Skip to Content

Friday, March 29th, 2024
له‌گه‌ل خودا… عه‌لی سدیق

له‌گه‌ل خودا… عه‌لی سدیق

Closed
by November 4, 2009 ئەدەب

 

ساته‌وه‌ختی هه‌ڵگه‌ڕان بوو
به‌دارو دره‌ختی ژیان
خودا به‌ جانتایه‌ك مردنه‌وه‌ له‌ده‌رگایدا
قاقای ته‌مه‌نی مامناوه‌ندیم سڕبوون
فریا نه‌كه‌وتم پڕ به‌ باڵا هه‌ناسه‌ هه‌ڵكێشم
تا به‌رزتر له‌پێشوازی پێبكه‌نم
كه‌ گه‌یشته‌ ناوه‌راستی حه‌وشه‌
نووزه‌ مه‌كربازه‌كانی نیوه‌شه‌و
جیڕڕڕڕه‌یان له‌ ده‌رگای ته‌نیایم هێناو
مانگ كوژاییه‌وه‌
چاوه‌ گریاوه‌كه‌ی ئاسمانی زولف ره‌ش
له‌دوا ساته‌كانی بێ مانایی
بێ به‌شی كردم له‌ بینینی ژنێكی ته‌نیا
خودا هاته‌ژووره‌كه‌م
به‌ كلكی ئه‌ستێره‌یه‌ك په‌رده‌كه‌ی راكێشایه‌وه‌ سه‌ر وجود و
له‌ دێڕێك شعیردا خه‌واندمی
نووستن له‌ بن باڵی قه‌سیده‌یه‌ك
رۆحدانه‌ تا ئاهه‌نگی زیندووبوونه‌وه‌

خودا ووتی: بۆ شیعر ده‌نووسی؟
وتم:
شیعره‌ مۆنه‌كان شێتن!
خۆیان خۆیان ده‌نووسنه‌وه‌
ئێواران رامده‌كێشنه‌ نێو بلقی كوپه‌یه‌ك چا
سه‌مایه‌كی ده‌ریاییم له‌گه‌ل هه‌ڵم پێ ده‌كه‌ن
له‌ قونكی سیگارێك ده‌مدۆزنه‌وه‌
دوای هاتوچۆكردن به‌ گه‌ده‌ی بیركردنه‌وه‌
له‌ جامێك ماچ ده‌مده‌نه‌ هه‌وا
هه‌واش به‌ لارو له‌نجه‌ بۆ لای تۆم دێنێ
خودا گوتی:
شاعیره‌كان، دڕكن
له‌ كه‌مه‌ری گوڵێك قه‌تیس ماون، تا جوانیه‌كان بشێوێنن
پیاسه‌ له‌ شه‌قامێك ده‌كه‌ن كه‌ پڕه‌ له‌ مێرله‌ی ره‌شپۆش
ئه‌و به‌ پێكه‌نینه‌وه‌ ده‌یگوت
پف له‌م شاره‌ رۆمانسیه‌!
جار جار سیگارێكی شه‌یتانی داده‌گیرسێنن و
ئاگر به‌ قنی “با” وه‌ ده‌نێن
شه‌ماڵ له‌ دایكه‌كان زیز ده‌كه‌ن
چ له‌زه‌تێكه‌ وه‌رگرتنێك ده‌كه‌ن؟
ووتم:
 ژیان بێ له‌زه‌تیه‌و له‌نه‌بوونی مانای
ئه‌مه‌وێ له‌ ساته‌كانی به‌مانایی بوون
نوێژی پاكبوونه‌وه‌ له‌ گوناهه‌كانی ئێوه‌ ده‌كه‌م
چیتر شیعر نه‌نووسم
ئه‌و “با”یه‌ هه‌میشه‌ گولاو بۆ دایكم دێنی
خۆشه‌ویستی منتان پێ ده‌گه‌یێنێ
ده‌ۆڕین بۆ رۆژئاوا،
ئه‌ستێره‌كان له‌ شه‌وێكی خامۆش بكوژێنه‌وه‌
ئاسمان دابه‌زێنه‌ خاكی مرۆڤه‌كان
خودا گوتی: هه‌موویان له‌گه‌ڵ خۆت بێنه‌
شیعر گوتی:
شاعیره‌كان به‌ جه‌هه‌نه‌م،
نزای پیاسه‌یه‌ك شه‌قام
ده‌رفه‌تی گرمه‌یه‌ك راز
له‌مندا بخوێننه‌وه‌
ببنه‌وه‌ تاشه‌به‌رده‌كانی په‌شیمانی
له‌كه‌نار باوه‌شی كه‌لله‌ پوتی نزا بكه‌ن
زه‌ویه‌كان عیشقیان تیا بۆگه‌ن بوو
ماله‌كان مردن
به‌ر له‌ نووسینه‌وه‌ی وه‌سیه‌تنامه‌كان
گه‌ردن ئازادی له‌ ژیان بكه‌ن
ئه‌و دوای مردن زیندوو نابته‌وه‌
خوداش گوتی:
ئه‌وه‌ی ناتوانم بیكوژم
ته‌نیا شیعره‌

Previous
Next
This site is registered on wpml.org as a development site.