Skip to Content

Friday, March 29th, 2024
مه‌له‌كردن له‌نێو گۆمی ئایدیۆلۆژیادا ……..

مه‌له‌كردن له‌نێو گۆمی ئایدیۆلۆژیادا ……..

Closed
by August 9, 2010 گشتی

مه‌له‌كردن له‌نێو گۆمی ئایدیۆلۆژیادا
مرۆڤ تووشی شیزۆفرینیا ده‌كات  
  نه‌جات ئه‌سپینداره‌یی

 

( پیه‌ر ژوزف پرودون ) كه‌ به‌رله‌ماركس پێشه‌نگی سۆشیالیزم بوو نامه‌یه‌ك بۆ ماركس ده‌نووسێت و تیایدا ده‌ڵێ ( ئێمه‌ ئه‌گه‌ر به‌ته‌مابین كارێكی باش ئه‌نجام بده‌ین و ئاینده‌یه‌كی گه‌ش ڕه‌چاو بكه‌ین ده‌بێ خۆمان له‌بیر بكه‌ین و خه‌ڵكمان له‌بیربێ , ته‌نیا بۆ خزمه‌تكردنی خه‌ڵك بجولێینه‌وه‌و به‌سه‌ریاندا نه‌بین به‌ پیاوی موقه‌دده‌س . ئامۆژگارییه‌كه‌ی من و تۆ نه‌بێته‌ ئایینێكی تازه‌و خه‌ڵك په‌یڕه‌وی لێ بكات . زۆر ده‌ترسم ئه‌م بیره‌ی تۆ له‌دوارۆژدا ببێته‌ مه‌زهه‌بێك و ئه‌وسا ئایدۆلۆژیا په‌رستی و تۆ په‌رستی جێگای خوا په‌رستی بگرێته‌وه‌ ) قسه‌كه‌ی پرودون ئه‌مڕۆكه‌ ده‌قاو ده‌ق هه‌مووی هاتۆته‌دی , ئێستا بیروباوه‌ڕو ئایدۆلۆژیای حیزب جێگای هه‌موو فه‌لسه‌فه‌و ئایدیاو مه‌عریفه‌یه‌كی گرتۆته‌وه‌و وه‌كو ئایین ده‌په‌رسترێ , له‌م سه‌رده‌مه‌دا كه‌ چه‌رخی گلۆبالیزم و پێشكه‌وتنی ته‌كنۆلۆژیاو لیبرالیزم و یه‌كسانی و دادگه‌رییه‌ كه‌چی له‌ وڵاتی ئێمه‌و هه‌ندێ وڵاتی ده‌ورو به‌رماندا خه‌ڵك بۆته‌ كۆیله‌ی حیزب و كۆیله‌ی سه‌ركرده‌و به‌ ئایدۆلۆژیا وه‌ها به‌نج كراون ته‌نانه‌ت مرۆڤبوونی خۆشیان له‌بیر چۆته‌وه‌ , جاران له‌نێو فه‌رهه‌نگ و ئه‌ده‌بیاتی ئیسلامدا كه‌ باسی تاك په‌رستی و یه‌كتاپه‌رستی ده‌كرا ده‌مانزانی مه‌به‌ست ( ته‌وحید )ه‌ , به‌ڵام ئێستا تاك په‌رستی بۆته‌ جۆرێك له‌جۆره‌كانی حیزب په‌رستی و سه‌ركرده‌ په‌رستی و ئایدۆلۆژیای حیزب بۆته‌ ئایینی زۆرینه‌ی خه‌ڵك , له‌سه‌ده‌ی ڕابردوودا چه‌ندین مه‌زهه‌ب به‌ناوی سه‌ركرده‌كانیانه‌وه‌ چووبوونه‌ قالبێكی تاك په‌رستی یه‌وه‌ , وه‌كو ماركسیزم . لینینیزم . تیته‌ویزم . كاسترونیزم . سه‌ددامیزم . كه‌ ئه‌وانه‌ له‌ڕووی پڕه‌نسیپ و فیكره‌وه‌ كاریگه‌رییان له‌سه‌ر زۆربه‌ی گه‌لانی جیهان و ناوچه‌كه‌ هه‌بوو , به‌ڵام نه‌یانتوانی گرێ كوێره‌ سیاسی و ئابورییه‌كانی جیهان بكه‌نه‌وه‌و چاره‌سه‌رێكی بنه‌ڕه‌تی بۆ بدۆزنه‌وه‌ , كه‌چی ته‌ماشا ده‌كه‌ی ئێستا مه‌زهه‌بی بچوكترو حیزبی بچوكترو سه‌ركرده‌ی بچوكترو ئایدۆلۆژیای ساده‌تر بوونه‌ته‌ موقه‌دده‌س و خه‌ڵكی سته‌مدیده‌ ده‌یانپه‌رستێ , ده‌یان مه‌زهه‌بی شیعه‌ هه‌ن مه‌ڕجه‌عه‌كانیان ده‌په‌رسترێ , ده‌یان حیزبی گلۆبالی و لۆكالی هه‌ن ئایدۆلۆژیاكه‌و سه‌ركرده‌كانیان ده‌په‌رسترێن , به‌ڵام ئه‌م مه‌زهه‌ب و حیزبانه‌ بۆیه‌ ناتوانن ئازادی بۆ به‌ره‌ی مرۆڤ به‌دی بێنن چونكه‌ ئایدۆلۆژیایه‌كی سه‌قه‌ت ده‌یانجولێنێ , بێگومان له‌هه‌ر كۆمه‌ڵگایه‌كیشدا كه‌ ئایدۆلۆژیا ببێته‌ زه‌مینه‌ی گه‌شه‌كردن و پێگه‌یاندنی مرۆڤه‌كان ئه‌و كۆمه‌ڵگایه‌ به‌هه‌موو تاكه‌كانییه‌وه‌ له‌ ڕێڕه‌وی خۆیدا كه‌متر ته‌ماشای پێشه‌وه‌ ده‌كات و زیاتر ئاوڕ له‌ دواوه‌ ده‌داته‌وه‌ , ئێستا مرۆڤایه‌تی به‌قۆناغێكدا تێده‌په‌ڕێ كه‌ وه‌ك سه‌ده‌كانی ڕابردوو هه‌ندێ وڵات هه‌یه‌ پڕه‌ له‌سیاسه‌تی به‌كۆیله‌كردن . پڕه‌ له‌سیاسه‌تی حیزب په‌رستی پڕه‌ له‌سیاسه‌تی چه‌وساندنه‌وه‌ . پڕه‌ له‌ مه‌ڕجه‌عی موقه‌دده‌س . پڕه‌ له‌سه‌ركرده‌ی موقه‌دده‌س . باجی ئه‌وهه‌موو موقه‌دده‌سانه‌ش ته‌نها چینی هه‌ژارو ره‌ش و ڕووت ده‌یدات , له‌ وڵاتی ئێمه‌و ده‌ورو به‌رماندا خه‌ڵكی سته‌مدیده‌ هێشتا له‌نێو قه‌فه‌س دایه‌و هه‌وای ئازادییان هه‌ڵنه‌مژیوه‌و هه‌میشه‌ له‌ گه‌ڕاندان به‌دوای ئازادیدا , ئازادیش ئه‌سپێكی سه‌ركه‌شه‌ یاخود ته‌یرێكی به‌رزه‌فڕه‌و به‌ هه‌مووكه‌س ده‌سته‌مۆ نابێ , ئێمه‌ نامانه‌وێ له‌ ده‌ره‌وه‌ی خۆمان به‌دوای ئازادیدا بگه‌ڕێین به‌ڵكو ده‌مانه‌وێ له‌ناخی خۆماندا ئازادی به‌رهه‌م بێنین , گه‌ڕان به‌دوای ئازادی له‌ ده‌ره‌وه‌ی خۆماندا ئازادییه‌كمان بۆ ده‌سته‌به‌ر ده‌كات كه‌ وه‌ك ڕۆژی زستانان ساتێك له‌ده‌ره‌وه‌یه‌و دوو سات له‌ژێر هه‌ور دایه‌ , بێگومان ئه‌وانه‌ی له‌نێو حیزبه‌كانیشدا ئه‌ندامی كاران و شتیان به‌ده‌سته‌ ئه‌وانیش هه‌ر كۆیله‌ن به‌ڵام به‌خۆیان نازانن كه‌ كه‌وتوونه‌ته‌ نێو ده‌می ئه‌ژدیهاو قووت دراون , خه‌ڵكی سته‌مدیده‌ ئه‌گه‌ر له‌هه‌ندێ ئه‌رك و مافیش مه‌حروم بێت به‌ڵام وه‌ك ئایدۆلۆژیسته‌كانی حیزب پابه‌ند نین به‌ڵكو له‌ بیركردنه‌وه‌و هه‌ڵوێست وه‌رگرتن و هه‌ڵس و كه‌وتی رۆژانه‌دا ئازادن , له‌ وڵاتانی رۆژئاوادا بیروباوه‌ڕو میتۆدی حیزبی بۆ گه‌شه‌ی ده‌روونه‌ بۆیه‌ هاوڵاتی هه‌میشه‌ به‌رچاوی ڕوونه‌ , به‌ڵام له‌ وڵاتی ئێمه‌دا به‌هۆی سیاسه‌ته‌كانی حیزبه‌وه‌ هاوڵاتی هه‌میشه‌ به‌رچاوی لێڵه‌ ده‌ڵێی سه‌رگه‌ردانێكه‌و ڕووی له‌بیابانی وێڵه‌ , له‌ وڵاتی ئێمه‌دا  به‌حیزبی بوونی خه‌ڵك و ڕوو كردنه‌ حیزب به‌و زۆرو بۆرییه‌ به‌هۆی نائارامی باری ئابوری خه‌ڵكه‌وه‌یه‌ , چونكه‌ زۆربه‌ی خه‌ڵكی ئه‌م وڵاته‌ ئایدۆلۆژیا جه‌زبی نه‌كردوون بۆناو حیزب , به‌ڵكو ده‌سكه‌وتی ماددی په‌لكێشی كردوون و دواتریش به‌ ئه‌فیونی حیزب به‌نج كراون , له‌ وڵاته‌پێشكه‌وتووه‌كاندا حیزبایه‌تی به‌وشێوه‌یه‌ نیه‌ وه‌كو له‌ وڵاته‌ میللیتارییه‌كانی لای خۆمان هه‌یه‌ , له‌ كۆمه‌ڵگا پێشكه‌وتووه‌كاندا ته‌نها نوخبه‌یه‌كی زیره‌ك و كارا حیزب به‌ڕێوه‌ ده‌به‌ن و خه‌ڵكی تر هه‌مووی سه‌رقاڵی كارو پیشه‌و داهێنان و به‌رهه‌مهێنانه‌ , به‌ڵام كه‌ سه‌روبه‌ندی هه‌ڵبژاردن داهات حیزبه‌كان هه‌ڵده‌ستن پرۆژه‌و به‌رنامه‌ی سیاسی خۆیان له‌ شه‌قام و شوێنه‌ گشتییه‌كان هه‌ڵده‌واسن بۆئه‌وه‌ی هاوڵاتی بزانێ پرۆژه‌و به‌رنامه‌ی كامیان زیاتر له‌خزمه‌تی هاوڵاتی دایه‌ , خه‌ڵك ده‌چێ پرۆژه‌و به‌رنامه‌ی هه‌موو حیزبه‌كان به‌ دیقه‌ت ده‌خوێنێته‌وه‌ كامه‌یان پێ باش بوو ده‌نگ بۆ ئه‌و ده‌ده‌ن و كه‌سیش نازانێ كێ ده‌نگی بۆ كێ داوه‌ , به‌ڵام كۆمه‌ڵگای ئێمه‌ ده‌ڵێی جه‌یشی هیتله‌ره‌ سه‌رله‌به‌ری  هه‌مووی حیزبییه‌ , خێزان هه‌یه‌ وه‌كو به‌ره‌ی كوردستانی له‌هه‌موو حیزبه‌كانی تێدا هه‌یه‌ , بۆیه‌ له‌م كۆمه‌ڵگایه‌دا رۆژ دوای رۆژ توانای به‌رهه‌مهێنان و داهێنان لاوازتر ده‌بێ چونكه‌ خه‌ڵكه‌كه‌ له‌ بیری عیرفان دا نیه‌ به‌ڵكو له‌ بیری گیرفان دایه‌ , سیاسه‌تمه‌دارو حیزبییه‌كانی ئه‌م وڵاته‌ له‌سه‌ر بنچینه‌یه‌كی ماددی تێڕوانینه‌كانی خۆیان بونیادناوه‌ , بۆیه‌ ناتوانن كه‌سی مه‌عریفی دروست بكه‌ن , بۆیه‌ ناتوانن تاكی سیاسی دروست بكه‌ن كه‌ له‌پرسه‌ نه‌ته‌وه‌یی و نیشتمانییه‌كاندا چالاكانه‌و هۆشیارانه‌ كاربكه‌ن , بۆیه‌ ناتوانن سیسته‌مێكی سیاسی یاخود ده‌ستورێكی ئه‌وتۆ دابڕێژن كه‌ ببێته‌ بنچینه‌و میتۆدێك بۆ حكومه‌ته‌ یه‌ك له‌دوای یه‌كه‌كان كه‌ كاروباری وڵاتی پێ هه‌ڵسوڕێنن , له‌ كۆمه‌ڵگا ئه‌وروپی و خۆرئاواییه‌كاندا خه‌بات و هه‌وڵ و تێكۆشانی حیزب بۆ به‌هێزكردن و پته‌وكردنی بونیادی كۆمه‌ڵایه‌تییه‌ , بۆ دابینكردنی ژیانێكی ئاسوده‌و پڕ له‌كامه‌رانییه‌ بۆ تاكه‌كانی كۆمه‌ڵگا , بۆ پاراستنی ئاسایشی نه‌ته‌وه‌یی و سه‌روه‌ری نیشتمانه‌ , به‌ڵام له‌كۆمه‌ڵگای ئێمه‌دا خه‌باتی حیزب بۆ به‌هێزكردن و پته‌وكردنی بونیادی حیزب و به‌هێزكردنی پێگه‌ی سه‌ركرده‌كانییه‌تی , هۆیه‌كه‌شی ئه‌وه‌یه‌ كه‌ بونیادی عه‌قڵی سیاسی كورد بونیادێكی عه‌شائیری و میللیتارییه‌ , بۆیه‌ زیاتر به‌لای به‌رژه‌وه‌ندی حیزبدا ده‌شكێته‌وه‌ نه‌ك به‌لای به‌رژه‌وه‌ندی نه‌ته‌وه‌یی و نیشتمانی ,    

Previous
Next
This site is registered on wpml.org as a development site.