Skip to Content

Saturday, February 24th, 2024
خۆپیشاندانە دەستکردەکان..!

خۆپیشاندانە دەستکردەکان..!

Closed
by May 17, 2012 گشتی

 

هەر خۆپیشاندانێك کە دەستکرد بوو، وە هیچ زەمینەیەکی مادی و مێژوویی نەبوو، ئەوا قاڵب و فۆرمی دروستکەرەکەی وەردەگرێت ، واتا گەر  مەهامی کارەکتەر و دروستکەرەکانی زیاتر دروستکردنی فۆبیا و ئاژاوە بێت دژ بە دەسەڵات، یان  بۆ بەدەستهێنانی ئیمتیازێك بێت لە چوارچێوەی هەمان حوکمەت و دەسەڵاتدا، ئەوا جەماوەرەکەشی تەنها ئەو ئەرکە ئەنجام دەدەن لەوە زیاتر توانای ڕۆشتن و بەدیهاتنیان نابێت و هەر زوو ڕا دەوەستن..!، وە شێوەکار و جوڵانەوەکانی سروشتی نابێت، کارێك دەبێت  کە هێز و ئیرادەی تێدا نابینرێت، وە کوێرانە و بێ ئاسۆ دەبێت، وە کۆتاییەکەشی بێجگە لە نائومێدی و شکست هیچی دیی لێ ناچنرێتەوە.
خۆپیشاندانە دەستکردەکان هەرگیز بۆ گۆڕانکاریەکی ڕیشەیی و ڕادیکاڵی ڕێکناخرێت و هەڵناگرسێت، وە لە لایەکی دیەوە داوای خۆپیشاندانەکان لە هیچ کاتێکدا هاوتای داوا و خواستە سەربەخۆکانی هاوڵاتیان نابێت،  بەڵکو زیاتر داوا و خواستی وەهمی دەبێت و بەدوور دەبێت لە کێشە زیندووەکانی ژیانیان..!
ئەگەر خەڵکی کوردستان لە ئەمڕۆدا دژ بە دەسەلاتی پارتی و یەکیەتی لە ڕێگایەکی هوشیارانەوە ڕاپەڕن، هەرگیز ڕێگای ڕووداوەکانی بادینان و هەولێر هەڵنابژێرن، چونکە وەک گوتم خەڵکی کوردستان داواکاری و داخوازی و کێشە و دەردی  قوڵی مادی ڕۆژانەی هەیە، لە بەر ئەمە خۆپیشاندانەکان و ناڕەزایەتی‌یەکان لە خاڵێکی ئەسڵی‌یەوە دەستپێدەکەن و دژ بە جێگایەکی  ئەسڵی دەڕۆن، وە  ئاراستەکەشی دژ بە ئاراستەی ڕوواوەکانی بادینان و هەولێر دەبێت، واتا خەڵكی هوشیار لە بەرامبەر دەسەڵاتداراندا هەرگیز  تیرەکانی لە هەوادا بە خەسار ناهاویژێت..!
بۆ ئەرگۆمێنتی زیاتری ئەم دیدەی سەرەوە  دەتوانین سەرنجێکی کورت لە خۆپیشاندانەکانی ١٧ ی شوبات بدەین و بەراوردی بکەین لە گەڵ ڕووداوەکانی بادینان و هەولێردا، دەبینین لە زۆر ڕووەوە جیاوازن..بەڵام لە یەک خاڵدا هاوبەشن، ئەویش هەمان توڕەیی و پڕ لە رقبونی هاوڵاتیانی سادەی ئەم وڵاتەیە کە چەند ساڵێکە هەر پەنگ دەخواتەوە ..کە هەموو هێزێک و حیزبێک دەتوانێت بە ئاسانی لە دوورەوە دەرزیەکی پێدا بکات و بۆ مەرامە سیاسی و تایبەتیەکانی خۆی بەکاریبهێنێت..!
 خۆپیشاندانەکانی ١٧ی شوبات هەرچەند ئەمیش دابڕاو نەبوو لە (دەستکاریکردن و ئیحتواکردن و ناسەربەخۆیی لە لایەن حیزبەکانی دەرەوەی دەسەڵات)، بەڵام لە ئاستی گشتیدا دژ بە گەندەڵی و نا عەدالەتی و نەبونی یاسا و  پێشێلکردنی ماف و ئازادیەکان بوو. بەڵام (خۆپیشاندانە دەستکردەکانی) بادینان و هەولێر بۆ خواستێک و داوایەك بوو کە کێشەی ئەسڵی و سروشتی واقیعی‌و مادی و ڕۆژانەی هاوڵاتیان ئەم دوو دەڤەرە نەبوو، واتا  کێشەی ئەمڕۆی خەڵکی بادینان و هەولێر بونی (سەنتەری مەساج و دوکانی مەیفرۆشتن) نی‌یە، بەڵکو خەڵکی بادینان و هەولێر هەمان کێشەی خەڵکی خۆپیشاندەری ١٧‌ی شوباتیان هەیە، واتا هەمان کێشەی ناعەدالەتی و نایەکسانی‌ سیاسی و ئابوری و ئیداری‌و بەرخودی ناشیرینی دەسەڵاتدارانیان هەیە .
 ڕوداوەکانی بادینان و هەولێر هاندان و ڕێکخستنەکانی هەر حیزب و لایەنێك بوبێت گرنگ نی‌یە، بەڵام گرنگ ئەوەیە ئەم رووداوانە لە سوتانی بارەگاکانەوە تا سوتانی مەیخانە و سەنتەری مەساجەکان لە گەڵ خواست و داوای ئەمڕۆی خەڵکی کوردستان بە گشتی و هاوڵاتیانی بادینان و هەولێر بە تایبەتی هاوتاو تەبا نی‌یە..!
واتا ئەوەی کە لە بادینان وهەولێردا ڕوویدا، سینارۆیەکی سیاسی چەند حیزبێك بوو، نمایشێکی تایبەتی  سیاسی-حیزبی بوو، خۆپیشاندانێکی خۆڕسک و سەربەخۆ نەبوو..! چونکە خۆپیشاندانە خۆڕسکو کۆمەڵایەتی‌یەکان، بە جیا لەخۆپیشاندانی هەر بزووتنەوەیەکی ئایینی و ئایدۆلۆژیی دروستکراو،..بە جیا لە خۆپیشاندانی هەر حیزب و ڕیکخراوێکی سیاسی، شێوەی سەرهەڵدان و ئاراستە و ئەرک و ئارمانی جیاوازی هەیە..!
خۆپیشاندانە خۆرسکەکان و خۆپیشاندانە دەستکردەکان  هەمان زەمینەی لێکچونیان نی‌یە..وە هەمان هەوێن وهاندانیان نی‌یە،وە هەمان کارەکتەرو شیعارو داواو ئامانجیان نی‌یە، بەڵام لەوانەیە ڕووبەڕووی هەمان دەسەڵات ببنەوە بە هێز و ئیرادەوی جیاوازەوە، وە بە دلنیایی‌یەوە شێوەکار و دەربڕینی جیاوازیشیان دەبێت.
وە وەك لە سەرەوە باسم کرد خۆپیشاندانە خۆڕسکەکان و دەستکردەکان ئەگەر ئاگاهانەو هوشیارانە بێت هەمان خاڵی ئینتڵاقیان نی‌یە و لە شوێنێکەوە هەڵناگرسێن و دەست پێناکەن، خۆپیشاندانە خۆڕسکەکان گەر هۆشیارانە بێت، ئەوا زیاتر لە شوێنی ژیان و کارەوە  سەر هەڵدەدەن و شوێنێک هەڵنابژێرن کە دووربێت لە ژیانی واقیعی و مادیانەوە، هەرگیز لە تەکیەو مزگەوتەکانەوە دەستپێناکەن، بەڵام هەرکاتێك مرۆکان لە مزگەوت و کەنیسەکانەوە لە پێناو کێشە مادیەکانیاندا دژ بە دەسەڵاتداران دەستیان کرد بە خۆپیشاندان و ڕاپەڕین، ئەوا دەتوانین بڵێین: یان لە ئەسڵدا هەستان وخرۆشانەکە ئایینی‌یە، یان ئاستی توڕەبون وبەگژاچونەوە هێندە بەرزبۆتەوەو هەموو جێگاکانی تەنیوەتەوە، لەم کاتەدا دەکرێت لە مزگەوت و کەنیسەکانیشەوە سەرهەڵبدەن و دەستپێبکەن، بەڵام موتڵەقەن مۆرکێکی ئایینی بەسەر خۆپیشاندان وخرۆشانەکاندا زاڵ نابێت..! چونکە ئەم شوێنانە، واتا مزگەوت و کەنیسەکان تەنها پەیوەستێکی ڕۆحی‌یە لە نێوان مرۆڤ و ئایینەکانیاندا کە لە ساتی ترس و نامۆبون و نزاو تاعەت و پاڕانەوە و تێڕامان لە خودا مرۆکان ڕووی تێدەکەن و تێیدا کۆدەبنەوە، نەك لە ساتی کاردا یان لە ساتی بەگژاچونەوە و شۆڕشدا بۆ ژیانێکی ماددی باشتر.
کەواتە دەگەینە ئەو ئەرگومێنتەی ئەگەر ئەمڕۆ هەر کۆبونەوەیەک و خۆپیشاندانێك لە مزگەوتەکانەوە ئەنجام بدرێت، ئەوا گومانی تێدا نی‌یە کە ئەجندایەکی ئیسلامی/سیاسی (ناوخۆ و دەرەوە) لە پشتی‌یەوە ڕاوەستاوە، وە هەر ناڕەزایەتی وخۆپیشاندان وڕاپەڕینێکیش لە مزگەوتەکانەوە سەر هەڵبدەن ئەوا لە پێناو گۆڕانکاری و باشترکردنی ژیان وگوزەرانی خەڵکی کوردستاندا نابێت، بەڵکو لەپێناو گۆڕێنی ڕووخساری ئەم دەسەڵاتە بێڕەنگەدا دەبێت بۆ دەسەڵاتێکی بە ئیسلامی ڕەنگکراو، لە پێناو مەهامی تایبەتی تاکە حیزبێکی ئیسلامی سیاسیدا دەبێت، لە پێناو گۆڕینی دەستێکی سەرکوتەوە بۆ دەستێکی سەرکوتی شەریعەتیدا دەبێت..لە پێناو گۆڕینی دەسەڵاتیكی گەندەڵی بێ یاساییدا بۆ دەسەڵاتێکی گەندەڵی شەریعەتی وئایینیدا دەبێت.. لە پێناو هاوڕەنگردنی  زمان و کولتور ونەریت و بۆنەی  کۆمەڵگای کوردی بۆ کولتور و نەریتی ولاتانی عەرەبی و ئیسلامی دەبێت ..هتد نەک لە پێناو عەدالەت و یەکسانی و  پێشکەوتن و نەمانی گەندەڵیدا، ئیسلامیەکان بەو بەرنامەو باکگراوەندەی هەیانە هەرگیز ناتوانن ئازادی و بەختەوەری و ئاسودەیی بۆ مرۆکان بە دەستبهێنن، وە هەرگیز ناتوانن کۆمەلگایەکی خالی لە گەندەڵی و توندوتیژی و چەوسانەوە  بۆ مرۆکان بەدیبهێنن..!
زۆرن ئەو وڵاتانەی کە بەپێ‌ی یاساکانی شەریعەت و قورئان دەسەڵاتەکانیان بەڕێوە دەبەن، زۆرن ئەو کۆمەڵگایانەی کە کولتور ونەریتی ئیسلامی پەیڕەو دەکەن، بەڵام گەر سەرنجێکی قوڵ لە چۆنیەتی ژیانیی مرۆکانیان بدەین لە رووی ئازادی و مافی مرۆیی‌یەوە، دەبینین نەک هەر ئازاد نیین  بەلکو بێبەشترین و زەلیلترین مرۆڤن، لە سایەی ئەو دەسەڵاتانەدا پرسیار و گومان و بیرکردنەوەی جیاواز و پێشکەوتن و داهێنان بە تەواوی لە مرۆکان  حەرامە..!

٩ ئایاری ٢٠١٢

Previous
Next
This site is registered on wpml.org as a development site.