Skip to Content

Thursday, March 28th, 2024
یه‌كێتی دناڤبه‌را شكه‌ستنێ‌ و رابونه‌ڤه‌یێ‌ دا

یه‌كێتی دناڤبه‌را شكه‌ستنێ‌ و رابونه‌ڤه‌یێ‌ دا

Closed

 

 

 

 

 

ئه‌گه‌ر هه‌لبژارتنێن 21/9/2013ێ‌ زه‌نگه‌كا مه‌ترسیێ‌ بیت ل سه‌ر یه‌كێتیێ‌، پسیار لڤێره‌، یه‌كێتی چاوان بیر ل رابونه‌ڤه‌یێ‌ بكه‌ت، بیركرن ژی ل هه‌ر رابونه‌ڤه‌یه‌كێ‌، بێی پێنگاڤێن پراكتیك دقوناغه‌كا هوسا دا، مه‌حاله‌ په‌یدا ببن. 

هه‌ر چه‌نده‌ ئه‌ڤا ژ ئه‌نجامێ‌ هه‌لبژارتنان په‌یدا بوی، شكه‌ستن بو ژ بو یه‌كێتیێ‌، به‌لێ‌ شكه‌ستن دوماهی نینه‌، بتایبه‌ت بو حزبه‌كا ب ده‌هان سالان، دناڤ گوره‌پانا خه‌باتێ‌ و ململانێ‌ دا و ب سه‌ده‌هان شه‌هید و قوربانی داین، لێ‌ ئایا ئه‌ڤ خه‌بات و شه‌هید و قوربانیدانه‌، دبه‌ره‌بابه‌كێ‌ سه‌رده‌مێ‌ (فیس بوك)ێ‌ دا به‌سن، كو هه‌ر حزبا خه‌بات كری، هه‌ر حزبا خه‌باتا خوه‌ ژ پێخه‌مه‌ت رزگاركرنا نه‌ته‌وا خو كری. بمن وه‌ره‌، نه‌خێر، ژبه‌ر كو قوناغ جودایه‌ و بیركرن ژی دڤێت جوداتر بیت. بویه‌ دڤێت یه‌كێتی بیر ل رێگا ده‌ربازبونه‌كێ‌ بكه‌ت، ڤان هه‌ردوو قوناغان پێكڤه‌ گرێده‌ت، خزمه‌تكرن و خزمه‌تكرن و خو گونجاندن. ئه‌گه‌ر ده‌مه‌كی خزمه‌تكرن، ب لیلییا تڤه‌نگێ‌ بیت، خه‌باتا پێشمه‌رگه‌ی، ئه‌ڤرو ئه‌و خزمه‌تكرنا هه‌نێ‌ دره‌نگه‌ك دی دا، به‌رچاڤ دبیت.

 ئه‌ز به‌حسا ناكوكیێن سه‌ركردایه‌تیا یه‌كێتی ناكه‌م. ئه‌ز به‌حسا غیابا كاریزمایا سه‌روك مام جه‌لال وه‌ك سكرتێرێ‌ یه‌كێتی ناكه‌م كو هه‌رده‌م ئه‌و دشیا هه‌می پرسگرێكان ئێكلایی بكه‌ت. ئه‌ز به‌حسێ‌ ئه‌دائا وه‌زیر و په‌رله‌مانتار و كاربه‌ده‌ستێن یه‌كێتی ناكه‌م، چ دكارێن حكومه‌تێ‌ دا بن یان ژی هه‌ر كاره‌ك كو راسته‌وخو گرێدای خه‌لكه‌كی و هاونیشتیمانیان بن. ئه‌ز به‌حسا گوهورینا سه‌ركردایه‌تیێ‌ ناكه‌م، كو هه‌مان سه‌روچاڤێن جاران، دویرئێخستنا گه‌نجان. ئه‌ز به‌حسێ‌ نه‌بونا گوتاره‌كا سیاسی یا ئێكگرتی یا یه‌كێتی ناكه‌م، كو نه‌شیایی ل به‌رامبه‌ری یاریكرنێن سیاسی بهێته‌ ده‌نگ. ئه‌ز بتنێ‌ دێ‌ به‌حسێ‌ هه‌لبژارتنان وه‌ك یاریه‌كا سیاسی كه‌م، یارییه‌ك كو بتنێ‌ تێدا یاریكه‌ر سه‌ركه‌تی و شكه‌ستی ژێ‌ ده‌ردكه‌ڤیت، مخابن ژبه‌ر چه‌ند ئه‌گه‌ره‌كان یه‌كێتی نه‌شییا جهێ‌ پێن خوه‌ ل عه‌ردی ب شدینیت، كو دڤیابایه‌، یه‌كێتی ل به‌رامبه‌ر ڤێ‌ یاریكرنێ‌ ئه‌ڤ بیركرنه‌ كربان.

1. بزاڤا گوران: ئه‌ڤ بزاڤه‌ پارچه‌یه‌ك بو ژ یه‌كێتی، دا كو ئه‌ڤ بزاڤه‌ هه‌بونا خوه‌ دیار بكه‌ت چ وه‌ك ئوپوزسیون یان ژی حزبه‌ك وه‌ك هه‌ر حزبه‌كا دی، دڤیابایه‌ خه‌باتا خوه‌ هه‌می ل سه‌ر پارچه‌یا خوه‌ یا دی كربایه‌، دا گرنگیا هه‌بونا خوه‌ ب سه‌لمینیت، كو حزبه‌كه‌ ژ حزبه‌كا مه‌زن و زلهێز ده‌ركه‌تی یه‌ و ب سه‌لمینیت كو ئه‌و باشتره‌ ژبو ڤێ‌ چه‌ندێ‌ ژی ته‌خسیری نه‌كر و  هند ل سه‌ر چ لایه‌نان كار نه‌كر، هندی ل سه‌ر یه‌كێتی كار كری.

2. پارتی دیموكراتی: هه‌ر چه‌نده‌ یه‌كێتی هه‌ڤپه‌یمانا ستراتیژی یا ئێكه‌مین بویه‌ ژ بو پارتی. ژ ئاخفتنا سه‌ركردێن پارتی بخوه‌ ژی، بتنێ‌ یه‌كێتی دشیانێن پارستنا ڤێ‌ هه‌ڤپه‌یمانیێ‌ دا هه‌نه‌، لێ‌ ل 30 ی حوزه‌یرانێ‌ پارتی ئه‌نجامێن ڤێ‌ یاریێ‌ بلایێ‌ خوه‌ دا شكاندن، بتایبه‌ت ده‌ما پرسا ڤه‌گه‌راندنا ده‌ستوری بو ناڤ په‌رله‌مانی یان نه‌ڤه‌گه‌راندنا وی، هاتیه‌ به‌ر به‌حس و پسیاران، راسته‌ یه‌كێتی شیا به‌رامبه‌ر درێژكرنا ماوێ‌ سه‌روكاتیا هه‌رێمێ‌، ده‌ستوری ڤه‌گه‌رینیت په‌رله‌مانی، لێ‌ یه‌كێتی به‌رامبه‌ر ڤێ‌ كێشا نه‌ته‌وایه‌تی، باج بده‌نگێن خوه‌ دان.

ئێك ژ ئه‌گه‌رێن دی یێن یه‌كێتی به‌ره‌ڤ شكه‌ستنێ‌ ڤه‌ بری، یه‌كێتی ژ ده‌رڤه‌ی هه‌ر هه‌ڤكێشه‌یه‌كا سیاسی بو، هه‌ر چه‌نده‌ یه‌كێتی ب لیسته‌كا جودا دهه‌لبژارتنان دا هاته‌ خارێ‌، به‌لێ‌ ژبه‌ر ڤان ئه‌گه‌ران یه‌كێتی نه‌شیا كونترولێ‌ ل سه‌ر ده‌نگێن خوه‌ بكه‌ت:

1. ده‌ڤه‌را زه‌ر: لڤێ‌ ده‌ڤه‌رێ‌، ئه‌گه‌ر خه‌لك ژ ده‌ستهه‌لاتێ‌ رازی بن، ده‌نگێن وان دێ‌ بو پارتی بتنێ‌ بن، راسته‌ یه‌كێتی ژی به‌شداره‌، لێ‌ ژبه‌ركو ل پێش وه‌خت، ئه‌ڤ ده‌ڤه‌ره‌ زێده‌تر یا موته‌عاتفه‌ ب پارتی ڤه‌، هه‌م وه‌ك زاراڤ و هه‌م وه‌ك خه‌باتا چیایی ژی.

2. ئوپوزسیون: ئه‌گه‌ر خه‌لكی باوه‌ری ب هه‌ڤسه‌نگییا سیاسی هه‌بیت و هزر بكه‌ن، دڤێت لایه‌نه‌ك هه‌بیت ڤێ‌ هه‌ڤسه‌نگیێ‌ راگریت، زێده‌تر ژ هه‌ردوو لایه‌نێن دی، گوران شیا ڤان ده‌نگان بو خو مسوگه‌ر بكه‌ت.

3. حزبێن ئیسلامی: ژبه‌ر كو خه‌لكێ‌ هه‌رێما كوردستانێ‌ یێ‌ موسلمانه‌، زێده‌تر حزبێن ئیسلامی ل سه‌ر ڤی ته‌وه‌ری كاركرن و شیان رێژه‌كا باشا ده‌نگان دڤی ئالی دا بو خو مسوگه‌ر بكه‌ن.

4. تشتێ‌ هه‌می حساباتێن یه‌كێتی تێكدای، خواندنا كومه‌لگه‌هی بو پره‌نسیپێن دیموكراسی خواندنه‌ك لاوازه‌ و دئێكه‌م پێنگاڤ ژی دا، لایه‌نێ‌ عه‌شاییری پێ‌ ل هه‌می تشته‌كی دانا و هه‌رێما كوردستانێ‌ ئه‌گه‌ر پێشكه‌فتنه‌ك دبوارێ‌ ئاڤاهی و خزمه‌تگوزاریان دا دیتبیت ژی، لێ‌ ژ ئالیێ‌ عه‌شاییری و ده‌ستهه‌لاتا عه‌شاییری ڤه‌، هه‌می تشته‌ك زڤرانده‌ ئێكه‌م چوارگوشه‌ ڤه‌.

ژڤان هه‌ڤكێشه‌یێن ل سه‌ری مه‌ ئاماژه‌ بو داین، یه‌كێتی نه‌شیا ل به‌رامبه‌ری راییا گشتی یا خه‌لكی چ هه‌ڤسه‌نگیان بو خو دروست بكه‌ت، كو پێ‌ به‌شداری یاریكرنا هه‌لبژارتنان بیت. بهزرا من یه‌كێتی ل 30 ی حوزه‌یرانێ‌، دشیا ب باشترین ته‌كتیك، به‌شداری هه‌لبژارتنان بیت، ژبه‌ر ڤان ئه‌گه‌ران ژی یه‌كێتی دا سه‌ركه‌تنه‌كا باش بده‌ست خو ڤه‌ ئینیت:

1. هه‌بونا لیسته‌كا جودا، كو ئه‌ڤێ‌ سه‌لماند یه‌كێتی نه‌ پاشكوێ‌ پارتی یه‌.

2. دشییا ل ده‌ڤه‌را كه‌سك، هه‌می ئه‌و ده‌نگێن بو گوران چووین، كو د بنیات دا، ده‌نگێن یه‌كێتی بون و بهزرا چاڤدێرێن سیاسی ژی، پتریا وان ده‌نگان بو هه‌ڤپه‌یمانیا دناڤبه‌را پارتی و یه‌كێتی دا ژ یه‌كێتی دویركه‌تبون، ب هه‌لویستێ‌ خوه‌ یێ‌ به‌ری 30 ی حوزه‌یرانێ‌، جاره‌كا دی ڤه‌گه‌رینیته‌ ڤه‌.

رێكێن رابونه‌ڤه‌یێ‌: 

ژبه‌ركو یه‌كێتی خودان خه‌باته‌كا دویر و درێژه‌ و شیانێن رابونه‌ڤه‌یه‌كا بله‌ز هه‌نه‌، بهزرا من، دڤێت یه‌كێتی پلان دارێژیه‌كێ‌ بو هه‌می پێنگاڤێن خوه‌ بهاڤێژیت، هه‌ر ژ هه‌ڤپه‌یمانیێن خوه‌ یێن سیاسی، جه‌ماوه‌رێ‌ خوه‌، به‌شدارییا خوه‌ دهه‌ر پروسه‌یه‌كا سیاسی دا، یا ژ هه‌میێ‌ ژی گرنگتر، به‌ستنا كونگره‌ی، پلنیومێ‌ بزوترین ده‌م، كو دگه‌ل ئه‌ڤرویا ئه‌م تێدا دژین و جیهانا نوكه‌ یا فیس بوكی بگونجیت، ژبه‌ركو هه‌لبژارتنێن 21/9 بتنێ‌ ده‌ركه‌فتنا شكه‌ستنه‌كێ‌ بون، نه‌ شكه‌ستن بخوه‌ و دشیانێن یه‌كێتیێ‌ دا یه‌، رێ‌ ل به‌ر وێ‌ ده‌ركه‌تنێ‌ بگریت.

 

عبدالرحمن بامه‌رنی
Previous
Next
This site is registered on wpml.org as a development site.