ئممممممم! …. جه‌لال قادر
ئه‌و ڕۆژه‌ی پۆلیسه‌کان قۆلبه‌ستیان کردم وامزنی ده‌مبه‌ن بۆ زیندانی که‌چی فڕێمیاندایه ناو شێتخانه‌یه‌ک!
به پزیشکی شێتخانه‌که‌م وت : من شێت نیم .
پزیشکه‌که وتی : گوێت له ده‌نگه‌که ده‌بێت؟
وتم : ئممممممم!
وتی : که‌واته تۆ شێتی ! ئه‌م شێتخانه‌یه بۆ که‌وسانه‌یه که گوێیان له ده‌نگه‌که ده‌بێت!
وتم : باشه چاره‌سه‌رێکمان بکه‌ن!
وتی : ئممممممم…ده‌بێت چاوه‌ڕوانبن!
وتم : تا که‌ی؟
وتی : ئمممممم!
سه‌ره‌تا که گوێم له و ده‌نگه بوو وامزانی گوێم کاس بووه یا ن هه‌ر له‌ناو مێشکدا ده‌خولێته‌وه .
له زۆر که‌سم پرسی : ئایا ئێوه‌ش گوێتان له‌و ده‌نگه هه‌یه ، که ده‌لێ ئمممممم؟
هه‌ندێک که‌س وه‌لامیان نه‌دامه‌وه هه‌ندێکیتر وتیان : په‌رده‌ی گوێت ته‌نک بووه!
سه‌ردانی پزیشکم کرد ، وتی : به‌لێ په‌رده‌ی گوێت ته‌نک بووه!
له‌پاش هه‌فته‌یه‌ک ده‌نگه‌که نه‌بڕایه‌وه ، گومانم هه‌بوو که ئه‌م ده‌نگه ناوازه له شوێنێکه‌وه دێت!
پیاسه‌ی ناو شارم کرد تا بتوانم له ده‌نه‌گه‌که نزیک بمه‌وه که‌چی له هه‌موو کۆلانه‌کان گوێبیستی ده‌نگه‌که ده‌بووم .
شه‌وانش کاتێ هاژه‌ی کارگه و ماشێنه‌کان خامۆش ده‌بوون ،هه‌ستم ڕاده‌گرت و گوێچکم شل ده‌کرد گوێم له ده‌نگه‌که ده‌بوو . تا زیێتر گوێم بۆ شل بکردایه هه‌راسانتر ده‌بووم .
له شار دوور که‌وتمه‌وه و چوومه ئه‌و ده‌شت و چۆله ، گوێم له هیچ ده‌نگێ نه‌ما . ئه‌مه‌ش تاقی کردنه‌ویه‌کی باشبوو که دلنیابم ده‌نگه‌که له‌ناو شاردایه.
له پیره‌مێردێکم پرسی : ئه‌م ده‌نگه ده‌نگه چییه له‌ناو ئه‌م شاره دێ؟
وتی : کوڕم گوێچکم گرانه ..ده‌نگت به‌رز که !
هاوارم کرد : باپیره ئه‌م ده‌نگه چییه له‌ناو ئه‌م شاره دێ ؟
وتی : ئمممممممممم..ئه‌وه‌نده گوێمان له‌م ده‌نگه ڕاگرت تا گوێچکمان گرانبوو .
وتم : من ده‌بێت سه‌رچاوه‌ی ئه‌م ده‌نگه بدۆزم !
وتی : ئممممممممممم.
له فه‌رمانبه‌ری شاره‌وانی و ده‌زگاکانم پرسی : ئێوه ده‌زانن ئه‌م ده‌نگه ده‌نگه له کوێوه دێ؟
وتیان :ئممممم.. ئێمه گوێمان له هیچ ده‌نگێ نییه و ڕسقمان مه‌بڕه!
گومانم هه‌بوو ئه‌م ده‌نگه ده‌بێت نهێنییه‌یه‌کی تیابێت .
به چاکترم زانی له مندالانی شاره‌که‌م بپرسم ، چونکه ئه‌وان ده‌توانن به ڕاستگۆیی وه‌لامم بده‌نه‌وه .
هه‌ر مندالی جۆره ئه‌فسانه‌یه‌کی بۆ گێڕامه‌وه . هه‌بوو ده‌یگوت : باوکم وتیه‌تی ئه‌وه گمه گمی کۆتره‌کانن؟
مندالێکیتر وتی : مامۆستاکه‌م وتیه‌تی ئه‌وه پرخه‌ی دێوێکی تووڕه‌یه!
هه‌ر که‌س شتێکی ده‌گوت له ئه‌نجامدا بۆم ڕوون بوه‌وه که په‌رده‌ی گوێم ته‌نک نه‌بووه به‌لکو ئه‌م ده‌نگه له‌ناو شار هه‌یه و هه‌ندێک که‌س ده‌بیستن هه‌ندێکش گوێگرانن .
کۆلم نه‌دا و به‌دوای سه‌رچاوه‌ی ئه‌وه ده‌نگه وێلبووم . له‌ناکاو دوو پۆلیس قۆلبه‌ستیان کردم و وتیان – تۆ تێکچوویته نابێت له ناوشار بسوڕێته‌وه .
وتم : هیچ تاوانێکم نه‌کردووه !
وتیان : ده‌نگه‌که ده‌بیستی؟
وتم : ئممممممم.
وتیان : ئمممممم..که‌واته خۆیه‌تی!
وتم : بۆ کوێم ده‌به‌ن؟
به پێکه‌نینه‌وه وتیان : ئممممممممممممممممممم!
