ڕەنگەکانى تەریقەت

 

(1)
باران تەریقەتى هەموومانە… 
گەر لێمان وون بێ،
کێڵگە بەدارشەقەوەداهۆڵ دەڕوێنێ..
.ئێوارە بە مەلوولییەوە پاشەکشە دەکا،
پەڕسێلکە دەچێتەوە سەر چڵى تیڕمان،
کۆچەر بێ یان نیشتەجێ…!
(2)
تەریقەت هەرگیز نافڕێ،
لە باڵی کۆترێکى کاغەزى…
دڵى عەبەسێک لەوپەڕى سۆفیگەرى…
خولیاى خەیاڵێک لەو دیو باخچەیەکى باغەیى…
مەرحەباى مەتارەیەک لەم دیوجۆگەلەیەکى دوودڵى…!
(3)
بەیانییەک تاڵان مەکەن کە ڕووى لە تەریقەتە…
چونکە سپێدە لە گەروى کەڵەشێردا پیادەو
چریکەى کەنارى لە گەڵاى گزنگدا پیاسەو
چەهچەهەى بولبولیش لە گوڵزارى گوڵا شکۆفە…!
(4)
پەنجەرە بۆ ئەبەد ناچێتە ماڵى تەریقەت،
کە دەڵێین پەنجەرە
دیوار بەهانەى پێدەگرێ و هەر باڵاى بڵند دەکا…
کە دەڵێین پەنجەرە دەرگا نەعلەکانى فڕێ ئەداو
دەم و لێویشى شووشەڕێژ…!
(5)
کە درەختى ماڵەکەمان ڕەشپۆش دەبێ،
ئەوە ئاشوبى دارلاسیکێکە،
لەناوهاروهاجى کۆڵانداخۆى حەشار ئەدا..
کە چۆلەکەیەکیش لەتەریقەت لایداو
ئاسمانى قیرتاو کرد بە نیشتنەوە..
گوناهى درەخت نییە،
کە ئارشیفى سەوزى تیا نییە…
گوناهى دارلاسیک و کۆڵانە
دڵیان هەڵبەز و دابەز دەکا،
بەڵام بۆ عیشق و ئولفەت نا…!
(6)
مەرگ هەمیشە لەگەڵ ژیاندا دانیشتووە،
گفتووگۆ دەکا..
کەژیان تووڕە دەبێ و دەقیژێنێ،
مەرگ فەتوایەکە لە خامۆشى…
هەرچەندە دووانەى شەڕ و ئاشتى
نییە لە فەرهەنگى مەرگا،
بەڵام مەرگ یەکەم تەریقەتە
کە قەناعەتمان پێدەکا…!
(7)
ئاو دەست و قاچ و دڵى هەیە،کە
دەستى ڕوودەکاتە دەوەنێ
لەلق و چڵى سەرى باڵندە چرۆ دەکا و
لە کەڵاکەشى  باڵەکانى….
کە قاچى ڕوو لە جۆگەلە دەکا،
دریژ،درێژچەم دەنووسێ…!
بەپێستى ڕووبارپێڵاو چێدەکاو
بە ڕەنگى دەریاش هەنگاو دەنێ
ئاو تەربقەتە و هەر دەڕواو لاناکاتەوە،
لەسەر چرپایى ئاوەدانى دەنوێ و
کەپایپێکیش دەکێشێ،
دەچێتە عەرشى خەیاڵدان
جارە،جارە دڵى لێئەدا،
بۆ ڕاکردنى بیابان…
(8)
کە ئاسمان تەنگەنەفەس دەبێ،
خەتاى پلیکانەیە بەفیزەوە بەرز بەرز دەڕوانێ…
خولەکێک خەتخەتێن لەگەڵ بێچووى مانگ ناکا…
خەتاى پەردەیە،بستێک پەتپەتێن
لەگەڵ مناڵى خۆرا ناکا…
ئاخر لەخوار پلیکانەوەتەریقەتى عاشقێک،
لە ناڵینا هەیەجان
لەم دیو پەردەشەوە مەعشوقێک،
بە دەست باڵاى دیوارەوە زیندان…!
(9)
واز بێنە لە ئینتەرنێت و مۆبایل و نامەى ئەلەکترۆنى…
وەرە سەرباڵى خەیاڵم بابفڕین،
لەوێ دەچینە سەر فەرشى ئاسمان و
لەوێشەوە فڕین بۆ ناو ئەستێرەکان…
من چاوشارکێ لەگەڵ مەریخ دەکەم و
بە چاوبەستنێ چلەگیایەکى،
دەکەمە ملوانکە و موستیلە…
تۆش قاوەیەک بخەرە سەر،
پشکۆى عیشق و عاتیفە…
من دەزانم هەموو بوونەوەرەکانى ئاسمان،
دەبنە میوانى تەریقەتمان…!
(10)
دواجار حەقیقەت دەبێتە،
هاوڕازى هەموو نەیارەکانى…
وەک دواهەناسەى مۆمێک،
بە فلوتى ڕەشەبایەک…
دواشەپۆلى دەریایەک،
بە خۆشتنى هاوینێک…
دوا پێکردنى گەڵایەک،
بەپایپى پایزێک…
دوا قسەى من وتۆش  ئەى تەریقەت،
کە خۆى حەقیقەتە،
بە ئینقیلابى عیشقێک…!
(11)
زەمەن وانەیەکمان فێر دەکا…
دواى حکومەتى گریان،
حکومەتەکەى پێکەنین…
دواى حکومەتى لە دایک بوون،
باوەشێک بۆ تروپکى گڕوگاڵ…
باوەشێک بۆ هاتنە خوارەوەى گۆڕستان..!
زەمەن وانەیەکمان فێر دەکا…
ئەوەى یەک حکومەتەوعەسکەر تار نییە،
حکومەتەکەى عیشقەوتەریقەتى عیشقستان…!
(12)
هەموو شتێک بەرەو پیرى دەڕوا…
پەردەى پەنجەرەکەم
دەرگاى ژوورەکەم
دەموچاوى ئاوێنەکەم
دەست و پلى چرپاکەم
هەموویان قەموور دەبن و
شێواو بە چرچولۆچى…
تەنها دڵى من و تۆ نەبێ
گەنج دەمێنێ و تۆخ، تۆخ
بە عیشوەى عیشق…ئەى تەریقستان…!
(13)
گەر بە قامچى نیتشە قسە نەکەین،
دوو پەرداخ لە تەرجەمەى
چاو پڕ دەبێ و
بۆ دانیشتنیش دوو کورسى ڕووخۆش،
لە سەر مێزەکەش تەنها
تامى تەریقەتى عیشق چاوەڕێ…!
 (14)
کە تەریقەتم ڕەنگاڵەى دەبێ…
دەهشەتم لەناو لەپى تەڕییا دەڕوا،
ئاوێزە بەند…
تەماشام لەناومشتومڕى گوڵەکاندا هاتووچۆ،
موعتاد بە ڕەنگ…
فەسڵێک لە شەویش دەدەمە
دەستى شەمشەمەکوێرە،
کە دەزانم ئەویش ئەهلى  تەریقەتە…!
(15)
ژن خۆى تەریقەتە…
کە پشتى بەرد دەخورێنێ،
کانى لە پەنجەکانییا هەڵدەقوڵێ…
کەقژى درەخت بە مەقەست دەڕژێنێ،
تەپڵەک و کورسی پێدەکەنێ…
بەڵام کە حەوسەڵەى،
دەخاتەناو چوارچێوەىئاگرێک،
مەرگ تێلى بۆ دەکاو
تەنها بۆ چا خواردنەوەیەک
دەچێتە دوا ژوانى…!