هێژ روندكێن ژ چاڤێن ته دوه‌ریێن؟!
عبدالرحمن بامه‌رنی
http://ebdulrehmanbamerni.blogspot.com/
من گری دچاڤێن ته دا دیت.. تو د په‌شی و تو نه‌شیایی ب چاڤان خاترێ بخازی.. سلاڤێن ته د گه‌وریا ته را دمانه ئاسێ!، پێن ته به‌ری ته قه‌ستا ده‌رگه‌هی كرن.. من ئاگه‌هـ ژ پێژنێن ته هه‌بو، تو د سیتافكا خوه دهه‌لنگفتی، هێژ زه‌نگا ده‌نگێ ته دگوهێ مندا یێ قه‌رسی یه، چیروكا دزینا خوشترین ماچ ژ لێڤێن ته، ب ئیمزا لێبورینێ من سلاڤێن ته بلند راگرتن!
هه‌می تشت
هاتنه دیلێت كرن و ئه‌و ناڤێن ته دبن په‌رده‌یا شه‌رمێ را زیق كرین و
ته ب كراسێ بێ هه‌تكیێ ناڤكرین
شیعرا ڤیایی ب دیالوكێ بهێته نڤیسین
ته ڤر لێددان و
ته به‌رپه‌رێن من سه‌روبن كرن
ته دڤێت یاریان ب پیروزیێن من ژی بكه‌ی!
دناڤ پایزا عه‌شقا مندا
په‌یڤێن من بده‌یه به‌ر كاشوێ خوه و
هێژ تو یا گه‌فا ل نڤیسینێن من دكه‌ی
و هێژ خه‌ونێن من
دڤێن ماچان لدۆر به‌ژنا ته ب ئالینن و
دگه‌ل هه‌ناسه‌یێن
هه‌ر دار كاژه‌كا تو لبن رونشتی
یان هه‌ر خه‌ونه‌كا
ته مێیاتیا خوه تێدا نیشان دای و ره‌نگ كری
سالوخه‌تێن شیعره‌كێ نه و ژ ته دوه‌رهان..
تو شیعره‌ك بوی
ته خوه ل پرێزه‌یا عه‌شقێ نه دگرت و
تو یا چاڤ ترسیایی بوی
زوی چاڤێن ته شه‌رم به‌لاڤه‌دكرن
تو یا دچی و
ئه‌زێ به‌رمایكێن ته ڤێدده‌م!
تو باخچه‌ی، بلنداهی، چیایی، جوانترین گول، خوشترین ئاواز، نازكترین شیعرا منی و ئه‌زێ په‌یڤێن وێ دنڤیسم و هێژ ئه‌زێ ل ده‌رازینكا جوانیا وێ و خه‌ونێن من یێن یاریان ب په‌یڤان دكه‌ن و تو یا ل بلنداهیا و هێژ تو یا دفری و خو دنازینی……..؟!
دگه‌ل ته و ده‌نگێ عه‌وران
هه‌كو هه‌می تشت دگوهێن من دا ده‌نگ ڤه‌دده‌ن
تو د بویه ئه‌لهوووو
نكلێن ته،
كونێن زوها دخه‌ونێن من ڤه‌دكرن
شیعرێن من نه دشیان خوه لبه‌ندا ته بگرن
نزانم؟!
شیعرێن من تژی ره‌نگ دبون
ته ره‌نگ ژ كیڤه دئینان!
ته به‌شه‌ك ژ من تژی دكر و هێژ ئه‌زێ لته دگه‌رم
تو تێكه‌لی من دبویی
دزانم به‌شه‌ك ژ ته ژی، تژی ئه‌زم
تو كی؟!!
دزانم ته دڤێت دجیهانا من دا رازێی
یان ببی یه په‌یڤێن من و
ته بگڤێشمه شیعره‌كا خوه
حه‌ژته بكه‌م و تو حه‌ژ من بكه‌ی..
تو كی؟!!
تو به‌رپه‌ركێ نه نڤیسی و
ژ پایزه‌كا ژ عه‌شقێ زیز، ڤه‌قه‌تیایی
ئه‌زێ گازی ته دكه‌م
ب دلێ خو، ب ده‌نگێ خو و ب پیروزیا شیعرێن خو و
تو نه‌شیایی خوه ل به‌ندا شیعره‌كا من راگری
تو هێژ یا ژ په‌یڤێن من دره‌ڤی و
و هێژ ئه‌زێ ل به‌رمایكێن ته دگه‌رم
تو یا دگه‌هی و ئه‌زێ دقفلبونا شیعرێن خوه دا
روندكێن ته هه‌مبێز دكه‌م…
