Skip to Content

Thursday, March 28th, 2024
عه‌شق…..كردنه‌وه‌ی ده‌رگایه‌ به‌رووی شێتی…

عه‌شق…..كردنه‌وه‌ی ده‌رگایه‌ به‌رووی شێتی…

Closed
by May 18, 2009 ئەدەب

 

بۆ  بوكه‌شوشه‌كه‌م پێشكه‌شه‌

چاوم خه‌م ودڵم خوێناوی لێده‌تكێ‌                                                      
كه‌چی هه‌رئالووده‌م به‌ئه‌وینت و
ئه‌وینتم پێ‌ له‌بیر ناكرێ‌
قوربانی ئه‌ودڵه‌ شێت وگه‌وره‌یه‌ت بم
ئێ‌ خۆ ده‌زانم عه‌شق
كردنه‌وه‌ی ده‌رگایه‌ به‌رووی( شێتی)
خۆ ته‌سلیم كردنه‌ به‌(قه‌ده‌ر)
تۆ ئه‌ی ئه‌و دۆسته‌ی ده‌ربه‌سی
سووتانه‌كانم نایه‌ی

پێم مه‌ڵی  (كچه‌ عه‌جووله‌كه‌ ئێواره‌یه‌كی تریش چاوه‌رێمبه‌)
چاوه‌رێت بم ونه‌بم
خۆ تۆ نایه‌ی
ئه‌ی كۆنه‌ یار وتازه‌ ئه‌غیار
چه‌ن ده‌ترسم بمرم ونه‌گه‌م
بۆته‌نها یه‌كجارتێر بۆنی چاوه‌ كاڵكانت بكه‌م!!!
خۆتۆ به‌بۆنی عیشقه‌وه‌ هاتی ئه‌ی بۆ پرتكردم
له‌(سووتان)؟؟
به‌بۆنی بارانه‌وه‌ هاتی
پرتكردم له‌
(خنكان)
من ده‌مه‌وێ‌ به‌م دووسێ‌ نیگا هه‌رزه‌كارانه‌یه‌
فێری پیرۆزی ئه‌وینت بكه‌م
گه‌مژه‌م
ده‌مه‌وێ‌ به‌ته‌نها گوڵێك هه‌موو ڕه‌نگه‌كانی عیشقت
له‌به‌ربكه‌م
 ساویلكه‌م
ده‌مه‌وێ‌ به‌گۆرانیه‌كی عاشقانه‌
له‌ده‌ریای ئه‌وینت هه‌ڵكیشم
مناڵم مناڵ مناڵ
هه‌موو رۆژێ‌ تاڵه‌ جیاوه‌ بووه‌كانی قژم ماچ ده‌كه‌م
گه‌ربیرم ده‌كه‌ی بۆجارێك سه‌رله‌ كۆنه‌ ژووان ناده‌ی
دڵم پڕبكه‌ی له‌گمه‌ی كۆتره‌ هه‌رده‌م عاشقه‌كان
چاوانم پڕپڕ بكه‌ی له‌ژیان
بۆنی مه‌رگم گرتووه‌ خودام( مه‌رگ)
ئه‌ی خودام پێم بێژه‌
گه‌رئه‌م به‌ربه‌سته‌ به‌رده‌ڵانه‌ نه‌بێت
گه‌رئه‌م حه‌ساره‌ نه‌بێت
نووزه‌م,گریانم,هاوارم
چه‌ند مه‌تر دوورتر ده‌روات؟كه‌ی به‌و دۆسته‌ بێده‌ربه‌سته‌ ده‌گات؟
درزێك كه‌وتۆته‌ رۆحمه‌وه‌
رۆّژ دوای  رۆژ  فراوان وفراوان و فراوانتر ده‌بێت
ته‌نیاییه‌ك رۆحمی ده‌سته‌ مۆ كردووه‌
چركه‌ دوای چركه‌ رۆحم ته‌نگ وته‌نگتر ده‌بێت
خودام
بۆنی مه‌رگم گرتووه‌ (مه‌رگ)
نازانم گولله‌ی چ چاره‌نووسێك ده‌مپێكێت؟؟
ده‌ ده‌ركه‌وه‌
ئه‌ی ناسكترله‌رووحی ناسكی په‌پووله‌ و وه‌كوجاران
چاوم لێ‌ زیت بكه‌وه‌و بڵێ‌:چۆنی كچێ‌؟؟
تووبی خودا به‌(هێرۆ)نا
هه‌ربه‌كچێ‌ بانگم بكه‌
به‌تووڕه‌ییه‌كی پڕپڕله‌ ئه‌وین پێم بێژه‌:
توخوا گوڵێ‌ شه‌بقه‌كه‌ت فرێده‌ تابۆنی ڤژتم بۆبێ‌
ئێواره‌دێت,,,,,هه‌رچاوه‌ڕیم
شه‌و ده‌ڕوات هه‌رچاوه‌رێم
ده‌ده‌ركه‌وه‌و
رۆحی هه‌رده‌م به‌عیشقت ئالووده‌م شادكه‌ به‌دیدارێك و
پڕمكه‌ له‌بۆنی سه‌وزه‌ گیا
هه‌ڵمكێشه‌ له‌ته‌ڕی سه‌وزه‌گیا
ئه‌ی نازانی كه‌ده‌تبینم
وه‌ك پشكۆی به‌رشنه‌(با)ده‌گه‌شێمه‌وه‌
چاوه‌ هه‌رده‌م چاوه‌ڕوانه‌كانم وه‌ك دووكانیله‌
ده‌بریسكێنه‌وه‌.
وه‌ره‌ به‌نوێژی نیوه‌ڕۆ له‌سه‌ر شه‌قامه‌كان
وانه‌كانی عیشق بڵێینه‌وه‌
مه‌ترسه‌ پۆلیس مانی ترافیك لایته‌كان
سه‌رقاڵی چاوباشقاڵی وده‌سبازین
له‌گه‌ڵ كچه‌ كلینیكس فڕۆشه‌كان
رێبواره‌كان له‌داخی گه‌رما نه‌ك من وتۆ بكره‌ چاویان رێگاش نابینێ‌
وه‌ره‌( به‌ماچ)
 دیواره‌ خۆڵگرتووه‌كانی ئه‌م ده‌ڤه‌ره‌ ڕه‌نگ ڕێژبكه‌ین
له‌بیریكه‌
ئه‌ی سوتێنه‌رتر له‌ئاگر وشێتترله‌شێتیم
له‌بیریكه‌ ئه‌و(sms )انه‌ی پڕن له‌گله‌یی
به‌وهه‌موو شێتیه‌ته‌وه‌
به‌وهه‌موو ڕقه‌ته‌وه‌
به‌و دونیا تووڕه‌ییه‌ته‌وه‌
شێتانه‌,ده‌روێشانه‌ خۆشتمده‌وێ‌ و
به‌له‌زترله‌ فڕینی پاسارییه‌كان ده‌چیته‌ قوڵایی دڵمه‌وه‌
وورده‌,وورده‌, تێكه‌ڵی رووحم ده‌بێت وجیانابیته‌وه‌ نا,نا
ئه‌ی پایزه‌ پیاو
وه‌ره‌ میحرابی پایزه‌وه‌
تا روون تربتبینم وبگه‌شێمه‌وه‌.
كه‌به‌چاو سڵاوم لێده‌كه‌ی
له‌خۆشیا خۆم بیرئه‌چێت و
لێوه‌كانم یه‌ك ناگرنه‌وه‌,
ئاااای….عه‌شق چ شێتیه‌كی جوانه‌!!
چ ده‌ردێكی كوشنده‌یه‌!!
تێناگه‌م
چۆن ده‌توانی به‌سڵاوێك ئه‌م هه‌موو گریانه‌ قه‌تیسه‌ی
ناخم بكه‌یته‌ پێكه‌نین.
كتێبێكم لێوان لێو له‌عیشق
پڕله‌ته‌نیایی
چیم ناوده‌نێی بنێ‌
شێت,ساویلكه‌,مناڵ
قه‌ینابه‌س ته‌نها یه‌كجار
موتاڵام بكه‌
ئه‌ی ئه‌و پیاوه‌ی له‌سه‌ر له‌پی په‌پووله‌ له‌دایكبوویت وبه‌
ئاونگی گوڵه‌كان گۆش كراوی
وه‌ره‌و چیتر خۆت له‌ خۆڵه‌ مێشی ئه‌م باخچه‌ سووتاوانه‌
هه‌ڵمه‌سوو و
 به‌وگوڵه‌ عه‌یارانه‌ بڵێ‌:
هێرۆیه‌ك چاوه‌ڕێمه‌پڕپڕ بووه‌ له‌ته‌نیایی گۆڵه‌ هێرۆكان و
خه‌ریكه‌ له‌چاوه‌ڕوانیدا ده‌هری ده‌بێت..
وه‌ره‌ پیاسه‌یه‌ك بكه‌ین به‌كۆڵانی ژنه‌ كوژراوه‌كان و
ده‌فته‌ری رازه‌ نهێنیه‌كانی كچه‌ هه‌رزه‌كانی ئه‌و دیو ده‌رگاكانی
شه‌رمكردن بخوێنینه‌وه‌.
ڕازێك له‌ دڵمایه‌ ده‌مكوژێت وپێم باسناكرێت
عه‌شقێك له‌ناخم دایه‌ پیرم ده‌كات وپیرنابێ‌
دۆزه‌خێك له‌ناخمدا داگیرساوه‌,داغ داغ بووه‌و به‌هیچ
ئایه‌تێك دانامركێت,
گه‌رله‌چاوه‌ زه‌رده‌كانت وون
بووم

له‌كۆڵانه‌ هه‌میشه‌ به‌باران شێداره‌كان بۆم بگه‌رێ‌
ئه‌ی دۆست پشتیوانم به‌
ده‌مه‌وێت ئه‌م ئاوێنه‌یه‌ به‌قیژه‌یه‌ك ووردو خاش بكه‌م
ئه‌م ئاوێنه‌یه‌ پڕم ده‌كات له‌ منێكی پڕله‌گوومان,
منێك پارچه‌یه‌ك خه‌نده‌و هه‌زارپارچه‌ گریان
نامه‌وێ‌ له‌م هه‌رێمه‌ جگه‌ له‌خۆت كه‌س دۆستم بێت.
ئه‌ی دۆست
وه‌ره‌ له‌چاوانم چاوه‌ڕوانیه‌كی جاویدان وله‌ رووحم ته‌نیایی
كۆبكه‌وه‌
له‌گه‌ڵ ئه‌م چاوه‌روانیه‌ی نامگه‌یه‌نێته‌ هیچ
پاساریه‌ك ماره‌م ده‌كات و ده‌مباته‌ هه‌رێمێك
كه‌سیان من نه‌ناسن وپیاوه‌كانیان
له‌بری خوێن ده‌سته‌كانیان بۆنی نه‌عنای لێدێ‌
ژنه‌كانیان به‌سه‌مای عه‌شق حه‌ساره‌كانی ژیان ده‌ڕووخێنن
هه‌رزه‌كانیان له‌بری شه‌راب
ته‌مه‌نێك به‌چاوی كچان سه‌رمه‌ست وخه‌یاڵ ده‌بن
ئه‌ی دۆست

ئه‌ی ناسكترله‌ناسكی رۆحی ناسكی په‌پووله‌
فرسه‌خێك دوورتر بوسته‌و
له‌وه‌ زیاتر تێكه‌ڵی رووحم مه‌به‌
خه‌ریكه‌ له‌نێوان(خۆم)و(تۆ)
خۆمم بۆنه‌دۆزرێته‌وه‌
باله‌وه‌ زیاتر وون نه‌بم
ئاخر وونبوونی من ئه‌به‌دیه‌
من,,,,,ده‌رگای عیشق وشێتیم پێكه‌وه‌ كرده‌وه‌,
چ كاره‌ساتێك سه‌ری هه‌ڵدا
پرمه‌كه‌ باده‌ساقی من عیشق مه‌ستی كردووم.
ئه‌ی دۆست من ده‌مه‌وێ‌ ئه‌وینمان وه‌ك بازنگه‌كه‌ی ده‌ستم
بێ‌ سه‌ره‌تاوكۆتایی بێت.

ئه‌ی یار شه‌وان له‌په‌نجه‌ره‌كه‌وه‌ وبه‌هێمنی سه‌یرم بكه‌
شێتا,مه‌ستانه‌,عاشقانه‌
سه‌ماده‌كه‌م,, گوێ‌ له‌گۆرانی ده‌گرم,ده‌گریم,
عه‌یامێك خه‌یاڵم ده‌كرد گوله‌یه‌ك له‌دڵماساردبكه‌مه‌وه‌و
ته‌مه‌نی ئه‌م چاوه‌روانیه‌ كورتكه‌مه‌وه‌

به‌ڵام بو َتۆیه‌ ئه‌ی ناسكتر له‌رووحی ناسكی په‌پووله‌
ئه‌م چاوه‌روانیه‌م بۆتۆیه‌
ئه‌وه‌ی له‌مندا ده‌كوژرێت خۆمم نه‌ك تۆ
ئه‌وه‌ی تائه‌به‌د له‌م دڵه‌ فره‌ بچووكه‌كه‌م  به‌سه‌وزی  ده‌مینێته‌وه‌
تۆی …ئه‌ی سه‌وزترله‌سنه‌وبه‌رو ناسكترله‌ رووحی ناسكی په‌پووله‌…..
پارچه‌كانی (من)له‌ناوئه‌م ئاوێنه‌ شكاوه‌یه‌
كۆممه‌كه‌ره‌وه‌
ته‌ماشا هاورێم
عه‌شق….تووشی چ ئافاتێكی كردم؟؟!
ته‌سلیمی ده‌ستی چ شێتیه‌كی كردم؟
ئاااای له‌م شێتیه‌ جوانه‌
ئه‌وه‌ی له‌تۆوه‌ بۆم جێما(ژان)بوو
ئه‌وه‌ی من دوای كه‌وتووم(مه‌رگه‌ مه‌رگ)
ته‌ماشاكه‌ هاوڕێم (مه‌رگ) چ یاریه‌كی شیرینم له‌ته‌ك ده‌كات!!!
چاوانت چ شه‌ڕێك ده‌فرۆشن!!
ئاه چاوانت تووشی چ گێژه‌نێكم ده‌كه‌ن؟؟!
له‌نێوان ئه‌م هه‌موو شه‌ڕه‌ ده‌ربازبوونم مه‌حاڵه‌ مه‌حاڵ
ده‌بێ‌ به‌چی بگه‌ین؟؟
تۆ ئازاره‌كانت له‌ دڵی منا ئه‌شاریته‌وه‌و
 خه‌نده‌كات له‌ رووحتا قه‌تیس ئه‌كه‌ی
روو گرژیت به‌من ده‌فرۆشیت و
بزه‌و قاقاكانت
به‌شه‌قامه‌خاڵییه‌كان
له‌گه‌ڵ مندا ئه‌غیارو له‌گه‌ڵ ئه‌غیارم
دۆستی گیانی گیانی
ئه‌ی دۆست بمكوژه‌و له‌بیرم مه‌كه‌
بمكوژه‌و ته‌نها یه‌ك بزه‌م پێبده‌
 بۆنی یاردێت

وه‌ی خودا دڵم ده‌له‌رزێت وچاوم ده‌فرَێت
ئه‌م زه‌رده‌په‌ڕه‌ یاردێت
بۆنی ماچی یاردێت
ئه‌مشه‌ویار له‌ماچم هه‌ڵده‌كێشێ‌.
خودام دڵم كوته‌كوت ده‌كات
ده‌نگی هه‌نگاوه‌كانی یاردێت.
زه‌مه‌ن ده‌ڕوات وشه‌وه‌كانی  ته‌نیایی من
زۆرتر ده‌بێت
ژیان به‌له‌ز ده‌ڕواو( یار)
قه‌ت قه‌ت  نایات..                                                 كه‌ركوك2009

 

 

 

 

Previous
Next
This site is registered on wpml.org as a development site.