کەمێک بیر کردنەوە … نەوزاد بەندى

 

 

 

-1-

لەبەردەم دوکانى چەرەس فرۆشتن ،

بوو بە شەڕ ..

ئەم ئەیوت : سەرەى منە

ئەو ئەیوت : سەرەى منە ..

(هەموویشیان چەرەسیان بۆ یەکتر ئەکڕى..

بۆ جەژنى قوربان ! ..

هههههههههه )

 

-2-

کەستان بیرتان کردۆتەوە ،

لە دابینکردنى ،

باخچەیەک

مەشتەلێ

ئینجانەیەک ،

بۆ گوڵە کەمئەندامەکان ؟؟

ئەوانەى کوللە دوو پەڕەى خواردوون ..

یان ڕەشەبا ژاکاندوونى ،،

یان پاییز ئیزنى داون ..

یان هەرخۆیان بە زگماک ،

کەمئەندامن ..

 

-3-

کەستان بیرتان کردۆتەوە

کتێبخانەیەک 

کوشکێک

دیوانێک ،

بۆ ئەو شیعرانە ئاوەڵا کەن ،

کە خاوەنەکانیان مردووە و

هەتیو کەوتون ؟

هیچ ڕۆژنامەیەک شەوێ نایانگرێتە خۆى ..

لەسەر شەقام ئەخەون 

 

-4-

کۆمەڵێ لاو ،

لەسەر سنوور ..

هەتا هێزیان تێدا بوو ،

ڕایاندەکرد لە دەست نیشتمان ..

( ئەبوو بە قوتابخانە ترسناکەکانى مناڵیمدا بمزانیایە ،

کە تۆ دواجار ئەبیتە زیندان ،

ئەى نیشتمان ! )

 

-5-

بێزار بووم 

لە بێژەرى قات و بۆینباخ لە مل و 

هەواڵى مردن و

کوشتن و

کاولکردن ..

 بەسە ! ..

با ڕۆژێک بە بێ کورتەى هەواڵ بژین ..

 (چایخانەیەک نییە ،

بێدەنگیى تیا بفرۆشن ؟؟ )

 

-6-

کێشەکە لەوەدایە ،

کۆمەڵێک کەس هەن ،

بۆینباخ لە مل ئەکەن و

تاقەتى هیچ ئیشێکیان نییە ..

ئیش لە خەڵکیش تێک ئەدەن ،

بە هەڵگیرسانى جەنگ

تەقاندنەوەى تى ئێن تی..

 

-7-

بۆم دەرکەوت

کە هێشتا هیچم بۆ دەرنەکەوتووە ..

 

-8-

پێشنیار ئەکەم ،

خزمەتگوزاریى گۆڕى کاتیى پەیدا بێ ..

( زۆرن ئەو کەسانەى

حەز ئەکەن بە شێوەیەکى کاتیى بمرن ..

بۆ ماوەى چەند ڕۆژێ

چەند هەفتەیەک ..

یان چەند مانگێ .. )

 

-9-

وڵاتیش هەتیو ئەکەوێ ..

بڕوانە بۆ وڵاتە هەتیوەکان ..

باڵەخانەکانى هەموو کاول بوون ..

جلەکانى پینە- پینەیە ..

لە شەقامەکانیدا ،

لە جیاتى میوە ،

نارنجۆک ئەتەقن ..

بوون بە هەزار تیرەى دژ بە یەک ،

هەموویشیان لەسەر حەقن !

 

-10-

هێشتا قەڵەم لێم بێزار نەبووە

مرەکەب دەنگى لێ وەرنەگرتووم ..

لاپەڕە نەیقیڕاندووە بەسەرما ..

بۆیە هێشتا ئەنوسم ..

 

-11-

دایک و باوک ،

مناڵەکانیان بەخێو ئەکەن ،

بۆ ئەوەى بەجێیان بێڵن ..

(ئەم دنیایە ،

پڕ-پڕ لە بەجێهێشتن ! )

 

-12-

نوسینەوەى بیرەوەریى ،

جۆرێکە لە دیکتاتۆریى ..

( کارێک ئەکەیت ،

ئەو خەڵکە واز لە بیرەوریى خۆیان بێنن و

سەرقاڵى بیرەوەریى تۆ بن )

 

-13-

حەزم لە هیچ خواردنێک نییە ..

حەزم لە هیچ جێگایەک نییە ..

حەزم لە بینینى هیچ کەسێک نییە ..

( ئەمە چییە ؟

ناوى چییە ئەم نەخۆشییە ؟؟ )

دکتۆر وتى : ناوى نییە ..

 

-13-

سوپاس بۆ تۆ خودایە !

بە مریشک خەڵقت نەکردم ..

لە قەفەزێکى سارد و سڕى فرۆشگایەک ،

چاوەڕوانیى کڕیارێک بم ،

بمکڕێ و

سەرم بڕێ و

پاکم کاو 

هەڵمکڕوزێنێ و

بمکوڵێنێ و

بمخاتە سەر برنج ..

جا بڵێ :

بۆنساردەکەى تەحەمول ناکرێ ..!