Skip to Content

Tuesday, July 23rd, 2024
داخکردن … نەوزاد بەندى

داخکردن … نەوزاد بەندى

Closed

 

 

 

 

-1-

نوسەرەکانمان ،

زۆربەیان بۆنى دەمیان دێ ..

( هەوکردنى قوڕگە ،

یان دانى کلۆر .. ؟

کەڕووى گەرووە ،

یان ئینفێکشنى سییەکان ؟ 

نازانم .. )

پێدەچێ بەرهەمى بەسەرچوو..و 

ئێکسپایەر بێ ..

 

-2-

بڕوانە 

لە پشت هەر شاعیرێکى بودەڵەى مەیدانەکەوە ،

تەزکیەیەک ..

مەسڵەحەتێک خۆى مەڵاس داوە ..

( ئەگەر شیعرێ ،

شتێکى ون بووى بۆ نەدۆزیتەوە ،

ئەوە شیعر نییە ،

قبوڵ خاسە ..

گەندەڵییە ..

مەیخوێنەرەوە ، با ئەدەبت لەبەرچاو نەکەوێ و

ن ە ڕ ش ێ ی ت ە و ە )

 

-3-

بۆنى قەوانى سواو ..

تایەى پەنجەر ..

باڵۆنى تەقیو ..

هێلکە و ڕۆنى سوتاو ،

لە بەرهەمى زۆربەى نوسەرەکانمانەوە دێ ..

( فاتیحایەک بۆ گیانى پاکى

نالى و مەحوى ..)

 

-4-

کە بۆ دەستێک ئەزنیف و عەدلە ،

ئەچوین بۆ چایخانە ،

دەستێکمان ئەکرد بە گیرفانمانا ،

بزانین پارەى چاییەکەمان پێیە ..

(کەچى زۆر بەلامەوە سەیرە ،

نوسەرێکى زۆرى حیزبى و مەسڵەحچى ،

وەکو زچ و گەنە ،

بە لاشەى ئەدەبى کوردییەوە نوساون ..

بێ بەرهەم

بێ ئیلهام

موفلیس 

تەنها خەریکى شکاندنى ددان و

پەنجەرە و

گڵۆپى ئەدەبى کوردین .. )

 

-5-

پێکەنینم دێ ..

چى بکەم بەدەستى خۆم نییە ،

کاتێ ئەبینم ،

شاعیرێکى ناسیاوى ڕۆژنامەیەک ،

وشەکانى بە پیتى بۆڵد و

گەورە ئەنوسن ..

جێگاى دەبڵى لە لاپەڕەکەدا بۆ حیجز ئەکەن و

مۆتیڤبارانى ئەکەن ..

( من ئەوە بە جۆرێک لە گەوادى دائەنێم ،

چونکە شیعر ڕۆحە ،

نەک بەردى حەلانى وشەو

پیت و

مۆتیڤ و

س ە گ و س ە گ ب ا ب ى )

هههههههههههههههه

 

-6-

تکایە

پێش کەرکوک و خانەقین ،

ئەدەبى کوردى ،

لە دەست ئەو لەشکرە نەخوێندەوارە ڕزگار کەن ،

حەیا و شەرەفمان چوو …

 

-7-

شیعر بە بۆینباخەوە نانوسرێ ..

کە بۆینباخت کردە ملى ،

ئەبێِ بە وەزیر و

مەگەر خوا بیهێنێتە پەرلەمان بۆ لێپرسینەوە ..

مەگەر خوا بزانێ ،

مانگانەکەى چەندە و

چەند گێڵفرێندى هەیە و

قاپە ویسکیەکەى چەند باییە ..

شیعر وەکو گوڵاڵە سوورە ،

بەرەبەیانیەک ئەپشکوێ و 

سەر لە ئێوارەیەک ون ئەبێ ..

یەک عانەى سووریش لە گیرفانیا نییە ..

 

-8-

کە ئەدەب بوو بە مانگاى فریزۆ و

بەرهەمەکانى

شیر و

ماست و

پەنیر و

قەیماغ و

ژاژ و

کەشک و

دۆ وشک ، خرانە بازاڕەوە ..

ئەوسا هەم سوک ئەبێ و

هەم ئێکسپایەر ..

ئەبێ بە جۆرێ لە کەرەوز و کەوەر ..

 

-9-

تکاتان لێدەکەم ،

کتێب بکڕن ..

هۆى سەرەکى نەهامەتى و

بێزاریمان ،

نەخوێندنەوەى کتێبە ..

( هۆکارى زیادبونى تەڵاق ..

هۆکارى دزى و گەندەڵى ..

هۆکارى زیاد بوونى جەڵتەى دڵ و شێرپەنجە ،

نەخوێندنەوەى کتێبە ..

ئەوانەى ئەخوێننەوە ،

ناتوانن سنورەکان بشکێنن و

سروشتى وشەکان وەرئەگرن ،

بە دێراوەکانى ژیاندا ڕەت ئەبن و

گوڵ ئەڕوێنن ،

لە زۆر ، زۆر و 

لە کەم ، کەم … )

 

-10-

داخکردنى ڕۆژنامەنوس ،

ئەوەندەى بە مەبەستى وتارى برژاوە ،

نیو ئەوەندە بۆ تەمبێ کردن نییە ..

 

-12-

کە پۆلیس ،

دەستى دایە کوتەک ،

واتا ئیتر مرۆڤایەتى تەواو ..

نۆبەتى فەلاقەیە !!

 

 

-13-

کە توانیمان شەقامەکان ،

وەکو ژوورەکانمان پاک ڕابگرین ،

ئەوسا دیموکراسى و

مافى مرۆڤ و

تەکنۆلۆژیا خۆیان لە وڵاتەکەمانا ئەڕوێن ،

وەکو نێرگز

وەکو ڕێواس

وەک چاوبازە ..

 

 

-4-

هەر بە تەنها دەشت و شاخ و باخەکانى خوا ،

پاوان و

تەلبەند و

سندم نەکراون ..

ڕۆژنامەکانیش توشى ئەو دەردە بوون ،

لاپەڕەکانى تاپۆکراون :

لاپەڕەى یەکەم بۆ کوێخا ڕینگۆى دەبڵ دەمانچە ..

لاپەڕەى دووەم بۆ ئاغاى جنێوفرۆشى هەندەران مەشرەب ..

لاپەڕەى سێیەم بۆ دکتۆرى فەلى بێ بڕوانامە ..!!

وە هەروەها …

( یەک بست نەماوەتەوە بۆ هەناسەدان ،

نە لە خاک ..

نە لە ئاو ..

نە لە هەوا ..

نە لە فیکر ..

هەمووی کراوە بە کۆمپیالە و سپارچەک و

نراوەتە گیرفانى کۆمەڵێ 

پۆرترێتى ناشیرین

 

Previous
Next
This site is registered on wpml.org as a development site.