مەیستان … فەتاح حەسەن

مەی بۆ ( مە ) یە

ئێمەی تەنها

کە، تەنها باڵ، ماوینەوە

ئێمەی نامۆ

کە، عەوداڵین، بەدوای ( خۆ ) دا.

***

ساقی بەهانامەوە بێ

تەنهایی، پرزەی لێبڕیم

پێك لەسەر پێك، بۆمتێکە، دەی

کە سبەی یارم هاتەوە

چیمداوە من، لە پیاڵە و مەی.

***

نامۆ، لەمەیخانەی خەما

پەیتا، پەیتا، خەم نۆش دەکا.

ناخی قورسە

چون، پڕبووە، لەخڵتەی مەی.

***

لە مەیستان

هەمو شتێك، بە یاسایە

مردن .. ژیان

خۆشەویستی

لە ژێر رکێفی ( مەی ) دایە.

بە پێی یاسا

هەرچی، لە مەیستان هەیە

بە تۆشەوە، موڵکی مەیە.

***

کە تەنها نیت، کە نامۆ نیت

لە مەیستان، جێ خۆش مەکە.

جێگە چۆڵ کە

بۆ تەنهایەك، بۆ نامۆیەك

تا تینوێتی، خۆی بشکێنێت

لە جۆگەی مەی.

   فەتاح حەسەن        

 دانیمارك/ ڤالبی