خرمەی ناڵ لە سەرای کۆشکەوە دێ
“شا”ڕۆزانس لە کاتی هەڵکێشانیدا لە بەرزترین بانی کۆشکە ڕەشە قوڕقوشمەکەیەوە بەرەو ئاسمان و بۆ نهۆمەکانی جەهەننەم، بەدەست فریشتەکانەوە پەلەقاژەی دەکرد و دەیقیڕاند:
– من “شا”رۆزانسم! ، “شا”ی مەملەکەتی کانزێس! ، ئێوە هەڵەن، زوو بمبەنەوە خوار، من نوێنەری خودام لە هەسارەی کاوێنز، ئێوە هەڵەن، من “شا”رۆزانسم…
فریشتەکان لە بەرزکردنەوەی “شا”رۆزانسدا بۆ هاوییە*و پاشان بۆ نهۆمەکانی دیکەی جەهەننەم کەوتبوونە بەر پەلاماری دەمەوەرییە بێ کۆتاییەکانی “شا”، مەجبوور گوێیان ئاخنی و لە بێدەنگیدا درێژەیان بە ئەرکە پێسپێردراوەکەیان دا.
لە قرم و قاڵی ڕفاندنی “شا”رۆزانس کۆشکی شاهانە خرۆشا. وەزیر تێساز کە تازە بە سواری با لە ڕۆژئاوای کانزێس گەڕابووەوە و هێشتا جل و بەرگی سەفەری دانەنابوو هەراسان و دەستەوەستان گەیشتبووە سەر بانی کۆشک و لە گەڵ پۆلێک ئاژەن و کاربەدەستی کۆشک لە ئاسمانی ئەنگوستەچاوی شەویان دەڕوانی؛ بەشکوو سۆراغێ لە “شا”ی ڕفێندراوی مەملەکەتەکەیان بگرن. خەفەتبار بوو بۆ ئەوەی نەیتوانیبوو زووتر بگەڕێتەوە و پێش لە هەڵکشانی بە خزمەتی بگا و دەستی ماچبکا، ڕاپۆرتی سەفەرەکەی و چۆنییەتی هێورکردنەوەی دۆخی دارستان و ئاواییەکانی ڕۆژئاوای مەملەکەتی پێبدا. زۆرتر چاوەڕوانی ئەوەش بوو؛ “شا”ش لە بەرامبەردا دەستی ڕێز بەسەریدا بکێشێ و گەر بە شیاوی زانی خەڵاتێکی بکا. دەستە و تاقمی “شا”، میوانەکانی کۆشک، پاسەوانەکان، لەشکری تایبەتی “شا”و جەنگاوەرەکان، دانیشتوانی مەملەکەت و تەنانەت؛ مەڕ و ماڵات و گاو گۆلەکانیش وڕ و کاس بوون و کەوتبوونە بیری ئەوەی کە؛ “شا”رۆزانسیان بۆ کوێ هەڵکێشا؟! کانزێسی بێ “شا” چی بەسەر دێ و چارەنووسی نادیار بەرەو کوێ پەلکێشیان دەکا؟ و هەزار و یەک گومان و پرسیاری دیکە، پاشان لارەمل و زار داپچڕاو و ڕوو لە ئاسمان و هەتیوئاسا لە تاریکایی شەوێکی ئەنگوستەچاوی مانگی شاریزیان دەڕوانی…
تا فریشتەکان لە نهۆمەکانی جەهەننەم نزیکتر دەبوونەوە دەنگی “شا”رۆزانس پتر باڵی دەگرت، دەیگوڕاند، زکر و حەلەلای دەکرد، دەیفیشکاند و فریشتەکانی دەخستە بەر تیری هەڕەشەکانی. بەڵام ئەوان گوێیان ئاخنیبوو، نەیاندەبیست. لە دوورڕا تەوژمی بۆنی گوگرد بە هەناسەی “شا”دا پرژا، پاشان مژێکی لێڵی سوورباو لە بڵندایی قەڵایەکی بەرزەوە گڕکانی زیندووی چیاکانی هەسارەی کاوێنزی هێنایەوە بیر. زاری بوو بە دەروازەی داپچڕاوی ئەشکەوتێکی بەردین. دوای تاسانێکی کەمدەوام سەرلەنوێ کەوتەوە گۆ:
– هەرچیتان بوێ دەتاندەمێ .. لە زێڕتان دەگرم .. بە کێشی خۆتان ئەڵماس و مرواریدتان ئەدەمێ.. تەنیا بمگێڕنەوە بۆ شوێنەکەی خۆم .. تکاتان لێدەکەم..
لەدەم دەروازەیەکی پۆڵای دوو کەرتی بڵندا نیشتنەوە؛ گۆڕەپانێکی گردی بێ گرێ و گۆڵ. فریشتەیەکیان لە چاوەی ئەلاحەدەی سەر دەروازەکەی سرەواند. دوای قەیرێک چاوەکە شریخەی هات و کرایەوە. فریشتەیەکی باڵابەرزی ڕەشتاڵەی گەڕاوەی لێهاتە دەر و پەرتووکە ئەستوورە قەوارەدارەکەی بن باڵی کردەوە؛
“بەناوی پەروەردگاری قەههار”
لە لایەن خوداوەندی جەببارەوە بڕیار دراوە کە نوێنەرەکەیان لە هەسارەی کانزێس؛ لە ژێرناوی”شا”رۆزانس بە هۆی کۆی کردەی ئەم تاوانانەی لە ژێردا هاتوون بکەوێتە بەر سزا. شایانی باسە پەروەردگار بە لەبەر چاوگرتنی ڕابوردوو و ئەو خزمەتانەی “شا”روزانس پێشکەشی کردوون، بە سووکترین سزا قەنا‌عەتیان هەیە و”شا” دەتوانێت لە حەوت نهۆمی جەهەننەمدا بەوردی بگەڕێت و دڵی لە سەر هەر سزایەک ساغ بووەوە بژاری بکات. کاتی سزادانی لە هەڵبژاردنەکەیڕا دەست پێدەکا و بیست و چوار کاتژمێر دەخایەنێت. پەروەردگار فەرموویەتی؛ هیوادارین ئەم سزایە ببێتە مایەی بە خۆداچوونەوە و پیاچوونەوەی بڕیارە حوکومیەکان و چارچی و کارساز بێ.
تاوانەکان ئەمانەن:
١- “شا”رۆزانس لە سەرەتای مانگی شاریزدا بە دەرکردنی حوکـمێک وەزیر تێسازی هەناردەی ڕۆژئاوای کانزێس کردووە تا کارێک بکا ئەو کرمە شەوگڕانەی لە لێڕەوارەکانی ئەو ناچەیەدا
کە “ئێمە گیانمان پێ بەخشیون” و ماوەیەکە کەوتوونەتە تیشکاوێژی و بە وتەی خۆیان شەوانە بوونەتە هۆی زڕانی خەوی زیندەوەرەکان، بە جۆرێک چارەسەریان بکا و لە وەشانەوەیان بخا.
٢- “شا”رۆزانس هاوکات لە گەڵ دەرکردنی حوکمی کرمە شەوگڕەکان دووهەم حوکمیشی داوەتە دەست وەزیر تێساز، تا بە پێی ڕاپۆرتی خەڵکی هەمان ناوچە ئەو بۆقە جۆراوجۆر و ڕەنگینانەی”ئێمە گیانمان پێ بەخشیون” و شەوانە لە ئەستێر و گۆلاوەکانی ئەو ناوچەیەوە دێنەدەر و بە دارستانەکان وەردەبن و تا هێزیان تێدایە دەکەونە خوێندن و گۆرانی لە یەکتر دەستێننەوە، بوونەتە هۆی تێکدانی باری ئاسایشی خەڵک و ناهێڵن خەو لە چاویان بنیشێت، بە جۆرێک بێدەنگ بکرێن و نەهێڵدرێن جارێکی تر سەر وێژێن بکەونەوە.
٣- “شا”رۆزانس پاش ئەوەی حوکمەکانی بە وەزیر تێساز سپارد لە گەڵ ئەوەشدا دەسەڵاتی ڕەهاشی داوەتێ کە هەر جۆرێک خۆی بە شیاوی زانی چارەسەری ئەو دۆخە بکات و کەسیشی وەک چاودێر بە مەبەستی بەڕێوەچوونی حوکمەکانی لە گەڵدا نەناردووە. لەوەش بێ ئاگایە کە وەزیر بە گەیشتنی ئەو ناوچەیە؛ کات بۆ بەڕێوەچوونی ژیرانەی حوکمەکان تەرخان ناکا و بێ موبالاتانە فەرمان بە جەنگاوەرەکانی ئەدا ئاگر لە لێرەواڕەکان بەربدەن و تەڕ و ویشکی پێکەوە بسووتێنن، تا هەم سزادانیان کاتبەر نەبێ و لە ڕیشەوە وشکەرۆبن، هەم هیچ کرمێکی شەوگڕ چیتر نەتوانێت بوەشێتەوە و هیچ بۆقێکیش بئاخفێت.
لە گەڵ تەواو بوونی دواوشەی فریشتەی کاتب دەروازە پۆڵا زەبەلاحەکە بە ڕاست و چەپا کشایەوە، هاڵاوێکی سووتێنەر و بۆنێکی خنکێنەر ڕاپێچی دەرەوە بوو. “شا” دڵی کەوتەخوار. دوو میرغەزەبی قەمچی بەدەستی چاو پڕ لە گڕی سامناک لە قووڵایی تەمەکەوە هاتنە دەر. “شا”رۆزانسی ئەژنۆشکاویان خستە نێوان خۆیانەوە و هەرکامیان بە دوو قامک قۆلیان گرت و بە عەرزەخشکێ ڕایانکێشایە ژوورەوە و خۆیان کردەوە بە ناو مژەکەدا. پاشان دەروازە پۆڵایینەکە لە چەپ و ڕاستەوە یەکیان گرتەوە و هاتەوە سەر شووینی یەکەمی خۆی.
دوای ئەوەی “شا”رۆزانس کەمێک سەرخۆ کەوتەوە خۆی لە بەرامبەر ئاشێکی مەزندا دۆزییەوە، سەدان میرغەزەب سەر و دەست و پێی یەکە بە یەکەی جەهەننەمییەکانیان لێکبەر دەکرد و فڕێیاندەدایە ناو ئاشەکەوە و لەو لاترەوە دەبووە تۆز و دەپوواو دەڕژایە دەرەوە. دیسانەوە تۆزەکان دەکرانەوە بە مرۆڤ و میرغەزەبەکان سەرلەنوێ تێهەڵدەچوونەوە. “شا” نزیک بوو جارێکی تر وەبوورێت کە لە ناکاو بڕیارەکەی پەروەردگاری هاتەوە یاد؛ “دەتوانی بە نهۆمەکاندا بگەڕێی و بژاری سووکترین سزا بکەی.” کەمێک لە باری گرانی مەینەتییەکانی کەم بووەوە و لە گەڵ میرغەزەبە ئێشکچیەکانیدا چوونە سەعیر*. لەوێ هەڵوێستەیەکی کرد. جەماوەرێکی لە هۆزی جەهەننەم بینی کە لە برسان؛ میرغەزەبەکان پەستا پەستا بەری دارزەقوومیان بۆ دەچنن کە لە سەری شەیتان دەکا، ئەوانیش بە لەزەوە قەپی لێدەگرن و وا هەست دەکەن خواردنێکی هەرە باشیان گیر هێناوە، نازانن دوای ساتێ گەدەیان چەشنی ئاوی کوڵهاتووی ناو مەنجەڵێک دەکەوێتە قوڵتلێدان، پاشان لە تاو چریکەی زگیان پەنا بۆ میرغەزەبەکان دەبەنەوە و داوای ئاوی خواردنەوەیان لێدەن بەشکوو ئاگری گەشاوە و داپڵۆخێنەری گەدەیان پێ هێور بکەنەوە و دایمرکێن، فریشتەکانیش بە رەزامەندییەوە داواکارییەکانیان بەجێ دێنن و لە ئاوی حەدید و سەدیدیان دەدەنێ کە لە بنەڕەتتدا زاماو و کێماوە و تێکەڵ بە خوێناوی بەرزێی ژنانەیە و لە مسی تواوەی سوورەوەبوو دەکا. کە دوای خواردنەوەی وەکوو کێچ هەڵیاندەپەڕێنێ و جەرگ و ڕیخۆڵەیان بزماررێژ دەکا و قریشکەیان دەگەیەنێتە ئەوسەری سەعیر. “شا”رۆزانس حەپەساو و بێدەرەتان، ئاماژە بە ئێشکچییەکانی ئەدا بیگوازنەوە بۆ جەحیم*.
لە گەیشتنیاندا چاوی بە حەفتا هەزار میرغەزەب دەکەوێ ئێسکی جەهەننەمییەکان دەشکێنن و گۆشتەکەی هەلاهەلا دەکەن. لەم سەروبەندەدایە کە خەڵکەکە گەیشتوونەتە دوا پلەکانی ئازار و مەینەتی، دەکەونە پاڕانەوە و داوا لە میرغەزەبەکان دەکەن بەزەییان پیایاندا بێتەوە و لێیان خۆش ببن، لە وڵامدا میرغەزەبەکان دەڵێن: ئێمە چۆن دەتوانین لێتان خۆش بین لە حاڵێکدا کەوتوونەتە بەر غەزەبی پەروەردگاری جەببارمان و هەناردەی جەهەننەم کراون. پاشان هەڵیان ئەدەنە چاڵێکی بەرینی پڕ لە گڕ و مار و دووپشک کە رۆژەرێیەک قووڵە، ئەوسا لە کاتی کەوتنەخوارەوەیاندا حەفتا پێستیان بە بەردا دەکرێ و شەیتانێک بە کەلەکەی چەپیانەوە دەنووسێ و بەردێکی سوورەوەبووی گڕداریش بە کەلەکەی ڕاستیانەوە. تا دەگەنە قوڵایی چاڵەکە بە ناو مار و دووپشکدا ڕێدەکەن و لە هەر ئانێکدا دەپێکرێن و دەگەسترێن. هاوکات بەردە سوورەوەبووە گڕدارەکەش توێ بە توێی کەلەکەیان کون دەکات و تا دەگەنە دواشوێن ڕە‌هۆڵێکیان تێدەخات. دواتر سەرلەنوێ ساغ دەکرێنەوە و دەبنەوە مرۆڤ و لە تاو بوونەوەرە سامناکەکان و ئاگری بە تەوژمی چاڵەکە بە چنگەکڕێ بە دیواری چاڵەکەدا هەڵدەگەڕێن تا دەگەنە لێواری سەرەوەی، لەم کاتەدایە کە میرغەزەبەکان بە گورزەوە ڕاوەستاون و بە گوڕ لە تۆقی سەریان دەسرەوێنن و سەرەونوقمیان دەکەنەوە بۆ قووڵایی چاڵەکە.
“شا” رۆزانس نهۆمەکانی دیکەشی بەسەر کردەوە، بە زۆرەملی دڵی خۆی بە قەناعەت گەیاند کە ئەمە گاڵتەجاڕ نییە و لێرە کەس “شا” بە سەپان ناگرێ و تووری بۆ ورد ناکا، دەبێ بە هەر شێوەیەک بێ سزایەکی سووک وەربگرێ و لەم گێژاوەی تێیکەوتووە خۆی دەرباز بکا. لە میرغەزەبەکانی گێڕاوە و داوای لێکردن کە ویژدانیان بکەنە چرا و بکەونە خۆ و ساناترین سزای نهۆمەکانی جەهەننەمی بۆ هەڵبژێرن ، وا کە بتوانێ لە حەودەی بێ و بەرگەی بگرێ…
… میرغەزەبەکان “شا”رۆزانسیان لە سەر تەختێکی پایەداری پۆڵای هاوقەدی خۆی ڕاکێشا، دەست و لاقیان بە زنجیر بەستەوە و سەریان خستە ناو توورەکە خامێکەوە. پاشان جووتێک ناڵی پۆڵای سوورەوەبووی تایبەت بە پێی مرۆڤیان هێنا و خستیانە سەر بەرەلاقی، “شا” قریشکەیەکی لێبووەوە و دوای لینگە فرتێیەکی کەمدەوام لە هۆش چوو. بە گوڵمیخی سوورەوەبووی ئاگرپژێن ناڵەکانیان بە بەرەپێیدا کووتا، لە پشتەپێیەوە هاتنەدەر، پاشان نووکی گوڵمیخەکانیان وەرگێڕایەوە و دایانکوتایەوە. ماوەی شەو و ڕۆژێک ئەم کردەوەیان دووپات کردەوە. لە کۆتایی بیست و چوار کاتژمێردا کاتێک توورەکە خامەکەیان لە سەری دەرهێنا؛ دووکەڵێکی سپی لە ناو مێشکیەوە بە ڕێگای زار و لووت و گوێکانییەوە دەڕژایە دەر.
دواتر کە لە دەروازەی پۆڵایینی جەهەننەمەوە ئەودیویان خست، چوار فریشتەکەی لە زەوییەوە هەڵیانکێشابوو سەرلەنوێ و بە کەلاکی بردیانەوە خوار و لە سەر بانی کۆشکە ڕەشە قوڕقوشمەکەی خۆی لە مەملەکەتی کانزێس بە جێیانهێشت. دوای شەو ڕۆژێک سزای جەهەننەم و پانزەڕۆژ حەوانەوە؛ “شا”رۆزانس بە جووتێ ناڵ و هەشت گوڵمیخی داکوتراوەی پۆڵاوە پێی نایەسەر مەڕمەڕی شووشەئاسای سەرای کۆشک و خرمەخرم بەرە و هۆڵی شاهانە هەنگاوی نا، کەوتەوە بیری بۆق و کرمە شەوگڕەکان کە چۆن بە هەڵقرچانیان داستانێکی کەم وێنەی لەم چەشنەیان بۆ نوێنەری خوا لەسەر هەسارەی کاوێنز تۆمار کرد …
رزگار لوتفــی 3/12/91 – بانە
ژێدەر:
* هاوییە نهۆمی یەکەمی جەهەننەمە.
*سەعیر نهۆمی دووهەمی جەهەننەمە.
*جەحیم نهۆمی سێهەمی جەهەننەمە.
سەقەر، حەتمە، لەزی و جەهەننەم نهۆمەکانی دیکەی جەهەننەمن.
