Skip to Content

Wednesday, September 23rd, 2020

كاتژمێر …. شیعرى:حەمە سەعید كەلارى

Comments

 گوڵ بەدەم بادى سەباوە پێكەنیى ، بولبول فڕیى
  یەعنى   عاشق لازمە   دووربىَ   لە یارى   بىَ وەفا
     " حەزرەتى نالیى "… 
  
  
    سێى پاش نیوە مەرگى شەوە بەسوتانى عەشق
       شوێن
  كانیەكى دوورەدەس
  لەخەیاڵى داربەڕوویەكى زڕخەو
     رەنگ 
 رەنگى رۆحە
 لەتاڵەسپیەكانى پرچى كچێنیى دایكم ئەچىَ
     خەیاڵ
  لەپارێزدا نوقمى باوێشكە و
  لەمامزێكى بەلەسەى سرك ئەڕوانىَ
     سەرەتا
  ئەگەر فریانەكەوین
  سەرەمەرگى سەرەتایە
    سەرەتا
  لەزەتێكى نەشئە بەخشە
  گەر دڵۆپە سۆزێك بەپەنجەى شەهادەت
  لێوى عەشق تەڕبكا،
 *
    لەبەر خاترى گوڵە
  گەڵا ئەبێتە پەناگەى چۆلەكەیەكى ترساو
  لەداتەپینى ئاسمان ،
    سەفابەخشە
  رێبوارێكى ماندوو
   لەكۆشى كانیدا خەوێكى خۆشى لێبكەوىَ
    بۆسبەى رێگاكان گوڵەمێخەكیان لێ ئەڕوىَ
   خۆنچەكان دەم ئەكەنەوەو ئەبن بەگوڵ ،
    دەى كەوابوو
 خوایە گوڵێ هەڵنەوەرىَ
  *                                                            
    بەیانیى زوو بەشڵپەى دەسنوێژى سەفەر
  مەنگیى كانى ئەشڵەقێنم
   لەحوزوریا ئەنوشتێمەوەو  پێى ئەڵێم :
    دەستم دامێنت گۆچ مەكە
    ئاخر لەگەڵ كۆچى تۆدا
  كانى بیرى شیعرەكانم ئەچۆڕێت و وشك ئەكا
   كۆچى تۆۆۆ ،
  بەڕەزاى عاتیفەى تەڕم ئەژاكێنىَ
   سەفەرى تۆ
  دارشاتوەكەى هەستى قەسیدەم بەكاڵیى ئەوەرێنىَ
   پێی  ئەڵێم :
 چاوى كۆچ كوێربىَ و
  چاوى من قوربانى تۆ
   كوانىَ كانى دواى كۆچى تۆ
  كڵاوكوڕەى عەشقى شوانییم
  لەشەوە كەژى فیراقا
   شاپەڕى باڵى لێتەڕكا و
  لەگلێنەى ئەشكى سۆزى چاوەكانیا چینە بكا0
 چى پێبڵێم ؟
 بڵێم مڕۆۆۆۆ؟،
   كەمێكى تر پاش هەڵهاتنى خۆر لە سووتانى من
 ئەچمە خزمەتى،
   ئەڕۆم ودڵم ئەخەمە سەر لەپى پەڵە هەورێكى سەرهەڵگرتوو
  مەست بەشەستەبارانى ئەوین
    لەوىَ بەزمانى  رەشەبا ئەدوێم
   بەتیژیى بروسكە دامێنى ئەگرم و
    بەزارى سووتان ئەپاڕێمەوە
  سووتاااااان
    دوایى
  كشتەكى كرژى زمانم خاوڕیس ئەكەمەوەو
    بەباوەشێنى رەشەڕەیحانە
   فرمێسكى سەفەرى ئەو  و
  ئارەقەى پەشیمانیى خۆم ئەسڕم ،
    ئیوارە  درەنگ وەختێك
 كە(زوهرە) لەبورجى كانى بانگى كۆچ ئەخوێنىَ
    مانگ دەسنوێژى سەفەر هەڵەگرىَ وئەكەوێتەڕىَ
    هەسارەكان ئەڕژێنە سەر بەرماڵى ئاو و نوێژ بۆ كانى دائەبەستن
    ئەووەختە من
  تریفەى ژیریى پەلم ئەگرىَ
  ئەمبا وئەمبا تا پێی ئەگەم
     دەس لەدامێنى گیر ئەكەم و پێی ئەڵێم:
    ئەز لەگوێلىَ ئاودا  ئەخنكێم  عەزیزەكەم
    كەچیى رۆحم لەقووڵایى عەشقى تۆدا
 تا دىَ باى باڵى خۆش ئەكا
    لەوىَ
  بەنەرمیى شنەبا
   بەفێنكیى شەپۆل
 بەهێمنیى دابارینى كلوَە بەفر 
 كپیى  بنار
 بەعەشقى پەڕەسێلكەى لێوقەیتانیى بەهار
  بەسەر سەریا دائەبارم و پێى ئەڵێم:
    چاوى رۆح لەتامەزرۆیى دیدارت وەختە كوێربىَ
    بۆیە بەم ناوەختە هاتم
 ببوورە لێم
 عەزیزەكەم    ببورە
   هاتووم
  لەباخچەى سۆزى سۆفیانەم بڕوانە
   لەشیلەى غوربەتى رۆحم تێر هەڵمژە و
  ئەم سووتانەم خامۆش بكە
    ئێژم
  ئەى گوڵە رەنگ  پەمەییەكەى عەرشى غوروور
    ئەى پاكیزەیى و پێگەردیى گوناهى من
    لەم بێدەنگیەت  دەربچۆ و
  لەلوتكەى غوروور دابەزە،
 گوڵ بەخەرمانىَ مەكرەوە
  ناز ئەفرۆشێ
   منى نامۆ زەكاتى نازم پێ ئەشێ ،
   ئیتر بەسە
  باڵاى سەبرم گڕى تێچوو
  سووتا سووتا
    دەوەرە ۆ و دەستم بگرە
  با بچینەوە بۆ زەمەنى ماریفەت
    بەرەو ساتەكانى منداڵیمان  بگەڕیینەوە
    بۆئەو ساتانەى دەسنوێژمان لێك نەئەشكا
    بۆ كۆڵانەكانى خاڵى لە شەرم وترس 
 بەرەوگوڵزارى  بەرائەت
   ئەو زەمەنە كەعەشق خەتى نەدابوو
 ئەو رۆژانەى
    بەرماڵمان بۆ عاتیفەى تەڕ رائەخست و
   بەبىَ دەسنوێژ
 سوژدەمان  بۆپاكیى ئەبرد
 بەبىَ نیەت
 رۆژوومان بۆ خواكان  ئەگرت،
   ئێستەش كاتى ئەوە هاتوە
  بەكۆڵىَ عەشقى هەجیجیەوە
  بچینەوە بەرەو پاكیى رۆح
   بۆكۆڵانەكانى چاوشاركێى بەرائەت
  بۆ ئەو رۆژانەى لە قرچەى نیوە ڕۆدا
  لەسێبەرى دارشاتوەكەى رۆخى كانى
  ماڵمان ئەكرد
    نەمن شەرم دایئەگرتم
 نەتۆش چاوت دائەخست و
  نەكوڵمت سوور هەڵەگەڕا ،
    دەبا بگەڕێینەوە بۆ ساتەكانى منداڵیمان
    كەدەسنوێژمان لێك نەئەشكا
  با بگەڕێینەوە عەزیزم بەرەودواااااا
 بۆ…………………………. دوور
    بەرلەوەى   هودهودى   رۆحمان
  لەم غوربەتى  عاتیفەیەدا  بخنكىَ
       دەبا تێر یەك بخۆینەوە .
                                                

Previous
Next

Leave a Reply