هەندێک تێبینى بێ سوود … نەوزاد بەندى

 

 

 

(تێبینى بیست و حەوت)

 

برادەرێکم 

لە شارى مالبۆرنەوە هاتەوە بۆ شارەکەى 

قالە شێت

دواى بیست و شەش ڕۆژ ،

ڕۆیشتەوە ..

دواى دوو ڕۆژ ئیمەیڵێکى بو نوسیبووم ،

تیایدا هاتبوو:

لە داخى ئەوەى مناڵ و مەزن

پێیان ئەوتم : حاجى …

تۆبە ! بگەڕێمەوە بۆ شارەکەى تۆفیق وەهبى ..

 

( تێبینى پێنج )

 

یەک ملیۆن کەس گوڵەبەڕۆژە 

ئەتروکێنن و

بە شەقامەکاندا کوڕێنى ئەکەن ،

قوڕ بەسەر کارگوزارى شارەوانى ..

 

 

( تێبینى هەژدە )

 

دوو ڕۆژ لەسەر یەک ،

دوو هاوڕێم مردن ..

لەگەڵ هەردوو لاشەکەدا ،

چووم بۆ گردى سەیوان …

خەریکە عەلاقە لەگەڵ مردنا پەیدا ئەکەم ..

خەریکە خۆشم ئەوێ ..

خەریکە ژمارەى مۆبایلەکەى لێ وەرئەگرم ..

ئەترسم کەشف بم ..

 

( تێبینى دوو )

 

لە بەردەم کۆفى نێتێک ،

سەر ژمێرى مێش و

قنگە جگەرە و

بەڵغەمە زەرد و سپیەکانم ، نەکرد ..

بۆچى سەرژمێرییان بکەم ؟

خۆ من دەزگاى سەرژمێرکردن نیم ..

 

( تێبینى حەفتا و سێ )

باوکم لەسەر ژمێرى حەفتا و حەوتا ،

بەشدارى کرد ..

مەدالیایەکی بە دیارى وەرگرت ..

خەریتەیەکى سوورى عێراق و

کۆمەڵێک دروشمى لەسەر هەڵکۆڵرا بوو ..

لەناو جزدانێکى شیندا بوو ..

باوکم وتى : ڕووى بابیان ڕەش بێ بۆ دەست و دیارییان ..

دایکیشم وتى : هەزار جار ..

براگەورەکەم وتى : بۆچى نەیخەینە کونى ئاودەستخانەکەوە ؟؟

تا ئیستایش ئەو مەدالیایەم ماوە ..

نایشزانم بۆچى ..

 

( تێبینى یەک )

 

لە لادێیەکى دوور ..

پیاوێکى جوتیار ،

دەستى هەردوو مناڵەکەى گرتبوو ..

بردنى بۆ لاى مەلاى گوند ..

وتى : کوڕەکانم عەرەبیەکى باش ئەزانن و

حەز ئەکەم لە قورسترین کتێبدا ،

ئیمتیحانیان کەى ..

مەلا وتى : قورسترین کتێب ،

ئەوەى ئیبنولحەجەرە ..

جوتیارەکە وتى : با ئیبنولحەجەر بێ ..

کە ئیبنولحەجەرى بۆ کردنەوە ،

مناڵى یەکەم وتى : ئەرەوەڵڵا ئەوە واوێک ..

مناڵى دووەم : ئەوەیش کافێک ..

مناڵى یەکەم : ئەوەیش وابزانم سینێکە ..!!!

( تێبینى نەوەد و نۆ )

 

دەمارەکانى شلەیەکى لینجى خەستیان پێدا ئەڕوات ،

نازانم چۆن نایبەستێ ؟؟

ڕیخۆڵەکانى پڕن لە پیسایى ..

میزڵدانى یەک مەشکە میزى تێدایە ..

بەو حاڵەوە ،

لەسەر یەک کاشى پۆرسەلینى ،

شەست بە شەست ڕاوەستابوو ..

باسى لە تاوەر و

باڵەخانە و

هاوردەکردنى ڕانجرۆڤەر و جاگوار ئەکرد ..

چەند جێگاى پێکەنینە !!

 

( تێبینى پێش سفر )

 

سى و پێنج هەزار ساڵى تر ،

خەڵکێک لێرە پاچە ئەخۆن ..

خەڵکێک لێرە بیر لە هەندەران ئەکەنەوە ..

خەڵکێک لێرە زاوزێ ئەکەن ..

خەڵکێک لێرە نازانن چى بکەن ..

 

(تێبینى حەوت )

نا بۆ قەسابخانە ..

نا بۆ کەبابخانە ..

نا بۆ سەروپێخانە ..

( ئەمە داواکاریەکانى مەڕێک بوو ،

کە زوڵم فێرى قسەى کرد !! )