Skip to Content

Friday, March 29th, 2024
ئیتر بۆ پێشەوە  …….  سمكۆ عەبدولكەریم

ئیتر بۆ پێشەوە ……. سمكۆ عەبدولكەریم

Closed
by November 8, 2008 گشتی

 ئیتر بۆ پێشەوە  …….  سمكۆ عەبدولكەریم

    باوەڕناكەم مەبەستیان لەو قسانە ئەوەبىَ كە فعلەن سەدام پیاوێكى هێندە نایاب بووە ، شایانى ئەوەیە سوێند بەسەرى بخۆین ، زۆربەى ئەو رۆشنبیرە كوردانەى كە وادەلێن رۆژێكدادىَ سوێند بەسەرى بخۆین یان  بچینە سەرگۆڕەكەى و دوعاى خێرى بۆ بكەین ، نیەتى ئەو قسانە لەوەوە سەرچاوەى گرتوە كە دەبینن زۆربەى ئەوانەى دواى سەدام دەسەڵاتیان گرتۆتە دەست چیان جیاوازتر لە هەگبە دانییە بۆ كورد ، زۆرجار گوێم لەو جۆرە قسانە دەبىَ ، نەك هەر تەنیا لە خەڵكى سادە ، زۆرجار خەڵكە رۆشنبیرەكە وادەڵێن ، تۆ وەرە خەڵكانێكى شۆڤینى عەرەب ببنە هۆى لەبیربردنەوەى ئەو هەموو كوشتن و بڕین و كاولكارییەى كە سەدام بەسەر كوردى هێناوە ، واى لێبىَ بڵێین سەدام زۆر پیاوتر بوو .
 ئەوە دونیایە ، هەر رۆژەى لە ئاوازێك دەخوێنن ، قسەى ئەو پێشمەرگە دێرینە گەرمیانەى كە وتى كار وابڕوا یەكێتى بەسەر هەمووماندا دەڕوخىَ زۆر جوان بوو .
 هەموو ئەوانەى تا دوێنىَ هەموو هیوایەكیان لەبەریەك هەڵوەشانەوە روخانى یەكێتى بوو ، ئەمڕۆ دەست لەسەر سینگ دوعاى خێرى بۆ دەكەن یەكێتى هیچى لێنىَ .
 دونیا ئەوهایە هەموو ئەوانەى بنى زمان و سەرى زمانیان ئەوە بوو كورد یەك دەنگ و یەك وتارو یەك هەڵویست نییە ، ئەمڕۆ كار بۆ لەبەریەك هەڵوەشاندنەوەى دەكەن .
 ئێستاش قسەى ئەو سەرۆك حیزبە بچكۆلانەیەم لەیادە كە راستگۆیانە وتى : لە جیاتى ئەوەى بچم فندقێك دامەزرێنم دێم بۆخۆم حیزبێك دروستدەكەم ، كە خێرەكەى بەقەد كۆمپانیایەك دەبىَ .
 تۆبڵێى ئەو حیزبەى بۆ نوخبە دروست دەكرىَ چەند كاریگەرى هەبىَ لەسەر ئەو واقیعە ، ئەو واقیعەى لە هەڵبژاردنى رابردووى پارێزگەكان بینیمان ، یەكگرتوى ئیسلامى لە سلێمانى بەقەد پارتى دەنگى هێنا و لە دهۆكیش بەقەد یەكێتى ، هەولێریش (الله بالخیر).
 كارەسات هەر ئەوە نییە ، لەوە كارەساتتر ئەوەیە بۆخۆمان بێن ماڵى خۆمان كاول كەین و پێمان وابىَ چاكى دەكەین . وەك ئەو رۆژنامە ئەهلی و ئازادەى بۆ دانانى مانشێتى رۆژنامەكەى تەلەفۆن بۆ رۆژنامە فرۆش دەكات كە كامە مانشێت دابنىَ باشترەو بازاڕى فرۆشتنى گەرمتر دەكات .
 برادەرێك وتى: ئەوە زانیمان خێرى حیزب دامەزراندن هیچى كەمتر نییە لە خێرى كۆمپانیایەك ، بەڵام تۆ وەرە ئەوەم پێ بڵىَ  خێرو حكمەتى  ئەوە لە چدایە  وەزارەتى رۆشنبیرى بۆ گواستنەوەى هەواڵى هەڵبژاردنى سەرۆك كۆمارى ئەمریكا پەیامنێر بنێرێتە ئەو وڵاتە ، لە كاتێكدا تا ئەو یەخەى كراسو پشدێنەكەى چاكدەكات ئێمە هەموو  شتێكمان پێدەگات.
 
 
 

Previous
Next
This site is registered on wpml.org as a development site.