Skip to Content

353 Views

بمبوورن … ئاکۆ محەمەد سابیر

بمبوورن … ئاکۆ محەمەد سابیر

Be First!
by March 1, 2017 General, Poems
image_print

سەرتا هەڵەیەک هەبوو لە چاندنم
لەهێلکەکە سەرم دەرهێنا
نەدەبوو چەقۆم نیشان بدەن
هەواڵی بەرزەخم بدەنێ
بمبوورن نەبوم بەهیچ
گەڵایەکم سەوز نەبوو
سەرۆک جەنگی ڕاگەیاند
زرمەی ناپاڵمەکان نەیان هێشت
خەونێکی خۆش ببینم
بمبوورن نەمتوانی
شتێکت پێ ببەخشم
ئەی وڵاتە خوارو خێجە کزۆڵەکەم
وەک کەلاکێک لەبەردەم
گورگەکانی شۆرشدا
ڵاڵوپاڵ لێی کەوتویت
ئەوەندەیان کڕانویتەتەوە
تەنها ئێسکەکانت ماوە
منوتۆ هەر لەیەک دەچین
گیرفان بڕڕاو لۆژە لۆژ
بەگیرفانی بەتاڵەوە
لەبەردەم سنوری وڵاتاندا شەق دەخۆین
نەمن ڕەنگی مرۆڤم پێوە ماوە
نەتۆش ڕووخساری نیشتیمان
بمبوورن نەبوم بەهیچ
من بەمنداڵی عاشق بووم
عیشقی سەگو کۆترو سینەما
هەرسێکیان لێ یاساغ کردم
تفەنگێکی ژەنگاویان دامێ
بۆ پاسەوانی بارەگاکان
ئەو ئاوە باپیرم ڕشتی
ناسۆلیستێکی قارەمان بوو
گەمژە گەمژە
دەروێشێکی بێ ئاگابوو
بمبوورن نەبوم بەهیچ
نەگەڵایەکم سەوزبوو
نە خەونێکی خۆشم بینی
دەستم بەرئامێرێکی مۆزیک نەکەوت
وێنەی سنەو بەرێکم نەکێشا
کۆلارەیەکم هەڵنەدا
فڕفڕۆکەیەکم نەخستە بەر با
خەمی نان سپی کردم
بمبوورن واشەکەتووماندووم
ئاخر چیبکەم؟ چی پێشکەشکەم؟
کەمن بەشێکم لە ڕابووردوم

ئاکۆ محەمەد سابیر

Previous
Next

Leave a Reply