نیشتمان ماڵی گشتمانه…. له‌تیف فاتیح فه‌ره‌ج
له‌به‌ر ڕۆشنایی دۆستایه‌تییه‌ك كه تۆ زیاتر هۆی پته‌وبوونی بوویته ، ئه‌گه‌ر چی جار‌وبار به‌هۆی منه‌وه ڕه‌نگه ساردیشی تێكه‌وتبێ، بۆئه‌وه‌ی ئه‌و دۆستایه‌تییه قوڵتر له برایه‌تیی په‌یوه‌ندییه‌كان گرێ بدات، پێم خۆشه وه‌كو سه‌رۆكی حكومه‌ت، پێكه‌وه مه‌سه‌له‌ی خوێندنه‌وه‌مان هه‌بێت و هه‌ر پێكه‌وه سه‌یرێكی نیتشیمانی ئه‌م گه‌له بێ تاج و ته‌خت و به‌خته بكه‌ین. ناكرێ پرسه نه‌ته‌وه‌كانی ئه‌نفال و هه‌ڵه‌بجه‌و نه‌ورۆزو راپه‌ڕین و كۆڕه‌و له‌توپه‌ت بكرێن و حزب له میلله‌تیان بسه‌نێته‌وه، نه ئۆپۆزیسیۆن، نه ده‌سه‌ڵات، واته حزبه‌كانی ده‌سه‌ڵات به‌ته‌نیا خاوه‌نی ئه‌و بۆنانه نین و ناتوانن خاوه‌نی بن، هه‌روه‌ها دیموكراسی و ئازادیش دیاریی حزبێك نین، تا خۆی پێوه بابدات و ئه‌وه كه‌مترین ده‌سكه‌وتی خوێنی ئه‌نفال و هه‌ڵه‌بجه‌و راپه‌ڕین و كۆڕه‌و و كێشه له‌وه‌دایه هه‌ندێ جار سه‌رۆك جاشیش خۆی ده‌كاته خاوه‌نی دیموكراسی و ئازادی، له‌كاتێكدا ده‌بوایه ئه‌و سه‌رۆك جاشه ئه‌گه‌ر قه‌فه‌سی زیندانیشدا نه‌بوایه، ئێستا داوای لێبوردنی له میلله‌ته‌كه‌ی بكردایه، ئازادی و دیموكراسی نه هی یه‌كێتی و پارتین، نه هی حزبه ئیسلامییه‌كانن، به‌ڵام به‌رپرسیارێتی پاراستنی ئازادی و دیموكراسی له ئه‌ستۆی حكومه‌تدایه، حكومه‌ت له رێگه‌ی ده‌نگی میلله‌ته‌وه دروست ده‌كرێت و ئه‌ویش له رێگه‌ی یاساو پۆلیس و ئاساییشه‌وه ئه‌م وڵاته ده‌پارێزێت و دیموكراسی و ئازادی زیاتر په‌ره پێده‌دات، حكومه‌ت دارده‌ستی هیچ حزبێك نییه، نه‌خۆی و نه پۆلیس و ئاساییش و هێزه‌كانی، دڵنیام سه‌رۆكی حكومه‌ت به‌هیچ شێوه‌یه‌ك سه‌رۆكی حكومه‌تێك نابێت كه حزب له كاروباری وه‌ربدات، من له نزیكه‌وه ئه‌و سه‌رۆكی حكومه‌ته ده‌ناسم و لانی كه‌م دۆستایه‌تی و یه‌كترناسینمان ده‌گه‌ڕٍێته‌وه بۆ (11) ساڵ له‌مه‌وبه‌ر، له‌گه‌رمه‌ی ئازادكردنی عێراقیشدا له‌سه‌ر داوای ئه‌وه زیاتر له مانگێك ماڵ و منداڵم به‌جێهێشت و له باشووری عێراق له‌گه‌ڵا تیمێكدا به‌دوای ئێسك و پروسكی ئازیزاندا ده‌گه‌ڕام، كه حكومه‌ت به‌رپرسیاره له ئازادی و دیموكراتی له‌م وڵاته، پێویسته به‌دواداچوون بۆ كێشه‌ی ئه‌و هاووڵاتییه بكات كه پێڵاوی پێ ماچ ده‌كه‌ن و سووكایه‌تی پێ ده‌كه‌ن، پێویسته به‌دواداچوون بۆ دۆسییه‌ی دكتۆر پشتیوان و رێبین ئه‌حمه‌د هه‌ردی و هه‌موو ئه‌وانه بكات كه سووكایه‌تییان ده‌رهه‌ق كرا، پێویسته سه‌ربكات به ماڵه بێنازه‌كه‌ی شه‌هید گه‌رمیانداو هه‌ر له‌وێ بڕیاری ئه‌وه بدات كه باشتره وه‌زیری ناوخۆ بچێته ماڵه‌وه، ئه‌مه چه‌ند رێزگرتنه له ماڵی شه‌هید گه‌رمیان، ده ئه‌وه‌نده رێزگرتنه له‌و به‌ڕێزه‌ی كه وه‌زیری ناوخۆیه، ده‌بوایه ئه‌و به‌ڕێزه‌ی خۆی ئه‌و كاره‌ی بكردایه، نه ئۆپۆزیسیۆن فریشته‌ن، نه حزبه‌كانی ده‌سه‌ڵات شه‌یتانن. حكومه‌ت به‌رپرسیاره له‌وه‌ی له‌م نێوه‌نده وا بێلایه‌نی خۆی بپارێزێ و به چاك چاك و به خه‌راپ خه‌راپ بڵێ، من ده‌زانم له‌م ساڵ و كه‌مه‌دا حكومه‌ت له شه‌ڕێكی ده‌سته‌ویه‌خه‌دا بووه له‌چه‌ند به‌ره‌یه‌كه‌وه له‌لایه‌كه‌وه له‌گه‌ڵا ئۆپۆزیسیۆن، له‌لایه‌كه‌وه له‌گه‌ڵا ئه‌و هه‌موو سته‌مكارییه‌ی عێراق ده‌رهه‌ق به كوردستان ده‌یكات، له‌لایه‌كه‌وه له‌گه‌ڵا مافیای ناو حكومه‌ت، مافیاكانی گه‌نده‌ڵی و نادادی، له‌لایه‌كی دیكه‌شه‌وه له‌گه‌ڵا ئه‌و حزبانه‌ی خۆیان، ئه‌م حكومه‌ته‌یان دروستكردووه، له‌گه‌ڵا پارتی و یه‌كێتی له‌شه‌ڕدا بووه‌و هه‌نگاویشی بۆ چاكسازی ناوه، ، بێویژدانییه‌كی گه‌وره‌یه ئه‌م هه‌نگاوانه نادیده بكه‌ین، به‌ڵام شه‌ڕی گه‌وره، شه‌ڕی نه‌یاره‌كانی سه‌رۆكی حكومه‌ت و حكومه‌ته له‌ناو پارتی و یه‌كێتیدا، كێ رێگا ده‌دات پاسه‌وانه‌كانی لێ بسێنێته‌وه‌و دیوه‌خانانه‌ی ببڕیت و شیرینی بۆ نه‌هێلێ؟ كێ رێگه ده‌دات درزو كه‌لێنه‌كانی گه‌نده‌ڵی بدۆزێته‌وه‌و بیانگرێ؟ گرفتی راسته‌قینه لێره‌وه ده‌ست پێده‌كات. ئێمه ده‌بێ شه‌رم نه‌كه‌ین ئه‌و راستییه به حزب بڵێین كه حكومه‌ت له حزب گه‌وره‌تره، ده‌بێ پێی بڵێین كه حكومه‌ت ئاوێنه‌ی میلله‌ته‌و خه‌ڵك له‌وێوه ته‌ماشای ئێمه ده‌كات، نه‌ك له رێگه‌ی حزبه‌وه، حزب نابێ ببێته جێگره‌وه‌ی حكومه‌ت، هه‌ركاتێك حزب كار بۆ ئه‌وه بكات ببێته جێگره‌وه‌ی حكومه‌ت، نیشتیمان له ماڵی گشتمانه‌وه، ده‌گاته ماڵی خۆی، شاری له شاری ته‌واوی خه‌ڵكه‌كه‌یه‌وه ده‌كاته شاری حزبێك، بۆنه له بۆنه‌ی هه‌موو گه‌له‌وه ده‌كاته بۆنه‌ی خۆی، ره‌نگه ئۆپۆزیسیۆن له‌وه‌دا هه‌ڵه‌یه‌كیان كردبێت، له‌بری دوورخستنه‌وه‌ی ده‌ستی حزب له‌ناو حكومه‌ت، له‌بری ئازادكردنی حكومه‌ت، داوای هه‌ڵوه‌شاندنه‌وه‌ی حكومه‌تیان كردبێت.
من بڕوام وایه ئێمه ده‌بێ كوێخایه‌تی حزب به‌سه‌ر حكومه‌ته‌وه نه‌هێلین، نه‌ك داوای هه‌ڵوه‌شاندنه‌وه‌ی حكومه‌ت بكه‌ین، ئه‌مه هه‌ڵه‌یه‌ك بوو، من هه‌ر زوو قسه‌م له‌سه‌ركرد. ئۆپۆزیسیۆن هه‌وڵیدا داوای هه‌ڵوه‌شاندنه‌وه به میللی و جه‌ماوه‌ری بكات، هه‌ڵه‌كه لێره‌وه‌یه، ده‌بوایه كار بۆ ئه‌وه بكرایه، حزب له‌م وڵاته چاك بكرێته‌وه، به‌ر له حكومه‌ت، ئاخر حزب ئه‌م هه‌موو رێكخراوه پیشه‌یی و جه‌ماوه‌رییه‌ی بۆچییه؟
ئاخر كه ئێمه خاوه‌نی حكومه‌تی خۆمان نین، حزب هێزی چه‌كداری بۆچییه؟، ئاخر هه‌رێمی كوردستان كه لێ پارێزگاو نیو پێكدێت، ئه‌م هه‌موو ده‌زگا سه‌ربازی و ئه‌منییه جۆراوجۆره‌ی بۆچییه؟، كه هه‌ندێكیان ئێستاش به‌هه‌مان بیركردنه‌وه‌ی سه‌رده‌می شه‌ڕی ناوخۆوه بیر ده‌كه‌نه‌وه، ئه‌و سه‌رده‌مه‌ی ئێمه له‌گه‌ڵا چه‌ند براده‌رێك، كۆمه‌ڵه‌ی دژ به شه‌ڕمان داده‌مه‌زراند‌و خه‌ڵكانی دیكه‌ش له‌سه‌ر كڵاوقاسم و كه‌پكی حه‌مه‌د ئاغا، خوێنی لاوانی كوردیان شاباش ده‌كرد. ئۆپۆزیسیۆن ده‌بوایه شه‌ڕی رزگاریكردنی حكومه‌تی پێش هه‌ر شه‌ڕێكی دیكه بخستبوایه، كه ئه‌وه نه‌كرا ده‌بێ چاوه‌ڕوانی ئه‌م توندوتیژییه بكه‌ین. حزبه‌كانی كوردستان به حزبه‌كانی ده‌سه‌ڵات و ئۆپۆزیسیۆنیشه‌وه ده‌بێ ئه‌وه‌یان له‌بیر بێت، سیاسه‌ت گه‌مه نییه ئه‌مڕۆ به‌جۆرێك و سبه‌ی به شێوازێكی دیكه بێت، ده‌بێ هه‌ردوولا ئه‌وه بزانن كه ده‌شێ له هه‌ڵبژاردنێكی دیكه‌دا ره‌نگه حزبێكی نێوده‌سه‌ڵاتی ئێستا له‌گه‌ڵا حزبێكی ئۆپۆزیسیۆندا حكومه‌ت دروست بكه‌ن، ناكرێ هیچ بوارێك بۆ هه‌ناسه‌دان نه‌مێنێته‌وه‌و حكومه‌تیش بگلێنرێته شه‌ڕی میلله‌ته‌وه، ئاخر هه‌رچی رووبدات كوڕی سه‌ركرده‌و سه‌رۆكه‌كانی ده‌سه‌ڵات و ئۆپۆزیسیۆن خوێن له په‌نجه‌یان تیانییه، كوڕی میلله‌ت ده‌بێته سووته‌مه‌نی، ئه‌مه له رابردووشدا هه‌روا بوو، سه‌ركرده‌و به‌رپرسه‌كان له شه‌ڕی ناوخۆدا به‌رده‌ستی نه‌یارانیش بكه‌وتنایه چاوپۆشییان لێده‌كرا، كه‌چی خه‌ڵكی ره‌شوڕووت ده‌بووه قوربانی، لێره‌وه‌یه حكومه‌ت ده‌بێ راستوڕه‌وان رووی ده‌م بكاته هه‌موولایه‌ك و هه‌ركێ دۆخه‌كه بشێوێنێ بیداته دادگا، ده‌بێ رووی ده‌میان تێبكات و پێیان بڵێ هیچ حزب و لایه‌نێك بۆی نییه، فه‌رمان به‌سه‌ر پێشمه‌رگه‌و پۆلیس و ئاساییشدا بكات، جگه له حكومه‌ت!!. له پشتی چاوی حكومه‌ته‌وه ته‌قه له هاووڵاتییان كرا، له پشتی چاوی حكومه‌ته‌وه كه‌ناڵی نالیا سووتێنرا، رۆژانه له پشتی چاوی حكومه‌ته‌وه به‌ناوی حزبه‌وه هه‌ڕه‌شه له رۆژنامه‌نووسان، نووسه‌ران، رۆشنبیران، پیاوانی ئایینی، هاووڵاتییان و خوێندكارانی زانكۆ ده‌كرێت، دیانه‌وێت حكومه‌ت له شه‌ڕێكه‌وه بگلێنرێت كه شه‌ڕی ئه‌و نییه، ده‌یانه‌وێ تۆڵه‌ی ئه‌و چاكسازی و ته‌قه‌للای چاكسازییه له حكومه‌ت بكه‌نه‌وه له‌مه‌دا ده‌بێ ئۆپۆزیسیۆن روونتر سه‌یری دۆخه‌كه بكات، شه‌ڕ بۆ نه‌مانی گه‌نده‌ڵی و نادادی بۆ ئه‌وه نییه، سته‌مكاری به‌رهه‌م بهێنێت، سته‌مكاری خه‌ریكه دێته نێو ماڵه‌كانمانه‌وه، ئێمه ده‌مانه‌وێ پارتی و یه‌كێتی و گۆڕان و كۆمه‌ڵ و یه‌كگرتوو به شێوه‌یه‌كی دروست و به گیانی پێكه‌وه ژیان و یه‌كتر قبوڵكردنه‌وه درێژه به سیاسه‌ت بده‌ن و به گوێره‌ی رۆژگاره‌كه خۆیان چاك بكه‌ن، ناكرێ نه كه‌س شه‌ڕی حكومه‌ت به‌وشێوه‌یه كه حكومه‌تی ئه‌و نییه‌و با نه‌بێ، نه كه‌س منه‌تی ئه‌وه به‌سه‌ر حكومه‌تدا بكات، كه حزبه‌كه‌ی ئه‌و حكومه‌تی دروست كردووه، یان به هاوبه‌شی له‌گه‌ڵا حزبێكی دیكه‌دا خاوه‌نی حكومه‌ته.
به میلیتاریكردنی هه‌ر شارو شارۆچكه‌یه‌ك، پاشگه‌زبوونه‌وه‌یه له دیموكراتییه‌ت، ئێستا له باشووری كوردستان، له زاخۆوه تا كفری پاشه‌كشه‌یه‌كی به‌رچاو له دیموكراسییه‌ت به‌دیده‌كرێت، ئێستا رۆژانه له زاخۆوه تا كفری ده‌ستوه‌ردانه‌كانی حزب له حكومه‌ت، ده‌بێته هۆی ئیحراج كردنی سه‌رۆكی هه‌رێم و سه‌رۆكی حكومه‌ت و حكومه‌ت. ئاخر ئیحراج كردن نه‌بێت چییه، كاتێ سه‌رۆكی هه‌رێم داوای خۆپیشانده‌ران به‌ڕه‌وا ده‌زانێ و ئه‌وه وا لێكده‌داته‌وه كه ئه‌مه نیشانه‌ی هۆشیاری كوڕان و كچانی میلله‌ته، كه‌چی له هه‌ولێر هه‌موو جووله‌یه‌ك له‌ژێر پرسیاردایه، دكتۆر پشتیوان كه له‌سه‌ر فانیله‌كه‌ی ده‌نووسێ، “نا بۆ گه‌نده‌ڵی”، له‌بری ئه‌وه‌ی بانگ بكرێ و ده‌ستخۆشی لێبكرێت، له‌بری ئه‌وه‌ی سه‌رۆكایه‌تی هه‌رێم و حكومه‌ت شانازی به هۆشیاری ئه‌م كوڕه‌یانه‌وه بكه‌ن، ده‌برێت و كورد وته‌نی: چاوی ده‌كه‌ن به قۆخ!!، من بڕوام وایه دكتۆر به‌رهه‌م ئه‌حمه‌د ساڵح پیاوێك كه زۆرێك له ته‌مه‌نی له به‌ریتانیاو ئه‌مریكا به‌سه‌ربردووه، پیاوێك كه زۆر به وردی دیموكراسییه‌تی رۆژئاوایی خوێندۆته‌وه، پیاوێك كه یه‌كێتی و پارتی بیانه‌وێ، یان نا بۆ خۆی ناوه‌و هه‌یه‌و پێشتر رۆڵێكی گه‌وره‌ی له ئه‌مریكا له ناساندنی كوردو كێشه‌كه‌ی گێڕاوه‌و دۆستی باشیشی بۆ حزبه‌كه‌ی په‌یداكردووه، ئئاماده‌بێت سه‌رۆكی حكومه‌تێك بێت، كه به‌رده‌وام قه‌یرانی بۆ دروست بكرێت، كه به‌رده‌وام ئه‌و بیه‌وێ چاكسازی بكات و رێگری لێبكرێت، ئاماده نییه ئه‌و حكومه‌ته به‌ڕێوه‌به‌رێت، به بڕوای من كه‌م رێكده‌كه‌وێت یه‌كێتی و پارتی پێویستیان به خه‌ڵك بێت، بۆ كاروباره‌كانیان، بۆ مه‌سه‌له‌ی پرسی به‌ڕێوه‌بردنی حكومه‌ت، ئه‌وان پێویستیان به دكتۆره، نه‌ك دكتۆر به‌وان، ئه‌گه‌رچی پێشترو له‌سه‌ره‌تای ده‌سبه‌كاربوونیان له‌لایه‌ن پارتی و یه‌كێتییه‌وه رووبه‌ڕووی شه‌ڕێكی گه‌وره بووه‌و تا ئێستاش به‌ده‌ستییه‌وه گیرۆده‌یه، له راستیدا ئێستا ئیدی كاتی ئه‌وه‌یه دكتۆر به‌رهه‌م روون و ره‌وان به یه‌كێتی و پارتی، به كاك مه‌سعودو مام جه‌لال بڵێت: ئه‌گه‌ر ده‌ستوه‌ردان له‌كاروباری حكومه‌ت كۆتایی نه‌یه‌ت، ئیدی من ئاماده‌نیم ئه‌م حكومه‌ته به‌ڕێوه‌به‌رم. ئیدی كاتی ئه‌وه‌ی سه‌رۆكی حكومه‌ت به هه‌ردوو حزب بڵێت و به‌شێكی زۆر له‌و شه‌ڕه‌ی ئێستای حكومه‌ت له‌لایه‌ن ئۆپۆزیسیۆنه‌وه رووبه‌ڕووی بۆته‌وه هۆیه‌كی مامه‌ڵه‌ی پارتی و یه‌كێتییه، یان روورنتر به‌شێك له به‌رژوه‌ندییه‌كانی نێو ئه‌و دوو حزبه‌یه، یه‌كێتی و پارتی و گۆڕان و كۆمه‌ڵ و یه‌كگرتوو، هه‌موویان ده‌رچووی نێو هه‌ناوی ئه‌م كۆمه‌ڵی كورده‌وارییه‌ن، نه هیچیان دوژمنن، نه‌هیچیان زیادن، عه‌یبوعاری نێو كۆمه‌ڵی كورده‌واری عه‌یبوعاری ئه‌وانیشه، به‌پێچه‌وانه‌شه‌وه هه‌روایه، ئه‌وان وه‌ك حزبی سیاسی، ئه‌و حزبانه‌ی كه زۆرینه‌ی هه‌ره‌زۆری كورسییه‌كانی په‌رله‌مان، له كۆی (111) كورسی لای ئه‌وانه، لانی كه‌م ده‌كرێ بڵێم: بریتین له زۆرینه‌ی كۆمه‌ڵیك كورده‌واری ئه‌ركی ئه‌وانه په‌ره به هۆشیاری سیاسیی كورده‌واری بده‌ن، په‌ره به گیانی لێبورده‌یی و یه‌كتر قه‌بوڵكردن و پێكه‌وه هه‌ڵكردن بده‌ن، نه‌ك رۆڵ له قوڵكردنه‌وه‌ی برینه‌كه‌دا بگێڕن، ئه‌و پێنج لایه‌نه پێكه‌وه هه‌ر چۆن به‌رپرسیارن له‌وه‌ی حكومه‌ت په‌رله‌مانێكی ته‌ندورست دروست بكه‌ن، حكومه‌ت و په‌رله‌مانێك كه له ده‌ره‌وه ببنه هۆی جوانكردنی كورد، به‌تایبه‌ت په‌رله‌مانێك كه جێگای مشتومڕی دیموكراتی و جێگای داكۆكیكردن بێت له مافه‌كانی خه‌ڵك، نه‌ك جێگای پاراستنی به‌رژه‌وه‌ندییه‌كانی حزب، ئاواش ئه‌م پێنج لایه‌نه به‌رپرسیارن له‌وه‌ی كه په‌ره به‌رهۆشیاری نه‌ته‌وه‌یی بده‌ن، ئاواش به‌رپرسیارن كه گیانی یه‌كخۆشویستن و رێًز له یه‌كدی گرتن له‌نێوان تاكه‌كانی كۆمه‌ڵی كورده‌واریدا په‌ره پێبده‌ن.
هه‌ر لایه‌نێك پێچه‌وانه‌ی ئه‌مه‌ی كرد، پێویسته حكومه‌ت ده‌رگای دادگای لێبگرێت، پێویسته خه‌ڵك به‌ر له هه‌ر كه‌سێك لایه‌نگرو ئه‌ندامانی خۆیان ئه‌وه قه‌بوڵ نه‌كه‌ن لێی، ده‌بێ داواكاریی گشتی بۆ داكۆكیكردن له مافه‌كانی خه‌ڵك، له پاراستنی ئارامی و له پاراستنی دیموكراتی لێی بێته‌ده‌نگ و داكۆكی له میلله‌ت بكات، پێویسته سه‌رۆكی حكومه‌ت و حكومه‌ت به‌ر له‌هه‌ر لایه‌كی دیكه، ده‌نگی ناڕه‌زاییان لێ به‌رزبێته‌وه، من لای خۆمه‌وه هه‌ر چاوه‌ڕوانی هه‌نگاوی له‌وجۆره له سه‌رۆكی حكومه‌ت ده‌كه‌م.
