Skip to Content

Tuesday, April 16th, 2024
یاداشته‌كانی په‌یكه‌رێك   … ئه‌مین محه‌مه‌د

یاداشته‌كانی په‌یكه‌رێك … ئه‌مین محه‌مه‌د

Closed
by July 24, 2013 ئەدەب

 

 

 

 

1-      ئه‌م په‌یكه‌ره‌ وه‌ك خۆی ده‌ڵێ  دژه‌ بــاوه‌ 

         شـاعیرێكه‌ چـاوی له‌ ئاسۆ بڕیوه‌و

        له‌پێناوی ئامانجێكا سه‌ری له‌سه‌ر خــاك داناوه‌   . 

2-     له‌وه‌ ده‌چێ ( نالی )ش بڵێ  :-                          

 ئه‌م په‌یكه‌ره‌ دژه‌ بــاوه‌ 

 نه‌وه‌كو خۆی نه‌وه‌ك كوردی  

نه‌وه‌كو ســالم وه‌ستاوه‌ . 

3-     تێڕامانی ئه‌م په‌یكه‌ره‌ 

گوزارشتێكه‌ لــه‌ مێژوو 

په‌یكه‌رێكه‌ ناونیشانی شــار ده‌گۆڕێ  

ده‌یكـات به‌شــاری ئاوه‌ژوو   .

4-      ئه‌م په‌یكه‌ره‌ له‌سه‌ر لابێ یا سه‌ره‌وخوار 

ڕێك به‌پێوه‌ ڕاوه‌ستابێ یا ڕاكشاو 

له‌م شــاره‌دا بۆ نابینا بووه‌ به‌چــاو .

5-    په‌یكه‌ر تاشی ئه‌م په‌یكه‌ره‌ 

به‌نهێنی له‌لایه‌وه‌ ڕاوه‌ستاوه‌ 

ئێمه‌ بۆیه‌ ئه‌و نابینین 

دیاره‌ له‌بن شه‌بقه‌كه‌یدا خۆی مات داوه‌ 

6-     یاخی بوونی ئه‌م په‌یكه‌ره‌ 

هه‌موو خه‌ڵكی له‌ خاڵێكدا كۆكرده‌وه‌

 ناوی ( نا ) یه‌ .

ڕێگایه‌كی بۆ كێشاون پرشنگداره‌

 تا هه‌تایه‌ .

7-    گه‌ر به‌ وردی سه‌رنج بده‌ی 

         جار ، جار پێڵوی ده‌جوڵێنێ‌

        ده‌ماری ملی لێده‌دا ،

        به‌ نیگا ده‌مان دوێنێ‌

        لاشه‌ی زیندوی ئه‌م په‌یكه‌ره‌

8-   نهێنی ناو  ئه‌م په‌یكه‌ره‌ پێمان ده‌ڵێ‌ 

        شاعیره‌كان یا درۆزن ،

        یا زۆر بڵێ‌ و چه‌نه‌بازن 

        ده‌گمه‌ن تاك ، تاكیان ڕاستگۆیه‌

       ئه‌ویش قفڵێ‌ له‌لا شه‌ویلگه‌ی دراوه‌ .

9-    ئه‌م په‌یكه‌ره‌ لنگه‌و قوچه‌

       ئاماژه‌یه‌كه‌ بۆ ئه‌وه‌ی له‌م شاره‌دا

       هه‌موو شتێ‌ ئاوه‌ژووه‌ 

      بۆیه‌ ئه‌م وا ، سوژده‌ بۆ زه‌وی ده‌بات و 

      قاچیشی بۆ حه‌وا چوه‌ .

10-  ئه‌م په‌یكه‌ره‌ له‌ دووره‌وه‌

       لاشه‌ی بۆشی شاعیرێكه‌ وه‌ك حه‌قیقه‌ت 

       وه‌ك ئه‌م زه‌مانه‌ لنگه‌و قوچ .

11-  وردبوونه‌وه‌ له‌م په‌یكه‌ره‌ ،

       گومانم لا دروست ئه‌كات 

       هه‌موو شار هه‌ڵاوگێڕاوه‌ 

         یان ته‌نها خۆی .

12-  له‌ هه‌ر هه‌موومان توڕه‌یه‌

         ئه‌م په‌یكه‌ره‌ ،

        نه‌ وه‌ك ئه‌و بیر ده‌كه‌ینه‌وه‌ و

        نه‌ وه‌ك ئه‌ویش ڕاده‌وه‌ستین .

13-    ئه‌م په‌یكه‌ره‌ 

         نامه‌یه‌كه‌ بۆ ئه‌وانه‌ی كۆشكه‌كانیان 

        به‌رز ، به‌رزن

        كه‌چی سه‌ریان زۆر له‌ ئاستی پێڵاوی 

       ئه‌م نزمتره‌ .

14-  ئه‌گه‌ر ڕۆژێ‌ بومه‌له‌رزه‌ 

        یان ڕووداوێ‌ ،

        ئه‌م په‌یكه‌ره‌ سه‌ره‌و ژێركاو  

       ڕێك به‌ پێوه‌ ڕابوه‌ستێ‌ 

      بێ‌ گومانم ،

     نه‌ ئه‌و به‌وه‌ قایل ده‌بێ و

    نه‌ من له‌م شیعره‌م ژێوانم . 

 

 

     ئه‌مین محه‌مه‌د / سلێمانی    

 

 

 

Previous
Next
This site is registered on wpml.org as a development site.