Skip to Content

Wednesday, October 21st, 2020

چاخی بی وه‌ڵامی گه‌رمیان

Be First!
by March 3, 2013 ئەدەب

 

 

 

گه‌رمیان وتی

 دایه‌ مزاهه‌ره‌چیه‌؟

دایكی وتی

هه‌موو خه‌ڵك كۆئه‌بنه‌وه‌ و 

ڕه‌نگه‌ گۆرانی بڵین

یان داوی ئازادی بكه‌ن

یان بڵین نا بۆ گه‌نده‌ڵی

گه‌رمیان وتی

ئه‌ویش وه‌كو سه‌یران وایه‌

دایكی وتی

له‌هه‌موو شوینێ وانیه‌

گه‌رمیان وتی

ئه‌ی دایه‌ گه‌نده‌ڵی چیه‌؟

دایكی وتی

یه‌كێ مافی گشتمان ده‌خوات

گه‌رمیان بزه‌یه‌كی كردو

له‌به‌ر خۆیه‌وه‌ ئاوای وت

وای چه‌ند عه‌یبه‌؟

23ساڵ ڕێك له‌مه‌وبه‌ر

چه‌ند ڕۆژ دواتر

 مناڵانی كوچه‌و كۆڵانی چه‌مچه‌ماڵ

 مناڵانی دایك‌و باوك ده‌ست به‌سه‌ری 

بێ‌ په‌ڕو باڵ

 مناڵانی نه‌وه‌ی قه‌ڵا 

مناڵانی دژی به‌عس دژی به‌ڵا

بێ‌ ئه‌وه‌ی به‌عس بناسن

یا بزانن به‌عس چییه‌ 

له‌گه‌ڵ جیهادی قاله‌دا

 ڕژانه‌ نێو شه‌قام‌و

به‌یه‌ك به‌سته‌‌و په‌یامه‌وه‌ 

نا بۆ ئه‌نفاڵ نا بۆ سته‌م 

23 ساڵ ڕێك له‌مه‌و به‌ر

ئه‌شێ‌ هه‌ر ئه‌و مناڵانه‌

 یه‌كێكیان باوكی گه‌رمیان‌و 

یه‌كێ خاڵی‌و یه‌كی دیكه‌ خزمێكی بێ

ئه‌شێ‌ هه‌ر ئه‌و مناڵانه‌ 

دواتر هه‌ندێكییان شه‌هید‌و 

هه‌ندێكیشیان پارێزه‌ری نیشتمان بن 

یان پۆلیس بن یان پێشمه‌رگه‌

گه‌رمیان له‌ دوای 23 ساڵ له‌و مێژووه‌ 

له‌ هه‌مان شار

بێ ئه‌وه‌ی تێبگات له‌ هاوار

كه‌وتۆته‌ دوای ئاپۆڕه‌ی  توڕه‌یی خه‌ڵك

له‌ خۆیه‌وه‌ شتێك ده‌ڵێ‌ 

به‌ڵام نازانێ‌ وه‌ك ئه‌وان 

به‌ڵێ‌ به‌ڵێ‌ بۆ یه‌كسانی 

نابۆ نادادی‌و گه‌نده‌ڵی 

نا بۆ به‌رپرسی بێ‌ كه‌ڵك

گوله‌یه‌ك دێ‌

ئه‌و گوله‌یه‌ له‌ كێ‌ وه‌ دێ‌

 ڕه‌نگه‌ 23 ساڵ پێشتر 

هه‌مان ته‌قه‌كه‌ری ئه‌مڕۆ 

وه‌كو گه‌رمیان

 شتێكی گوتبێ‌ وه‌ك ئه‌وه‌ی

 ماناكه‌ی هه‌مان مانابێ‌ 

نا بۆ سته‌م 

گوله‌یه‌ك دێ‌

له‌باخی جه‌سته‌ی گه‌رمیانا

گڕ به‌ر ئه‌دا له‌ دڵی شار

ده‌نگێك ئه‌ڵێ‌ ئه‌و مناڵه‌ 

ئیدی گه‌رمیان ئه‌كه‌وێت‌و

په‌پوله‌ی گیانی ده‌فڕێ‌

بۆلای ڕێژوان 

له‌وێ‌ له‌ گه‌ڵ هاوڕێكانیا

به‌هه‌شتیان ده‌بێ به‌ جێژوان

له‌وێ‌ له‌گه‌ڵ هاوڕێكانیا

یه‌ك له‌ یه‌كتری ده‌پرسن

 كوڕی سه‌رۆك كوڕی به‌رپرس

 كوڕی كار به‌ده‌ست‌و سه‌ردار

چیان له‌ ئێمه‌ زیاتره‌ 

باوكیان چی له‌ باوكی ئێمه‌

 دایكیان چی له‌ دایكی ئێمه‌

ئه‌ی نیشتمان ماڵێك نییه‌ بۆ هه‌موان 

بۆ چی به‌هه‌شته‌ بۆ كه‌مێ‌‌و 

بۆ زۆرێ‌ بۆته‌ ته‌م تومان 

گه‌رمیان ڕۆیشتو

 نه‌یزانی گه‌نده‌ڵی چییه‌ 

له‌وه‌تێ‌ گه‌یی كه‌ عه‌یبه‌

 گه‌رمیان ڕۆیشتو نه‌یزانی نادادی چیه‌ 

گه‌رمیان ڕۆیشتو وه‌ك چۆن چركه‌ ساتی یاری

ده‌سته‌كانی خاڵین له‌ به‌رد 

ئێستا له‌ نێو خێزانه‌كه‌ی 

جێگاكه‌ی ئه‌ویش خاڵییه‌ 

ته‌نانه‌ت له‌ پۆله‌كه‌یشیا

كه‌سێ‌ گوێی له‌ ده‌نگی نیه‌ 

گه‌رمیان ڕۆیشتو 

نه‌شیزانی مزاهه‌ره‌ مانی چییه‌

 

 

 

 

 

Previous
Next

Leave a Reply