62گوڵی ساده …. ههردی شهفیق
1-ئهمڕۆ ئهو پیرهژنهیان برده گۆڕستان
ساڵههای ساڵ خۆشم ئهویست
ڕۆژگارهكان مهراق و حهسرهتم
وهكو جگهرهكهی ئهو ئهكێشا
ئێستاش دهمهوێت ئهگهر مانگ لهشیعرێكی منهوه ههڵهات
لهكچێنی ئهوسای ئهو بچێ
ئاخر ئهو لهدوكهڵی جگهرهكهیدا ئاوابوو!
2-ههڵهاتنی مانگ چ پیاسهیهكی بهئێوارهی ئهم شهقامه بهخشی !
لهژێر ماچی شنهو تریفهدا گفتوگۆمان چهند شیرین بوو!
زهمان چهند زوو تێپهڕی !
ئێستاش شنه وهكو جاران جوانه
مانگیش وهكو جاران ههڵهاتووه
ژیانیش تاحهزكهیت نابووته
بهڵام حهیف
تازهناكرێت لهسهر ڕوی مانگ بنوسم
یهشتا بهعیشقت گیرۆدهم
چونكه ههمووشتێك لهدڵی تۆدا ئاوابووه
3-لهكۆتایی ئهلبومهكهدا تێگهیشتم پارهیهكی زۆرم خهرجكردوه
عومرێكی زۆرم بهههدهر داوه
چونكه تهنیا وێنهیهك ئهتوانێت بمگریهنێت
ئهویش ئهوهیه
من دهستم بهسهرپشتی سهگهكهمدا دێنم!
4-مرۆڤ بۆیه لهمردن ئهترسێت
سهبوری خودا لهتهمهنی مرۆڤ زیاتره
عیشق لهعومر زیاتر باڵادهكات
مرۆڤ بۆیه دهگری
پێكهنین ناتوانێت تادوامهنزڵ
عیشقێك بكاته كۆڵ
گۆڕبۆیه ئهوهنده دڵی تهنگه
باكان لهسهرزهمینێكی ترهوه نامهیهك ناهێنن
5-لهبهر ڕۆحێكی گهرمدا دهموچاوێك ئهپۆشێت
لهبازاڕو شهقامهكانیشدا جلی جوان
لهقهره باڵغیشدا دڵو جل و دهموچاو
كهچی لهبهر پێی لهشفرۆشێكا ههمووی دائهكهنێت
بۆیه پێی ئهڵێن سیاسی!
6-ساڵهكان لهپاكهتی جگهرهكان ئهچن و
ههر ڕۆژهی سیگارێكی ئهكێشین
ئهگهر عیشق نهچووبا بۆ مهیخانه كهس سهرخۆش نهدهبوو
گهر عیشق هاوڕێیهتی تلیاك فرۆشهكهی نهكردایه
كهس بهبێهۆشی نهئهمرد
تۆش بهعیشق سێدارهت بۆخۆت ههڵنهخستبا
تهنافهكان ناچار نهبوون گیانی كهس بكێشن
7-كاتێك دهتهوێت لهجهنگ ههڵبێیت لهدواوه دهتكوژن
پۆساڵهكانی خۆت تێت ههڵئهدهن
جله خوێناویهكانی خۆت شاهیدیت لێئهدهن
تفهنگهكهی خۆت نیشانه لهدل َ و كهللهسهرت ئهگرێت
حهربهكهی خۆت زمانت ئهبڕێت
ئیتر ئهمه قانونی جهنگه
ئهبێت ویژدانت فڕێ بدهیت و زهڕنهقوتهكان سهربڕیت
یاخود دهبێت
لهخهیالێشا جهنگاوهرێكی كوژراوبیت
8-لهوانهیه مانگت بۆ بكهن بهگڵۆپی ژورهكهت
منیش دهیجور ڕێگاكانم كوێر كاتهوه
لهشهمشهمه كوێرهیهك سواڵبكهم ڕێگایهكم پێبڵێت
دڵی ههزار بولبول لهحهوشهكهتا بخوێنێت لهقهفهزا
منیش سهیری دهمی پهپولهیهك بكهم شتێك بڵێ
ئاخر سروشتی سامان و ههژاری وایه
لهوانیه تۆ ببیت بهمیوانی كۆشكێك و
منیش بهكۆڵ بلۆكی بۆ بكێشم
9-ئهم بهلهمه كاغهزیانه كهس ناگهیهننه دورگه سهوزهكان
من لهوێم لهكۆتایی ههموو جوانیهكان
من لهگۆڕستانهكهم
دهبوو بزانم عاقیبهتی من ههرئهمهیه
من دهمویست گوڵهئهستێرهی ناو شیعرهكان دابگیرسێن
درهختی ئهفسانهكان میوه بگرن
پهپولهی كتێبهكان بهگوڵهكانهوه بنیشنهوه
پاڵهوانی چیرۆكهكان ڕۆژگار بگۆڕن
-10گوڵهنایلۆنهكهت وهكو جاران بۆن ئهكهم
ههر ئهو گوڵهی ئێوارهی پایزێك
باخچهیهكی پڕكرد لهگوڵی سور
ئێستا ههستم كردوه ئهم گوڵه له ڕهگهزی خاشخاشه
زهبوونیم لهبهردهم فاڵچیهكانا باشترین بهڵگهیه
بۆیه وهكو تلیاكیهكان
گێژ گێژ بهدواتا ئهگهڕێم
-11ویستم گوڵێك بدهم بهكچی ناو شیعرهكان
كهچی شیعر غوربهتێكی ناكۆتابوو
مردن لهسهر نهخشهی گۆڕستانهكه بسڕمهوه
گوڵی ناو شیعرهكان ببن بهههنار
شهمهنهفهرێك بمان بات بۆ دورگه دورهكان
فایدهی نهبوو
ههتا ههزار سهده لهحهقیقهت دوركهوتمهوه
پێم پێكهنین
ئێستا گهروی كوكوختیهكم دهوێت
ئهم بێتاقهتیه بكات به گۆرانی
12-بهم سهحرا تینوهدا نههاتباین
نهدهبووین بهسهراب
غوباری مردنمان لێ نهئهنیشت
من ئهگهر
دوای خۆم نهكهوتبام
لهڕوم دههات جارێك سهیری خۆم كهم
تۆش ئهگهر خۆپهرستی پێی نهكردبای
ههموو ڕۆژێك ئاوێنهكهت ماچ نهدهكرد
31-بهدیار تۆوه كوژراین وهیچت نهوت
گهرتۆ بتوانیت دڵی دڵشكاوهكان بدهیتهوه
دهست بهسهری سۆزانی و سواڵكهرهكاندا بێنی
ببیتهوه دایكی پهپولهیهكی ههتیو
چوكلاتهبدهیت بهزهڕنهقوته بێكهسهكان
تهرازوهكهت بهدهستی ویژدانهوه بێت لهقیامهتا
ئیتر كێشهی من وتۆ ئهوهیه
نازانم لای كێ دوعای خێرت بۆبكهم
ئهی خودا؟؟
14-دهست ئهدهم لهو برینه خوێناویهی دڵم و
پهنجهی شایهتومان لهسهر ناوی تۆ دائهنێم
بهڵام خۆزگه تۆش
جارێك ئهو كاغهزه سپیهت ئهخوێندهوه
بهبێ هیچ مهرجێك مۆرم كردوه
15-شیعر یانی وههمێكی دڵخۆشكهره
یانی گۆرانیهكی حهزین بهلێوی قهرهجێكهوه
یانی نیشتیمان لهدڵی قهرهجێكدا
یانی ژیان بۆ مردویهك
لهگۆڕێكدا خهوئهبینێ بگهڕێتهوه
یانی زمانی ڕۆح بۆئهو لاڵهی ناتوانێت بێتهقسه
یانی گریانی پهپولهیهكی حهشیش كێش
لهنامهیهكی تهڕو خوێناویدا
یانی ههڵهاتنی مانگ لهناو لاپهڕهی كتێبا
ئائهمهیه نهگبهتی شیعر
بهخهیاڵ بهههشت دروستبكهیت لهدۆزهخدا!
16-ڕۆژێك كهدهترسایت ماچهكان بهلێوه كانمانهوه
ببن بهخۆڵهمێش ،گهیشت
ئێستا لێوهكانم پڕن لهخۆڵهمێشی بهجێماو
ئێستا ئیتر كهسێك بێداری وهكو جگهره ئهكێشێ
تهنیایی وهكو خهیاڵ ناوه بهلالێویهوه
ڕۆژێك كهدهترسیات دڵم نهشكێت ،گهیشت
ئێستا پارچه شكاوهكانی دڵێكی شكاو پێكهوه ئهنێم
17-گوناهی ئهو ههر ئهوهیه كهخهیاڵی ئهڕوات
تابلۆیهك بهخوێنی من ئهنهخشێنێ
پهپولهیهك لهخوێنی منا غهرق ئهكات
منیش كهخهو بهوهوه دهبینم
ئهڵی ی چهقۆیهك لهناو دڵما خهوتووهو
خهبهری بووهتهوه
18-من ئهم گۆرانیه بۆ گهڕانهوهی تۆ ئهڵێم و
تۆش گۆرانی بۆ سهفهرێكی تر ئهڵێ ی
من گۆرانی بۆ چاوهكانی تۆ ئهڵێم و
تۆش گۆرانی بۆ خهونهكانت ئهڵێ ی
تۆ گۆرانی بۆ خهیاڵهكانت ئهڵێ ی و
من لای لایه بۆئهم دڵه گرینۆكهم ئهكهم كهناخهوێت
ئێستا ئیتر دهبێت لهنێوان دهنگی من وتۆدا
چاوهڕێ ی دهنێگكی تربم
وهكو لاوازێك برسێتی چاوهڕێ ی مردنی پێئهكاو
لاشهخۆرهكان لهئاسمان گۆرانی بۆ ئهڵێن
19-دهچێته سێبهری ههمان درهخت یادگاریهكانی لهسهر دهنوسی
لهوێ سهیرانێكی پیرانه ساز دهكات
ئێسقانهكانی خۆی ئهكات بهپشكۆ
چاوئهنوقێنێ و دڵی خۆی لهسهر ئهبرژێنێ
یادگاریهكانی ئهكات بهتابووت بۆخۆی
سهیری ئاسمان دهكات و
گوێ بۆناڵهی دڵی خۆی ڕائهدێرێ
هاوارێكه
كێ ئهزانێت بهچهند سهدهی تر ئهگاته شوێنی خۆی!!
20-بهئهندازهی ئهو ئهستێرانهی
وهكو مقاڵیهك خهڵوزی گهشاوه درابوون بهناو چاوی شهوا
حهقیقهت لهسهر دڵی من قورسبوو
بۆ سهردهمێك دهبوومه گۆرانی بێژ
ژنهكانی مناڵی كهڕو لاڵیان دهبوو
بۆ مهیخانهیهك دهبوومه باده گێڕ
ههموو بوتڵهكانی پڕ بوون لهخوێن
بۆ ڕابردویهك دهبوومه شیوهنگێڕ
شتێكی جوانم نهبوو تیایدا بۆی بگریم!
21-چاوهكانی لهدووقهسیدهی مهملهكهتی شیعر ئهچن
ستیانهكهی لهزیندانی جوتێك مانگی تهنیا
ئهو مناڵهی خهمی بوو سێوی حهوشهكهیان گهورهنهبێت
ئێستا فێری سێو دزین بووه
لهحهوشهی دراوسێكهیان
22- ههر لهو كانیهی تینوهكان تێر ئاو ئهبن
لهو مهیخانهی مهینۆشهكان
مردووهكانی ناو خۆیان گهرم ئهكهنهوه
كهسێك ههیه گۆرانی بۆعیشقَكی ناكام ئهڵێ و
وهك ئهوهی لهههسارهیهكی ترهوه فڕێ درابێ كهس تێ ی ناگا
ههر لهو دهریایهی بایهوانهكان مهله ئهكهن
كهشتی گهلێك دۆلفینی مردوو بار ئهكهن
ههر لهوشوێنهشدا نوسراوه
ئاوڕێك لهبهختهوهری خۆت بدهرهوه
كۆڵانێكه
ئهچێتهوه سهر دوكانی جگهر فرۆشهكان
23-وهك گوللهیهك سهدهیك بهناو دڵی تۆدا بڕوا
یادگاریهكانی ئهو
منی لهسهر ئهم تابلۆی بوونه سڕیهوه
بههیلاكت بردم ئهی گێژاوی شێت
دهبمحنكێنه
ههموومرۆڤێك لهیادی یهكهمین عیشقا
دهبێت بهخۆڵهمێش
دهریاوانهكان وتیان جاران
سروشتی ئهم دهریا شێته وانهبوو
ههرگیزیش مانگ ئاوا توڕه شهپۆلهكانی نهدیوه
ئهی دهریای تاڵو لیخن بهخوێن
من بهدوای جۆگهلهیهك خوێندا هاتم
بهدوای جهنازهیهكی ڕاكێشراودا هاتم
گوللهیهك سهر دڵی پێكابوو!
24-ئهو باڵندانهی وێنهم كێشان
بهئاسمانی یادگاریهكانهوه دهفڕن
ئهو ماسیانهی لهناو شیعرهكانی منا لهدایك بوون
ئێستا بهناو سهراب و
ڕوباره خوێناویهكانا ئهڕۆن
ئهو بێچووهئاسكهش لهناو دڵی منهوه سهیری دنیای ئهكرد
ئێستا بهدهم پڵنگێكی برسیهوهیه
ئهو دۆلفینهش من پێم دهووت
چاوێكت لهموسافیری بهلهمه شكاوهكان بێت
ئێستا لهقهصابخانهیهكا لهت لهت ئهكرێ
ئهو بووكهشووشهش من لهناو قوڕی شیعرێكا خوڵقاندم
ئێستاكه خهریكه
بهباوهشی مناڵی سۆزانیهكهوه گیان ئهدا
25-شهوێك لهگهڵ تۆدا دهمان ویست
بهژێرمانگهشهودا پیاسه بكهین مانگ گیران بوو
دهمان ویست بچینه كهنار دهریا
ئۆقیانوسهكانیش وشكاییان هات
بۆیه دوای ساڵههای ساڵ بۆت دهنوسم
ئهمشهویش مانگ لهپێكێك بادهدا ئهشكێت
ئاخر قهدهری ئێمه كهوته ناو ساڵانێكهوه
ههرگیز مانگی تیادا ههڵنههات
26-ئهی جهنگاوهری دۆڕاو ،
تهرمی هاوڕێ و خوزگهكانت بده بهكۆڵتاو
لهسهر گۆڕی دووژمنه كانت پێبكهنه
ئهی كچی جوان، ترس و عیشقی كۆنهت بشارهوهو لاشهت ڕاخه
ئهی مێرولهی چاو چنۆك، تۆش لهبری گهنمی مشكهكان
مهیتی هاوڕێ ناكامهكانت بژمێره
تۆ ئهی سوار چاكی ئهسپه تینوهكان
ئهم ئهسپانه بهخوێن تاكوێ ئهڕۆن؟
تۆش ئهی گوێزی پوچ،
مههێڵه بتشكێنن
باحهقیقهت بهو ههموو پوچیهوه دهرنهكهوێت !
27-درۆ ئهكات و باوهڕمان پێیهتی
سیاسیه ئیتر
هاوارئهكات و خۆمان داوهتێ و شوێنی كهوتوین
گیرفانهكانی پڕن لهپارهو خاڵین لهحهقیقهت
لهباڕ و مهیخانه و
سۆزانیخانه و قوتابخانه و
قهصابخانه و چایخانه و
قومارخانه و قیامهتیشا، باس ههرباسی ئهوه
بهڵام ههزار ئهوهندهی ئهو
حهقیقهت ئهوهتا لهناو گهڵی ئهو سۆزانیهدا
مناڵهكهی چاوهڕێ ی نانه!
28-لهبیریكه ئێوارهیهك باران نهباریایه بێتاقهت دهبووین
ئهوه سهدهیهكه دڵی من
لهم وشكه ساڵیهدا ورد دهبێت
لهوانهیه ئهو ساڵانه سهرخۆش بووبم
دهنا دهبووبزانم ئاوا ئهبێت
چونكه ئهم ئاسمانه
ههرگیز نهیتوانیوه
نازی دوومانگ پێكهوه ههڵگرێت
29-من و ئهو بهو شهقامهتاریكهدا هاتین
دهبوو چارهنوسی خۆمانمان لهبهر چاوبێت
بینیمان دووڕێگای جیاواز
لهگۆڕستانهكهدا بهیهك دهگهن
دهمانزانی مۆمێك دووپهروانه پێكهوه نایانكرێ
بمبورن لهشعری پێشوترا وتم
لهم ئاسمانه جێگای دوومانگ نیه
ئێستا ئهڵێم گۆڕێكیش نیه
ئهم دوو مردووه پێكهوه ههڵگرێ
30-ژیان پڕه لههاواری ڕووشكاو
وهك ناو لهپی سواڵكهرێكی تازهكار
سیخناخه بهدڵتهنگیهكی فهرامۆش
وهك ئهو قهرهجهی
لهباوهشی شارێكی غهریبهدا ڕۆژ ئهكاتهوه
پڕه لهخهیاڵی خاوی دڵی ئێمه
وهك ئهو پهڕهسێلكهی بهدیار هێلكهیهكی پیسهوه
ئومێد ههڵئهچنێ
لێوان لێوه لهعیشقی پوچ
وهك ناو دڵی ئهو ژنهی
شهوانه حهشاماتێك تێر ئهكات
پڕه لهخۆزگهی بێفایده
وهك هاواری ناو دڵی ئهو دێوانهی
ناگاته گوێ ی هیچ ناخودایهك
چۆڵو هۆڵه لهویژدان
وهكو پرسهی سۆزانیهك
31-زهمانهیهك
نامهكان لهقاوغی شقارتهكانا
ئهچوون بۆ ماڵی دڵی یار
چهرمهسهریم لهخۆم ئهتهكاندو
خوێن لهزمانمهوه ئههات
ئێستاش ئهتوانی بهسانایی خوێنی دڵی من ببینی
بهناو چاوی ئهو فریشتانهوه
لای خواش مهحكوم بوون بهپاكیزهیی
بهسهر ڕۆحی ئهو باڵندانهوه
مهحكوم بوون به نهنیشتنهوه
32-لهوشكی ئهم خاكهوه
بێچوی كهروێشكهكان سهیری خاكی ڕوتهن ئهكهن
سهیری ئاسمانی بیبَهزهیش
زهڕٍنهقوتهكانیش سهیری دهمی دایكهو باوكهكان و
دایكهو باوكهكانیش ڕهنجی بێحاسڵی جوتیارهكان
ههمووشتێك سیمای خۆی لهمشارهدا ونكردووه
ژیان مانای خۆی لهدهست داوه
لهو ڕۆژهوه تۆ بلیتی سهفهرت گرتووه
باران لهئاسمانی ئهم شاره تۆراوه
33-من دهمهوێ بهشیعرێك كچێك بخوڵقێنم
بهرلهوهی شوبكات
مناڵی سواڵكهرهكان شیربدات
بهڵام خۆزگه
مهمكی ئهم ههنجیره برینداره،
بێچوی شهمشهمهكوێرهیهك نهیئهمژی
34-تۆ ئهوهندهی خزمهتی شیعری منتكرد
ئهوهنده هی عیشقت بكردایه بهس بوو
ئهوهنده بهدیار منهوه گریایت،بهسبوو
بۆ ئهوهی من داگریت بهم خاچهوه
چ نائومێدیهكی جوانه ڕوئیا
پهپولهیهك بتگریهنێت
بهسهر گوڵی خاشخاشهوه ؟؟!
-35بهسهر پشتی سواڵكهرهكانا
بهسهر گهدهی سۆزانیهكان و
ڕوشكاوی دێوانهكانا
بهسهر خوێنی فریشتهو قهرهجهكانا
بهسهر سهری ئیزرائیلا
سهردهكهویت بهرهو ئاسمان
بهرهو خوا
بهرهو خۆر
بهڵام بیرت نهچێت خاوهن شكۆ
سهركهوتن بهم پلیكانهدا
دابهزینه بهرهو گۆڕ
-36كچێك
تالێره ڕۆیشت لهعیشق بێزاربوو
لهوێنهی باخچهژاكاوهكانو
ژا وهژاوی شهقامهكانو
وێنهی ئهو پهپولانهی بهدووكهڵی كارگهكان ئهمرن
بهبێ ئهوهی كهسێك لهوێنهیكدا ههڵیانگرێت
وهك ماسیهكی خنجیلانه بێزاربوو
لهدهریای خهیاڵی منا ڕاو ئهكرێت
-37گهرچی ساڵانێكه لێره ڕۆشتووی
بهڵام یهشتا ڕۆحت لێرهیه
تۆ ناتوانی سهرزهمینی یادگاریهكان بهجێ بێڵی
پشت لهمناڵی ئهوینێكی كۆسكهوتوو بكهیت
ئاوڕ لهپیاسهی ژێر مانگهشهوت نهدهیتهوه
گۆرانیهكانی ژێر باران لهبیر بكهی
بهڵام من دڵنیام ئهم بهلهمه تابووتیه
تهنیا جهنازهكهی بردی
-38كهچاو چاو نابینێو دهستت وهبهر هیچ شتێك ناكهوێت
من كچێكی ونبوو دهبینم لهم ژورهدا
من بهسهر ئهم وێرانهدا ئهوین خامۆشی كردووه
ههزار گوڵ و
ههزار فریشتهو
ههزار خۆزگهی بهباچوو ئهبینم
لهڕاستیشدا چاوانی من
تهنیا توانای بینینی تابلۆ یهكیان ههیه
دوكهڵی جگهره دروستی كردووه
-39وتت كهمن وتۆ لهیهكتری دوربووین
باكم نیه
مانگ ئهتوانێت سڵاوهكانمان بگهیهنێت بهیهكتری
ئێستاكه تۆ لهمن دوری و
ئهم مانگه بێتاقهش
حهوسهڵهی پۆسته چێتی نیه
-40پیاوێك بهشیری فریشتهیهك
باڵندهیهكی تینوو ئاو ئهدات
كهمردن دێ ئهوهتا لهگۆڕستانهكه دانیشتووه
كهژیان دێ دیسان لهگۆڕستانه
ئهو لهخهمی پهڕهسێلكهیهك بیردهكاتهوه
لههێلكهدا باڵیان شكاند
-41بانگت دهكهم بگهڕێیتهوه
تا شتێكت بدهمێ
هاوكات من خاوهنی هیچیش نیم
ئاخر لهناو دڵی منا شیعرێكی كۆسكهوتوو ههیه
نهمن توانیم بینوسم و
نهتۆش توانیت بیخوێنیتهوه
-42ژنێك كه عهشق دهست درێژی ئهكاته سهری
پهنا بۆ مردن ئهبات
گوڵێك كهپایز سۆراخی ئهپرسێ
بهدوای پهپولهیهكی غهریبهدا ئهگهڕێ
هێلكهیهك كهبیابان ههڵیدێنێ
ههتا مردن هاواری ئاو ئهكات
-43ساڵ لێره ههرچوار وهرز پایزه
گوڵ لێره بهبۆنی خوێن كهوتووه
ئهم وڵاتی خۆڵهمێشه لهبیابانێكی سهوز ئهچێت
لێره لهم خاكی ژهنگو كهڕووهدا
تهنیا گۆڕو سۆزانی و سیاسی سهوز ئهبێت
-44شارهكانم وێرانكردوو
لهدێهاتهكانا گوڵی سروشتیم ڕوان
خۆڵهمێشم كرده ئهو ئینجانانهی
ساڵههای ساڵ دۆستی سهرابو خوێن بوون
من دونیایهكی وێرانم ڕوخاند و
وێرانهی دونیایهكم دروستكردهوه
دهستهكانم بهئهندازهی زمانم بۆ زاڵمان،
بۆ ههژاران درێژبوون
من فیلم كار تۆنێكی عاشقانهم دروستكرد
من پاڵهوانی مهملهكهتێكی كاغهزی بووم!
-45لهسهر سهوڵهكانی بهلهمێكی كون تێبوو نوسرابوو
سهر كهوه بهرهو دنیای ئاسودهیی
شێتیك هات و لهسهری نوسی
ئهی بهلهمی شكاو
تۆخۆشت لهئاوا ئهخنكێیت
-46سوڵتانهكان وتیان
سوپاسالارهكان وتیان
سیاسیهكان وتیان
خوێن ڕوی شهرفت سورئهكات
خوێن پیرۆزی ئهدات بهبوون
بهڵام من بێشهرهفیم خۆشویست
بهڵام من ڕیسواییم ههڵبژارد !
47-ڕوئیا
لهسهر زهرفی ههرنامهیهكدا شوێن ماچێك جێدێڵێ
عیشق وهك عهتر ئهدات لهسینهو ناو لهپ و لاملی
لهگهڵ تهریقیدا ههرگیز لهماڵێكدا دانهنیشتوه
لهگهڵ مردندا چایهكیان پێكهوه نهخواردۆتهوه
دڵی ئهوهنده ناسكه بهكزه بایهك ههڵئهوهرێت
كهئهترسێت دڵی لهناوچاویدا ئهبینیت كهلێ ئهدات
عیشق كهسهری دێشێ پارچهیك لهكراسهكهی ئهوی تێوه ئهپێچێ
كهنهخۆش ئهكهوێت بهو ههموو عهیاریهی خۆیهوه
ئهو لهژور سهری عیشقهوه دائهنیشێت
ساحیرێكه كهسهیری گوڵهكان ئهكات ئهكهونه قسه
كه گۆرانی ئهڵێ فریشتهكان سهما ئهكهن
كچێكی عهجوله
پرسیاری بهههشتی لێئهكهیت دهست بۆ مهمكهكانی ئهبات
ستیانهكهی بهكهمهریهوه ئهبهستێ و نهرنهرم سهما ئهكات
48-ڕۆژێك كهئێوارهپایزیهكانمان جێهێشت
ههموو حهرامهكانمان دابهدهم باوه
دهستی یهكتریمان گرت و بۆ ههسارهیهكی دور فڕین
لهناو ماچا ههزار گهرماومان بۆ یهكتری داخست
وهكو هێلكهی چۆلهكه
مانگی ژێر ستیانهكانتم ئهنا بهگوێمهوه
بۆ ئهوهی گوێ لهههناسهی دڵێكی زیندوو بگرم
ههموونوشته نوسهكانم خسته سهرساجی عهلی
كتێبی شاعیرهكانم كرد بهزیندان و
قوفڵی دهمی خوێن ڕێژهكان
بهڵام ئهوهی جێگهی داخه
ئێمهتهنیا بهخهون دۆستی یهكتری بووین
ههر بهخهیاڵ كرێكاریمان بۆ عیشق ئهكرد!
49-جهنگ دهمو چاوی ههموو مانی گۆڕی
لهبهردهم خوێنخۆره كانا چۆكی پێداداین
تهنانهنهت باخچهكانیشی كرد بهكۆنكرێت
دڵی پهپولهكانی كرد به پۆڵا
دوا وێنهی ئهلبومهكهم بهرهو
لهپشتهكهی بنوسه
جهنگ زیندووهكانیشی كوشت !
50- لهپشت ئهم پهنجهره داخراوانهوه چاوهڕێ ی تاوانێكم
من ئهمهوێ ئهمڕۆ فریشتهیهك بكوژم
بهڵام كهپیاوێك ئهبینم لهپهنا تۆدا پێئهكهنێت
تۆش ئهبینم بێباك
لهخهیاڵی خۆتا سهمای بۆ ئهكهیت
ناچار چهقۆكه بهدڵی خۆما ڕۆ ئهكهم
51-لهسهر بهرگی دیوانێك وێنهی مۆمێك ههیه
كهچی پهروانهكان
بهدهوریا ئهسوتێن
52-لهكۆڵانی تلیاك فرۆشهكان
گۆرانیهكی دڵشكاو لهدهرگا ئهدات
پێئهچێت مانگ
لهناو دوكهڵا خنكابێت
53-ههتا واشهیهك سهری ههڵكۆڵی
ههرخهریكی ترساندنی پاسارهی بوو
ئهو داهۆڵهی دهنكه گهنمێكیشی پێنهخورا
54-وهك ئهوهی لهئاههنگی خۆیانا سهما بكهن
بهئاسمانهوه دهجوڵان
ئهو كچانهی ئهڵقهكانیان لهملیانابوو
55-من ئهزانم گوڵی سهر پهنجهرهكهت ڕهنگی مردنی لێنیشتووه
شهرابی سهرمێزهكهت تامی خوێن ئهدا
بهسهر گۆڕهكهی منا ئهڕویت وهك ڕێگایهك بۆ دۆزهخ ئهچێت
بهناو دڵتا ئهڕۆم
وهك باخچهیهك
لهمهوسیمی خهزانا ئهپشكوێ
من بۆنی شهیتانێكم لێدێ بهتیری موحیبهت ئهكوژرێ
تۆ ڕهنگی ئهو فریشتانهت گرتووه
یهشتا خودا بۆ سهرزهمینی نهناردون
56-تۆ سهرسهختترین عاشقی دونیایت
بهلایتێكی شهو كوێرهوه
ئهم باخچه پڕ ئهكهیت لهموعجیزه
بهبهلهمێكی شكاوهوه
بهزهریایهكدا ئهڕۆیت
پڕه لهدۆلفینی سهرخۆش
قولاپ بۆ ماسیهك ههڵئهدهیت
بهناو دڵی منا ئهگهڕێت
57-كهسێك به كلیلی دهرگای ههموو سهردهمهكانهوه
ئێوارهیهك خۆی ئهكات بهدڵی مناو
فارگۆنی شهمهنهفهرهكهی
پڕه لهتابووت و خۆڵهمێش
وهك دهریاوانێكی پیر
كهشتیهكهی لهدهریادا سوتابێ
بهبارێك دوكهڵ و بوغوردهوه ئهگاته ئاوهدانی
ئهو ئهیهوێت لهدهرگای ماڵهكانی شاربداو
چاوی و دڵی و ڕۆحی
لهدهرگای ههریهكێكیان بهجێبێڵێ
بهڵام ئیتر بێفایدهیه
چونكه ههموو دهرگاكان بوون بهدیوار
58-سهردهمێك خوێنی غهریبیم لهبهر ئهڕۆیی
دوریت لهناو دڵی منا ئهسوتا
ئهتوت ستیانهكهم بهرهو برینهكانتی پێ بپێچه
دهرمانی دهربهدهریت ئهدا بهمن
ئێستاش بهخوێنی دڵم لهسهر گۆڕهكهت ئهنوسم
اخ عیشقه شههید كراوهكهم !
59-بینیم بهسهر ئهم شهقامه بێنازهدا ئهباری
تۆ لهوێ بووی میهرهبانی لهوێ نهبوو
بینیم ئهو پرتهقاڵانهی لهسهر سینهت خڕ بووبوون ئهگریان
وتم لهوانهیه ئیتر پایز ڕێگا بههاتنی سێ وهرزهكهی تر نهدات
وتم ئیتر تۆ ئهتوانیت
پێغهمبهرێك
بۆ لای خودا بنێریت!
60-ئهو گوڵهی پهپولهیهك سهیری جوانی ئهكرد
خهزانێك هاتو لهگهڵ خۆیدا بردی
من لهژێر بارانی خوێنی تۆدا ئهمرمو
ئیتر بارانی ئهم ئاسمانه تاریكهم خۆشناوێ
ئاخر ئهوهی ئێمه دۆڕاندمان
قومارێك بوو خودا كردی !
61-كاتێ لهسهفهر گهڕایتهوه ئهو ههزار ساڵ بوو مردبوو
ههتاو لهحهوشهی ماڵهكهی تۆرابوو
تاریكی لهسهر كڵاو ڕۆژنهكهی كهوتبووه سهرپشت
وهلێ لهسهر ڕوی مانگهشهو نوسیبووی
بهم سهفهرهت تۆ منت كوشت
62-بهختخوێنێ بیتوانیبا
دڵی ئاسكێك وهرگێڕێته سهر زمانی گۆشت خۆرهكان
ههموو پڵنگهكان لهپاوانهكانا ئهلهوهڕان
تۆش ئهگهر بتتوانیبا
لهبهردهمی سۆزانیهكدا
دڵت بكهیتهوه
عیشق
ڕوسوری خۆیی نهئهدا بهمردن
Jgarsoz8181@yahoo.com
www.jgarsoz.kurdblogger.com
