سەمای دڵ ….خولیا حسێن

تۆ بەقدەر مشتێکی داخراوی
چۆن بەرگەی ئەم هەموو شکان و
شەونخونی و شاردنەوەی
 نهێنیەکانی تەمەن دگریت
ئەی دڵ ؟

هەتا ئێستا
چۆن بەرگەی تاڵاوی تاراوگە و
تلانەوەی تەنیای و
 ترسەکانی دۆڕانت گرتووە
 ئەی دڵ؟

تۆ بەقەدەر مشتێکی و
هەزاران جار بە دەستی ڕاوچیە
خوێن خۆرەکانی  بەدوای  کوشتنی خەونە پەرەسێلکەییەکانی هەرزەیی و
خنکاندنی خەیاڵە نەوڕەسییەکانی لاوێتی و
 زیندە بە چاڵکردنی
 خولیایە ئەبەدیەکانی ئەم تەمەنە
 پێکراوی  و
تاساوی و
 تۆقێندراوی

کەچی هێشتا
ئاوازی ئومیدە ئەبەدیەکانی خۆشبەختی لە قووڵاییتدا بەرز دەبێتەوەو
دەستی خەونەکانم دەگریت و
 لەسەر تەختەی پڕ لە جوولەی ئەم ژیانە
داوای سەمایەکی ترم لێ دەکەی
 ئەی دل؟