوورێكم دروستكرد له‌‌ په‌‌پووله‌‌
دامه‌‌ گوڵێك
دیمه‌‌نێكی نزیكتر:
په‌‌پووله‌‌یه‌‌كم دروستكرد
من له‌‌ ئه‌‌ودام. 

تێبینی: ئه‌‌م شیعره‌ی دڵشاد، هاوكاتیش نووسینه‌‌كه‌ی ڕابه‌‌ر‌، له‌‌ ژماره‌‌ (٢١)ی حه‌وته‌‌نامه‌‌ی (ئه‌‌ده‌ب و هونه‌‌ر)ی ڕۆژنامه‌ی (كوردستان ڕاپۆرت)دا بڵاوبوونه‌‌ته‌‌وه‌‌، ل٤. به‌‌روار: ١١ی ٦ی ٢٠٠٩. ڕۆژی پێنج شه‌‌ممه‌. ‌   

Previous
Next