Skip to Content

Sunday, May 19th, 2024
كه‌ گوڵ ده‌چێته‌ نێو ئینجانه‌یه‌ك له‌ موحیبه‌ت

كه‌ گوڵ ده‌چێته‌ نێو ئینجانه‌یه‌ك له‌ موحیبه‌ت

Closed
by February 15, 2011 هۆنراوە

سه‌رهه‌نگ خامۆش 
 
                      
كه‌ ده‌تبینم
چاوه‌كانم
له‌نێو چاوی تۆ ده‌ڕوێن
په‌نجه‌كانیشم
له‌ نێو تاڵه‌به‌ندی قژی خاوت
له‌پڕ چه‌پكێ گوڵی وه‌نه‌وشه‌یی
له‌ سه‌ر لێومان
چرۆ ده‌كا

كه‌ ئاوڕم لێ ده‌ده‌یته‌وه‌
وا هه‌ست ده‌كه‌م
تازه‌ خۆر
له‌ باخه‌ڵی هه‌ورا
پرچی خۆی شۆڕ كردۆته‌وه‌

كه‌ گوڵ ده‌چێته‌ نێو
ئینجانه‌یه‌ك له‌ موحیبه‌ت
به‌ (ئاو) ده‌ڵێ
په‌ڕه‌كانم ته‌ڕكه‌ له‌ خۆت
به‌یانی عاشقێك
ده‌مكا به‌ دیاری
بۆ دڵداره‌كه‌ی
هه‌ناسه‌ی پڕ ده‌كه‌م
له‌ عیشق

ئه‌مشه‌و
نغرۆی یادگاریه‌كانم بووم
خۆشترین سات
هه‌ڵفڕینی كۆلاره‌ یه‌ك
له‌ ئاسمانی منداڵیم بوو

شۆڕه‌بیه‌ك
له‌ ته‌نهایی
خۆی ڕووت كرده‌وه‌
(با) فیكه‌یه‌كی بۆ لێدا
هه‌ور له‌ باران
گوناهه‌كانی شوشته‌وه‌
شاعیرێك به‌ شیعرێ
ماكیاژی كرد

هه‌موو به‌یانیه‌ك
له‌ سوچێكی شه‌قامێكدا
كه‌ ئه‌فسونمان
تێكه‌ڵ به‌ یه‌كتری ده‌بێ
ئه‌م ناوه‌
پڕ ده‌بێت له‌ گوڵ
تۆش ده‌بی به‌ شوشه‌یه‌ك
پڕ له‌ عه‌تر…!!

Xamosh_s@hotmail.com                                                                      

Previous
Next
This site is registered on wpml.org as a development site.