پاییزێکى تریش ….نەوزاد بەندى
-1-
لە شەقامێکى تۆزاویى ..
درەختێکى ڕووت و قووتم دى ..
ناسیمەوە ..
لەبەر گریان نەیتوانى وەڵامم باتەوە ..
تەرمى گەڵاکانى لەبەر پێیدا بوون ..
وتى : بڕوانە !
بزانە کەس هاو خەمییەک ..
بزانە کەس فاتیحایەک ..
بزانە کەس دێ لە گەڵما بۆ گۆڕستان ؟؟
-2-
ئەو درەختە ،
لە بەهارێکى ساڵى هەشتاکاندا ناسیم
ئەو کاتە نە زریانى تۆز پەیدا بو بو
نە بانگەشەى وشکە ساڵیى ..
ئەو کاتە خەڵک تینووى کتێب بو ،
نەک تینووى دۆلار ..
ئەو کاتە هەژارەکان ئەیانتوانى لە نێوان ڕوسیا و ئەمەریکادا ،
پارووە نانێک پەیدا بکەن ..
ئەو کاتە ڕۆى ..
ن
ا
گ
ە
ڕ
ێ
ت
ە
و
ە
-3-
پاییزێکى ماندوو ..
بە تەنیشتمدا ڕەت بوو ..
من جامێکى فافۆنى پڕ سەهۆڵاوم بە دەستەوە بو..
بە فانیلەیەکى عەلاگەوە ،
تەماشایەکم کرد ..
وتى : لە هەڵامەت ناترسى ؟
ئەوەى لە هەولێر پێى ئەڵێن : پەسیو
ئەوەى لە جنوب پێى ئەڵێن : نەشلە ..
ئەوەى لە سوقى ئەوروپى موشتەرەک پێى ئەڵێن : ئەنفلۆنزا ..
وتم : نا ..
-4-
پاییز لە دەرگاى دا ..
وتى : ڕەحمەت لە باوکت ،
پەرداخێ ئاوم فریا خە ،
تینوێتى کوشتمى ..
پۆلیسى دژە تیرۆر ،
بە تاوانى ناشیرینکردنى ڕوخساری شار ،
شەش مانگە لە مەعەسکەر سەلام ،
کەلەپچەى کردووم ..
-5-
کارگوزارى شارەوانى ،
گەڵاى شەقامەکانى کۆ ئەکردەوە و
عەرەق بە تەوێڵیدا ،
دا ئەچۆڕایە سەر قەفەزى سنگى ..
پاییز شەرمەزار بوو
پێى وت : خەجاڵەتم ..
بە بێ شنە بایەکى فێنک ،
حەیاى هەموو درەختەکانم برد ..
-6-
لەبەر بەلەدییەکە ،
ئەویش سەرەى گرتبوو بۆ سەهۆڵ ..
پارەیشى پێ نەبوو ،
وتى : بینوسە !
زستان ئەتدەمەوە ..
-7-
موفتى هەرێمى غەززە ،
فتواى خواردنى سەگ و گوێدرێژى دەرکرد ..
برسێتیەکە تەحەمول ناکرێ ..
( پاییز دەستى کرد بە گریان ..
عەگاڵ و
دشداشەى نەوتفرۆشەکانى خەلیجى خوساندەوە ..)
-8-
جاران کە پاییز ئەهاتە شارەکەمان ،
حەوشە و بەرهەیوانەکانى پڕ ئەکرد لە شیعر ..
شەماڵ بۆنى خۆڵى لە خۆى ئەدا و
لە پەنجەرەکانەوە ،
ئەهاتە ژوورەوە ..
-9-
لە ناکاو ئەمبولانسێک ،
بە کۆڵانەکەماندا ، بە خێرایى تێپەڕى ..
پاییز جەڵتەى دەماغ لێى دابوو ..
پاییز دەمى خوار بو بو..
پاییز نیوەى ڕاستى وشک بو بو ..
-10-
ئەگەرەکانى مردنى پاییز لە زۆر بووندان ..
زستان خەریکى ئیحما کردنە ..
لە ناوەختا دێتە مەیدانى شارەوە ..
( دەسکێشفرۆشەکان خەنى بوون ! )
-11-
پاییز نەمرد
