چاوپێکه‌وتنی هاوپشتی له‌گه‌ڵ کازم قادر سه‌باره‌ت به یاسایی خۆپیشاندان
کازم قادر : یاسا لە سیستەمی چینایەتیدا تەوقێکە لە ملی مرۆڤ دەکرێت. هیچ شتێک هێندەی یاساو دەستورەکان مرۆڤی لە کۆیلەتییدا ڕانەگرتووە.
یاسايی خۆپیشاندانه‌كان له كوردستان له ماوه‌ی چه‌ند هه‌فته‌ی ڕابردوودا شه‌پۆلێكی فراوانی له “ناڕه‌زایه‌تی” له نێو جه‌ماوه‌ری كوردستاندا خوڵقاند و زۆر شارو شارۆچكه‌ی كوردستان خۆپیشاندانی بێ مۆڵه‌تی له دژی ئه‌م یاسایه به خۆیه‌وه بینی، هه‌روه‌ها له ده‌ره‌وه‌ی كوردستانیش ده‌نگی ناڕه‌زایه‌تی له شه‌قامه‌كانی ژماره‌یه‌ك له پایته‌خت و شاره‌كانی ئه‌وروپا له به‌رانبه‌ریدا به‌رزبۆوه. خودی ده‌ركردنی یاساكه و نیازو مه‌رامه‌كانی پشت ده‌ركردنی و ئه‌و جووڵانه‌وه‌یه، كۆمه‌ڵێك پرسیار دروست ده‌كه‌ن، كه ده‌كرێت له ڕوانگه‌ی جیاوازه‌وه وه‌ڵامی جۆراوجۆریان پێ بدرێته‌وه. له گفتوگۆی ئه‌م جاره‌ی ته‌وه‌ری ماڵپەڕی هاوپشتیدا کازم قادر وه‌ڵامی پرسیاره‌كانی هاوپشتی ده‌داته‌وه.
هاوپشتی: له زۆر سۆنگه‌وه ڕه‌خنه له یاساکه گیراوه، به بڕوای ئێوه سه‌ره‌کی ترین که‌م و کوڕی، یان لایه‌نه جێ ڕه‌خنه‌کانی ئه‌م یاسایه چین؟
کازم قادر:سەرەتا پێویستە بۆچوون و خۆپارێزیی خۆم لە سەر یاساو چەمکی یاسا ڕوون بکەمەوەو پیشان بەدەم. واتە پێویستە ئەوە ڕوون بکەمەوە یاسا چییە؟کێ یاسا دادەنێت و بۆچی یاسا؟ دانەرانی یاساکان کێن و لە چ هەل و مەرج و فەزایێکی کۆمەڵایەتیی و فەرهەنگییدا پرۆسەی یاسادانان بەڕێوە دەچێت!ڕۆسۆ دەڵێت مرۆڤی ژیر پێویستی بە یاسا نییە.بەجیا لەوەی باکگراوندی ڕۆسۆ سەبارەت ئەو ڕستەیە چۆن بووە،بە ڕای من دونیایێکی هزریی گەورەو بێپایان لەپشتی ئەو ڕستە کورتەوە ڕاوەستاوە.ژیر بوون لەو ڕستەیێدا ئەو وشە بێگیان و پوچە نییە کە دەکرێت مەلایێک بە فەقێکەی بێژێت ژیربە.بەڵکو ژیر بوونی مرۆڤ گرێدراوی کۆمەڵگەو کولتورێکە تێیدا ژیان و کۆی پەیوەندییەکانی مرۆڤ لەسەر بنەمای ژیرێتیی ڕێکخرابێت، لەوەش گرنگتر گرێدراوی فەزای کۆمەڵایەتییانەی دونیای بەرابەرییە.چوونکە مرۆڤ لە کۆمەڵگەی چینایەتییدا مرۆڤێکی عەقڵانیی نییە،بەڵکو مرۆڤێکە لەسەر وەهم و مەعریفەی درۆ و ئەفسانەکان دەژێت،هەرچەندە خۆی ماندو دەکات و لە بارەی عەقڵەوە دەدوێت و دەڕێسێت،بەڵام وەهمزەدەیە،خاوەن کولتورێکی شەڕانگێزو جیاخوازییە، پەیوەندییەکانی لەسەر بنەمای خۆپەرستیی و ئارەزووە تایبەتییەکانی خۆیێتیی کە دەکرێت ئارەزوی ساختەو دروستکراوی کولتوریی بن و تێیدا ئەوانیتر زەرەرمەندبن.ئەگەر لە ئاستی سیستەمیشدا بروانین ئەوا مێژووی جەنگ و کورەی سوتاندن و کۆکوژییەکانی مرۆڤ دەبینین کە نەک دەمانباتەوە سەر عەقڵ بەڵکو بەربەرێتێکە خاڵییە لەهەر تایبەتمەندییەکی عەقڵیی مرۆیی بوون،بەم واتایە ئەگەر عەقڵ مرۆڤ نەکاتە مرۆڤ، نەیباتەوە ناو خەسڵەتی مرۆڤ بوون ئەوا هەرچیێک بێت عەقڵ نییە.
دەگەڕێمەوە سەر ئەو پرسیارانەی سەرەوەو پرسیارەکەی ئێوە.بەبۆچوونم هەر کەسێک،هەر نوخبەو ڕێکخراو و پارت و تا دەگاتە دەوڵەت و سیستەمێکی چینایەتیی،یاساو دەستورەکانیان هەرچییەکبن و هەر ناوێکی لێبنێن، دواجار لەسەر بنەمای بەرژەوەندییە چینایەتییەکانی خۆیان هەڵیدەچنن.یاسا لە سیستەمی چینایەتییدا تەوقێکە لە ملی مرۆڤ دەکرێت،هیچ شتێک هێندەی یاساو دەستورەکان مرۆڤی لە کۆیلەتییدا ڕانەگرتووە.جەنگ و کۆکوژییەکانی مرۆڤ،نابەرابەیی و هەژاریی،بە یاسایی کردنی مرۆڤ کوشتن،بە کورتیی هەموو ناشیرینییەکانی ئەم دونیایە،هەمووی لە ڕێگەی یاساوە ڕەوایەتیی وەرگرتوووە.هەروەها فەزایێک کە تێیدا یاساکان دەچەسپێندرێن فەزایێکی ئازاد نییە تا خەڵکی ئازادانەو لە سەر بنەمای بەرژەوەندی و ئارەزووە مرۆییەکانی دەنگی لەسەر بدات، بەڵکو هەموو پرۆسەی یاسادانانێک لەسەروی ویست و هۆشیاریی ئازادانەی مرۆڤە بندەستەکانەوە دەردەچێت.لەم ڕوانگەیێووە من هەموو یاسایێک ڕەت دەکەمەوەو خوازیاری هۆشیارییەکی فەرهەنگیی گەشەکردووی باڵام بۆ مرۆڤ و کۆمەڵگە مرۆڤایەتییەکەی،ئەگەر یاساو نەرێتێکیش هەبێت،دەبێت بەناو ئەو کەشە ئازادو فەرهەنگە باڵاو مرۆییەدا بێنەدەرو ببنە مێنتالیتێتی مرۆڤەکان.ئەمە دەکرێت خەونێک بێت یانیش وەکو خەونێک وێنای بکەین، بەڵام مرۆڤ دەتوانێت لە ڕێگەی عقل و تێورییەوە و بە تێگەییشتن لە خەسڵەتە مرۆییەکانی مرۆڤ دەرکی بکات و زەمینەی بە واقیع بوونی ببینێت!
بەڵام تا ئەو کاتەی مرۆڤ لە سایەی ڕەشی یاساکاندا دەژێت،پێویستە تێبکۆشێت،خوازیاری یاساو دەستورێک بێت بتوانێت تێیدا خاوەنی دەنگێکی ڕێژەیی بێت و لەناو ژیاندا پێگەیێک بۆ بوونی دەستەبەر بکات.لەم ڕووەوە مێژووی مرۆڤایەتیی مێژووی قوربانییە گەورەکانە بۆ ئازادیی،هەم مێژووی داسەپاندنی یاساکانەو هەم نەفییکردنەوەو فڕێدانیان!
سەبارەت یاسای قەدەغەکردنی خۆپیشاندانی دەسەڵاتی کوردیی،ئامانجێکی ئەوەیە کە لەسەرەوە باسم کرد،لایێنی دووهەمیش خودی یاساکەو خەسڵەتەکانێتی کە بەباوەڕم نەک دەکاتە بەرتەسکردنەوەی ئازادیی و مافی خۆپیشاندان،بەڵکو دەمداخستن و لەغاوکردنێکی ڕەهایە تا کەم و کوڕیی و ئەو شتانە.هەروەها ئەو درێژدادڕیی و هێنان و بردنەی لە وشەو ڕستەو مادەکاندا هاتووە،هەمووی بە ئاراستەی لە قاڵبدان و داکوتانی هەر جوڵەو چالاکییەکی جەماوەرییە.ئەو پەیامەی لەو یاسایێدا هاتووە ئەوەیە بە خەڵکی دەڵێت:دەبێت ئاگەداربن چوونکە ئەوە یاسای خوێن حەڵاڵکردنی ئێوەیە،یاسای گرتن و تێهەڵدان،تێزابی فرمێسکڕێژ،گۆپاڵ وەشاندن و زیندانییکردن و دوا ئامرازیش خوێن ڕشتن!لەوانەیە بۆ هەندێک کەس وا بێتە پێشچاو کە من هەم زیادەڕۆیی دەکەم و هەم وێنەیێکی زۆر ناشیرین و ترسناک و هەروەها ناواقیعی ئەو یاسایە دەکێشم،بەڵام بە پێچەوانەی ئەو وێناکردنەوەوە،کە لەوانەیە لای هەندێک کەس دروست بێت،بە وردبوونەوە لە یاساکەو لە خەسڵەت و کارنامەی دەسەڵاتی کوردیی هیچ گومانێک نامێنێتەوە.
دەزانم بێمانایە دانیشین و تەفسیری ئەو بڕگەو مادانە بکەین کە لەو یاسایەدا هاتووە،بەڵام بە ناچاریی و بۆ بەرچاو ڕوونیی بڕێک لەو دەستەواژانە دەگوازمەوە کە لە دەقە یاساییەکەدا هاتووە.(یەكەم: داواكاری رێكخستنی خۆپیشاندان لەلایەن لیژنەوە پێش وادەی ئەنجامدانی بە (48) كاتژمێر بە لایەنی كەم …
دووەم: پێویستە داواكارییەكە ناونیشان و ئیمزای ئەندامانی لیژنەی سەرپەرشتی كاری رێكخستنی خۆپیشاندانەكە بگرێتە خۆ و مەبەستەكەشیان لەوبارەیەوە روونبكرێتەوە، رێگەی رۆیشتنەكەیان و كات و شوێنی دەستنیشان بكرێت… سێیەم: دەزگاكانی پۆلیس بەگوێرەی یاسا كارپێكراوەكان، رێكاری یاسایی دەرهەق بە سەرپێچیكاران دەگرنەبەر…) یەكەم: وەزیر یان سەرۆكی یەكەی كارگێڕی، لەحاڵەتی دەرچوونی خۆپیشاندانەكە لەئامانجی خۆی یان كاتی دیاریكراوی خۆی، بۆی هەیە پاش راوێژكردن لەگەڵ لیژنەكەدا، خۆپیشاندانەكە بڵاوەی پێ بكات… ئەگەر لەكاتی خۆپیشاندانەكەدا ئاسایش یان سیستەمی گشتی یان ئادابی گشتی تێكدرا، یان زیان بە ئەوانی دی یان بە سامانی گشتی یان تایبەتی گەیشت، یان خۆپیشاندانەكە لەئامانج و مەبەستی دیاریكراوی دەرچوو، سەبەبكاران بەرپرسایەتی قەرەبوو كردنەوەی ئەو زیانەیان دەكەوێتە ئەستۆ كە بەو هۆیەو دەكەونەوە… هەر كەسێك سەرپێچی حوكمەكانی ئەو یاسایە بكات، سزای بەندكردنی بەسەردا دەسەپێت…) هێڵی جەختکردن هی منە. وەک دەڵێن ئەوە مشتێکە لە خەروارێک،من هیچیتر لەو بارەوە ناڵێم،با خوینەر خۆی هەڵیانبسەنگێنێت.
هاوپشتی: ئایا هه‌ڵوێستی دروست که به بڕوای ئێوه پێویسته ڕه‌خنه‌گرانی ئه‌م یاسایه و جه‌ماوه‌ری ناڕازیی له‌سه‌ر کۆک و یه‌کگرتوو بن چییه؟ ئایا ئه‌م یاسایه هه‌موار بکرێته‌وه، یان ڕه‌ت بکرێته‌وه‌و به یه‌کجاری وه‌لا بنرێت؟
کازم قادر:خۆپیشاندانە جەماوەرییەکان پەرچەکردارو هەڵوێستی دروست بوون،دەنگ و تروسکەیێکی ئومێدبەخشی کۆمەڵایەتییە لەنێو دونیایێکی تاریکدا،پێویستە دەستی پێوە بگیرێت و ئاراستە بکرێت.هەوەها بۆ هەموو ئەو کەس و لایێن و ئەو جەماوەی بە دژی ئەو یاسایە هاتنە سەر شەقامەکان و بەدەنگی بەرز”نا”یان بەو یاسایە گوت، پێویستە هیج سازشێک نەکەن و یاساکە ڕەتبکەنەوە،چوونکە بەڕاستیی ئەو یاسایە یاسای کۆت و بەند کردنە، جگە لە ڕواڵەتی ئاسنینی یاساکە لە هەمانکاتدا هێند درێژدادڕو لاستیکییە دەسەڵات چۆن ئارەزوو بکات ئاوا بەکاری دێنێت.هەروەها دەتوانین ئەوەش بڵێین کە بەجۆڕێک یاساکە لەلایێن بەشێکی بەرچاو و چالاکی جەماوەری کوردستانەوە ڕەتکرایەوە و فشارو نیگەرانیی بۆ دەسەڵات دروست کرد،ئەوەش کە دواجار دەتوانێت ئەو یاسایە لەکار بخات،بەردەوامیی و فشارە کۆمەڵایەتییەکان و هاوسەنگیی هێزەکانە.
هاوپشتی: هه‌ندێک پێیان وایه که له بناغه‌وه پێویستمان به یاسای خۆپیشاندان نییه. ئایا خۆپیشاندان له کوردستان پێویستی به یاسا هه‌یه به بڕوای ئێوه؟ ئه‌گه‌ر به‌ڵی ، بۆچی؟
کازم قادر:ئەوەمان لەبیر نەچێت کە من بۆچوونی خۆم لەسەر کۆت وبەندەکانی یاساو ئامانجەکانیدا،ئەگەر بە من بکرێت نا بە یاسای خۆپیشاندان و بەربەستکردنی هەر چالاکییێکی کۆمەڵایێتیی دەڵێم،پیویستە خەڵک ئازادبن و ئەو ئازادبوونەش بە بۆچوونم لە کێشمەکێشی نێوان هەردوو بەرەی ئازادییخوازیی و دژی ئازادییدا دەبڕێتەوە، ئەگەر یاسایێکیش هەبێت پێویستە ئازادیی بێمەرجی تەواوی ناڕەزایێتییەجەماوەرییێکان بە ڕەسمیی و ڕاشکاوانە بناسێت،لە ژێر هیچ بڕوبیانویێکی پڕوپوچی وەک تێکدانی ئادابی گشتیی و ئاساییشی گشتیی و زۆر فریوکارییتر شاڵاو نەکاتە سەر خواست و ئازادییێکانی خەڵک.
هاوپشتی: مه‌رامی ده‌سه‌ڵاتدارانی کوردستان له ده‌رکردنی یاسای خۆپیشاندان چییه؟
کازم قادر:هەڵبەت دەرکردنی ئەو یاسا دژی ئازادییە بێئامانج نییەو هۆکاری بابەتیی خۆی هەیە.بەبۆچوونم دوو هۆکاری پایەیی لە پشتی دەرکردنی ئەو یاسایەوە هەیە،هۆکار یان خاڵی یەکەم ئەوەیە کە،دەسەڵاتی کوردیی بە جۆرێکی ترسناک بەرەو کۆنەپەرستیی و ستەمگەریی چووە،هەر ئەوە کە ئەمڕۆ مەلاکان حکومەتێکن لە ناو حکومەتدا نمونەیێکی بەرچاو و بەرجەستەیە.کۆنەپەرستیی و باوەش کردن بە نەرێتە کۆن و ژەنگرتووەکاندا لەلایێن دەسەلاتەوە،یەکێکە لە تەقەلا گەورەکانی ناسیونالیزمی دەسەڵاتداری کورد بۆ مانەوەو ژیانێکی زیاتر، کە دەتوانین ئەو ماناوەیە لە هەناوی کۆنەپەرستییدا وەک تراژیدیای ئەو دەسەڵاتە ببینین.ئەوەش کە بۆچی چارەنوسی ئەو دەسەڵاتە پەیوەستە بە بەرەی کۆنەپەرستیی و نەرێتیی و دواجار ستەمگەریی و بەرتەسکردنەوەی ئازادییەوە،هۆکار زۆرن و من تەنها لەسەر یەک خاڵی گرنگ ڕادەوەستم،ئەویش سیاسەت و کارنامەی بیست ساڵی ئەو دەسەڵاتەیە لەبەرامبەر خەڵکی ستەمکێش و بەشمەینەتی کوردستان،واتە مێژوو و کارنامەی ئەو دەسەڵاتە هێند تارێک و ستەمگەرو بێداد بووە،ئەوی بە ئاقارێکدا بردووەو خەسڵەتێکی سیاسیی و کولتوریی هێند کۆنەپەرستی تێدا چاندووە،تروسکەی هەر ئاڵ و گٶڕو جاکسازییەکی لێبڕیوە،ئەو گەندەڵییە سیاسیی و ئابوریی و ئیداریی و کۆمەڵایەتییە لە سەردەستی دەسەڵاتی کوردیی_پارتیی و یەکێتیی_زامێکی بچووک نییە بتوانێت لە ڕێگەی بڕێك چاکسازیی وئاڵوگۆڕ لە ژیانی خەڵکیدا چارەسەری بکات.چونکە چاکسازیی کۆمەڵایەتیی وەهمی بە دوبەی(بەدەویی)کردنی هەولێرو کوردستان نییە،بەڵکو مەرجی پایەیی چاکسازیی کۆمەڵایەتیی،بیناکردنی نەرێت و فەرهەنگێکی پێشکەوتوو و مرۆییە،ئاڵ و گۆڕی ڕیشەییە لە دونیابینی کۆمەڵگەدا بە ئاقاری یەکسانیخوازیی،مافی یەکسانی ژن و پیاو،مافی منداڵ،پەروەردەی پێشکەوتوو بەدوور لە هەر خورافاتێکی ئایینیی و خێڵەکیی و دەمارگیرییەکانی فەرهەنگیی.مەبەستم ئەوە بڵێم ئەم ئاڵ و گۆڕە بەو دەسەڵاتە گەندەڵە ناکرێت،چاکسازیش ئەگەر نەکاتە دادگەیی کردنی ئەو دەسەڵاتە دەکرێت ناویدی لێبنێین بەڵام چاکسازیی نییە.بەم دەلیلانە تەنها ئامرازێک کە بەدەست دەسەڵاتی کوردییەوە ماوە،سەرکوت و زەبروزەنگە،مەرامی دەرکردنی ئەو یاسا تۆقێنەرەش تەنها لەو چوارچێوەیەدا واتای هەیە.
هۆکارو خاڵی دووەم هۆشیاربوونەوەی خەڵکی کوردستانە بە ماف و ئازادییەکانیان،ئەو ناڕەزایەتییە خەفەکراوە جۆشخواردووەیە کە بەبۆچوونم تەنها چاوەڕێی هەل و ڕێکەوتێک دەکات تا بتەقێتەوە،ڕێکەوت وەک چەمکێکی خورافیی نا بەڵکو وەک زەرورەتێکی مێژوویی و پەرچەکرداری مادیییانەی پەیوەندییەکان (وەک ئەوەی لە تونس بینیمان،گەنجێک خۆی دەسووتێنێت و بە دوایدا دەسەڵاتێکی ستەمگەر هەرەس دێنێت).وەک ئەوەی کە جەنگی پارتیی و یەکێتی لە کوشتنی قازێکەوە دەستی پێکرد!دەکرێت بە کوشتنی مراویێک و لە هەل و مەرجێکی تایبەتدا جەنگی خەڵک و دەسەڵاتیش بەرپابێت…!)
ئەو ناڕەزایەتییانە نەک نابێت کەم وەربگیرێن بەڵکو بەبۆچوونم چەشنی پریشکی بورکان وایە،لە پرۆسەی چڕبوونەوەو تەقینەوەدایە،دەرکردنی ئەو یاسایەش دەلیلی هۆشیاربوونەوەو دەرککردنی دەسەڵاتدارانە بەو تەقینەوەیە،هەوڵێکە لە ڕاستای بە یاسایی کردنی فەزای سەرکوت.لە بیرمان نەچێت کە دەسڵاتی کوردیی لە سەرکوتکردنی بێپەردەی خەڵکیدا شکستی خوارد(ئەگەرچی قەت دەستیشی لێهەڵناگرێت)بەبۆچوونم دەرکردنی ئەو یاسایە بەیانێکی ئەو شکستەیە.تێرۆرکردنی سەردەشت عوسمان ئەو شکستەی بە ڕوونیی پیشاندا،بە واتایەکیتر تێرۆرکردن و سەرکوتی بێپەردە باجی گەورەی بە دواوەیە،ئەو یاسایە شێوازێکیتری سەرکوت و تۆقاندنە و ڕەوایەتییدانە بە هەمان کردە بەڵام لە ڕێگەی یاساوە.
هاوپشتی: هه‌ندێک ناوندی ده‌سه‌ڵاتدارانی کوردستان ده‌ڵێن که سه‌ره‌ڕای که‌م و کوڕیه‌کان ئه‌م یاسایه پێشکه‌وتوو ترین یاسایه له ناوچه‌که، ڕای ئیوه له‌و باره‌یه‌وه چییه؟
کازم قادر:بێگومان لە بازاڕی سیستەمی چینایەتییدا هەموو کاڵایێک بازرگان و بازاڕی خۆی هەیە.بازاڕی ژەهریش هەیە،دەیفرۆشن و دەیکڕن و مرۆڤی پێژەهرخوارد دەکەن.ئینجا بەڕاستیی دەسەڵاتێک ئەگەر شەرم نەکات و بەراوردی خۆی لەگەڵ دەسەڵاتی ناوچەکەدا بکات،هیچ ناکات بێجگە نماییشکردنی ڕەهای کۆنەپەرستیی و دواکەوتووی خۆی!ڕژێمەکانی ناوجەکە کێن؟جمهوریی ئیسلامیی مرۆڤ کوژو ڕژێمی سێدارەو شەلاق،تورکیای فاشیی،کە سانسۆر لەسەر ناوێکی کوردیی بۆ منداڵێک دادەنێت،سوریای بەعسی و مەملەکەتی شێخە کۆنەپەرستەکانی خەلیجە،ڕژێمی شەلاقکاریی و دەست بڕین و بە کۆیلەکردنی ژنان.
هاوپشتی: جووڵانه‌وه‌ی ڕه‌تکردنه‌وه‌ی ئه‌م یاسایه هێشتا به‌رده‌وامه‌‌و له‌گه‌لێک جێگا جه‌ماوه‌ر نایان به‌م یاسایه ووت، ئه‌م جووڵانه‌وه‌یه چۆن هه‌ڵده‌سه‌نگێنن‌و ئاسۆی سه‌رکه‌وتنی چۆن ده‌بینین؟
کازم قادر:وەک پێشتر گوتم بزوتنەوەیێکی ئومێدبەخشە،ئەگەرچی ناڕێکخراوەو ستراتیجێکی ڕوون و دیارییکراوی نییە،بەڵام ڕیشەیێکی کۆمەڵایەتیی و مێژووییی هەیە،بزوتنەوەیێکی زیندوو پڕ ژیانە،ڕیشەی لەو بێدادییە سیاسیی و ئابورییە ترسناک و زەبەلاحەدایە کە دەسەڵاتدارانی کوردستان خولقاندوویانە،جوڵانەویێکە گەشە دەکات و سەرکەوتنیش لە حەتمییەتی ئەو گەشەکردنەدایە.
هاوپشتی: هه‌لوێستی هێزه سیاسیه‌کانی ده‌ره‌وه‌ی حکومه‌ت له کوردستان سه‌باره‌ت به‌م کێشه‌یه چۆن ده‌بینن؟
کازم قادر:پێویستە بپرسین هێزە سیاسییەکانی دەرەوەی دەسەڵات کێن؟چوونکە بڕێک لەو پارت و ڕێخکراوە سیاسییانە هێز نین،بەڵکو دوکانداری سیاسیین،مانگانە مەعاشی خۆیان وەردەگرن و بڕایەوە.هێندەی بە بزوتنەوەی گۆڕان و یەکگرتوو و کۆمەڵ دەگەڕێتەوە کە لە حکومەت و پەرلەمادا بەشدارن و کورسییان هەیە و بەهرەمەندن لە پێگەیێکی جەماوەریی،ئەوانیش هێزگەلێکی سات و سەوداچی،هەلپەرست و سازشکارن.سیاسەتی ئەو هێزانە کۆنترۆڵکردنی ناڕەزایەتییەکانە بۆ فشارخستنە سەر دەسەلات و داپچڕینی ئیمتیازاتی زیاتر بۆ خۆیان.هەروەها هەڵوێستیان لە بارەی ئەو کێشەیەوە شەرمنۆکانەو دووفاقییە،لە پشتی پەردەوە نماییشێک دەکەن و لە سەر شانۆش نماییشێکی دی، ئەو هێزانە هەر هێندەیان پێدەکرێت و بە بۆچوونم نوێنەری پریشکی بورکانەکە نین…!
کازم قادر
21.01.2011
