Skip to Content

Thursday, September 24th, 2020

دیمانه‌ له‌گه‌ڵ چیرۆک نووس کاروان عومه‌ر کاکه‌سوور…

Be First!
by May 14, 2008 ئەدەب

 كاروان عومەر كاكەسوور: هەتا ئێستاش لای ئێمە تیراژی كتێب و ژمارەی دەركەوتنی نووسەر لەسەر شاشەی تیڤییەكان پێوەرن بۆ چاكی و خراپی!..
 
  سازدانی/ دانا فایەق….
 پێنجەم…….

 
 
 *هەر تۆ نا، بەڵكو زۆر لە نووسەرانی تریش تەنیاییەكیان بۆ خۆیان دروست كردووە و كەمتر تێكەڵ دەبن، یاخود هونەری ئیشكردن بۆ خۆیان نازانن، بەڵام ئایا ئیشی رەخنە كەشفكردنی ئەو دەنگە تەنیاو پەراوێزخراوانە نییە؟ باسی (سالینجەر)ت كرد، رەنگە لە دونیادا نووسەرێكی تر نەدۆزینەوە هێندەی ئەو لە پەراوێز و تەنیاییدا ژیا بێت، بەڵام ئەوە زیرەكیی رەخنەگرە توانیویەتی ئەو نووسەرە پەراوێز و تەنیایە بدۆزێتەوە و كەشفی بكات، كە ئەو یەكێكە لە نووسەرە داهێنەرەكانی جیهان. هەست ناكەی رەخنەی كوردی لەوە بێتواناترە، كە هێزی كەشفكردنی دەنگە تازە و جیاوازەكانی هەبێت؟
 
 -بەڵێ، رۆشنبیریی ئێمە هیچ كاتێك بێ (سالینجەر) نەبووە، بەڵام دۆزینەوەی ئەو (سالینجەرانە) لە ئێستا و لە ئایندەدا بەندە بەو هێزەی، كە رەخنە لە رێگای هەوڵەكانی خۆیەوە پەیدای دەكات. دیدگا بەتەنیا بەس نییە، بەڵكو زۆر گرینگە رەخنەگر شارەزایی لە تەكنیك و فێڵەكانی نووسینی چیرۆك و رۆمان و شیعردا هەبێت، چونكە خۆت وەكو چیرۆكنووسێك دەزانی، ماناكانی هەر تێكستێكی ئەدەبی لەناو ئەو تەكنیك و یارییانەدا حەشار دراون. بۆ نموونە تۆ لە چیرۆكێكتدا تەكنیكی فلاش باك بەكاردەهێنیت، ئەو بەكارهێنانە ئامانج نییە، بەڵكو (هۆ)یە. رەنگە مەبەستت نیشاندانی كاریگەریی زەمەن بێت لەسەر خودی كارەكتەر و شوێندا. رەخنەگرێك كاتێك ئەمانە نازانێت، ئەوا نەك هەر ناتوانێت هیچ نهێنییەك لە چیرۆكەكەتدا بدۆزێتەوە، نەك ناتوانێت لەبارەی كارەكتەر و زەمەن و شوێن و زۆر شتی دیكەوە قسەی لەبارەوە بكات، بەڵكو تۆمەتباریشت دەكات و دەتخاتە پەراوێزەوە. دیدگای ئیستاتیكی لە خوێندنەوەی تێكستی ئەدەبی و هونەرییدا گرینگە. ئەوەی دەتوانێت نهێنی لەناو هەر تێكستێكدا بدۆزێتەوە، تەنها دیدگای فیكری نییە، بەڵكو دیدگای ئیستاتیكییشە، كە ئەمڕِۆ لەناو گوتاری رەخنەی ئێمەدا دیار نییە، یاخود لاوازە. (ماركس) لە هەندێك لە بەرهەمە فەلسەفییەكانیدا باسی نووسەری وای كردووە، كە رەنگە ئەو نووسەرە لە شارەكەی خۆشی نەناسرابێت، بەڵام ئەو هەموو ئاگادارییە لە ئەدەب لای ئەو فەیلەسووفە، دیدگایەكی ئیستاتیكیی وای پێ نەبەخشیوە، كە لەپاڵ فەلسەفە و رەخنەی فیكر و ئایدیۆلۆژیادا خەریكی كاری رەخنەی ئەدەبییش بێت، بەڵام (لۆكاچ)، بە چاوپۆشین لە هەموو ئەو رەخنانەی ئەمڕِۆ ئێمە لەسەریمان هەیە، توانیویەتی ئەو دیدگایە بەدەست بهێنێت. لە حەفتاكاندا هەر یەك لە (فوئاد مەجید میسری) و (فوئاد قەرەداغی) لە رووی فیكرەوە زۆر لە (حسێن عارف) بەتواناتر بوون، بەڵام دیدگای ئیستاتیكیی (حسێن عارف) لە هی ئەوان گەورەتر بوو. وەكو چۆن (لۆكاچ) لەسەر حسابی نووسەرانی  دیكەوە، بایەخی بە نووسەرانی سەر بە ریالیزمی سۆسیالیستی دەدا، یان (تۆماس مان)ی دەخستە پێش (جەیمس جۆیس)ەوە، گوایە یەكەمیان مەنەلۆژی لە روانگەیەكی دینامیكانەی پێشكەوتووەوە بەكار هێناوە و لای دووەمیان ئەو مەنەلۆژە لە تێڕِوانینێكی حدسییانەی وەستاوەوەیە، بەهەمان شێوە هەردوو (فوئاد) لەسەر حیسابی هەندێك نووسەری داهێنەر بایەخیان بە نووسەرانی دیكە دەدا. دیارە نەك مەبەستم نییە لە گرینگیی ئەو دوو ناوە كەم بكەمەوە، بەڵكو من پێم وایە ئەوان لەو سەردەمەدا، (وتم لەو سەردەمەدا)، لەپاڵ (رەوف حەسەن، ڕِەوف عوسمان، دڵشاد مەریوانی، كەمال میراودەلی، حەمەسەعید حەسەن، ئازاد عەبدولواحید، زایەر رۆژبەیانی) و یەك دوو ناوی دیكەدا هەوڵی جدییان لە بواری رەخنەدا هەیە، بەڵام لەناو ئەو هەوڵانەدا هەیە دواتر وەستاوە، هەیە بەهەمان كەرەسە بەردەوام بووە و هەیە زمانی زیاتر بەرەو توندوتیژیی سیمبۆلیی چووە و هەیە رووی لە بواری دیكەی نووسین كردووە. زیاتر مەبەستمە بڵێم ئەو شێوە ئیشكردنەی (حسێن عارف) لە ئیشكردنی هەردوو (فوئاد) زیاتر داهێنانی لەناو رۆشنبیریی ئێمەدا دۆزیوەتەوە. یەكێك لە ئەركەكانی رەخنە ئەوەیە، لەو نهێنییانە دەگەڕِێت، كە نەدۆزراونەتەوە، لەو ناوانە دەگەڕِێت، كە نەناسراون، بەڵام لای ئێمە رەخنە لە زانراوەكان و لە ناوە دیارەكان دەگەڕِێت. ئەو هەموو لەیەكچوونەش بەرهەمی ئەم شێوە ئیشكردنەیە. ئەو پرسیارەی تۆ دیوی دووەمی پرسیارەكەی دیكەتە، كە لەبارەی كاریگەریی ئەدەب لەسەر واقیعدا ئاڕِاستەت كردم. ئەركی رەخنە كردنەوەی شفرەكانی تێكستە، بەڵام هەرگیز مانای بەتاڵكردنەوەی تێكست و سادەكردنەوەی نییە تا ئەو ئاستەی لەگەڵ تێكستێكی دیكەدا جیاوازیی نامێنێت. هیوادارم دەنگی من تێكەڵی ئەو دەنگانە نەبێت، كە بەشێوەیەكی نیهلیستییانه‌ سەیری رۆشنبیریی خۆمان دەكەن و سووك و ئاسان دەڵێن هیچ رۆشناییەك بەرچاو ناكەوێت. من دەبینم زمانی شیعر بەسەر رەخنەدا زاڵە. ئەو زمانە هەموو شتێك وەسف دەكات. ئەو وەسفەش پێوەندیی بەو هەست و خرۆشەوە هەیە، كە لەو كاتەدا رەخنەگری وەسفیی ئێمە لەناویدا دەژی. ناڵێم رەخنەگری خاوەندیدگا بەهیچ شێوەیەك وەسفی شت ناكات و باوەڕِم بە شیعرییەتی رەخنەش هەیە، بەڵام كاتێك وەسف جێگای میتۆدی خوێندنەوە و راڤەكردن دەگرێتەوە، ئەوە وەسف وەكو ئەوەی لێدێت، كە منداڵانی هەولێر ئەو سەردەمەی شار چۆڵەوانی بووە، لە دووری دوور دوورەوە سەیری منارەی چۆڵییان كردووە. لێیان بووە بە شەڕِ، كە ئەگەر رۆژگارێك بیگەنێ، كامیان لە باوەشی دەكات بۆ ماڵەوەی دەهێنێتەوە. رەخنە فانتازیای تێكست لەسەر ئاستەكانی فیكر و ئیستاتیكادا دەخوێنیتەوە و هەوڵی دۆزینەوەی ماناكان دەدا، نەوەك فانتازیاكانی خۆی لەسەر بنیات بنێت. من لە شوێنێكی دیكەشدا باسم لەوە كردووە، كە زمانی شیعر بۆ رەخنە دەست نادات، چونكە ئەو زمانە سیفەتێكی مەزاجییانەی هەیە و هەر جارێك بەشێوەیەكی جیاوازتر لەوەی پێشووی دەردەكەوێت. سەرچاوەی ئەو رەخنەیە مەعریفە نییە، بەڵكو ئیلهامە. رەخنەگری وەسفی هەیە لەكاتێكدا ئیلهامی بۆ هاتووە و گوتوویەتی: (زۆر كەس لە نەزانییەوە بێت، یان لە هەرچییەكی دیكەوە بێت وادەزانن زمان نووسەر دروست دەكات)، كەچی جارێكی دیكە بەشێوەیەكی دیكە ئیلهامەكەی پێ گەیشتووە و گوتوویەتی: (لێرەدا نووسەر زۆر وەستایانە زمانێكی نایابی دروست كردووە و بەو زمانەش بەچاكی وەسفی دەرەوە و ناوەوەی شتەكانی كردووە. ئەوەی توانای دروستكردنی زمانی نەبێت، هەر نەنووسێت باشترە). ئیلهام بۆ نووسینی تێكستی ئەدەبی چاكە و فرەدەنگی مسۆگەر دەكات، بەڵام لە رەخنەدا كۆمیدیایە، كاریكاتێرە. راستییەكەی هەتا ئێستاش لای ئێمە جیاوازی لەنێوان رەخنە و ئەدەبدا بەشێوەیەكی روون و ئاشكرا نییە. بەردەوام تێكەڵی یەكدی كراون. ئەگەر لە بیرت بێت من ئەوسا باسی مەترسیی ئەوەم بۆ كردی، كاتێك نووسەری ئەدەبی لەناو تێكستی ئەدەبییدا دەیەوێت رۆڵی رەخنەگر ببینێت، بەڵام رووێكی دیكەی ئەمە لێرەدا دەردەكەوێت، كاتێك رەخنەگر دەیەوێت رۆڵی نووسەری ئەدەبی ببینێت. زمانی وەسف ناتوانێت هیچ نهێنییەك لەناو تێكستە جدییەكاندا بدۆزێتەوە، بەڵكو زۆر جار بەهەموو سادەیی خۆیەوە رۆڵێكی دیماگۆژییانە دەبینێت و لە رێگای ئیحایەكانییەوە خوێنەری سادە لە خوێندنەوە دوور دەخاتەوە، بەوەی خۆی هەموو شتێكیان بۆ وەسف دەكات. رەخنەی وەسفی زۆر كەم لە تێكستە گەورەكان نزیك دەكەوێتەوە، چونكە لەوێ خێرا لاوازییەكانی دەردەكەوێت، بەڵكو زیاتر لە دوورەوە قسەیان لەسەر دەكات. لەپاڵ ئەوەی بە تێكستە سادەكاندا هەڵدەڵێت، بە چەند دێرێكیش هێرش دەكاتە سەر ئەو تێكستانەی بەو كەرەسە سادانەی ئەو ناكرێنەوە. لێرەوەیە داهێنانی (سالینجەرەكان)ی ناو ئەدەب و رۆشنبیریی ئێمە ناخوێندرێنەوەو هەر لە پەراوێزدا دەمێننەوە.
 
 
 *كاتێك سەرنج لە چیرۆك و رۆمانی خۆمان دەدەین، دەبینین زمانی وەسف باڵادەستییەكی تەواوی هەیە. لە بەرامبەر ئەوەدا گێڕِانەوە ئەو بایەخەی پێ نەدراوە. ئایا ئەمە مانای ئەوە نییە وەسف وایكردووە كەمترین ماوە بمێنێتەوە بۆ بیركردنەوە و لێكدانەوەكانی خوێنەر و زۆر جار ماوەی نەهێشتووەتەوە بۆ رەخنەگرتن تا نهێنییەكانی ناو دەق ئاشكرا بكات؟ فەرامۆشكردنی گێڕِانەوە وەكو یەكێك لە بنەما سەرەكییەكانی چیرۆك و رۆمان بۆچی دەگەڕِێتەوە؟
 
 -چیرۆكنووس، دیارە هەر جارێ دەڵێم چیرۆكنووس، هاوكات مەبەستم رۆماننووسیشە، لە رێگای گێڕِانەوەوە كار لە گۆڕِانی ئەو ماددە خاوە دەكات، كە هێشتا بەتەواوی لەناو خەیاڵدا پێنەگەیشتووە. هەر لەبەر ئەوەشە زۆر جار گێڕِانەوە رێك بە مانای زمان دێت. ئێمە لە پرسیارێكی پێشووتردا باسمان لەوە كرد زمان هاوكات لەگەڵ پرۆسێسی بیركردنەوەدا دەخوڵقێت و ئەركی خۆی لە پێكهێنانی وێنەكان و گەیاندنیاندا دەبینێت. ئەوە پرۆسێسی گێرانەوەیە رووداو لەسەر ئاستی واقیعدا دەگەیەنێتە ئاستی زمان، نەوەك وەسف. وەسف كۆنتاكت لەگەڵ رووی دەرەوەی شتەكاندا دەكات. پرۆسێسی گێڕِانەوە، شیعرییەت (Poetical) بە تێكستی ئەدەبی دەبەخشێت. بە مانایەكی دیكە وەسف بەشێكە لە پرۆسێسی گێڕِانەوە، نەوەك خۆی بەشێكی جیاواز بێت. ئەگەرچی (جیرار جینێت) بێجگە لەوەی جەخت لەسەر گرینگیی وەسف دەكات لە پرۆسێسی گێڕِانەوەدا، پێشی وایە وەسف لە توانایدا هەیە سەربەخۆ هەڵسووڕِێت. بە باوەڕِی ئەو گێڕِانەوە خۆی لەو توانایە بێبەشە. دەگاتە ئەوەی بڵێت دەتوانین وەسف بێنینە بەرچاومان، كە گێڕِانەوەی تێدا نەبێت، بەڵام ناتوانین گێڕِانەوە بێنینە بەرچاومان، وەسفی تێدا نەبێت. ئەو رایەی (جینێت) بەمانای بێبایەخكردنی رەگەزی گێڕِانەوە نییە، بەقەدەر ئەوەی جەختكردنە لەسەر وەسف لەناو پرۆسێسی گێڕِانەوەدا. من لەگەڵ راكەی تۆ دام، كە لای ئێمە وەسف دەستی بەسەر گێڕِانەوەدا گرتووە، بەڵام ناتوانم بڵێم وەسف گرینگ نییە. من دەزانم مەبەستت زیاتر ئەو شێوازی وەسفەیە، كە لای ئێمە لەسەر حیسابی گێڕِانەوەدا بوونی هەیە و هیچ ئەركێكی زمانی و جوانكاری جێبەجێ ناكات. وەسفی ئێمە وەسفێكە لە دەرەوەی كۆنتێكستی گێڕِانەوەدا. وەسفی شوێن دەكات، بەبێ ئەوەی ئەو شوێنە هیچ كارلێكێكی لەگەڵ كارەكتەر دروستكردبێت. وەسفی كارەكتەر دەكات و ئێمە هیچ كاریگەرییەكی شوێن و كاتی بەسەرەوە نابینین. هەر (جیرار جینێت) دەڵێ (گێڕِانەوە ئەركی دەستنیشانكردنی واقیع و كردار و رووداوەكان دەگرێتە ئەستۆ و وەسفیش ئەركی دەستنیشانكردنی كەسەكان و شتەكان). من پێم وایە وەسف كاتێك نەتوانێت جیاوازی لەنێوان ئاستەكانی كارەكتەر و شوێندا بكات، ئەوە نەك ئەركی خۆی لە دەست دەدات، بەڵكو دەبێتە قورساییش بەسەر گێڕِانەوەدا. گرینگترین ئەركی وەسفیش ئەوەیە لەناو سیستەمی زمان و ئیستاتیكادا ماهییەتی شتە واقیعییەكان تێكبشكێنێت و جیاوازتر دەریانبخاتەوە. بەمانایەكی دیكە وەسف نیشاندانەوەی رووی دەرەوەی ئەو شتانە نیین، كە روون و ئاشكرا لە بەرچاون، بەڵكو دۆزینەوەی شتە پەنهانەكانن. لەكاتێكدا چیرۆكنووسی ئێمە ناتوانێت لە رێگای گێڕِانەوەوە بابەتی گێڕِانەوە، كە بە (حەكایەت Narrative) ناسراوە، بۆ چەند كەناڵێكی لۆكاڵی دابەش بكات و لە رووی واتاوە هەوڵی سەربەخۆیی هەر یەكێك لەو كەناڵانە بدات، ئەوا ناشتوانێت لەناو گێڕِانەوەی ستاندارد دەربچێت و ناچارە بە پلەی یەكەم پشت بە وەسف ببەستێت. لێرەدا دەشێت هەندێك وێنەی شیعریی جوانمان نیشان بدات، بەڵام ئەو وێنانە تاكڕِەهەندن و نامانخەنە بەردەم تێڕِوانین لە زەمەن و پێكهاتەی زەمەن. (ڕِۆلان بارت) جیاوازی لەنێوان رەگەزی كات و رەگەزی هۆكاری (Causal)دا دەكات. مەبەستی ئەوەیە لۆژیكی گێڕِانەوە خۆی زەمەنی خۆی دەردەخات. زەمەنی گێڕِانەوەش، كە لە شێوەی سیستەمدا بوونی هەیە، لە لایەك واتاییە و لە لایەكی دیكە وەزیفی. لێرەوە دەتوانین بڵێین هەر ئەم لۆژیكی گێڕِانەوەیەشە ئەركی وەسف دیاری دەكات. ئێمە بەدەگمەن رۆماننووسمان هەیە بە هۆشیارییەوە مامەڵەی لەگەڵ گێڕِانەوەدا كردبێت. رۆماننووسی ئێمە ئەگەرچی هەندێك ماكیاژی لە تێكستەكاندا كردووە، بەڵام من پێ لەسەر ئەوە دادەگرم، كە ئەگەر یەك دوو رۆمانی لێ دەركەین، ئەوا گێڕِانەوەی (جەمیل سائیبـی) گۆڕِانێكی گەورەی بەسەردا نەهاتووە. بۆ نموونە من پار رۆمانێكم خوێندەوە، نووسەرەكەی بەپێی ئارەزوو ئەو تێكستەی بەسەر چەند بەشێكدا دابەش كردووە. بەشی دووەم لە رووی كاتی فیزیكییەوە درێژەپێدەری بەشی یەكەمە و كەم و زۆر هیچ رووداوێكی بەشی یەكەم ناگاتە ناو ئەم بەشەوە. بەشەكانی دیكەش بەهەمان شێوە. لەكاتێكدا هەموو رۆمانەكە لەسەر تاكە بیرۆكەیەك و یەك دوو كارەكتەری سەرەكی دامەزراوە. ئەوەی لە بەشێكەوە دەگاتە ناو بەشێكی دیكەوە، كارەكتەرەكانن و لەژێر جەبری زەمەنی فیزیكییدا درێژەیان هەیە. كارەكتەر بۆی هەیە تەنها لەناو ئەو ماوەیەدا بیر بكاتەوە، كە نووسەرەكەی بۆی دیاری كردووە. مەبەستم ئەوەیە ئەو كارەكەتەرە، كە گەیشتۆتە بەشی دووەم، بەهیچ شێوەیەك بیركردنەوەی بۆ ناو بەشی یەكەم ناگەڕِێتەوە. لە بەشەكانی دیكەش بەهەمان شێوە. ئەمە رۆمان نییە، بەڵكو حەكایەتە، چونكە حەكایەت وەكو ماددە خاوەكە ماوەتەوە و نەخراوەتە ناو سیستەمێكی جیاواز لە زەمەنی فیزیكییەوە. راستە ئەمە لای خوێنەری سادە كارێكی سەركەوتووانەیە، بەوەی سەری لێ ناشێوێت، بەڵام كاتێك دەمانەوێت لەناو دەلالەتەكانی زەمەندا ئیشی لەسەر بكەین، شتێكی نوێمان بەدەستەوە نادات. ئەم رۆمانە بە پلەی یەكەم پشتی بە وەسف بەستووە. ئەگەر تۆ وابزانی ئەو رۆمانە لەبارەیەوە نانووسرێت و نووسەرەكەی لە گفتوگۆكاندا وەسفێكی سەیری بەرهەمەكەی ناكات، ئەوا بە هەڵەدا دەچیت. رۆماننوس كاتێك نەتوانێت تەكنیكەكانی وەكو جێگۆڕِكێی راناوەكان و وێنەی بزۆك و مۆنتاژەكان لە شێوەی فلاش باك و بڕِین و ونبوونی هێواش هێواش و هی دیكە بەكاربهێنێت،  یان نەتوانێت بە هۆشیارییەوە بەكاریانبهێنێت، ئەوا لەناو وەسفدا نغرۆ دەبێت، چونكە ئەو تەكنیكانەن نووسەر ناچار دەكەن زەمەن تێكبشكێنێت و جێگۆڕِكێ بە شوێن بكات و كۆمەڵێك یاریی دیكە بێنێتە ئاراوە، كە سەرجەم ئەمانە لەلایەك رووبەری وەسف كەم دەكەنەوە و لەلایەكی دیكە ئەو وەسفە پێویستەش بە ئاڕِاستەی داهێناندا دەبەن. بیرت نەچێت هەر ئەو نووسەرانە لە گفتوگۆكانیشیاندا هەر بە زمانی وەسف دەدوێن. لەبارەی كاتەوە پرسیاری لێ دەكەیت، لەبارە شوێنەوە پرسیاری لێ دەكەیت، لەبارەی زمانەوە پرسیاری لێ دەكەیت، ئەو وەسفیان دەكات. رۆماننووس هەیە لە گفتوگۆدا لەبارەی رۆمانەوە شتی لەم شێوەیەی گوتووە: (ڕِۆمان ئەو شووتییە سوور و گەییوەیە، كە ئەگەر قاشێكت لێی خوارد، هەمووی دەخۆی). تۆ دەتوانی لە گوتەیەكی لەم شێوەیە چییت دەست بكەوێت؟ دەزانی بەشێكی زۆری ئەوانەی لای ئێمە رۆمان دەنووسن لە گفتوگۆكاندا ئەوەی باسی ناكەن، هونەری رۆمانە؟ چونكە نایانەوێ ئاشكرا بن، كە چەند لەو هونەرەوە دوورن. دیسان جەخت لەسەر ئەوە دەكەمەوە، كە وەسف لە ئەدەبی گێڕِانەوەدا گرینگە، بەوەی ئەركی پێكهێنانی لایەنی هەستی دەخاتە ئەستۆی خۆیەوە، چونكو بایەخ بە لایەنی دەرەوەی شتەكان دەدات، ئینجا بەمەبەستی نیشاندانی جوانی بێت یان ناشیرینی. وێنەی روخساری كارەكتەر و قەبارەی شتەكان دەكێشێت، كە تۆ ناتوانیت لە رێگای گێڕِانەوەوە ئەنجامیان بدەیت. هەر لەبەر ئەوەشە (ژان ریكاردۆ) و زۆری دیكە باوەڕِیان وایە وەسف رەوتی گێڕِانەوە خاو دەكاتەوە، بەوەی سەرنجمان بۆ لای دیمەنەكان دەگوازێتەوە، بەڵام ئەمە بە پێویست دەزانن. ئەگەرچی (جیرار جینێت) پێی وایە وەسف لای (مارسیل پرۆست) نابێتە هۆی خاوبوونەوەی جووڵەی گێڕِانەوە، بەڵكو تێیدا دەبێتە رەگەزێكی بنەڕِەتی، چونكە وەسفی پرۆستی قەوارەیەكی پڕِ لە گۆران و دۆزینەوە و ئێمپرێشنی هەیە. بەگشتی رۆمانی چاك گرینگیی وەسف لەو شتە نابینێت، كە وەسفی دەكات، بەڵكو لە كۆنتێكستی گێڕِانەوەدا لێی دەڕِوانێت و دەیكاتە بەشێكی جیانەكراوە لە رەوتی گێڕِانەوەدا.
 

Previous
Next

Leave a Reply