Skip to Content

Saturday, August 13th, 2022

شاری تارماییه‌کان …. به‌ندی عه‌لی

Closed
by September 29, 2011 ئەدەب

                                                                                  

له‌گشت په‌ناو په‌سارێکا
له‌به‌ر ده‌رگای هه‌موو ماڵێ
له‌پاڵ هه‌موو دیوارێکا
له‌سه‌ر هه‌موو توله‌ڕێیه‌ک
له‌بن هه‌موو ده‌وارێکا
له‌ئاپۆڕه‌ی سه‌رشه‌قام و
له‌کۆڵانه‌ چۆڵه‌کانا
له‌چایخانه‌و له‌مزگه‌وت و
له‌مه‌یخانه‌و له‌بازاڕو مۆڵه‌کانا
له‌نێو بینه‌رانی شانۆ
له‌باخچه‌و له‌هۆڵه‌کانا
له‌خوێندنگاو له‌نێو زانکۆ
له‌ئاهه‌نگ و پرسه‌کانا
له‌سه‌یران و له‌سه‌ر گڵکۆ
له‌سێبه‌ری هه‌موومانان
نزیکتر له‌هه‌ناسه‌ی من
له‌چاو تروکانێکی تۆ
ئه‌وان له‌وێن
بۆنی ته‌ته‌ره‌کانی دۆزه‌خیان
لێدێ .. که‌دێن
ئه‌وان له‌وێن
کڵاوی سیحروای غه‌یبیان
له‌سه‌ردایه‌ وه‌ نابینرێن
ئه‌وان له‌وێن
گوێمان له‌زرمه‌ی پێی مه‌رگه‌
کاتێ که‌دێن
ئه‌وان له‌وێن و نابینرێن
هه‌ناسه‌کان ژمار ئه‌که‌ن
گوێ له‌چرپه‌ی دڵ ئه‌گرن
خه‌ونه‌کانیش ئه‌پشکنن
نیگا له‌چوارچێوه‌ ئه‌نێن
کاتێ که‌دێن
ئه‌وان له‌وێن و نابینرێن
کێ هه‌ناسه‌ی درێژتر بێ
له‌سه‌یزاده‌ .. ده‌یفڕێنن
کێ به‌چرپه‌ باسی بکا
دڵی له‌سینه‌ ده‌ردێنن
  کێ له‌خه‌وا جوێنی پێدا
خۆی و خه‌وی ئه‌سوتێنن
کێ برژانگێکی نیگاش
تیری توانجی تێبگرێ
ترێ ڕه‌شکه‌ی چاوی ئه‌که‌ن
به‌مێووژو ئه‌پروێنن
وه‌لێ .. یاران
سه‌یرو سه‌مه‌ر نه‌بێ لاتان
له‌شاری تارماییه‌کانا که‌سانێ هه‌ن
گه‌مژه‌و زه‌لیل و ملکه‌چن
هه‌ر له‌دێوه‌ ده‌بنگه‌که‌ی
نێو چیرۆکی عه‌لادین و
قۆریه‌ سیحراویه‌که‌ی ئه‌چن 

Previous
Next