Skip to Content

Sunday, April 21st, 2024
په‌رله‌مانی كوردستان خاوه‌ن بڕیار نیه‌و…

په‌رله‌مانی كوردستان خاوه‌ن بڕیار نیه‌و…

Closed
by March 22, 2011 گشتی


په‌رله‌مانی كوردستان خاوه‌ن بڕیار نیه‌و
بڕیاری مه‌كته‌ب سیاسییه‌كان جێبه‌جێ ده‌كات 
   نه‌جات ئه‌سپینداره‌یی  
  

بێگومان ئه‌مرۆ ره‌وشی كوردستان به‌ قۆناغێكی گرنگ و مێژوویی دا تێده‌په‌رێت و ئه‌زموونه‌كه‌مان له‌ به‌رده‌م تاقیكردنه‌وه‌یه‌كی گه‌وره‌ دایه‌ ، بۆیه‌ پێویسته‌ به‌ عه‌قلێكی گه‌وره‌و ژیرانه‌ مامه‌ڵه‌ له‌گه‌ڵا روداوه‌كاندا بكه‌ین ، نابێ به‌ ساده‌یی شته‌كان به‌سه‌ر بكه‌ینه‌وه‌ به‌ڵكو ده‌بێ جه‌وهه‌ری مه‌سه‌له‌كان وه‌رگرین و به‌ قووڵی لێیان تێبگه‌ین ، ده‌بێ به‌رژه‌وه‌ندی حیزبایه‌تی و به‌رژه‌وه‌ندی كه‌سایه‌تی و هه‌رچی شتی تایبه‌تی هه‌یه‌ هه‌مووی له‌ خزمه‌تی ئامانجێك دابێ كه‌ به‌رژه‌وه‌ندی گشتی یه‌ , له‌م قۆناغه‌ ناسكه‌دا ده‌بێ گه‌ل سه‌رچاوه‌ی بڕیارو ده‌سه‌ڵات بێ نه‌ك حیزبه‌كانی ده‌سه‌ڵاتدار , چونكه‌ ئێمه‌ له‌ به‌ره‌به‌یانێكدا ده‌ژین كه‌ زنجیره‌یه‌ك گۆڕانكاری گرنگ له‌سیسته‌می سیاسی ناوچه‌كه‌دا ڕووده‌ده‌ن و ده‌سه‌ڵاتداره‌كان ناچار ده‌كرێن یان كورسییه‌كانیان چۆل بكه‌ن یان ملكه‌چی داخوازییه‌كانی گه‌ل بن , ده‌سه‌ڵاتدارانی كوردیش نه‌یانتوانیوه‌ یاخود نه‌یانویستووه‌ چوارچێوه‌یه‌ك بۆ حه‌زو ئاره‌زووه‌ بێ سنوره‌كانی خۆیان دابنێن , ئه‌وه‌ی ده‌یكه‌ن و ئه‌وه‌ی ده‌یانه‌وێ بێ سنوره‌ , به‌ڵام ئه‌گه‌ر یه‌كێك باسی گه‌نده‌ڵی و پاوانخوازییان بكات هێڵی سوره‌ , كێشه‌ی سه‌ره‌كی گه‌له‌كه‌مان ئه‌وه‌یه‌ هه‌موو بڕیارێكی چاره‌نووسساز به‌ده‌ستی حیزبه‌كانه‌وه‌یه‌و میلله‌تیش له‌ كارو كرده‌وه‌و سیاسه‌تیان بێ ئاگایه‌ , به‌ په‌ڕاوێزخستنی خه‌ڵك یاخود هاوكاری نه‌كردنی ده‌سه‌ڵات و خه‌ڵك له‌گه‌ڵ یه‌كتری وای كردووه‌ كه‌ نه‌توانن به‌سه‌ر كێشه‌و گرفته‌كاندا زال بن و چاره‌سه‌ریان بۆ بدۆزنه‌وه‌ , ده‌سه‌ڵاتیش چۆن ده‌توانێ بیروڕای خه‌ڵك وه‌ربگرێ و له‌نزیكه‌وه‌ ڕاوێژیان له‌گه‌ڵدا بكات بێگومان له‌ڕێگای په‌رله‌مانه‌وه‌ ده‌بێ , چونكه‌ په‌رله‌مان گوزارشت له‌ ڕای خه‌ڵك ده‌كات , به‌مه‌رجێك ئه‌گه‌ر ئه‌و په‌رله‌مانه‌ ئازادی تێدا هه‌بێت و ئازادیه‌كه‌ی له‌نێو چواردیواردا خه‌فه‌ نه‌كرابێت , په‌رله‌مان ده‌بێ ده‌زگایه‌كی سه‌ربه‌خۆ بێت و نابێ هیچ ده‌سه‌ڵاتێك فه‌رمانی به‌سه‌ردا بكات , به‌ڵكو ده‌بێ هه‌موو ده‌سه‌ڵاته‌كان هه‌موو دام و ده‌زگاكان گوێڕایه‌ڵی په‌رله‌مان بن و بڕیاره‌كانی په‌رله‌مان جێبه‌جێ بكه‌ن  چونكه‌ بڕیاری په‌رله‌مان بڕیاری گه‌له‌ , هه‌روه‌ها ده‌بێ ئازادی سیاسی و جیاوازی بیروڕا له‌نێو په‌رله‌ماندا هه‌بێ چونكه‌ ئه‌گه‌ر هه‌موویان وه‌كو یه‌ك بیربكه‌نه‌وه‌ ئه‌وه‌ پڕ مه‌ترسی یه‌و مۆركێكی دكتاتۆری به‌خۆوه‌ ده‌گرێ , ئه‌گه‌ر فراكسیۆنه‌كان ببن به‌یه‌ك ده‌نگ و وه‌كو یه‌ك بیر بكه‌نه‌وه‌و وه‌كو یه‌ك بجولێن و وه‌كو یه‌ك ده‌ست به‌رزبكه‌نه‌وه‌و وه‌كو یه‌ك بێده‌نگی بنوێنن , ئه‌وه‌ وه‌ك پۆلی قوتابخانه‌ وایه‌ مامۆستا بڵێ ( دارا دوو داری دی ) ئه‌وانیش هه‌موویان پێكه‌وه‌ بڵێن دارا دوو داری دی , ئه‌وكاته‌ هیچ مانایه‌ك بۆ دیموكراسی نامێنێته‌وه‌و ئه‌م ده‌زگایه‌ شه‌رعییه‌ ده‌كه‌وێته‌ ژێر پرسیارو گومانی خه‌ڵكه‌وه‌ , ئێستاش كه‌ 17 ڕۆژ به‌سه‌ر خڕۆشان و خۆپیشاندانه‌كانی شاری هه‌ڵمه‌ت و قوربانیدا تێده‌په‌ڕێت , كه‌چی هێشتا په‌رله‌مانی كوردستان نه‌یتوانیوه‌ پرۆژه‌یه‌ك ده‌ربكات كه‌ خه‌ڵك پێی ڕازی بێت و بارودۆخه‌كه‌ هێور بكاته‌وه‌ , چونكه‌ هه‌ر پرۆژه‌و بڕیارێك ده‌ربكات ده‌بێ به‌ڕه‌زامه‌ندی هه‌موو مه‌كته‌ب سیاسییه‌كان بێت كه‌ ئه‌مه‌ش پێچه‌وانه‌ی به‌رژه‌وه‌ندی گه‌له‌ , هه‌موو حیزبه‌كانی ناو په‌رله‌مان به‌تایبه‌تی بزوتنه‌وه‌ی گۆڕان بۆ ئه‌وه‌ی جیاوازبوونی میتۆدو ئایدیای خۆی بسه‌لمێنێ و جه‌ماوه‌ر بۆخۆی په‌یدا بكات و هه‌له‌كه‌ بۆخۆی بقۆزێته‌وه‌ ناوه‌ناوه‌ هه‌ندێك پرۆژه‌و بڕیارو خاڵ ده‌رده‌كات , به‌ڵام خه‌ڵكی خۆپیشانده‌ر پێی رازی نیه‌ چونكه‌ ده‌زانن هه‌موویان گه‌ڵای یه‌ك دره‌ختن , لێره‌دا مه‌ترسی یه‌كه‌ له‌وه‌دایه‌ كه‌ ته‌ماشاده‌كه‌ی ئه‌و هه‌موو گه‌شه‌كردن و پێشكه‌وتن و ئازادییه‌ بێ سنوره‌ی له‌دنیادا ده‌بیندرێن و رۆژ به‌ رۆژ زه‌مینه‌یان بۆ خۆشتر ده‌كرێت و یاسا له‌سه‌رووی هه‌مووشتێكه‌وه‌یه‌و ده‌زگای یاسادانانیش گه‌وره‌ترین ده‌زگایه‌ , كه‌چی له‌ وڵاتی ئێمه‌دا سیاسه‌ت له‌سه‌رووی یاساوه‌یه‌و مه‌كته‌ب سیاسییه‌كانیش گه‌وره‌ترین ده‌زگان , باشه‌ شه‌وكه‌ت و شكۆی په‌رله‌مان له‌ كوێ دایه‌ ئه‌گه‌ر كاریگه‌ری حیزب و ده‌سه‌ڵاتی به‌سه‌ره‌وه‌بێ و بڕیارو ڕاسپارده‌ی مه‌كته‌ب سیاسییه‌كان به‌سه‌ریدا فه‌رز بكرێن , ئایه‌ وه‌زیفه‌ی په‌رله‌مان هه‌ر ئه‌وه‌یه‌ كه‌ بڕیاره‌كانی مه‌كته‌ب سیاسی هه‌ردوولا تاوتوێ بكات و به‌بێ سێ و دوو ڕه‌زامه‌ندییان له‌سه‌ر بدات ,  په‌رله‌مانی ڕاسته‌قینه‌ ده‌بێ وه‌كو ئه‌نجومه‌نێكی باڵا یاخود وه‌كو ده‌زگایه‌كی خاوه‌ن هه‌یبه‌ت ته‌ماشا بكرێ و هه‌موو به‌رپرس و ده‌سه‌ڵاتداره‌كان بگه‌ڕێنه‌وه‌ بۆ ئه‌و ده‌زگایه‌و له‌وێ كێشه‌و گرفته‌كانیان چاره‌سه‌ر بكه‌ن , لێره‌دا پێویسته‌ له‌سه‌ر په‌رله‌مانتاره‌كان گه‌ر خۆیان به‌ چاوساغی ئه‌م گه‌له‌ ده‌زانن با ئه‌م حاجیزه‌ بشكێنن و چیتر له‌نێو قه‌فه‌سی بێده‌نگی دا ده‌سته‌و ئه‌ژنۆ دانه‌نیشن و چیتر له‌نێو كوله‌كه‌دا بانگ نه‌ده‌ن ، چونكه‌ هه‌ریه‌كه‌یان خاوه‌نی كۆمه‌ڵێك ده‌نگن و به‌حیساب هه‌ر یه‌كه‌یان نوێنه‌رایه‌تی خواست و ویستی كۆمه‌ڵێك خه‌ڵكی ئه‌م وڵاته‌ ده‌كات , له‌ قۆناغی ئێستاماندا پێویستمان به‌ چه‌ترێكه‌ هه‌موومان له‌ ژێر خۆی دا كۆبكاته‌وه‌ به‌ڵام به‌ بیروڕای جیاوازو به‌ ده‌نگی جیاواز , كاتی ئه‌وه‌ هاتووه‌ ئینتیمای نیشتیمانیمان هه‌بێت و بیری حیزبایه‌تی و عه‌شیره‌تگه‌ری و ناوچه‌گه‌ری زاڵ نه‌بێ به‌سه‌رمانداو چیتر له‌ كونی ده‌رزییه‌وه‌ ته‌ماشای دنیا نه‌كه‌ین ، با چیتر بۆ به‌رجسته‌كردنی دام و ده‌زگاكانی حیزب كار نه‌كه‌ین و پڕۆژه‌ی نیشتمانیش بخه‌ینه‌ ئه‌و لاوه‌ ، با هه‌موومان بۆ پڕۆژه‌ی ( خوایه‌ وه‌ته‌ن ئاواكه‌ی ) كار بكه‌ین و پاراستنی سه‌روه‌ری خاك و نه‌ته‌وه‌مان له‌به‌ر چاوبێ ، پێویسته‌ به‌سنگێكی فراوانه‌وه‌ یه‌كتر بخوێنینه‌وه‌و ڕای یه‌كتر په‌سند بكه‌ین و ڕاوێژ به‌ یه‌كتر بكه‌ین ، بۆ ئه‌وه‌ی هیچ لایه‌نێك به‌تاقی ته‌نیا خۆی به‌ به‌رپرس نه‌زانێ‌ له‌ چاره‌نووسی ئه‌م گه‌له‌و ئه‌وانی تریش بخاته‌ په‌راوێزه‌وه‌ ، تا ئێستا كورد چ وه‌كو حكومه‌ت چ وه‌كو ڕێخراوو بنكه‌و ناوه‌نده‌ ڕۆشنبیریه‌كانی نه‌یانتوانیوه‌ په‌یڕه‌وو پرۆگرام و به‌رنامه‌یه‌كی ئه‌وتۆیان هه‌بێت كه‌ ببێته‌ سه‌رچاوه‌ی گه‌شه‌ی فیكری و خه‌ڵك ته‌یار بكه‌ن به‌ چه‌كی زانست و مه‌عریفه‌ , ئه‌وه‌ی ئه‌وان زۆر لێی شاره‌زان و زۆر لێی زیره‌كن بریتی یه‌ له‌پڕۆژه‌ی گه‌وره‌ گه‌وره‌و كۆمپانیای تایبه‌تی جۆراو جۆر ,
 حیزبه‌ ده‌سه‌ڵاتداره‌كان چۆن له‌ڕووی ئابوری و بازرگانی یه‌وه‌ ئه‌وه‌نده‌ زیره‌ك و بڵیمه‌تن كه‌ هه‌رچی كۆمپانیای گه‌وره‌و زه‌به‌لاحی دنیا هه‌یه‌ ده‌یهێننه‌ كوردستان و ده‌ستی خۆیانیان له‌گه‌ڵ تێكه‌ڵ ده‌كه‌ن , پێویسته‌ له‌ڕووی سیاسیشه‌وه‌ ئاوه‌ها زیره‌ك بن و هه‌رچی ئازادی سیاسی هه‌یه‌ له‌نێو په‌رله‌مانه‌كانی دنیاو هه‌رچی سیسته‌می به‌ڕێوه‌بردن و به‌رنامه‌ی خزمه‌تگوزاری چاك هه‌یه‌ له‌ وڵاتاندا بیهێننه‌ كوردستان و لێره‌دا كاری پێ بكه‌ن ,          
لێره‌دا به‌ وته‌یه‌كی ئه‌فلاتون كۆتایی به‌ قسه‌كانم دێنم كه‌ ده‌ڵێ ( هه‌ندێك ئه‌ندامی كاراو لێهاتووی ناو كۆمه‌ڵگا هه‌ن ده‌بێ بدۆزرێنه‌وه‌و ئه‌رك و فه‌رمانیان پێ بسپێردرێ )

Previous
Next
This site is registered on wpml.org as a development site.