Skip to Content

450 Views

هه‌ڵه‌بجه‌؛ سێوی شاره‌زوور …   بـۆتـان لـه‌تیــف مـاویلـی (پــایــــان)

هه‌ڵه‌بجه‌؛ سێوی شاره‌زوور … بـۆتـان لـه‌تیــف مـاویلـی (پــایــــان)

Be First!
by March 16, 2017 General, Poems
image_print

شانزه‌ی سێیه‌
شه‌و ده‌یه‌وێ تا هه‌تایه‌
دڵی گه‌ردوون بگوشێت و
ئاسۆی ڕۆژگار
به‌ر له‌ هه‌ڵاتن بڕفێنێ !..
شانزه‌ی سێیه
ژوان پرته‌قاڵاویه‌
هه‌ناسه‌ تفت و بۆن سێوی..
ئه‌وه‌ ڕۆژه‌
مانگ باوه‌شی بۆ گرتووه‌و ده‌یلاوێنێ!..
ده‌ڵێ زووبه‌ چاوه‌کانت زوو هه‌ڵێنه‌
تا تاریکستانی ئازار له‌ڕووی گه‌ردوون بڕه‌وێنێ!..
شانزه‌ی سێیه‌
هه‌ڵه‌بجه‌ سێوی شاره‌زوور
ده‌ناڵێنێ وهاوار ئه‌کات.. ئه‌قیڕێنێ!..

ته‌ماشاکه‌ن
باخی سێوانی حه‌بیبه‌و
ده‌شتی شعری خاکوخۆڵ و
نه‌قشبه‌ندیه‌که‌ی مه‌ولانا؛
چۆن هه‌ناسه‌ی پرته‌قاڵی و
بۆنی سێوی ( بـــا ) هه‌ڵده‌مژن!؟..
کاتژمێری شار سیلاکه‌
نا…
تا پێنج هه‌زاری ژمارد…
ئیتر خه‌وت و
ته‌نیا ڕسته‌یێ که‌جێی هێشت
( پێویست ناکات….
له‌چاویلکه‌ی هیچ وڵاتێ….
له‌زاری هیچ مرۆڤ ناسێ….
یا فلاشی ڕۆژنامه‌وانێ…. گه‌شتیارێ….
بــــــا؛ ئازاره‌کانی مێژوو
له‌هه‌ناوی شانزه‌ی سێ بخوێنینه‌وه‌!.. )
وه‌رن سه‌یری هه‌ڵه‌بجه‌که‌ن!
ئه‌م تابلۆ ڕه‌نگاڵه‌ییه‌!
..
….
……
له‌م تابلۆ ڕه‌نگینه‌ی شار
ببینن ته‌نیایی مێژوو!
ببینن ته‌نیایی ئازار!..
هه‌ڵه‌بجه‌یه‌و ده‌ڵێ وه‌رن…
ببینن ته‌نیایی خۆم و
ئێش و خه‌وی شه‌وینه‌ی شار!..
له‌و وه‌رزی به‌هاری ساڵا
به‌ته‌نیان..
خۆی و مانگه‌شه‌و!..
یه‌که‌م هاوار
یه‌که‌م گریان
یه‌که‌م ترازانی هه‌ناسه‌
له‌جوانی شار…
له‌ژوانی ژان…
هه‌ور به‌فلاشه‌ ته‌زیوه‌که‌ی
وێنه‌ی باخی مه‌مانی گرت!
مه‌مکێ؛
له‌مژینی تامه‌زرۆی زاری زراسکه‌یێ ئه‌ترازێ!..
مه‌مکێ؛
له‌گوشینی سه‌رپه‌نجه‌ی عه‌شقی شاگه‌شکه‌یێ ئه‌ترازێ!..
به‌ته‌نیان..
خۆی و مانگه‌شه‌و!..
مانگ پێی ده‌ڵێ:
جێت ناهێڵم..
ناتڕفێنم..
هاتووم به‌ پێنوسی ئازار؛
نه‌خشه‌ی ژان و
نه‌خشه‌ی هاوارو ته‌یاره‌و
بۆمبی کیمیاویت بکێشم
له‌سه‌ر باڵی کۆلاره‌ی مناڵی لاسار!..

ته‌ماشاکه‌ن
وا ئێستاکه‌ هه‌موو جیهان
له‌ناو خه‌وێکی په‌مه‌یی
هاوکێشه‌ ئابوریه‌کانیان
به‌تامی سێو شیکار ده‌که‌ن!..
وه‌رن بچین بۆ شاره‌زوور!
سێوه‌که‌ مێخه‌ک به‌ند بکه‌ین..
هه‌ڵه‌بجه..
سێوی شاره‌زوور!..
بـۆتـان لـه‌تیــف مـاویلـی (پــایــــان)
17/3/2007 ـــ هه‌ولێر/ ڕاپه‌ڕین

Previous
Next

Leave a Reply