Skip to Content

Tuesday, November 24th, 2020

تەمێک لە ڕەنگی خۆم ، خۆمێک لە ڕەنگی تەم

Be First!
by August 9, 2011 ئەدەب

 

تۆ ئەبێ لێرە بی ،
ئێرە ، ئەبێ تۆی لێ بی…
بۆئەوەی لە ئاوەدانیی بچێ
 —-
ئەوساتەی هەموو خۆمم نووسییەوە
شەوەزەنگ چراکانی خۆی….
لەسەر تاقەکانی ژوورەکەم پێئەکا و
ئیتر ئەزانم سپێدەی خۆکوشتنە
 —-
بۆنی خوێن لە بۆنی شەراب خۆشترە
بۆنی سەرەنوێلک لە عەتری یار خۆشترە،…..
کە دڵێ ، شوێنێ شک نەبا…..
بە دەنگی بەرز تیا بگری
 —-
وەرە لام ،
تۆ ناڵێم ،…
ئەو، با بێ ،
ئەوێک ،کە بە دزییەوە نەبێ ، ناوێرم گازی کەم
 —-
با ، بڕوات ،
تۆ ئەڵێم،….
تۆیەک ، بە ئاشکرا ئەتوانین ڕقمان لە یەک بێ
 —-
بە پێی پەتی….
بەسەر وردەشووشەی ئەو ڕۆژگارانەدا ڕائەکەم
کە تێناگەم چۆن لە پشتمەوە هاڕەیان کرد ،
کە ئاوڕیش ئەدەمەوە
خۆم ئەبینم،…
یەک پارچە مەوج ئەدەمەوە لە خوێنا
 —-
دوو شت زراوم ئەبەن ،…
ئەوەی ، شیعر بە زۆریش نەیەتە ماڵم ؛
ئەوەی ، شیعر بە زۆریش ماڵم چۆڵ نەکا
 —-
كەسێك هەیە هەمیشە غیرەی لێ ئەکەم
کەسێکە ،…
سەخیفە ئەوەندە نازدارە ،
بە ئەنقەست خۆشی ئەوێم….
بۆ ئەوەی هەمیشە دوودڵ بم !!
 —-
پێش ئەوەی ماچم کات
هەموو گیرفانەکانی دڵم ئەپشکنێ!
 —-
گومانی چیم لێ ئەکەی ،
لە مەمکەکانی تۆ ڕووتترم !  
 —-
وا بیر ئەکەمەوە ،
لە خودا بپاڕێمەوە، دۆزەخم پێ ببەخشێ،….
بیکەمە باخی وەنەوشە ؛
بزانم ئەهلی ئیمان چی ئەڵێن !!!
 —-
بیری کەس نەکەم و
کەس بیرم نەکات
ئەمەیە کۆتایی شەڕە گەرمەکانی ژیان ؛
ئەمەیە سەرەتای دۆڕانە ناشرینەکان
 —-
نێوانی دێڕەکانم ئەگەڕێی…..
بۆ ئەدرێسی کۆنەخەمێکی خۆت ؛
ئەی من کوێ ؟
 —-
ئەچمەوە سەر سیلەی…..
یەکەم کۆڵانی منداڵییم ؛
لە دایکم زیاتر ، کەسێکی لێ نەماوە
 —-
لە دەرگا بدە و بڕۆ ،
کە کردمەوە….
بە بۆنی جێپەنجەکانتا ئەتناسمەوە
 —-
کە پاییز دێ ،زەرد ئەچمەوە لە شەرمی…..
کەوتنە خوارەوەی گەڵاکان ،
فریای چەند پرسە بکەوم !؟
دڵی چەند درەخت بەمەوە!؟
 —-
خوێن ، هەموو حیکایەتە ناخۆشەکانم بیردێنێتەوە
ئەو حیکایەتانەی دەرفەت نادەن…
لە ڕەنگی سووردا ،
بیر لە کەوتنە خوارەوەی کۆرپەیەک بکەمەوە….
لە ڕەحمی دایکی
 —-
منداڵیی ،
شەقاو بە شەقاو  شوێن پێم هەڵئەگرێ و
پیرییش ،
کونجێکم پێ ئەبەخشێ بۆ بیرەوەرییەکانم ؛
لەم نێوانەدا…..
منداڵێکی بێ پا و
پیرێکی کەفتەکار ماوم
 —-
تەقە لە سێبەرەکەم ئەکەم و
زریکە لە خۆم هەڵئەستێ !
 —-
بە شەو ،
هەتا سەر لێواری گۆڕەکەم ئەڕۆم ،
بە ڕۆژ ،
ئەچمەوە باخچەی گشتیی و
پەپوولەیەک دەستم ئەگرێ و
 هەتا بەردەرگای ژیان ناوەستینەوە
 —-
کارەساتە، چاڵ بۆ خەیاڵەکانم هەڵکەنم،….
بۆ ئەوەی ئەوان…
نەمخەنە خەرەندێکەوە !!
  —-

لە دەمی بیرەکەوە ،….
بەسمە هێندەی ئاسمان ببینم ؛
بڕوا ناکەم لەوە زیاتری ساماڵ بێ !!
 —-
خۆڵەمێش ، خوێنی مەییوی پشکۆکانە و
بە دیار  “ئەو”یشەوە….
ئێسک و پروسکی ڕزیوی من
 —-
خۆشمویست و
نەیئەزانی ، کەی ئەبمە پاییز،
خۆشیویستم و
ئاگام لێ نەبوو، کەی سەوز دائەگەڕێ ؛
کەواتە هەردووکمان ، شێت و وێت !!
 —-
بەم تاریکییە ،
گزنگ داگیری کردووم ، گزنگ
بەم خۆرەتاوە ،
تەم لە ڕووخسارم ئاڵاوە ، تەم
 

  bhastiar@yahoo.de
          بەرزان هەستیار
ئۆکتۆبەرو نۆڤێمبەری 2010
کۆلن- ئەڵمانیا

Previous
Next

Leave a Reply