Skip to Content

Wednesday, January 19th, 2022

شكۆفه‌ی شه‌ونمی به‌یانیه‌ك … کەژاڵ ئیبراهیم خدر

Be First!

 

 

 

 

1

له‌به‌رده‌م كاروانی وێنه‌ی

گه‌ڵازه‌رده‌كانی رۆحما

بروسكه‌ی وه‌رزی ساڵانه‌ی

خه‌وێكی قووڵی

شه‌وه‌زه‌نگی ملوانه‌كه‌ی سه‌رسنگم

یادگاری خه‌یاڵه‌و

وه‌ك ده‌نكه‌ هه‌نار هه‌ڵده‌وه‌رێ

2

نامۆیی كازیوه‌ی

گوڵێكی ره‌نگاو ره‌نگه‌و

وه‌رزێكی پڕ له‌كڕێوه‌ی به‌فره‌و

چاوه‌كانم بارانی مه‌ستی و

پرشنگی خونچه‌ی شه‌ونمی به‌یانیه‌ك

گۆرانی شه‌ڵاڵی سه‌فه‌ری شه‌وی كزه‌بایه‌و

سه‌فه‌ری ته‌مه‌نیش گوڵێكی سه‌رگه‌ردانه‌

3

هه‌ژاری به‌رده‌وام

رێژنه‌ی سه‌مفۆنیای كانیاوێكی به‌خوڕه‌و

ته‌نهایی كه‌مانی دڵی خۆی ده‌نوسێته‌وه‌

هه‌ڵوه‌رینی تریفه‌ی

ورشه‌ی گه‌ڵاكان ده‌بینێت

پیاوێكه‌ خوڕه‌ی روبارێكی مه‌نگه‌ و

كه‌وتۆته‌ بێ هیوای ژیانه‌وه‌

4

هه‌ژاری خۆشه‌ویستی

دیمه‌نی كۆڵانه‌كانی دڵی

خستۆته‌ ده‌سڕه‌كه‌ی به‌رده‌می

چاوه‌رێی به‌زه‌یی گوناهی خۆی ده‌كات

ویژدانیش ئاسمانێكه‌

وه‌كوو ژنێك

قژی خۆی ده‌ڕنێت و

به‌رهه‌می دره‌ختی خۆی ده‌خوات

5

ئه‌مجاره‌ش نمه‌ی غه‌ریبی

سه‌فه‌ری باڕێژه‌ی گریانم

گۆمی مه‌نگێكی  لێڵه‌و

ته‌مێكی ساردو سڕه‌

ئه‌وه‌نده‌ی شكۆفه‌ی خه‌ونی كازیوه‌ی بینیووه‌

چوومه‌ ته‌مێكی ئاسۆیه‌كی ته‌ڵخه‌وه‌

6

نیشتمانی په‌لكه‌زێڕینه‌

كوانێ خه‌ونی شعری داهاتووی ژنێتیم

هه‌رشمشێره‌ شه‌ڕده‌كا

روباری ئازادییه‌

جه‌سته‌ی من ووشك ده‌كا

7

شه‌و تارای مه‌مكێكی جوانه‌

ده‌بێته‌ به‌رسیله‌ی به‌فرو

گوناهه‌كانی ده‌سڕێته‌وه‌

ماته‌مێكه‌ بۆزستانی خه‌موو

ده‌ستی تۆش فرمێسكی ئازارم ده‌سڕێ

نایه‌ڵێ به‌خوێنی جه‌سته‌م سوربێ

8

گه‌ر شه‌پۆله‌كانی ده‌ریا

ده‌نگی ئازادیم نه‌مرێنێ

له‌لوتكه‌ی سپی شعرێكا

خوێنی لاوانی نیشتمانه‌كه‌م

ده‌ڕژێ به‌سه‌ر لاپه‌ڕه‌ی رێگای خه‌باتا

ئه‌وسا گوڵه‌كانی باخی دڵی تۆ

سوور سور ئه‌چنه‌وه‌ له‌ناو ئاواتا

9

من شه‌وی ته‌نهایی

خه‌مه‌كانم راده‌ژێنێ

چه‌پكێك نێرگز

له‌پرشنگی هه‌تاو

گوڵێكی نوێم بۆده‌چنێ

له‌نێو تاڤگه‌ی یادگاریه‌كانی

بێ هیوای گوڵی ووشه‌م

ده‌بێت به‌قژی به‌هارو هه‌ڵبه‌ستێ

Previous
Next

Leave a Reply