Skip to Content

Friday, May 27th, 2022

كه‌وتنه‌خواره‌وه‌ی فڕۆكه‌یه‌ك یان كوشتنی پۆلیسێك

Closed
by October 13, 2010 ئەدەب

ئه‌مشه‌و كات
چاكه‌تێكی چه‌رمی ره‌شی له‌به‌ردایه‌
مانگ تێیدا دوایین نه‌فه‌سی خۆی ژیا                                                                                     
من له‌رێو ره‌سمی به‌خاك سپاردنیدا ئاماده‌ییم هه‌یه‌                                       
له‌شوێنێكی تر                                                                                                 
به‌كه‌وتنه‌خواره‌وه‌ی فڕۆكه‌یه‌ك‌و

ئه‌مشه‌و نیشانه‌یه‌ك هه‌یه‌
ئه‌ستێره‌كه‌م له‌هیچ لایه‌كه‌وه‌ نییه‌
مانگیش له‌ده‌ریادا نابینرێ
بۆی هه‌یه‌ سبه‌ی
له‌ماركێتێكدا به‌بارمته‌ بگیرێم
      تۆمه‌تباربكرێم، به‌بڕینی بانكێك، به‌كوشتنی پۆلیسێك

رۆژێك دێ دڵم له‌ته‌واوی شته‌كان بستێنمه‌وه‌
ئه‌و به‌شه‌ی كتێبی ژیانم وه‌ربگێڕمه‌ سه‌ر زمانی كۆتایی
وه‌ك توڕه‌یی “با” له‌په‌نجه‌ره‌ی شوقه‌كه‌مه‌وه‌
خۆم فڕێبده‌مه‌ خواره‌وه‌

له‌ئێستادا ته‌نها له‌بیری ئه‌وه‌دام بگه‌مه‌ كوچه‌ دابڕاوه‌كه‌ی خۆم
بگه‌مه‌ ئه‌وێ‌و له‌ژێر دار گێلاسێكدا كۆتایی خۆم ره‌سم بكه‌م
وه‌ك مناڵ مشتێ‌ ده‌باشیر بگرم به‌ده‌ستمه‌وه‌
یه‌ك یه‌ك به‌خواری له‌سه‌ر دیواره‌كانی ئه‌م شاره‌ بنوسم “من”

 
من كه‌ ئێستا له‌ژێر ئه‌م دوشه‌دا
بیر له‌پاكێتی ئه‌كه‌مه‌وه‌
وه‌ك ئه‌وه‌یه‌ نه‌زانم ئه‌م ئاوه‌ له‌ گرفت‌و فشاری زه‌وییه‌وه‌ دێ

         گه‌ر رۆژێك ئه‌م په‌پولانه‌ی سه‌رم فڕین‌و نه‌گه‌ڕانه‌وه‌
گه‌ر رۆژێك به‌شی ئه‌وه‌م مایه‌وه‌ پێی بناسرێمه‌وه‌
لێده‌گه‌ڕێم……..
گورچیله‌كانم وه‌ك دڵم ده‌به‌خشم
جه‌سته‌م ده‌نێرمه‌ تاقیگه‌كانی سه‌نته‌رێك
به‌خۆم ئه‌ڵێم من هی خۆم نیم
واده‌كه‌م
به‌هه‌موو ئه‌وانه‌ پێده‌كه‌نم
كه‌ده‌یانه‌وێت بژین

وه‌ك گه‌شته‌كانی فرۆكه‌یه‌ك سه‌فه‌ره‌كانم راگرن
رێگه‌ مه‌ده‌ن هێنده‌ نزیك ببمه‌وه‌ له‌مانگ
ئاسوده‌مكه‌ن ده‌ست بخه‌نه‌خوێنمه‌وه‌
به‌رله‌وه‌ی ببمه‌ خه‌مێكی گه‌وره‌ بۆتان

ئه‌مرۆ هه‌تاوه‌
مرۆڤه‌كان هه‌موو لێره‌ن
بۆ راپۆرته‌كه‌ت گرنگییه‌ك نامێنێته‌وه‌
ژماره‌كه‌ت به‌جێبێڵه‌
      به‌رله‌خۆكوشتن خۆم په‌یوه‌ندیت پێوه‌ده‌كه‌م

 با زریانه‌كان بێن تۆفانه‌كان رووبكه‌نه‌ من
با سروشت به‌نه‌شته‌ره‌ پیره‌كه‌یه‌وه‌ بكه‌وێته‌ گیانم
با ئاسمانه‌كان دوایین ژه‌هری خۆیان بڕێژن به‌سه‌رمدا
من به‌م ئازاره‌ سه‌ره‌تاییانه‌ نامرم
من سینه‌یه‌كی ترم هه‌یه‌ بۆ كوشتن
من خودا هه‌ڵیگرتووم بۆ رۆژانێك
كه‌ كه‌س تێیدا مرۆڤ نییه‌

  P_ali84@yahoo.com

Previous
Next