Skip to Content

Sunday, May 9th, 2021

په‌نجه‌را من روی ل په‌نجه‌را مالا وه‌ یه‌!

Be First!

 


دێ‌ شێی بێژیه‌ من، 

په‌نجه‌را مالا وه‌ روی ل په‌نجه‌را مالا مه‌

 چ رامانا خوه‌ هه‌یه‌!

تشتێ‌ ل پشت په‌نجه‌را مالا وه‌ 

وه‌كی بانگێ‌ (ئێڤاریان) من هه‌می ژێ‌ ژ به‌رن

ل به‌رامبه‌ری په‌نجه‌را مالا وه‌

ئه‌زێ‌ ل هه‌می تشتان به‌رزه‌بویم و 

ئه‌زێ‌ هه‌می تشتێن خوه‌ دپشت په‌نجه‌را مالا وه‌ را دبینم

یاریكێن من ب ده‌ستێن خوه‌ بو ته‌ چێكرین

بیكێن پاته‌ی

خو سیتافكا ته‌ ژی

ئه‌زێ‌ ل هه‌می تشتێن خوه‌ دگه‌رم

پارچه‌یێن بیره‌وه‌ریێن خوه‌ یێن به‌لاڤه‌ 

ل پارچه‌ موزیكه‌یێن ژبیركری!

لێگه‌ریانا بیره‌وه‌ریێن دوماهی ئه‌ز و

ئه‌و دوماهیا پارچه‌یێن جه‌سته‌یێ‌َ من لێ‌ دبژاله‌..

ل به‌رامبه‌ری په‌نجه‌را مالا وه‌

چاڤێن من بتنێ‌ قه‌تره‌یا په‌نجه‌ره‌یا وه‌ دكه‌ن

بتنێ‌ د زمانێ‌ بێده‌نگیێ‌ دگه‌هم و

فرینا بالده‌یه‌كی ل بلنداهیا عه‌سمانا و 

دادان ژبیرا خوه‌ بری! 

تو چه‌ندا ژ من دویری و چه‌ندا ژ په‌نجه‌ره‌یا من نێزیك

ده‌ستێ‌ خوه‌ ب پرچا گولان دا بینه‌ خار

دا بێژمه‌ ته‌ عه‌شقێ‌ چه‌ند هه‌ناسه‌ هه‌نه‌؟

ئێك ئێكه‌ وان هه‌می مه‌سجێن 

ته‌ نیڤا شه‌ڤان خه‌و ژ چاڤێن من ره‌ڤاندین

چاڤێن خوه‌ ل رسته‌یا مه‌سجێن من یێن بوری دا ب خشینه‌

دوماهی مه‌سجا من یا نڤیسی ته‌ نه‌ لبیره‌؟

….. (ئه‌گه‌ر ته‌ ڤیا هه‌ست ب خوشیا عه‌شقێ‌ بكه‌ی

رحا خوه‌ ژبیر بكه‌ و

 بهێله‌ تو لدویڤ مه‌شا حه‌زێن خوه‌ بچی

رویساتیا خوه‌

بكه‌ دناڤ ده‌ستێن به‌لگه‌كێ‌ وه‌ریایی دا و 

دناڤ پێكه‌كێ‌ مه‌ی دا خوه‌ ژبیر بهێله‌

هه‌می تشته‌ك ب بێده‌نگی

 دێ‌ سه‌رخوشیا ته‌ ل پاش خوه‌ هێلیت! 

دناڤ هه‌می بێهوشیه‌كێ‌ ژی دا

دێ‌ زانی من چه‌ند تو دڤێی)…..

ئه‌ڤه‌ ئێكه‌م مه‌سجا من یا عه‌شقبونێ‌ بو و

دوماهی ڤرێن ته‌ ل پشت په‌نجه‌رێ‌، لبیرا منن

دوماهی مه‌سجا من یا كو دێ‌ گه‌هیته‌ ته‌

….. (هێشتا په‌نجه‌را من 

بیر ل خه‌ریبیا په‌نجه‌را مالا وه‌یه‌ و 

ته‌ هێشتا خوه‌ د كویراتیا هه‌ناسه‌یێن من دا نه‌ دیتی یه‌

كه‌س ب كوره‌ییا شه‌ڤان، خه‌ریبیا خوه‌ د په‌نجه‌را كه‌سێ‌ دا نابینیت

هیچ تاڤیه‌كا بارانێ‌ نه‌مایه‌، ته‌ ل هه‌ناسه‌یێن من نێزیك بكه‌ت)…..

ئه‌و مه‌سجا هێش من نه‌ نڤیسایی ژی

خو ئه‌گه‌ر ته‌ بیر لمن كر 

ته‌ ڤیا خوه‌ ژ په‌نجه‌را خوه‌ نێزیك بكه‌ی

وه‌ك بارانێ‌ هویر هویر

ب سه‌ر په‌نجه‌را من دا وه‌ره‌ خارێ‌ و 

ب دلوڤانیا روژێن به‌رێ‌

دلوپ دلوپ

خوه‌ به‌رده‌ دناڤ پێكێ‌ لبه‌ر سینگا من دا

ئه‌ڤه‌ دوماهی شه‌ڤا منه‌

دوا و سیا و چارا و پێنجان ژی

تا سه‌رخوش دبم دێ‌ هه‌ر ڤه‌خوم و

 ئه‌گه‌ر سه‌رخوش ژی بوم

بتنێ‌ دێ‌ په‌نجه‌ره‌یا مالا وه‌ بینم…..! 

 

عبدالرحمن بامه‌رنی

Bamerni77@yahoo.com

Previous
Next

Leave a Reply