ئه‌و كچا نه‌گه‌هشتی لبه‌ر خودیكێ پرچا خوه شه‌كه‌ت!
“پارچه‌كه ژ چیروكا كچه‌كا حه‌له‌بچه‌یی ب مه‌زنبونا خوه شاد نه‌بوی و خه‌ونێن وێ ماینه هه‌لاویستی “
تێبینی: ئه‌ڤه دوماهیا چیروكا وێ نینه!!!ئه‌و دێ چكه‌ن
یێ روژگارێن من دبه‌ن!راوه‌ستن،
روژگارێن من نڤیسین، دێ بو كیڤه به‌ن؟
هێژ نه‌گه‌هشتیمه به‌ر خودیكێ و
من رویساتیا خوه تێر نه دیتی یه
هێژ پرچا من كه‌هی نه‌بویه شه‌یی..بو بله‌ز
بو ده‌ستێن من رادكێشن
هێژ من عه‌شق نه‌كری یه و
ژبلی ماچێن زاروكینیێ و دلوڤانیێ
دبێژن له‌زه‌تا ماچان هه‌یه
من ئه‌ڤ له‌زه‌ته نه‌دیتی یه
من ئاره‌زوو بو ماچان هه‌یه
بو عه‌شقێ
بو ئه‌ز مه‌زن نه‌بم، ببمه جوانترین كچ
بو گه‌نج جوانیا من نه‌بینن
دگه‌ل مه‌زنبونا سینگێ من و
درێژبونا پرچا من
شاعر، نڤیسینێن خوه تام بده‌ن!دێ من كیڤه به‌ن
راوه‌ستن
ئه‌و چ عه‌ورن، وه خه‌لك تێدا به‌رزه‌كری
من نه‌ڤێت شوی ب عه‌وران بكه‌م!
هوین دسه‌یرن
بو من ژی، په‌یاسه ل جادده‌یێن درێژ نابن
بو من شه‌ڤێن درێژ نابن
بو خه‌ونێن من، دێ بو عه‌وران بن
من بێده‌نگی نه‌ڤێت
من سه‌ما یا دگه‌ل بێده‌نگیێ ژی نه‌ڤێت..ئه‌ڤ مروڤه دسه‌یرن
نزا دێ من به‌ره‌ف كیڤه‌به‌ن!
عه‌ور …
عه‌ور …
عه‌ور…
روژێ روناهیا خوه كیڤه بری یه؟!
ژبلی مژاتیێ چ نابینم..كا ئه‌و زه‌لامێن په‌سنا جوانیا من دكر،
كا…
كا ئه‌وێن دگوتنه من
چه‌ند مه‌زن دبی، جوانتر لێدهێی،
كا…
كا جوانیا من
كا خه‌ونێن من
بێده‌نگ…. هه‌می تشت بێده‌نگ؟!
