Skip to Content

115 Views

حیزب و گوتاری فاشیەت نیگایەك لەسەر تایپەكانی تیرۆر… نەبەز گۆران

حیزب و گوتاری فاشیەت نیگایەك لەسەر تایپەكانی تیرۆر… نەبەز گۆران

Be First!
by November 29, 2016 General, Opinion
image_print

(1)

لێرەدا فاشییەت ناوێك نییە لە سیاقی مێژووێكی دیاریكراودا ئاماژەی پێبدەین، بەڵكو ئاماژەیە بۆ گوتارێك لەهەر چركەساتێك لە چركەساتەكاندا، لەشوێن و لە زەمەنێكی دیكەدا بەسیمای جیاجیاوە دەردەكەوێت. ئەم گوتارە یەكێكە لە مەترسیدارترین گوتارەكانی سەدەی بیست و سەدەی بیست و یەك. بەرهەم هێنی ئەم گوتارەش كاپیتالیزم و، ڕەگوریشە ئایدۆلۆژییەكانە. مەترسی ئەم گوتارە لەویادا كۆنابێتەوە خۆی دەردەبڕێت، بە پێچەوانەوە لەپێش خۆدەرخستەكەیەوە مەترسییەكانی دەردەكەون. لەهەناوی بەر لەهاتنیدا دیوێكی جەهەنەمی خۆی مەڵاس داوە، كە هەرگیز دەركی پێناكەیت تا گوتارەكە دێتە ئاراوە. سیماكانی ئەوانەی لەژێر لەچكی ئەم گوتارەدا خۆیان داپۆشییوە، دەیانجۆر سیمایە. هەریەك لەم سیمایانە ناونیشانێك و شوێنێك و پانتاییەكی بۆخۆی داگیر كردوە. بۆیە مەترسییەكەش لە پێش خۆدەرخستنیدا دەبینینەوە، چونكە كاتی دەرخستنی برێكجار زۆر روكەشانەیە، بەڵام كاتی دەرنەخستنی جوڵە شوێنی روكەش دەگرێتەوە.
سیستەمەكانی ئەم ناوچەیە سیتەمگەلێكن خاڵی نین لەم گوتارە، لەناو سیستەمی دەسەڵاتی ئێمەشدا زۆر بەروونی رۆژانە دەرگیری ئەم فەزاییە دەبین. بەڵام یەكێك لە كێشە گەورەكانی ئەم سیستەمی دەسەڵاتەی ئێمە فرەسیما بوونییەتی. فرەسیمایی تەنها بۆ ئەوانە كێشە نییە دەیانەوێت دیوەراستەقینەكە بدۆزنەوە، بۆئەوانەش كێشەیە كە خۆیان لەناو ئاوێنەكەدان. ئەشێت لەدەرەوەی ئاوێنەكە بینەرەكان بەوردبوونەوەیەك فرەسیماییەكە ببینن، لێ‌ بوونی ئەوانەی لەناوەوەن نەخۆیان دەبینن، نە كۆی سیماكانیان لێوە دیارە. كاتێكیش سیستەمێكی فرە سیما دێتە بەرامبەرت ناچاردەبیت بەپێی كات و بەپێی دەركەوتنی یەكێك لە سیماكانی خوێندنەوەی بۆبكەیت و ناتوانی لەسەر یەك جۆر بوەستی و پێویستت بە كاتی دەركەوتنەكەیەتی بە چ جۆرێك دەركەوتوە بەو جۆرە خوێندنەوەی بۆ بكەیت. ئەگەرچی رەگوریشە رۆژهەڵاتییەكە خۆی لەسەر پایەی ستەمكاریی رۆژهەڵاتی راگرتووە، لێ‌ لەپشت ئەو پایەیەوە كۆمەڵێك سیمای دیكە دێنە پێش و بە سود وەرگرتن لەو سیمایانە ڕەگوریشە ستەمكارییەكەی خۆی بەهێز دەكات. ئاشناترین سیمای دەسەڵات لە ئێستادا بەرزراگرتنی گوتاری فاشییەت و برەودانە بە جۆرەكانی تیرۆر.
بۆ ئاشنابوون لەیەكێك لەم سمایانە، لە ئێستادا تەنها لەسەر گوتارێك دەوەستین، ئەویش گوتاری ئەویتر سڕینەوە، ئەویتر تۆمەتباركردن، ئەویتر تیرۆركردن. یانی گوتاری (تایپەكانی تیرۆر،لەناو فاشییەتدا.)
ئەم گوتاری تیرۆرە بە جوڵەكانیشیەوە تەواوی ریشەكانی لەناو فاشییەت و تۆتالیتاریزمدایە. لەهەردوو سیماكەدا بە شێوەی جیاواز و ڕەنگی جیاوازەوە خۆی نما دەكات، بەڵام لەهەر خۆنماكردنێك دەبێتە دینەمۆیەك بۆ فاشییەت و تۆتالیتاریزم. حیزبی كوردیی بە راست و چەپەوە، بە ئیسلامی و عیلمانییەوە، خاوەن ئایدۆلۆژییایەكن گوتارەكەیان پانتاییەكی زۆری لەناو فاشییەت و تۆتالیتاریزمدایە. حیزبێك نادۆزیتەوە دینەمۆیەك نەبێت بۆ گەشەدان بەم گوتارە. لەپاڵ ئەواندا چ میدیای ئاراستەكراوی حیزبی، چی میدیای دەرەوەی حیزبی بوونەتە بەرهەم هێنی هەمان گوتار. دونیاكەیان بە جۆرێك بەرەنگی ئەوگوتارە ڕەنگ كردووە قۆرسە بۆ كەسی ناوەوەی ئاوێنەكە بتوانێت بە سانایی ڕەنگی دیكە بدۆزێتەوە. بەبێ‌ ئاگا و بەئاگاییەوە لەژێر چەتری دیموكراسی، ناسیونالیزم، مۆدێرنە، خەریكی برەودانن بەو گوتارە، بەر لەهەموویان دەستەی سەرەوەی حیزبەكان. ئەگەر تەنها وەك هەڵوەستەیەك لەسەر یەك وتاری یەكێك لە دەستەی سەرەوەی حیزبەكان بوەستین، ئەتوانین بە ئارگۆمێنت درەیخەین كە ئەم وتارە، جەوهەرەكەی هەمان گوتاری فاشییەتە و خزمەتە بە ئایدۆلۆژیا قوڵەكەی تۆتالیتاریزم و دەیەوێت لەرێگەی وتارەوە كە پیشەی هەمیشەیی حیزبە، جۆرەكانی تیرۆر بەزیندویی بهێڵێتەوە.

بەر لە هەموو شت،تیرۆر یەكێكە لەو جوڵانەی لە ناوەراستی سەدەی بیست و ئێستای سەدەی بیست و یەكەوە، هەمیشە خۆی دووبارە دەكاتەوە. لەو چركەساتەی حیزبی كوردی رووبەرووی ئەویتری دوژمن دەبێتەوە، لەو چركەساتەوە ئەم گوتارە لەدایك دەبێت و تائێستاش خۆی نوێ‌ دەكاتەوە. تیرۆر تەنها لە چوارچێوەی تیرۆركردنی كەسایەتی ئەویتری دوژمنا خۆی نەبینیەوە، بووە یەكێك لە چەكە بەهێزەكانی حیزبی كوردی و، هەمیشە بەرامبەر ئەویتر، ئیدی ئەو ئەویترە لەناو خودی حیزب بێت یان لە چوارچێوەی دەوری حیزب بەكار هاتووە. شەڕەكانی حیزبە كوردییەكان پڕە لە باڵادەستی ئەم تایپی تیرۆرە. منداڵەكانی حیزب لەسەر ئەوە گۆشكراون، ئەوەی لەگەڵ ئێمە نەبێت كەوایە دوژمنی ئێمەیە. هەمان میتۆد كە فاشییەت و تۆتالیتاریزم خۆی لەسەر بونیاد دەنێت، حیزبی كوردیش خۆی لەسەر بونیاد دەنێت. ناوەراستی سەدەی بیست سەرەتایەكە بۆ دەركەوتنی ئەم گوتارە. كاتی جیابوونەوە و ناكۆكییە ناوخۆییەكانی حیزب چەكە بەهێزەكەی هەردوولا دەبێتە ئەم گوتارە. سەرەتا هەوڵی یەكتر وێرانكردن و پاشان تیرۆركردنی كەسایەتی یەكتر و پاش ئەوەش تیرۆركردنی جەستەیی دەست پێدەكات.

وێستگەیەك نادۆزیتەوە ناكۆكی حیزبی و ناكۆكی ناوخۆیی بوونی هەبێت و ئەم گوتارە دەستی بەسەردا نەكێشابێت. خەمباری لەوەداییە هەریەك لەخاوەنانی ئەم گوتارە ئەویتری پێ‌ تۆمەتبار دەكات لەكاتێكدا هەردوولا خاوەنین. لەشەڕە ناوخۆییەكاندا پانتاییەك نامێنێتەوە بۆ دەركەوتنی بۆچوونێكی جیاواز لە م گوتارە. پاش شەڕەكانیش ئەم گوتارە كاڵ نابێتەوە و هەڵدەگیرێت بۆ كاتی خۆی. هەڵگرتنەكەی بۆ پڕكردنی منداڵەكانی حیزبە.
ئەو پڕكردنەی بەردەوام منداڵانی حیزب لەسەر ئەوە پەروەردە دەكرێن رقێك لەناخیاندا بچێنرێت و رقەكە گەورەببێت تا دەگاتە ئەو ئاستەی بكەونە ژێر هەیمەنەی گوتارەكە. لەكاتی وەلاوەنانی گوتارەكە پەروەردەیەك ئامادەیی هەیە خەریكی كۆكردنەوەی زەخیرەیە بۆئەوەی هەركاتێك پێویستیكرد زەخیرەكە بە هەمان كەرەستەوە بەهێزێكی دیكە و سیمایی دیكەوە بێتەوە ناوەوە. هەندێكجار دەستدرێژی ئەم خاوەن ناخە بیمارانە ئەگاتە هەمووشوێنێك و تەنانەت ئەوانەش بەم گوتارە تۆمەتباردەكەن كە بە دیدێكی رەخنەییەوە تەماشای سیستەمەكە دەكەن. ئەوانەی لە چوارچێوەی رەخنە سەیری سیستەم دەكەن، بێگومان بەشێكیان زۆر هوشیارن و لەوە تێدەگەن نەكەونە ژێر هەیمەنەی ئەم گوتارەوە، لێ‌ منداڵانی حیزب لە ناهوشیارییان و لە خنكانیان لەناو گۆماوەكەدا بۆ شاردنەوەی گەمژەیی خۆیان لەو دۆزەخەدا، ناچارن پەنجە بۆ رەخنەگرەكانیش درێژ بكەن، ئەگەرچی زۆرێك لەو رەخنەگرانە بێ‌ هیچ وەستانێك دورن لەم گوتارەوە و، لە جیهانێكی جیاوەزەوە سەیری سیستەم دەكەن كە هیچ كات منداڵە پەروەردە كراوەكانی حیزب ناتوانن لەو جیهانەوە بۆ دونیای نوێ‌ بڕوانن. بۆ داپۆشینی ئەو نەتوانیینەیان لەناو هەژمونی گوتارە فاشییەكەدا سەرقاڵی هێنانی هەموو دەنگەكانن بۆ لای خۆیان و بەم كردەیان لەبری پشتكردن لە فاشییەت جارێكی دیكە دەبنەوە خزمەتچی فاشییەت!

(2)

-تیرۆر و رەگو ریشەكانی لەناو حیزبدا

حیزبی كوردی لێك ئاڵانێكی تەواوەتی لەتەك تیرۆردا هەیە. تیرۆر بەشێكە لە مێژووی حیزبی كوردی. ئیدی ئەو تیرۆرە تیرۆری فیكری بێت، یان كەسایەتی، یان هەركام لە تاپیەكانی تیرۆر. حیزب نییە لەناو ئەدەبیاتیدا بەشێكی تەرخان نەكردبێت بۆ تیرۆر. چركەساتی دروستبوونی حیزبی كوردی، لەگەڵیشیدا چركەساتی دروستبوونی تیرۆری ئەوانی تری دەرەوەی خۆیەتی. گەر نمونە ئەم چەنجا ساڵەی رابردووی حیزبی كوردی بكەینە وێستگەیەك بۆ وەستان. ئەتوانین بێ‌ ماندوو بوون دەیان نمونە و دەیان وێستگە دەست نیشانبكەین كە حیزب چۆن تیرۆریكردووە بە بنەمایەكی پیشەیی خۆی.
هەڵبەتە دوای ساڵانی شەستەكان ئەو دیدەی حیزب هەیبوو بۆ تیرۆر گۆرانكارییەكی ریشەیی بەسەردا دێت. ئیتر حیزب تەنها یەك دوژمنی بێگانەی نییە، دوژمنێكی ناوخۆیی هەیە، بۆیە دەبێت دیدی بۆ تیرۆر بگوازێتەوە بۆ ناوخۆ. سەرەتا تیرۆركردنەكە لە تیرۆری كەسایەتی بۆچوونە جیاوازەكانەوە دەست پێدەكات و پاشان دەگاتە سەر خێڵەكان و پاشان دەگاتە ئاستی مەترسیدار كە كۆمەڵكوژی خێڵەكەی و حیزبی تێیدا روودەدات.(ئێرە شوێنی لێكۆڵینەوەی تەواو نییە بۆ ئاشنابوون بەو كردانەی ئەنجامدراون، ئەشێت لەشوێنێكی دیكە لەسەری بوەستین.)
ساڵی شەستەكانی رابردوو ساڵای دروستبوونی كۆی نەخۆشییە گەورەكانی حیزب و كۆمەڵگەیە. ساڵی سەرهەڵدانی چەمكە مەترسیدارەكانە. ساڵی دروستكردنی كۆمەڵگەیەكە لەسەر بنەمای ئایدۆلۆژیا و بە ئایدۆلۆژیاكردنی خێڵ. ساڵی دەست پێكردنی رەش و سپی، دۆست و دوژمنی ناوخۆ، من و تۆ، ئێمە و ئەوانە، ساڵی یەكلایكردنەوەی ئەو بیمارییانەیە كۆمەڵگە لە هەناویدا هەڵیگرتووە و دێت لە رێگەی حیزبەوە ئەو بیمارییە بەشێوەی سیمای جۆراوجۆر، هەم فاشیانە، هەم ستەمكارانە، هەم تۆتالیترییانە تەحقیقی دەكات. ئەگەر شوێنێك هەبێت بۆئەوەی لەوێوە دەست پێبكەین بۆ شەنكردنی تەوای بیمارییەكانی حیزب، ئەو شوێنە ساڵی شەستەكانە. ئەو ساڵانەیە حیزب خۆی دەكات بە تارماییەك و دەچێتە ناو ژیانی كۆمەڵگەوە و دەیەوێت لە هەموو شتێكی تاك و كۆ ئاگاداربێت. لەو ساتەوەی بۆچونی جیاواز لەناو حیزبدا سەر هەڵدەدات لەگەڵ سەرهەڵدانی بۆچونی جیاوازدا تیرۆر سەر هەڵدەدات.

ناكرێت بەبێ‌ گەرانەوە بۆ ئەو ساتە مێژووییە ترسناكانە باس لە ئێستا بكەین. ئەوەی ئێستا دەیبینین بەرهەم و پێگەیاندنی ئەو چركە ساتانەی رابردووە. ئەو چركە ساتانەی كە لەشەستەكاندا پایەكانی داكوتان و ئەمرۆ بە ناوی دیكە و لە سەردەمێكی دیكەدا خۆی دەردەخاتەوە. رەگوریشەكانی تیرۆر بە تایپەجیاكانییەوە لەناو ساڵانی شەستەكانی حیزبی كوردیدایە خۆی پێگەیاندوە. سەرەتای جیابوونەوەكانی بەشەكانی حیزب، سەرەتای دەستپێكردنی دۆزەخەكەیە. دۆزەخێك كە لەگەڵ خۆیدا كۆمەڵێك چەمكی هێنا ئەم چەمكانە بوونە نەخۆشییەك و چوونە ناو گیانی كۆمەڵگەوە و گەشەیانكرد. (خوێنەری بەرێز: ئەو مۆدێلە فاشییەی بەعسیش بەشێكی گەورەیە لەوەی نەیهێشت ئەو چەمكانە بمرن كە حیزب لە ساڵانی شەستەكانەوە هێنابوونیە ناو كۆمەڵگە، ئێرە شوێنی باسكردنی كاریگەرییەكانی بەعس نییە لەسەر كۆمەڵگە، تەنها باسكردنی كاریگەرییەكانی حیزبی كوردیی و بەرهەمە دۆزەخیەكەیەتی كە ئەمڕۆ دەیبینین.)

سەرەتا تیرۆرەكە بە تیرۆری وشەی یەكتر بەدوژمن زانین. یەكتر بە خائین زانین، یەكتر بە دژە كورد زانین، یەكتر بە خراپ زانین، دەست پێدەكات. گەر تەماشاییەكی بڵاوكراوەكان و دیداری كەسە باڵادەستەكانی ئەوكاتی حیزب بكەین، تێدەگەین روانینیان بۆیەكتر چەند فاشیانەیە. چۆن كار لەسەر نەوەكان دەكەن جەوهەریان پركەن لە پەروەردەی تیرۆری یەكتری و كەسایەتی یەكتری داماڵن تا ئەو ئاستەی دەست ببەن بۆ هەموو تۆمەتێك بۆ تیرۆركردنی كەسایەتی. تیرۆری كەسایەتی تەنها بەشێك نەبووە لە راگەیاندی حیزب، بەشێك بووە لە تێگەیشتنی سەركردە حیزبیبەكان و لە زۆر شوێندا خۆیان بەزمانی خۆیان كەسایەتی بەرامبەر تیرۆر دەكەن. لە هەندێك شوێندا تیرۆرەكە باڵدەكێشیت بۆ تیرۆری فیكری و یەك ناوچە بە گوتاری تیرۆری فیكریی دنە دەدرێت و دادەپۆشرێت.
تیرۆرە فیكرییەكە هێندە باڵادەستی پەیدادەكات لەناو هونەری گۆرانی وتن و، لەناو ئەدەبدا رەنگ دەداتەوە و، ئەو كۆمەڵە شاعیرە مشەخۆرەی لەدەوری خوانی حیزب كۆبوونەتەوە، لەژێر هەیمەنەی ئەو گوتارە فاشییەدا شیعر دەهۆننەوە بۆ تیرۆركردنی بەرامبەرەكەیان. شیعر دەهۆننەوە بۆ ستایشكردنی خۆیان و سرینەوەی بەرامبەرەكەیان. كێشەكەش لەوەدایە بەرامبەرێكی بێگانە لەئارادانییە، ئەوەی هەیە لەسەر بنەمای جیاوازی تێگەیشتن دروستبووە و جیاوازییە تێگەیەشتنەكە پەرتەوازیی لێدەكەوێتەوە و بەرەو فاشییەت هەنگاو دەنێت.

گەمژەییە تیرۆر جیابكەینەوە لە ئایدۆلۆژیایی حیزبی، ئایدۆلۆژیای حیزبی لە فەزایی كوردیدا هەمیشە تیرۆری بە تایپیە جیاوازەكانەوە بەرهەم هێناوە. ئەو مەترسیانەی لە ساڵانی شەستەكانەوە دەست پێدەكان چ لەناو حیزب و چ لەناو كۆمەڵگەدا رەگی خۆیان دادەكوتن و، لە سەردەمە جیاوازەكاندا جارێكی دیكە بەریان دەكەوینەوە. حیزبی كوردیی هەمیشە دوو دیوی هەیە، دیوێكی فریودەرانە كە لەپێشەوەیە و خۆی نمایشدەكات و زەردەخەنەی پێوەیە، دیوێكی جەهەمەنمی كە لەپشتەوەیە و لە ساتە ترسناكەكاندا دەیبینی و ژیان وێران دەكات. حزبێك نییە بەدەربێت لەم دوو دیووە.
كۆی ئەو حیزبانەش لەم دواییەوە دروست بوون لە هەمان چوارچێوەدا خۆیان رەسم دەكەن. گەرچی هەندێكیان هەر سەرقاڵی گوتارە روكەش گەراییەكەی فاشیەتن، ئەما لەبنەمادا ئەم گوتارە بیركردنەوەیەكە و بوونی هەیە. لێ‌، دوو حیزبە سەرەكییەكەی باشوور، دوو حیزبن بە ئاسانی دەتوانیت بنەما فاشییەكانیان تێدا بدۆزیتەوە و لەسەریان بوەستی و تێبگەیت لە بنەوانی ئایدۆلۆژیاكەیان.

تیرۆری جەستەیی لەناو حیزب و دەرەوەی حیزب ساڵی شەستەكان دەست پێدەكات. لەگەڵیشیدا تیرۆری فیكری و، تیرۆری كەسایەتی دەست پێدەكات. لەوێوە دێت تا دەگاتە ئەمرۆی قسەكردنی ئێمە. هەموو ئەو كارەكتەرانەی دەبنە قوربانی ئەم تیرۆرانە بریتین لەوانەی لە هێڵی بیركردنەوەی حیزبێك لایانداوە و بەشوێن دونیایەكی نوێدا گەڕاون.
هەندێك چركەسات حیزب بە ئایدۆلۆژیاكەی خۆیەوە دەگاتە ئاستێك بێباكانە هەوڵی سڕینەوەی مرۆڤێكی داوە تەنها لەبەر ئەوەی بۆچونێكی تایبەتی خۆی هەبووە. تایبەتی بوون لەو فەزا ئایدۆلۆژییەدا یەكێكە لەترسە گەورەكانی حیزب.(هەرچۆن تۆتالیتاریزم تایبەتی بوون دەكوژێت و هەمووی دەخاتە چوار چێوەی جەماوەری بوون،حیزبی كوردیش لەسەرەتاوە لەسەر هەمان میتۆد برەوی بەخۆی داوە.) تەنانەت حیزب لە خودی بیركردنەوەش دەترسێت و، كەم نین ئەو قوربانیانەی لەبەر بیركردنەوە كەوتوونەتە ژێر تەوژمی تیرۆرەوە. دیارە كە گەمژەییە مرۆڤ بروا بەو دونیا روكەشە بكات حیزب لەرێگەی وتارە فیڵاوییەكانیەوە دەیدات بەرووی جەماوەرەكەیدا، ڤەلێ چونكە كۆمەڵگەی كوردی، كۆمەڵگەیەكە یادەوەری لاوازە و، زیاتر كۆمەڵگەیەكی (غەریزە)ییە، نایەوێت جەوهەری شتەكان ببینێت و شەیدای روكەشە. خۆ گەر ئەم كۆمەڵگەیە كەمێك وردتر بیری لەتەواوی ئەو مێژووە بكردایەتەوە حیزب دروستیدەكات، بێگومان فەزای ئێستای سیستەمی دەسەڵات بەم جۆرە نەدەبوو كە هەیە. كاتێك كە حیزب خۆی هەڵهاتووبووە بە شاخەكانەوە هەوڵی سڕینەوەی نەیارەكان و جیاوازییەكانی داوە، دەبێت كاتێك ببێتە دەسەڵات چی رووبدات؟ جێگای سەرسوڕمان نییە ببینین زنجیرەی تیرۆرەكان بەردەوام دەبێت و، تیرۆركرداو دیاربێت و تیرۆركەر نادیار. جێگای سەرسورمانیش نییە هەمیشە بۆ داپۆشینی كردەكە، سیناریۆییەكی بێمانا بێتە ئاراوە. ئەمە بەشێكە لە سروشت و پەروەردەی حیزبی.

گەر بەنمونە ئاخر كردەی تیرۆر وەربگرین. ئەم كردەیە جیاوازییەكی لەگەڵ سەرتاپای كردەكانی تردا نییە. دەكرێت چاوەرێی ئەوەش بكرێت سیناریۆییەك بێتە ئاراوە بۆ ئاوەژوكردنەوەی كردەكە. راستییەكەی ئەوەیە كردەكە لەناو حیزبەوە هاتووەتە دەرەوە. ئەوە حیزب و ئایدۆلۆژییایە نزیكەی پەنجا ساڵە نەوە بەرهەم دەهێنێت لەسەر جۆرەكانی تیرۆر. ئەوە حیزب و ئایدۆلۆژییایە هەمیشە كار لەسەر گوتاری فاشییەت دەكات و خەریكی ئەوەیە بە پشت بەستن بە (هەرچی و پەرچی)ییەكانی خۆی، هەوڵی لەناو بردن و تیرۆركردنی بەرامبەرەكانی بدات. ئیدی گەر لەشوێنێكیشدا حیزب بێ‌ ئاگابێت لەكردەیەكی تیرۆر، لە هەمان شوێندا دەتوانرێت دەست بۆ حیزب رابكرێشرێت، چونكە حیزب دینەمۆی دروستكردنی تایپیەكانی تیرۆرە.
بێ‌ ئاگاییە دڵخۆشبین بەوەی بكەرانی كردەكە بدۆزرێنەوە، لەكاتێكدا تیرۆر وەك چەمك و وەك گوتار هەمیشە ئامادەییی هەیە و، بەردەوام حیزب و ئایدۆلۆژیاكەی كار بۆ زیندوكردنەوەی دەكات. لەكاتێكدا دەبێت دڵخۆشبین لە كاڵبوونەوەی تایپەكانی تیرۆر، حیزب دەست لە گوتارە فاشییەكەی هەڵبگرێت و، كۆتایی بەو ریتمەی تێگەیشتن بهێنێت لە پشتیەوە دونیایەكی دۆزەخی خۆی مەڵاس داوە. چ تیرۆكردنی ئەوانەی لەسەر جیاوازی تیرۆركران، چ تیرۆركردنی ئەوانەی لە هێڵی حیزب و خێڵ لایانداوە، چ تیرۆركردنی ئەوانەی لە ئایندەدا تیرۆر دەكرێن، بریتین لەو قوربانیانەی حیزب كاری بۆ لەناو بردنیان كردووە. هەتا ئەم گوتارەش بوونی هەبێت، زەحمەتە كۆتایی بەو چیرۆكە بێت كە پەنجا ساڵە حیزب لەناو كۆمەڵگەدا ئیشی لەسەر دەكات.

نەبەز گۆران

Previous
Next

Leave a Reply