Skip to Content

Wednesday, June 19th, 2024
كێڵگه‌ی وشه‌كان …. بورهان ئه‌حمه‌د

كێڵگه‌ی وشه‌كان …. بورهان ئه‌حمه‌د

Closed
by August 13, 2011 ئەدەب

 

گۆڕستان,
یاده‌وه‌ری قاسه‌یه‌
گیرفان,
یاداشتنامه‌ی زێرابه‌
      ***
كورسی,
باسك و مه‌چه‌كه‌ی كڕنۆشه‌
پێ وپلی سستییه‌
له‌نێو زه‌ڵكاوی ته‌مه‌ڵی
     ***
قه‌ره‌وێڵه‌,
باپیره‌ گه‌وره‌ی
سه‌رینی پاڵدانه‌وه‌یه‌
له‌ژێر ره‌ونه‌قی
پا و پووزی
خۆرێكی ڕه‌شی شێدار
     ***
قه‌ڵه‌م,
قۆڵی دووربینه‌
بۆ بووژانه‌وه‌ی مانگ
له‌ شه‌وێكی رووناكدا
     ***
نووسین,
گۆڕینی دیكۆری سینه‌یه‌
له‌ بانیژه‌ی هه‌ستدا
لادانی په‌رده‌یه‌
له‌سه‌ر شانۆی مێشك
     ***
ڕێگای دوور
خه‌یاڵی ده‌وێ‌
باڵا به‌رز,
باخێك هه‌نجیری شیله‌دار
به‌ری هێرشی زه‌رده‌واڵه‌ی گرتووه‌
كۆڵانی پێچاوپێچ
ئه‌وسه‌ری ده‌گاته‌
ئه‌ندێشه‌ی قووڵی فه‌نتازیا
      ***
سفره‌ی پڕ
له‌ده‌وره‌ی ماڵ
ئاژاوه‌ی نیشتمانه‌
ئاژاوه‌یه‌ك دۆست له‌گه‌ڵ ئاشتی
ئاشتییه‌ك نه‌گونجاو له‌گه‌ڵ ئازادی
ئازادییه‌ك زویر له‌گه‌ڵ هه‌مووان
هه‌مووانێك ناته‌با به‌یه‌كتر
ناكۆك به‌رانبه‌ر به‌ وتنه‌كانی دوێنێ
ده‌سته‌مۆ به‌حیكایه‌ته‌كانی
سه‌ده‌یه‌ك پێش ئێستا.

2011

Previous
Next
This site is registered on wpml.org as a development site.