Skip to Content

Thursday, August 11th, 2022

نمایشی جه‌سته‌ بێده‌نگه‌كان … سه‌مه‌د ئه‌حمه‌د

Closed
by October 17, 2011 چیرۆک

*په‌یڤینێكه‌ له‌گه‌ڵا ئاوازو قوڕو هێڵاو ره‌نگه‌كاندا…
*هه‌وڵدانێكه‌، بۆ ئاشنابوون به‌ڕۆحی ئه‌م سێ‌جه‌سته‌ خاوێن‌و بێده‌نگه‌…
*نه‌فره‌تكردنه‌ وشه‌ ده‌مامكدارو هاواره‌ درۆزنه‌كان…

جگه‌ له‌قوڕێكی ساده‌و ساكار شتێكیتر نه‌بوو، قوڕێك كه‌بریتی بێت له‌خۆڵه‌سوره‌یه‌كی نه‌رم‌و چه‌ند قه‌تره‌ ئاوێكی ڕوون‌و پاك، خۆڵاو ئاوه‌كه‌ چه‌ند جارێك به‌یه‌كدا درابێت‌و هیچیتر، دواجار قوڕه‌ سوره‌ جوانه‌كه‌ی لێپێك ده‌هات..‏. شارێكی جوان‌و قه‌شه‌نگ بوو، شارێك بوو خه‌ڵكه‌كه‌ی به‌بێ‌ ده‌ربڕینی هیچ وشه‌یه‌ك زۆر به‌ساده‌و ساكاری له‌گه‌ڵا یه‌كدا ده‌دوان‌و ژیانی ئاسایی خۆیانیان به‌سه‌رده‌برد. بۆ خۆشم نازانم‌و تائێستاش بۆم ڕوون نه‌بۆته‌وه‌ چی منی گه‌یانده‌ ئه‌م شاره‌و بۆچی به‌م مه‌مله‌كه‌ته‌ ئه‌فسوناوییه‌دا گوزه‌رم كرد. ئه‌وان هه‌رله‌گه‌ڵا خۆیاندا وانه‌بوون ته‌نانه‌ت له‌گه‌ڵا منیشدا هه‌روابوون، به‌ وشه‌ گوزارشتیان له‌هه‌ست‌و سۆزو ناخی خۆیان نه‌ده‌كرد، به‌ڵكو ته‌نها به‌چه‌ند جوڵه‌یه‌كی خێرا له‌هه‌موو ڕازو په‌نهانییه‌كیان ده‌گه‌یشتم، له‌وكاته‌دا ڕێك منیش به‌شێك بوم له‌وان… شارێكی كپ‌و بێ‌ده‌نگ بوو.. یه‌كه‌مجار بوو ژیان به‌وئارامییه‌ ببینم، له‌چی ده‌گه‌ڕام له‌دوای تاوێكی كه‌م چه‌ند جوڵه‌یه‌كی خێرا بۆیان ده‌خستمه‌ به‌ردیده‌و نیگام، هه‌ركاتێك نیگام له‌سیماو روخساریان ده‌خشاند ئیتر هه‌موو نهێنییه‌كان به‌ئاشكرا خۆیان ده‌نواند, چ مه‌رامێك بۆ خۆشاردنه‌وه‌ نه‌ده‌ما… ئه‌وان نه‌ك هه‌رشتی ساده‌و ساكاریان بۆ ده‌گێڕامه‌وه‌ به‌ڵكو وه‌ك شاعیرێكی كارامه‌، به‌ڵام به‌بێ‌ ده‌ربڕینی ته‌نها یه‌ك وشه‌ باسی ورشه‌ی ئه‌ستێره‌و هه‌ناسه‌ی باو هه‌ناوی وه‌نه‌وشه‌و چیتریان بۆ ده‌كردم، منیش له‌خزمه‌تیاندا نیگای خۆمم راخستبوو, خۆش خۆش سه‌رنجی ئه‌وانم ده‌دا, سه‌ره‌تا له‌ زمانی بێ‌ده‌نگیی‌و له‌جوڵه‌ی پانتۆمایمیان حاڵی نه‌ده‌بووم.. به‌ڵام خۆشییه‌كی بێئه‌ندازه‌ جه‌سته‌ سڕه‌كه‌می داپۆشیبوو، بۆ یه‌كبه‌یه‌كی دیمه‌نه‌كان له‌ناخه‌وه‌ پێده‌كه‌نیم، بۆیه‌ بێ‌ده‌نگییه‌كه‌یانم به‌هه‌ند وه‌رنه‌گرت‌و نیگاو سه‌رنجم به‌شه‌پۆلی خێرای جوڵه‌كان به‌خشی‌و خۆشمژدانه‌ له‌پێشوازیاندا بووم.. چاوم لێبو قوڕه‌كه‌ جیهانێكی بۆنخۆش‌و ره‌نگینی بۆ نه‌خشاندم به‌تیله‌ی چاو تێیده‌ڕوانیم، ڕێك له‌وه‌ ده‌چووكه‌پێم بڵێت:
(ژیانی له‌مه‌ڕئێوه‌ چه‌ند ژیانێكی مه‌نگ‌و ژینگه‌یه‌كی بۆن گرتووه‌؟)..
ئیتر زۆر به‌زه‌یم به‌خۆماندا هاته‌وه‌, به‌ده‌ستخۆم نه‌بوو به‌ری چاوم لێڵا بوو، خه‌یاڵم وه‌كو منداڵێكی ئیفلیج نه‌یده‌توانی رێبكات‌و هه‌رله‌جێگای خۆیدا چه‌قبه‌ستوو مایه‌وه‌.. ویستم پڕكێشی بكه‌م‌و خۆم قوتاربكه‌م له‌وخه‌یاڵه‌ ناوه‌خته‌, به‌ڵام بێهوده‌بوو نه‌متوانی.. زریانێكی ناوه‌خت هه‌ڵی كردو خه‌یاڵمی وه‌كو قژی كیژۆڵه‌یه‌ك له‌ده‌ست‌و گێژه‌نی خۆی ئاڵاندو بردمی له‌به‌رده‌م شاره‌ مێرووله‌و به‌چكه‌ مێشه‌كاندا فڕێیدام.. له‌وێ‌ بۆئه‌وه‌ی بژێیت، ده‌بوو هه‌ناسه‌ نه‌ده‌یت! چونكه‌ شنه‌بای سه‌حه‌ر ژه‌هراوی بوو… قوڕه‌ سوره‌كه‌ فریام كه‌وت‌و به‌په‌له‌ خه‌یاڵه‌ په‌رت په‌رت‌و ئاڵۆسكاوه‌كه‌می كۆكرده‌وه‌, بۆ پشودانی، نه‌رم نه‌رم ده‌یشێلاو به‌ئاگای هێنامه‌وه‌. دووباره‌ له‌ناوشاره‌ ره‌نگینه‌كه‌ی ئه‌واندا خۆم بینییه‌وه‌، به‌چوارده‌وری خۆمدا ده‌مڕوانی، ده‌رگاكان بۆ نیشاندانی سیمای بێگه‌ردی جوانی له‌سه‌رپشت بوون. یه‌كه‌م جارم بوو شته‌ نه‌فره‌ت لێكراوه‌كان به‌دی نه‌كه‌م.. قوڕه‌كه‌ هێنده‌ به‌سه‌لیقه‌وه‌ نمایشه‌كه‌ی ئه‌نجام ده‌دا به‌خیلیم ده‌هات بۆئه‌و هه‌موو جوانی‌و پاكییه‌.
 زۆر به‌ئینسافه‌وه‌ له‌خزمه‌تمدا كاریان ده‌كرد، بۆ خۆم سه‌رم لێسوڕمابوو نه‌مده‌زانی له‌كوێم.. ئایا ئه‌مه‌ ئه‌و به‌هه‌شته‌یه‌ كه‌چه‌ند وه‌خته‌ هه‌وڵی بۆ ده‌ده‌م, یان ته‌نها نامۆبوونی ئه‌ندێشه‌كانمه‌ له‌خۆیان؟ یان چیتر نه‌م ده‌زانی، به‌ڵام یه‌كپارچه‌ جه‌سته‌ی شه‌ڕانیم ئارام ده‌بۆوه‌و شه‌رابی خۆشی نۆشده‌كرد.. دیمه‌نه‌كان زۆر دڵڕفێن‌و بێ‌گه‌ردبوون، له‌وشاره‌دا به‌چاوی خۆم جه‌سته‌و ته‌رمی هه‌ڵبزڕكاوی ئه‌هریمه‌نم بینی.. ئه‌هریمه‌ن دوای ئه‌وه‌ی له‌هه‌وڵه‌كاندا بێئاكام‌و بێهوده‌ ببوو, كه‌سی بۆ له‌خشته‌ نه‌برابوو, كه‌س نه‌بوو به‌ده‌روێشی ته‌ریقه‌تی, ئیتر له‌داخاندا خۆی كوشتبوو.. چاوم له‌ته‌رمه‌كه‌ی بڕی، دیمه‌نێكی زۆر ترسناك‌و ناشرینی هه‌بوو, بۆكڕوزێكی ناخۆشی لێوه‌ده‌هات, زوخاو له‌جه‌سته‌ ئاوساوییه‌كه‌ی ده‌تكا، به‌سه‌رسه‌ریه‌وه‌ دوكه‌ڵێكی ته‌ڵخ سێبه‌رێكی گه‌رمی دروستكردبوو. ئه‌م دیمه‌نه‌ له‌نمایشێكدا هه‌ر قوڕه‌كه‌ بۆی گێڕامه‌وه‌.. ئیتر له‌وێوه‌ منیش كه‌وتمه‌ موتاڵاو تێفكرین له‌گه‌ڵا بیركردنه‌وه‌ له‌مه‌رگی ئه‌هریمه‌ن‌و چاره‌نووسی بۆله‌مه‌ودوای مرۆڤ هه‌نگاوم ده‌نا، هیچم چنگ نه‌كه‌وت.. به‌ڕاسته‌ شه‌قامه‌كه‌دا سه‌ركه‌وتم زۆر رۆیشتم ئیتر له‌وێوه‌ گه‌ڕه‌ك‌و مه‌مله‌كه‌تی قوڕه‌كانم وه‌كو تارمایی ده‌هاته‌ پێش چاو. به‌لای رۆژهه‌ڵاتی شاردا هه‌نگاوم نا، به‌ڵام نه‌مده‌زانی بۆكوێ‌ ده‌ڕۆم، زۆری نه‌مابوو رێگام لێونبێت‌و خۆم به‌كونێكی نادیاردا بكه‌م.. سۆناته‌و ئاوازی شار ته‌نها بێ‌ده‌نگی بوو، به‌ڵام بێده‌نگییه‌كی قسه‌زل‌و قسه‌ خۆش.. هێنده‌م نه‌زانی راسته‌هێڵێكی ره‌نگ حه‌ڵوایی هاته‌ خزمه‌تم‌و بوو به‌چاوساغم.. ده‌ستی راستی گرتم‌و بردمی هه‌تا گه‌ڕه‌كی خۆیان رای نه‌گرتم، بردمی‌و له‌ناو جه‌سته‌و ڕۆحی ڕه‌نگه‌كاندا له‌ناوجیهانی هێڵه‌كاندا جێگایه‌كی بۆ خۆشكردم, له‌سه‌ر كورسییه‌كی نه‌رم‌و فراوان داینیشاندم… ره‌نگی ره‌ش, له‌دوای ئاوێته‌بونی له‌گه‌ڵا تیشكی زێڕینی خۆر به‌سه‌ر سه‌رمه‌وه‌ سابات‌و سێبه‌رێكی خۆش‌و فێنكی بۆ دروستكردم.. جه‌سته‌ قه‌ترانیه‌كه‌ نه‌ماو جه‌سته‌یه‌كی خۆڵه‌مێشی له‌چه‌شنی خۆرئاوا، یان سپێده‌ی به‌یان خۆی ده‌نواند. راسته‌ هێڵه‌ حه‌ڵواییه‌كه‌ له‌پێش چاومدا نمایش‌و سه‌مایه‌كی سه‌یری ئه‌نجامدا، چه‌ند جارێك به‌ده‌وری خۆیدا سوڕایه‌وه‌و خۆی لولكرد, پاشان بوبه‌ گوریسێَكی ئه‌ستوری توك ڕه‌ق, له‌چه‌شنی چه‌ماوه‌یه‌كی داخراوی هێلكه‌ییدا خۆی نواند، ناوقه‌دی خۆی به‌چه‌ند گرێیه‌ك توند توند شه‌ته‌ك‏دا، ئیتر بوبه‌په‌تی قه‌ناره‌و له‌چاوه‌ڕوانی گه‌ردنێكدا وه‌كو قورسی سه‌عاتی چاڵمه‌ ئه‌ملاو ئه‌ولای ده‌كرد! ترسام‌و رۆحم كه‌وته‌ له‌رزه‌، سیمام هه‌ڵبزڕكاو ئێڵنجم هات.. راسته‌ هێڵه‌كه‌ كه‌ئه‌وكاته‌ په‌تی قه‌ناره‌بوو, زمانی نه‌بوو تا تێیبگه‌یه‌نم, به‌ڵام به‌نیگاو دیده‌م به‌توندی لێی توڕه‌بوم‌و پیاهه‌ڵشاخام‌و پێم گوت:
(بۆچی ئێوه‌ش وه‌كو بنیاده‌م ره‌فتار ده‌كه‌ن, ده‌تانه‌وێ‌ له‌ژێر په‌تی سێداره‌دا وانه‌ی عه‌داله‌ت‌و دادپه‌روه‌ریمان بۆداده‌ن؟ بۆله‌وه‌ته‌ی قه‌ناره‌ هه‌یه‌ جگه‌ له‌گه‌ردنی باریكی په‌پوله‌‌و فریشته‌كان, ملی ئه‌ستووری كام ئه‌هریمه‌ن‌و كام دڕه‌نده‌ی ماچ كردووه‌؟.. به‌كام یاسا…)
هێشتا قسه‌كانم ته‌واونه‌كردبوو سیمام هه‌رتوڕه‌و غه‌زه‌باوی بوو، بینیم ره‌نگی سپی له‌چه‌شنی كۆترێك ئاماده‌باشی كردو به‌ده‌نوكی په‌تی قه‌ناره‌كه‌ی ونجڕونجڕكردو له‌بۆشایی ئاسمانه‌وه‌ به‌خاویو پارچه‌ پارچه‌ له‌به‌رده‌م پێمداكه‌وتن‌و گیانی یه‌كجارییاندا.. ئه‌م نمایشه‌ هه‌ر بۆ هێوركردنه‌وه‌و دڵنه‌وایی من بوو.. بۆ ساتێكی كورت ئاسوده‌بووم, به‌ڵام نه‌متوانی باوه‌ڕ به‌خۆم بكه‌م ئه‌وه‌ دوا مه‌رگی قه‌ناره‌بێت.. له‌ژیانمدا دیمه‌نی ناخۆشم زۆر بینیوه‌, به‌ڵام هیچ كامیان هێنده‌ی خنكاندن‌و هه‌ڵواسین سامناك‌و قێزه‌ون نه‌بووه‌.. كێ‌ له‌نهێنی‌و په‌نهانی زمانی ئه‌وچاوانه‌ ده‌گات كه‌له‌كاتی هه‌ڵواسیندا ده‌رده‌پۆقێت‌و به‌هه‌موو هێزی ته‌ماشا ده‌كات؟
ئه‌م ته‌رزه‌ بابه‌تانه‌ خه‌یاڵمی ته‌واو ماندوكردبوو.. ره‌نگی شین فریام كه‌وت، خۆی كرد به‌ئاسمانی سه‌رم، كه‌گوزارشت بوو له‌هێوركردنه‌وه‌و به‌خشینی ئارامی. تیكه‌ تیكه‌و لێره‌و له‌وێ‌ خه‌یاڵمی گورج كرده‌وه‌، ڕه‌نگی شین هات‌و هه‌ردوو ده‌سته‌ ناسكۆڵه‌كه‌ی ره‌نگی زه‌ردی گرت‌و كه‌وتنه‌ سه‌ما, كه‌وتنه‌ راموسانی یه‌كتری, هه‌رله‌وێداو له‌پێش چاوی منه‌وه‌ بێ‌شه‌رمانه‌ جووت بوون.. له‌دوای تاوێك‌و تواندنه‌وه‌ی هه‌ردوكیان له‌هه‌ناوی یه‌كدیدا منداڵێكی قشتیله‌ی سه‌وز له‌دایك بوو، ته‌نانه‌ت هه‌ردوو چاویشی هه‌ر سه‌وز بوو، سه‌وز به‌چه‌شنی به‌هار.. زۆر چاوه‌چاوو مله‌ قوته‌م كرد بۆ دایك‌و باوكی ئه‌ومنداڵه‌ چاو سه‌وزه‌, بێسود بوو, نه‌مزانی ئه‌وان رۆحیان به‌كێ‌ به‌خشی‌و چییان لێهات، به‌ڵام هێنده‌م له‌یاده‌ كه‌ئه‌وان خۆیانكرد به‌قوربانی بۆ هاتنی به‌هار. لێره‌ به‌دواوه‌ چه‌ند هێنده‌ی تر مه‌مله‌كه‌تی ره‌نگه‌كانه‌م خۆشویست.. زمانی خێڵی ره‌نگه‌كان زمانێكی بێگرێوگۆڵا‌و ساده‌و ساكار بوو, نازانم چه‌ند له‌خزمه‌تی كه‌رنه‌ڤاڵی هێڵاو ره‌نگه‌كاندا مامه‌وه‌, به‌ڵام وام لێهات هه‌ركه‌ ده‌جوڵانه‌وه‌ یه‌كسه‌ر له‌گوزارشت‌و مه‌رامیان تێده‌گه‌یشتم, ده‌مزانی ده‌یانه‌وێ‌ چیم پێ رابگه‌یه‌نن. ئه‌گه‌ر باسی بێزاری‌و دڵته‌نگی مه‌سه‌له‌یه‌كیان بۆ بكردمایه‌, ئه‌وا یه‌كسه‌ر هێڵه‌كان درێژ ده‌بوونه‌وه‌و به‌په‌له‌ به‌یه‌كدا ده‌ئاڵۆسكان‌و جیڕ ده‌بوونه‌وه‌، به‌شێوه‌یه‌ك كه‌هه‌ناوی منیش له‌گه‌ڵیاندا ده‌هاته‌ ئێش‌و دڵم ده‌گوشرا.. ئه‌گه‌ر بیانویستایه‌ باسی به‌رده‌وامی ژیانم بۆ بكه‌ن هێڵه‌كان به‌شێوه‌ی بازنه‌ی داخراو خولیان ده‌خوارده‌وه‌. له‌وكاته‌دا خولیاو ئاواته‌كانی منیش له‌بازنه‌ داخراوه‌كاندا له‌سوڕی به‌رده‌وامدا ده‌بوون.. ئه‌گه‌ر باسی مردن‌و له‌ناوچونیان بكردایه‌ ئه‌وا راسته‌هێڵێكی ره‌شداگه‌ڕاو له‌به‌رده‌ممدا درێژ ده‌بوو.. ئه‌گه‌ر باسی هێزو ده‌سه‌ڵاتیان بكردایه‌, ئه‌وا دوو هێڵی راست‌و چه‌پ به‌شێوه‌ی ئاسۆیی‌و شاقوڵی له‌سه‌ریه‌ك راده‌وه‌ستان..
له‌پاڵا دره‌ختێكی سه‌رقژنی كۆنه‌ ساڵدا ته‌ماشای ئه‌م جیهانه‌ ئه‌فسوناوییه‌م ده‌كرد، له‌كۆڵانی به‌رانبه‌رمه‌وه‌ چاوم لێبوو, چه‌ند هێڵێكی نوك تیژ له‌شێوه‌ی نوكی سێگۆشه‌و چوارگۆشه‌ له‌به‌رانبه‌ر یه‌كتری قیت بوونه‌وه‌, هه‌ریه‌كه‌یان توڕه‌یی‌و هه‌ڵچونێكی  ته‌واو له‌ڕویاندا به‌دی ده‌كرا.. زۆر ده‌ترسام لێره‌ش شه‌ڕو كوشتارو به‌ده‌ستییه‌كناشتن ببینم. به‌ڵام خۆشبه‌ختانه‌ باش بوو, هه‌رزو ئه‌م دیمه‌نه‌ گۆڕاو نمایشێكی یه‌كجار شه‌نگم بینی. هێڵه‌ ره‌نگاوڕه‌نگه‌كان، زه‌ردو سور، ئاوێته‌بون‌و پرته‌قاڵی خۆی نیشاندا. سه‌وزو شین بوون به‌قوربانی یه‌كدی, پیرۆزه‌ی هه‌ڵهات.. شین‌و سور تێكه‌ڵاوبوون‌و مۆر له‌دایك بوو، مۆرو سور بوون به‌یه‌ك‌و جگه‌ری چه‌كه‌ره‌ی كرد، سورو سپی ماچی ناوده‌می یه‌كیان كرد په‌مه‌یی جه‌سته‌ی ئاره‌قاوی هه‌ردوكیانی داپۆشی. ئینجا هه‌موو ئه‌م ره‌نگانه‌ له‌شێوه‌ی نیوه‌بازنه‌و چه‌ماوه‌ی كراوه‌، له‌شێوه‌ی گه‌ردن‌و لامل‌و سه‌رسنگ‌و ناوقه‌دو كه‌مه‌ر خۆیان ده‌نواند.. یه‌كتریان له‌ئامێز ده‌گرت، له‌دوای ئه‌م نمایشه‌ بارانی شه‌هوه‌ت دایكردو هه‌مویان چێژیان لێده‌چۆڕا.. منیش وێڕای ئه‌وه‌ی خۆم له‌بن داره‌كه‌دا مه‌ڵاس دابوو چاوم بڕیبووه‌ نمایشی ماچ‌و قوربانییه‌كان، به‌ڵام چه‌ند دڵۆپێك له‌وبارانه‌ گیانی ته‌ڕكردم. یه‌كه‌مجاربوو قوربانییه‌كی بێده‌مامك‌و بێمه‌رام ببینم.. به‌ده‌ستخۆم نه‌بوو, ئیتر لێره‌وه‌ چاوی سه‌رنجم نابینابوو, هیچم نه‌ده‌بینی.. لافاوێكی ناوه‌خت دای به‌سه‌رماو كه‌وتمه‌ به‌رشه‌پۆلی بێڕه‌حمی لافاوه‌كه‌و راپێچی كردم به‌ره‌و قوڵایی گه‌روی خۆی. ئه‌م جاره‌یان نه‌ك هه‌ر خه‌یاڵم بگره‌ جه‌سته‌شم له‌ناو ئه‌و قه‌رسیل‌و ده‌شته‌ڵانی به‌هاره‌دا هه‌ڵكێشاو هێنامیه‌وه‌ ناو بنیاده‌مه‌ ده‌مامكدارو درۆزن‌و زۆربڵێكان، لێره‌ شه‌هیده‌كانیش, كه‌ پاكژترین جه‌سته‌ی ئه‌م كۆمه‌ڵه‌ن خۆپه‌رست‌و درۆزنن، ئه‌وان له‌ڕێگای په‌یامی په‌پوله‌دا نه‌ڕۆیشتن یان له‌ڕێگای قڕكردنی شه‌مشه‌مه‌كوێره‌دا گیانیان به‌خت نه‌كرد.. به‌ڵكو بۆئه‌وه‌ی هه‌ریه‌كه‌یان جێ‌ ده‌رزییه‌كیان له‌به‌هه‌شت پێبدرێ‌ شه‌هید بوون. ئێره‌ وه‌كو مه‌مله‌كه‌تی هێڵا‌و ره‌نگه‌كان نییه‌, هه‌موو شتێك ئاوه‌ژو بۆته‌وه‌و پێچه‌وانه‌ نمایش ده‌كات, ئه‌وه‌تانێ‌ كیژه‌ پاكیزه‌ییه‌كان دووانه‌یان ده‌بێت, یه‌كێكیان ده‌بێت به‌قاوه‌چی یانه‌ی پیاوكوژان‌و ئه‌ویتر به‌سوپاسالاری شه‌وكوتان.. هه‌موومان له‌به‌رده‌م شه‌وقی لۆكزو چرا بێ‌ نه‌وته‌كاندا كۆڕی درۆو پیاهه‌ڵدانی یه‌كدی گه‌رم ده‌كه‌ین, له‌گه‌ڵا تارماییه‌كاندا هاوڕێ‌و له‌گه‌ڵا جه‌سته‌ زیندووه‌كاندا دوژمن‌و باوه‌كوشته‌ین. ئینجانه‌كان ده‌شكێنین‌و گوڵه‌كان له‌تابوتێكی ئاسنین ده‌نێین. به‌سه‌رپشتی گوێزاندا له‌پێشبڕكێیه‌كی ماراسۆنیدا به‌ره‌و هه‌تاو هه‌ڵده‌كشێین، دوای ئه‌وه‌ی كه‌ناگه‌ین به‌ڕووناكی به‌ده‌ست‌و پلی خوێناوی‌و سه‌ری بڕڕاوه‌وه‌ له‌قوڵایی تاریكیدا تیزو گاڵته‌ به‌یه‌ك ده‌كه‌ین. له‌ڕۆژه‌ پیرۆزه‌كاندا له‌جیاتی گه‌ردن ئازادی‌و لێخۆشبوون ته‌ون‌و داوی جاڵجاڵۆكه‌ ده‌سازێنین.. تابووت‌و دارشه‌ق به‌دیاری بۆیه‌كدی ده‌نێرین. له‌ژێر ئاسمانی ئه‌م ده‌ڤه‌ره‌دا بارانی سور داده‌كات‌و له‌جێگای گولیلكه‌ سوره‌ی به‌هار كه‌له‌سه‌ره‌كان سه‌رده‌ردێنن..!!
 زۆری نه‌مابوو هزرم له‌ده‌ست بده‌م, ببم به‌قوربانی هه‌ڵسوكه‌وتی بنیاده‌مه‌ مشه‌خۆرو خۆخۆره‌كان.
به‌ڵام تاماوم قه‌رزاری ئه‌و ئاوازه‌ به‌سۆزو میهره‌بانه‌م كه‌ له‌ گه‌رویه‌كی سه‌رمه‌سته‌وه‌ ده‌رده‌په‌ڕی, كه‌سه‌رجه‌م خه‌مه‌كانی منی له‌پریاسكه‌یه‌ك ناو بۆ خۆشم نازانم چیان به‌سه‌رهات، منیش له‌به‌رده‌م ئه‌و ئاوازه‌ خه‌م ره‌وێنه‌دا جه‌سته‌و رۆحی خۆم هه‌ڵخست‌و جارێكیتر, به‌ڵام له‌جاران سه‌رمه‌ستتر هاتمه‌وه‌ ناوجه‌سته‌ی هێڵاو ره‌نگه‌كانه‌وه‌.. چومه‌ ناو گلێنه‌و بیناییانه‌وه‌. ره‌نگه‌ گه‌رمه‌كان, ره‌نگه‌ سارده‌كان, ره‌نگه‌ بێلایه‌نه‌كان، هێڵه‌ پان‌و باریكه‌كان, كورت‌و درێژه‌كان, هه‌موویانم به‌سه‌ركرده‌وه‌، چاوی یه‌ك به‌یه‌كیانم ماچ كرد. ئیتر له‌خزمه‌تی هاووڵاتیانی ئه‌م شاره‌ پڕ له‌ئه‌ندێشه‌یه‌دا چ پێویستیم به‌ وشه‌و ژاوه‌ژاو نه‌بوو، له‌وێدا ئیستێكم كردو ئاوازێكی ناخۆش په‌رده‌ی گوێیه‌كانمی له‌رانه‌وه‌، ده‌نگی ناوه‌ختی زڕته‌ پیاوه‌كه‌ی له‌مه‌ڕخۆمان بوو كه‌ له‌ناو شایلۆغانی جه‌ماوه‌ردا ده‌یشیڕاندو كه‌ف به‌لاچه‌ناگه‌یدا ده‌چۆڕایه‌وه‌.. خۆی كردبوو به‌فریادڕه‌سی كرێكاران‌و په‌نجه‌كانی راده‌وه‌شاند, هه‌ڕه‌شه‌ی له‌سه‌رجه‌م چاره‌نووسی مرۆڤ‌و مرۆڤایه‌تی ده‌كرد.. بۆ ئه‌وه‌ی چیتر گوێ‌ بیستی ئه‌و درۆ زلانه‌ نه‌بم، به‌هه‌ردوو ده‌ست گوێی خۆمم داخست‌و پشویه‌كم به‌گوێیه‌كانم‏دا.
هه‌رله‌خزمه‌تی ئه‌و جه‌سته‌ بێده‌نگانه‌دابووم، حه‌زم ده‌كرد بروسكه‌یه‌كی به‌په‌له‌و بانگه‌وازێك بۆ هه‌موو وشه‌و ده‌نگه‌كان جاڕبده‌م, كه‌ له‌ده‌ورم كۆببنه‌وه‌, ئه‌وسا منیش كفنێكی ره‌ش بكه‌مه‌ باڵاپۆشیان‌و مه‌رگی وشه‌و ده‌نگه‌كان رابگه‌یه‌نم. نه‌مریش ببه‌خشمه‌ نمایشی جه‌سته‌ بێده‌نگه‌كان.

Previous
Next