Skip to Content

62 Views

ڕاگەیاندنی ناوەندی سەربەخۆیی کوردستان

ڕاگەیاندنی ناوەندی سەربەخۆیی کوردستان

Be First!
by July 17, 2017 General
image_print

کەمپینی رفراندۆم بۆ سەربەخۆیی کوردستان، کە لە ١٨ ساڵ لەمەوبەرەوە هەڵسوراو دەست بەکاربووە، بۆ بەرزکردنەوەی خواست و دەنگی خەڵکی کوردستان بۆ ئەنجامدانی رفراندۆم بۆ سەربەخۆیی لەدەست ڕژێمی بەعس و دامەزراندنی دەوڵەتێکی سەربەخۆ. لەم پێناوەدا کاری میدیایی و کەمپەینی سیاسی لە کوردستان و لەووڵاتانی ئەوروپادا ئەنجامداوە، لەناساندنی فکرە و میکانیزمی رفراندۆم لە کوردستان و ناساندنی خواستی سەربەخۆیی لە دەرەوەی وڵاتدا و ڕاکێشانی پشتیوانی لەلایەن کەسایەتی وحزب و ڕێکخراوەکاندا دەوری بووە.
ئەم کەمپەینە لە دوای ڕوخانی بەعسیشەوە دوبارە دەورەیەکی نوێی دەستپێکردەوە بۆ هەمان رفراندۆم بۆ خواستی سەربەخۆیی. بەتایبەت لە کاتی دانان و دەنگدانی گشتی لەسەر دەستوری نوێی عێراق دژ بەم دەستورە فیدرالیەوەستایەوە کە حزبە دەسەڵاتدارەکانی کوردستان بانگەوازیان بۆکرد . لە ڕێگەی کۆڕو کۆنفرانس و میدیاوە بانگەوازی خەڵکی کوردستانی کرد کە دەنگ نەدەن بەو دەستورەی کوردستان دەکاتەوە بە پاشکۆی دەستور و دەوڵەتێکی ئیسلامی عەرەبی.
سەرەڕای ئەم هەوڵانەی “کەمپینی رفراندۆم بۆ سەربەخۆیی کوردستان” و کاری “بزوتنەوەی رفراندۆم” و دەنگدانی ٩٨٪ خەڵکی کوردستان بەسەربەخۆیی لەرفراندۆمی نافەرمی ساڵی ٢٠٠٥دا، بەڵام دەسەڵاتدارانی کوردستان بەرژەوەندی خۆیان لە پلە و بەشە دەسەڵات و داهاتی فیدرالیدا دەبینیەوە و بە پێچەوانەی خواستی خەڵکەوە کوردستانیان وەک پاشکۆی عێراق هێشتەوە.
دوای چەندین ساڵ لە گێرەوكێشەی سیاسی نێوان حکومەتی هەرێم و ناوەندو ئاکامە سەلبیەکانی لە سەر خەڵکی کوردستان، لە ئێستادا پارتی و یەکێتی بڕیاریان داوە بە بەرپاکردنی رفراندۆم بۆ سەربەخۆیی لە ٢٥ سێپتەمبەری ٢٠١٧دا. ئاشکرایە ئەمە ئاکامی شکستی ڕێگا چارەی فیدرالی و ڕەوایەتی ڕێگاچارەی سەربەخۆییە، کە چەندین ساڵ “کەمپینی رفراندۆم بۆ سەربەخۆیی کوردستان” و “بزوتنەوەی رفراندۆم” و خەڵکی ئازادیخوازی کوردستان خەباتی لەپێناودا کردوە و فشاری خستۆتە سەر دەسەڵاتدارانی کوردستان، تاکو ئەم مافەی خەڵکی کوردستان بۆ بریاردان لەسەر چارەنوسی سیاسی کوردستان بۆ سەربەخۆیی لە رفراندۆمێکدا بەڕەسمی بناسێ و جێبەجێی بکات.
ئێستا کە بەرپاکردنی رفراندۆم لەلایەن دەسەڵاتدارانی کوردستانەوە دانی پێدانراوە، هەنگاوی گرنگ بریتیە لە جێبەجێکردنی رفراندۆمێکی ئازادو ڕەسمی و جێبەجێکردنی ئەنجامی ئەم دەنگدانەی خەڵکی کوردستان، کە ئاشکرایە سەربەخۆیی کوردستانە.
هەربۆیە ئەم کەمپینەش لێرە بەدوا لەژێر ناوی “ناوەندی سەربەخۆیی کوردستان ” کاردەکا تاکو بتوانێ ئەو دەنگدانەی خەڵکی کوردستان بۆ سەربەخۆیی بە ڕاگەیاندنی دەوڵەتی سەربەخۆی کوردستان بگەیەنێ. لەم پێناوەدا هەم کاردەکا بۆ دروستکردنی بزوتنەوەی فشاری جەماوەری بۆ سەر دەسەڵاتدارانی کوردستان بۆ پابەندبون بە جێبەجێکردنی بڕیاری جیابونەوە لە عێراق و ڕاگەیاندنی دەوڵەتی سەربەخۆ، وە هەم کاردەکا بۆ ڕاکێشانی پشتیوانی بۆ بەڕەسمیەت ناسینی ئەنجامی رفراندۆم و دەوڵەتی سەربەخۆی کوردستان.
لە ڕوانگەی دەورو دەخالەتی خەڵکی کوردستان بۆ دیاری کردنی چارەنوسی خۆیان و دەرکێشانی کوردستان لە گێژاو ناجێگیری سیاسی و دامەزراندنی دەوڵەت لە کوردستاندا “ناوەندی سەربەخۆیی کوردستان” بانگەوازی خەڵکی کوردستان دەکات بۆ بەشداریکردن و دەنگدان بە سەربەخۆیی کوردستان لەو رفراندۆمەدا کە بڕیارە ئەنجام بدرێ.
هاوکات بەپێی تەجروبەیەک کە ئێمە و خەڵکی کوردستان لەگەڵ دەسەڵاتدارانی کوردستان هەمانە، پێویستە کە خەڵکی کوردستان خۆیان لە مەیداندا بن و بزوتنەوەیەکی فشاری جەماوەری سازبکەن تا لەم ڕێگەیەوە پێداگری جدی بکەن لە سەر جێبەجێ کردنی ئەنجامی دەنگەکانیان تا حزبە دەسەڵاتدارەکان یاری بە چارەنوسیان نەکەن و دەنگەکانیان بۆ مەبەستی سیاسی خۆیان بەکار نەهێنن و نەیکەنە سەودا ومامەڵەی لەسەر زیادکردنی بەشە فیدرالیەکەی داهات و دەسەڵاتیان.
هاوکات کاردەکەین بۆ ڕێگاگرتن لەوەی خواستی سەربەخۆیی خەڵکی کوردستان بکرێتە قوربانی کێشەی دەسەڵاتی حزبەکان و پێویستە سەرجەم حزبەکانی کوردستان پابەندی مافی بەرپاکردنی رفراندۆم و سەربەخۆیی خەڵکی کوردستان بن، بەجیا لەهەر جیاوازیەکی سیاسی و کێشەی نێوخۆیان یاخود ڕا و سیاسەتێک کە سەبارەت بە ئایندەی کوردستان هەیانە .
هەروەها ئەم ناوەندە هەوڵئەدات بۆ ئەوەی نەتەوەیەکگرتوەکان سەرپەرشتی ئەم رفراندۆمە لە ناوچە کوردنشینەکانی هەرێم و دەرەوەی هەرێمیش بکا و ڕەسمیەت بدا بە ئەنجامەکەی و بە سەربەخۆیی کوردستان.
ئەم بزوتنەوە جەماوەریە دەوری گرنگی دەبێ لە ڕاوەستانەوە بەرامبەر هەڕەشەی وڵاتانی دەوروبەر و ناکامکردنەوەی هەوڵەکانیان دژی سەربەخۆیی، وە هەروەها ڕۆڵی دەبێ لە هێنانە سەرکاری دەوڵەتێکدا کە دەستور و یاسا و دامودەزگا و کارەکانی مۆری خواست و ماف و فشاری جەماوەری هەژار و ئازادیخوازی پێوەبێ و دەوڵەتێکی سێکولار و غەیرە قەومی و مافی هاوڵاتی یەکسان بۆ دانیشتوانەکەی دابین بکا بەبێ جیاوازی نەتەوە و ڕەگەزو زمان و ناوچە.
ناوەندی سەربەخۆیی کوردستان بانگەوازی هەموو خەڵکی ئازادیخوازی کوردستان و حزب و لایەن و ڕێکخراوە جەماوەریەکان دەکا کە بەشداری لەم ناوەندەدا بکەن و لە هەموو شار و شارۆچکە و وڵاتێکدا هەڵسوراوان دەستەکانی دروست بکەن تا یەکدەست و پێکەوە بزوتنەوەی سەرتاسەری جەماوەری ڕێک بخەین لەپێناو سەرخستنی خواستی ڕاگەیاندنی دەوڵەتی سەربەخۆ و کاربکەین بۆ ناکامکردنەوەی ڕێگریەکانی بەردەم سەرکەوتنی بڕیاری خەڵکی کوردستان لە سەربەخۆبونیدا.

ئاسۆکمال ڕێکخەری
ناوەندی سەربەخۆیی کوردستان
‏17‏/07‏/2017
پەیوەندی : https://www.facebook.com/asokamal, Tel:00447760131203,asokamal@yahoo.com,

Previous
Next

Leave a Reply