بهیاننامهیهک له لایهن ڕامیار مهحمودهوه
بهیاننامهی ژماره یهك
جیهانی ئیسلامی- عهرهبی به وهرزی كهوتنی دیكتاتۆرهكاندا تێپهڕ دهبێت ئهم وهرچانه بێ ئهندازه گرنگ و مێژووییه ئهگهرچی ئێمه بۆچونمان وایه ئهمه تهنها وهرزێكی سیاسییه لهو رووهوه وهرچهرخانهكه تهنها به دهستكاریكردنی ئاستی سیاسییهوه دهوهستێت و نوێنهرایهتی دابرانێكی كهلتوری و مهعریفی و كۆمهڵایهتی ناكات و جیا بونهوهی دوو سهردهمی كۆمهڵایهتی و كهلتوری نییه له یهكتر . بهڵام له گهڵ ئهوهشدا گۆرانی سیستهمی سوڵتانیزم له رۆژههڵاتی ناوهڕاستدا دهروازهیهكی گرنگ ئهبێت بۆ پرسیاركردن و رهخنهكردنی ئاستهكانی تری كۆمهڵگا . ئهوهی پهیوهندی به به ههرێمی (كوردستان) هوه ههیه سهرباری كهوتنی دیكتاتۆرییهتی بهعس له ساڵی 1991 دا و كهوتنی یهكجاری رژێمی بهعسیش له سهرتاسهری عێراقدا له 2003 هوه بهڵام هێشتا نهیكرده دروستبوونی كۆمهڵگایهكی پێچهوانه به عسیزم و فاشیزم. دابرانهكه له سهر هیچ كام له ئاستهكان نهگهشتنه شوێنی خۆیان كه دهبوایه و پێویست بوو ستراتیجێكی عهقڵانی بۆ دیسهنتراڵیزهشنی سیاسی له ئارا دهبێت و كایهی سیاسی رهههندێكی ئاسۆیی وهر بگرێت نهك شاقوڵی و سهنتریزمی حزب و گهرانهوهی به شێوهیهكی كولانی ئهستهم بوایه و دامهزراوهی سیاسیش به حزب و حكومهتهوه به شێوهیهك دیزان بكرایه ببوایه به فاكتهری گهشهسهندنی دیموكراسی نهك به پێچهوانهوه. له سهر ئاستی ئابوری و كۆمهڵایهتیش دهبوایه گهشهسهندێكی ههمهڵایهنهو گشتگیر له ئارادا بوایه نوێكردنهوهیهك له ئاستی خهون و تهوهقوعی خهیاڵی كۆمهڵاهیهتیدا بێت. ههروهك چۆن دهبوو له سهر ئاستی كهلتوری له ناو پارادایمێكی نوێ كهلتوریدا بوینایه كه عهقَڵ سهروهری و رهخنه و كرانهوه و دیاڵۆگ ببوایه به مۆراڵی گشتی. بۆیه له ئێستادا رووبهروو له گهڵ قهیرانێكی راستهقینهی سیاسیداین ئهگهر به وریاییهوه مامهڵهی له گهڵ نهكرێت ئهگهری ئهوهی ههیه چهندین سهرئهنجامی نهخوازراو و نهویستراوی لێ بكهوێتهوه وهك ههڵوهشانهوهی یهكێتی كۆمهڵایهتی و ئیداری و سیاسی له كۆمهڵگای ههرێمی كوردستاندا و ترازان بۆ ناو ئهگهری شهڕی ئههلی و قهیرانی بێ سهر و بن. بۆیه له روانگهی منهوه دوا پرۆژهی هاوبهشی ههر سێ لایهنه بهرههڵستكارهكه. پرۆژهیهكی ئیجابیهو ناچێته خانهی داخاوازی تهعجیزی و رادیكالانهوه و به شێویهكی گشتی عهقڵانی و قابیلی مهشقپێكردنهو هیوادارم دهرگا له سهر سهردهمێكی تازهی پێكهوه ژیانی سیاسی و كۆمهڵایهتی و كهلتوری بكرێتهوه.
رامیار مهحمود
سهرنوسهری گۆڤاری كۆنسێپت
