Skip to Content

Tuesday, May 24th, 2022

سیناریۆی ژه‌نینێکی ده‌روێشانه‌

Closed
by July 30, 2012 شانۆ

 

 

 

1… ڕۆژه‌ … شه‌قامێکه‌ … ده‌ره‌وه‌یه‌ .

شه‌قامێکی قه‌ره‌‌باڵه‌غی شاره‌ ،گوێمان له‌ده‌نگی سۆڵۆی ڤیۆلایه‌که‌  ، خه‌ڵکی سه‌رقاڵی هاتن و رۆیشتنن . له‌ نێوه‌ندی ئه‌م قه‌ره‌بالغییه‌دا هه‌ندێك له‌ ڕێبواران ده‌نگی ڤیۆلاکه‌ ڕایانده‌کێشێ و بۆ ساتێك گوێبیستی  مۆسیقایه‌کی به‌سۆزی خه‌یاڵ ئامێز ده‌بن . که‌ پیاوێکی ته‌مه‌ن 48 ساڵ ناوی  دانیاڵه‌ ده‌یژه‌نێ ، پاش ته‌واو بوونی پارچه‌ مۆسیقاکه‌ سه‌گه‌که‌ی قه‌پ به‌شه‌بقه‌که‌ی دانیاڵدا ده‌کات و ده‌یباته‌ به‌رده‌م گوێگران هه‌ندێکیان پاره‌ی وورده‌ی بۆ تێده‌که‌ن .

2… شه‌وه‌ … ماڵه‌ … ناوه‌وه‌یه‌ .

ژووری دانیشتنی ماڵی دانیاڵه‌ و له‌سه‌ر کورسیه‌ك دانیشتووه‌و نوقمی بیرکردنه‌وه‌و خه‌یاڵه‌ ، ئازار ده‌مووچاوی گرژو بێتاقه‌ت کردووه‌ . پاش ساتێکی کورت سه‌لینی کچی که‌ته‌مه‌نی (18) ساڵانه‌ له‌گه‌ڵ سه‌گه‌که‌یاندادێنه‌ ژوورێ … دانیاڵ ڕاست ده‌بێته‌وه‌و سه‌یریان ده‌کات و ده‌یه‌وێ قسه‌ بکات به‌ڵام هیچ ووشه‌یه‌ك له‌ دوو لێوی نایه‌ته‌ ده‌ر …. سه‌لینیش هه‌ست به‌ باوکی ده‌کات .

                               سه‌لین /

                  باوکه‌ ده‌موچاوت ده‌یه‌وێ قسه‌

                 بکات ،تاکه‌ی لێوه‌کانت بۆ ژیان

                  ناجوڵێ… ؟

 باوکی ده‌یه‌وێت بێته‌ گۆ به‌ڵام ووشه‌کان نایه‌نه‌ ده‌رێ ، دیاره‌ ئازارێکی گه‌وره‌ هۆکاری ئه‌وبێده‌نگییه‌ن  .

                 تۆش ده‌ته‌وێ وه‌ك دایکم

                بێده‌نگ بیت له‌م دونیایه‌ ؟       

                ئاخر ئه‌م جیهانه‌ پێویستی

                به‌گفتوگۆ کردنه‌ نه‌ك به‌ته‌نها

                سه‌یرکردن..دایکشم به‌یانی

                دێته‌وه‌ بۆ ئه‌م ماڵه‌ .. دواتر

                ئێره‌ به‌یه‌کجار ده‌بێته‌ ماڵی 

                ئازارو فرمێسك وئه‌شك و 

              بێده‌نگی .‌

سه‌گه‌که‌ له‌م کاته‌دا ده‌ست ده‌کات به‌وه‌ڕین به‌چاوێکی پڕ خۆشه‌ویستی میهره‌بانه‌وه‌  له‌ لای سه‌لینه‌وه‌ ده‌چێته‌ لای دانیاڵ و داده‌نیشێ.

 

3… ڕۆژه‌ … ماڵه‌وه‌یه‌ … ناوه‌وه‌یه‌ .

ژوورێکی تری ماڵی دانیاڵه‌ . ئانجێل که‌ ته‌مه‌نی (45) ساڵانه‌ ماوه‌ی دوو ساڵه‌ له‌کۆمادایه‌و به‌ته‌نها دڵی لێده‌دات ، له‌سه‌ر قه‌ره‌وێڵه‌یه‌ك که‌وتووه‌ چاوه‌کانی کراوه‌ن و هیچ جۆره‌ جووڵه‌یه‌کی نییه‌ . دانیاڵی مێردی له‌لای سه‌ریه‌وه‌ دانیشتووه‌و چاوه‌کانی بڕیوه‌ته‌ ئانجێل سه‌گه‌که‌شی له‌لای قاچییه‌وه‌ پاڵکه‌وتووه‌.  سه‌لین ڤیۆلاکه‌ی باوکی به‌ده‌سته‌وه‌یه‌و دێته‌ ژوو.               

                                سه‌لین /

                   باوکه‌ به‌ بۆنه‌ی ئه‌وه‌ی دایکم ‌

                  پاش دوو ساڵ له‌ نه‌خۆشخانه‌

                  بۆ یه‌که‌مین جاره هێناویانه‌ته‌وه‌ ‌

                 بۆ ماڵه‌وه‌ پارچه‌یه‌ك مۆسیقامان ‌

                 بۆ بژه‌نه‌ ، با ژه‌نینێكی وابێ سا

                 به‌ڵکو بمانگه‌ڕێنێته‌وه‌ بۆ نێو 

                 یاری و ده‌نگه‌ده‌نگ وهاوارو

                 قیژه‌ قیژی منداڵی ، بۆ نێو

                  گه‌رم و گوڕی ژیان ،ده‌ی 

                  باوکه‌ هه‌رچیت کردووه‌

                  با ژه‌نینه‌که‌ت ئه‌گه‌ربۆساتێکی

                 که‌میش بووه‌ له‌ ئامێزی سۆزو

                 ناسکی خۆیدا بمان لاوێنێ .

ڤیۆلاکه‌ ڕاده‌گرێ بۆ باوکی ، فرمێسك به‌ر چاوه‌کانی دانیاڵ ده‌گرێ  و له‌سه‌رخۆ ڤیۆلاکه‌ وه‌رده‌گرێ ده‌ست ده‌کات به‌ژه‌نین . ده‌نگی ژێکان وده‌ست و په‌نجه‌ی دانیاڵ مۆسیقایه‌کی زۆر له‌سه‌رخۆی سیحراویمان پێده‌به‌خشێت که‌ هه‌رچ شتێك ژیانی تێدا بێت کاری تێده‌کات وسۆزو ئاوازه‌که‌ی ده‌یجوڵێنێ . دانیاڵ چاوه‌کانی داخستووه‌و به‌هه‌موو هه‌ست و سۆز و بوونی خۆیه‌وه‌ به‌رده‌وامه‌ له‌ ژه‌نین . ئه‌نجێل چاوه‌کانی فرمێسكی پێدا دێته‌ خوارێ ، سه‌لین هاوار ده‌کات .

                   باوکه‌ … باوکه‌  چاوه‌کانی 

                   دایکم که‌وتنه‌ قسه‌… سه‌یرکه

                  فرمێسك له‌چاوه‌کانی دایکم

                  دێته‌ خوارێ ..که‌واته‌ هه‌سته‌کانی

                  ئیشده‌که‌نه‌وه‌ .

دانیاڵ و سه‌لین باوش به‌ ئه‌نجێڵ دا ده‌که‌ن، سه‌گه‌که‌ش ده‌ست ده‌کات به‌وه‌ڕین… 

                 دایه‌ ئێستا تۆ گوێت له‌ ئێمه‌ یه‌

                 ده‌ی دایکه‌ وه‌ڵاممان بده‌ره‌وه‌ .

به‌رده‌وام فرمیسك به‌چاوه‌کانی ئه‌نجێل دا دێته‌ خوارێ ………..

                باوکه‌ تۆ به‌رده‌وامبه‌  له‌ ژه‌نیین .

                               دانیاڵ /

                سه‌لین تۆش به‌په‌له‌ ته‌له‌فۆن بۆ

                دکتۆره‌کان بکه‌ … ده‌ی خێرا

               ئه‌مه‌ شتێکی زۆر تازه‌و دڵخۆشکه‌ره‌ .  

سه‌لین باوه‌ش به‌باوکیشیدا ده‌کات وپاشان ماچی ده‌کات و هاوار ده‌کات .

                              سه‌لین /

                  باوکه‌ به‌رده‌وام به‌ له‌ ژه‌نین

                 باناخی ووشکمان سه‌وزبێته‌وه‌

                 باگه‌رم و گوڕی ژیانمان بۆ

                 بگه‌ڕێته‌وه‌ .. ده‌ی باوکه‌ گیان

                  به‌رده‌وام به .‌

سه‌لین ته‌له‌فوونه‌که‌ی له‌ گیرفانی ده‌رده‌هێنێ و ده‌ست ده‌کات به‌ ژماره‌ لێدان … دانیاڵیش ده‌روێشانه‌ ده‌ست ده‌کاته‌وه‌ به‌ژه‌نینی ڤیۆلاکه‌ی . سه‌گه‌که‌ش ده‌ست به‌هاتوو چۆکردن ده‌کات له‌ ژوور ه‌که‌دا جارێ ده‌چێته‌ لای دانیاڵ جارێکی تر ده‌ڕواته‌ لای سه‌لین وخۆی تێیان هه‌ڵده‌سوێ .


                             ته‌واو .

تێبینی / بۆنووسینی ئه‌م کورته‌ سیناریۆیه‌  سوودم له‌ ژیانی       ( ئه‌نجێل لبی فه‌ره‌نسی) وه‌رگرتووه‌ .

rbahir@hotmail.com

نووسینی: رزگار باهیر

 

Previous
Next