من پاڵه‌وانی هه‌ره‌سم …. له‌تیف فاتیح فه‌ره‌ج
مێژوم سه‌ركرده‌ی دۆڕاوه
مێژوم پڕه له چیرۆكی تێكشكانی ئه‌و خه‌ونانه‌ی نه‌هاتنه دی
پڕه له فڕینی ئه‌و مه‌لانه‌یبه‌ر له‌وه‌رزی هاتن رۆیشتن
ئه‌وباخانه‌ی خۆمان ناوی مه‌رگمان لێنان
سه‌ركرده‌یه‌كم نیه گه‌یشتبێته ئه‌و به‌ری روباره‌كه
سه‌ركرده‌یه‌كم نیه به‌ر له‌هاتنی دوژمن هه‌ڵنه‌هاتبێت
سه‌ركرده‌یه‌كم نیه به‌خوێنی خۆی بونی به‌خشیبێ به‌ژیان
كه‌شتیه‌كم نیه بۆ تێپه‌ڕینبه نێو دۆزه‌خا
كه‌شتیه‌كم نیه بۆ گه‌یشتن به به‌هه‌شت
كه‌شتیه‌كم نیه بۆ هه‌ڵكردنی ئاڵا
گۆرانیه‌كم نیه بۆ ووتن
گۆرانیه‌كم نیه بۆ هه‌ستانه‌وه
گۆرانیه‌كم نیه بۆ به‌رده‌وامی
مێژوم پڕه له سواری بێچه‌كی دوای هه‌ره‌س
پڕه له ماچی نه‌گه‌یشتوو به‌لێو
پڕه له درۆی سیاسیه‌كانی خاك به‌خشین
وڵات به‌خشین ومرۆڤ به‌خشین
پڕه له رۆمانی ئه‌تك
پڕه له‌شكست وهه‌ڵنه‌سانه‌وه
پڕه له لاوانه‌وه‌ی ئه‌و دایكانه‌ی رۆڵه‌كانیان نه‌گه‌ڕانه‌وه
ئه‌و باوكانه‌ی به‌سه‌ربه‌رماڵی چاوه‌ڕوانیه‌وه مردن
ئه‌و خوشكانه‌ی فرمێسك هیوایه‌كی پێنه‌به‌خشین
ئه‌و گوڵانه‌ی پێش هه‌ناسه‌دان وه‌رین
مێژوم
ده‌ستێكی نیه بۆ گرتنی ده‌ستێكی تر
ده‌ستێكی نیه بۆنووسینی ئازادی
ده‌ستێكی نیه بۆ نیشاندانی سه‌ركه‌وتن
دڵێكی نیه هه‌تاهه‌تایه لێبدات
دڵێكی نیه بۆ جێكردنه‌وه‌ی هه‌موومان
دڵێكی نیه بۆ ده‌رچون له‌دوێنێ
چاوێكی نیه بۆ بینینی سبه‌ی
چاوێكی نیه بۆ خوێندنه‌وه‌ی ئاینده
چاوێكی نیه بۆ به‌رگرتن له شكست
پڕه له چاوی زه‌قی بێمانا
ده‌ستی دزی نیشتمان
دڵی ترسنۆكی هه‌ره‌س
مێژوم پڕه له‌تێكدانی یاده‌وه‌ری
له تێكدانی په‌یوه‌ندی نێوان گوڵ و باخچه
له تێكدانی ئه‌و به‌رده بازانه‌ی ده‌مانبه‌نه‌ئه‌و به‌ری روباره‌كه‌وه
له تێكدانی خه‌ونی ئه‌و شاعیرانه‌ی
ده‌ستیان له‌ملی سه‌ربه‌ستیدا بوو
ئه‌وشاعیرانه‌ی ترنا
ئه‌وانه‌ی
گه‌لیان نارده راپه‌ڕین وخۆیان دوردور
سه‌یریان ده‌كرد
ئه‌وانی هه‌میشه به‌ده‌م سه‌ركرده‌كانه‌وه
سه‌ركرده‌كانی شكسته‌وه
پێده‌خه‌نن
مێژوم هێنده‌ی مستێ مێوژی زۆراب
چێژی پێنه‌به‌خشیوم
تا بڵێم هه‌م
مێژوم له‌به‌رده‌م مام زۆرابه‌كه‌ی باڵدارا
بیرله‌وه‌ده‌كاته‌وه‌داخوا له‌م سه‌ر زه‌مینه سه‌ركرده سه‌وز بێت
له‌م مێژوه ئه‌تك كراوه‌داسه‌ركرده‌یه‌كم نه‌دی رانه‌كا
گاندیه‌كم نه‌بوو بۆ به‌رگری
ماندێلایه‌كم نه‌بوو بۆ ژیان
له‌م مێژوه ئه‌تك كراوه‌دا
هه‌میشه راكردن وراكردن وراكردن
له‌م مێژوه ئه‌تك كراوه‌دا
رێیه‌كم نه‌دۆزیه‌وه‌بۆ بوون
رێیه‌كم نه‌دۆزیه‌وه‌بۆسه‌ربه‌ستی
رێیه‌كم نه‌دۆزیه‌وه‌بۆ به‌رده‌وامی
سوارێكم نه‌دۆزیه‌وه‌بۆ نه‌گلان
سوارێكم نه‌دۆزیه‌وه‌بۆ په‌ڕینه‌وه
سوارێكم نه‌دۆزیه‌وه‌بۆ گه‌یشتن به رووناكی
چرایه‌كم نه‌دۆزیه‌وه‌بۆ تێكشكاندنی تاریكی
چرایه‌كم نه‌دۆزیه‌وه‌بۆ بینینی ئه‌و به‌ری روباره‌كه
چرایه‌كم نه‌دۆزیه‌وه‌بۆنووسینه‌وه‌ی بیره‌وه‌ریه‌كان
هه‌میشه راكردن وراكردن وراكردن
له‌گه‌ڵ ئه‌وه‌ش ئێمه هه‌ین و به‌شێكین لێره له ئێستا
لێره له نێو ئه‌م بوونه‌دا
گوڵانی 2010
