ڕاستە … نەوزاد بەندى

 

 

 

 

 

-1-

ڕاستە هێشتا ماوین ..

بەڵام زۆر شتمان مردوون ..

ڕزیون ..

شى بونەتەوە ..

وەکو دەفتەر و

کتێبەکانى سەرەتایى

ناوەندیى

ئامادەیى و زانکۆ ..

(بەرگى نایلۆن و

بەرگى کاغەز و

بەرگى سەرەکى ئەلف و بێى نوێ ..مردن ..

مێوژى مام زۆراب کەڕوو لێى دا ..

کۆلارەکەى دارا کەوتە خوارەوە ..

ون بوو .. ڕزى ..)

 

-2-

هەروەها ..

( ناو : نەوزاد ئەحمەد حسێن

پۆل : یەکەم 

لق: ب

قوتابخانە: ئەیوبیەى سەرەتایى کوڕان )

ون بوو .. ڕزى ..

 

-3-

گۆرانیەکەى مائیدە نەزهەت و محەمەد قەدرى ،

( ئێمە هەڵاڵەى شادین )

هەروەها ، مرد ..

 

-4-

کلارنێتەکەى شەوکەت ڕەشید..

فیاتە پۆڵسکییەکەى مامۆستا غەریب ،

باوکى هۆرێن ..

گڵۆپەکانى منارەى مزگەوتى گەورە ،

کە کاتى بانگى ئێوارەى ڕەمەزان دادەگیرسان ..

هەروەها ، مردن .. ڕزین ..

 

-5-

هاوڕێکانمان ،

زۆربەیان سەفەریان کرد ..

جیاوازى نێوان سەفەر و مردن ،

یەکەمیان بە فڕۆکە و

دووەمیان بە تابوت ..

هەردووکیان یەکسانن بە ون بوون ..

 

-6-

گەشتیارانى ناو سنەوبەرەکانى کارێزى وەستا شەریف ..

3 بۆرییە ئاوە سپیەکەى کارێزى وەستا شەریف ..

سەدان هەزار پەلەوەرى ناو درەختەکانى کارێزى وەەستا شەریف ..

ون بوون ڕزین ..

چەقۆى ڕەشى  شەقامێ ،

گەردنى سنەوبەرەکانى وەستا شەریفى بڕى ..

هاوینە هەوارێکى سەربڕاو ..

مەلەوانگەیەکى لە تینووا خنکاو ..

گۆڕەپانى (سەروو)ى زیندەچاڵکراو ..

ئەمانە بەشێکن لە تاوانى جینۆساید ،

بەرامبەر بە مێژوو ..

بەرامبەر بە بیرەوەرییەکان ..

بەرامبەر بەشێک لە درەختەکانى شار..