Skip to Content

325 Views

هیچ سەرکردە و حزبێک فریشتە نیە! … نەوزاد عەلی ئەحمەد

هیچ سەرکردە و حزبێک فریشتە نیە! … نەوزاد عەلی ئەحمەد

Be First!
by November 19, 2016 General, Opinion
image_print

ئەگەر بە گوێرەی لێدوان و گوتار و نووسینی ناو رۆژنامە و تەلەفزیۆنەکان بێت، کوردستان بەسەر هەردوو بلۆکی فریشتە و دڕندە دابەشکراوە، بەڵام ئەگەر بە شێوەیەکی مەیدانی نیگا بۆ ناخ و کردەوەی سەرکردە و حزبەکان هەڵبخەین، خانەی فریشتە جۆرێک خاڵییە شتیک دیارە نیە لە فریشتە بچێت، زۆربەی هەرەزۆریان ئەوەندە دڕندە و رەفتار دڕندەن ئەم نیشتمانە بە گوفەک و ئەم گەلەش بە مێگەل تێدەگەن! دیارە دڕندەکان تێناگەن تەواوی شۆڕش و گۆڕانکارییەکانی دنیا بە خەباتی درێژخایەن و تێکۆشانی کۆنکرێتکراو هاتوونەتە دی، بەڵام بە راپەڕین و جۆش و خرۆشێکی کورتخایەن شتێک نامێنێت بەناوی کورسی و پیرۆزییەکانی دەسەڵات. باشترین نموونە راپەڕینەکانی ١٩٨٢، مانگرتن و خۆپیشاندانەکانی ساڵانی ١٩٨٤ و ١٩٨٥، ئەی خۆ راپەڕینەکانی ساڵی ١٩٩١ مێژووییەکی ئەوەندە دوور نیە زۆر کەس دەیووت بەعس دوو فەیلەقی گەورە و پڕ چەکی لە کوردستان دابەستاوە” فەیلەقی پێنج لە هەولێر، فەیلەقی یەک لە کەرکوک” بەڵام کە کڵپەی جەماوەر تاوی سەند بۆ نموونە تەنیا لە ماوەی دووکاتژمێردا فەیلەقی پێنج بە جۆرێک توایەوە تا ئێوارە ئاسەوارێک نەما بەناوی ئەو فەیلەقە.. دەکرێت بەرامبەر بە هێزی جەماوەر و هێزی حزب، دەیان، بگرە سەدان نموونە ریز بکرێن.
ئەوەی جێگای دۆشدامان و هەڵوەستە بۆ کردنە، تەنیا لەماوەی ١٢ کاتژمێری رابردوودا، ٨ گوتار، بەیاننامە، روونکردنەوە، وەڵام و وەڵامکاری لە لایەن دوو حزبی ئێرە ئاراستەی یەکتر کراون و دەرخواردی جەماوەر دراون!
من بە بەڵگە و داتا هەمووتان بە تاوانبار دەزانم، جارێ پێم بڵێن کامەتان سامان و داهاتی گشتیتان بۆ پێگەی شلوقی حزبەکانتان بەکارنەهیناوە؟ ئەگەر ئازان با یەک حزبی گەورە یاخود حزبێکی تاک نەفەری پێم بڵێت من پاکم! منیش پێی دەڵێم فەرموو ئەمە لیستی دزی و گەندەڵی و دەستی رەشی تۆش، هەر تەنیا وەک نموونە حزبێک هەیە پێش ٢٢ ساڵ لەمەوبەر دامەزراوە، سەری زمان و بنی زمانیان ئێمە حزبێکی دادپەروەر و ریفۆرمخوازین، کە سەیری لیستی وەزیرە خانەنشینکراوەکانی ئەو حزبەم کرد، هیچی کەمتر نەبوو لە لیستی وەزیرانی خانەنشینی پارتی و یەکێتیی، وەزیریان هەیە تەنیا شەش مانگ وەزیر بووە کەچی کاکم مانگانە بە شەش ملیۆن دینار خانەشین کراوە، حزبێک هەیە تەنیا شانازی بە گوندێک دەکات، ناوە، ناوە خۆی تەسلیم بە دەرگای پارتی یان یەکێتیی دەکات، کەچی وەرە سەیری لیستی ئەو پارانە بکەن کە لە داهاتی گشتی وەریانگرتووە! خەڵکیش هەیە تەواوی قیادەکانیان لەسەر داهاتی گشتی خانەنشین کراون و خەڵکیان لەبەر گەندەڵی ناوێرێت بۆ نیشتمان بگەڕێتەوە کەچی دەڵێن ئیمە تازەین! لەگەل هەزاران بەڵگەی هاوبەشی نێوان یەکیتیی و ئەو حزبە تازە بابەتە! نامەوێت تەواوی حزبەکان وەک دەنکی تەزبیح بژمێرم و باس لە گەندەڵییەکانیان بکەم.
بۆئەوەی شەقام هێوربکرێتەوە، تکاتان لێ دەکەم بەیان و بەیانکاریی و گوتاری نابەرپرسانە بەرامبەر بە یەکتر رابگرن، چونکە جارێکی تر ناتوانن رایگشتی چەواشە بکەن، ئەگەر لە ساڵانی رابردوو بە دروشمی بریقەدار خەلکتان چەواشە کردبێت، بەڵام ئەوە دوو ساڵە نەک درووشم فاڵ و سیحر و هەقیقەتەکانیشتان بەتاڵ کراونەتەوە و رووی راستەقینەی دەسەڵاتدارێتی ئێوە کەشف بووە! تکایە داوای لێبووردن لە خەڵک بکەن، ئەگەرنا کە شەقام راپەڕی هیچ شتێک فریاتان ناکەوێت. ئەگەر شەقام جووڵا هیچ کەسێک ناتوانێت بڵێت من فریشتەم و ئەوانی تریش دڕندەن. کە شەقام راپەڕی بەڵگەنامەکانیش بسووتێنن و لەناویان ببەن، وڵات و دراوسێ دۆستەکانتان ئەمجارە وەک جارانه پێشوو پشتیوانی لە جەماوەر دەکەن و بەڵگەکان هەرزان فرۆش دەکەن! تا کار لە کار نەترازاوە داوای لێبووردن لە خەلکی هەژار و کرێکار و بەش مەینەتی کوردستان بکەن. داوای لێبووردن لە خەڵکی خۆتان بکەن باشترە، نەک لە دەرگای داگیرکەرانی کوردستان بدەن.

نەوزاد عەلی ئەحمەد
هەولێر
2016-11-18

Previous
Next

Leave a Reply