Skip to Content

Sunday, April 21st, 2024
ئیتر … نەوزاد بەندى

ئیتر … نەوزاد بەندى

Closed

 

 

 

 -1-

 

ئیتر وەختى ئینتیزاریى بارانە ..

تا وەرزى کوللە ، چاوەڕوانین ..

شەقام ،

سەرە سۆدە و

دەبەى ئاو و

قنگە جگەرە و

کارتى بەڵانسى هەڵگرتووە ..

یەک دڵۆپ باران ،

تەوێڵى تەڕ نەکردووە ..

( ئەگەر شەقام بوومایە ،

سەرى خۆم هەڵئەگرت ..

لە کۆڵانێکى دانیمارک ،

لەگەڵ شانۆگەرییەکى شەکسپیر ،

مافى پەناهاندەییم وەرئەگرت ..

لەوێ هەموو ڕۆژێ باران و بەفر ئەیانشۆردم ..

لەوێ ،

خەڵک بە ڕێزەوە پێیان پیا ئەنام ..

تف و

قنگە جگەرە و

سەرەسۆدە و

کارتى بەڵانسى ئێسکپایەریان ،

تێ نەدەگرتم ..)

ئەگەر شەقام بوومایە ،

خۆم ئەکوشت ..

چونکە نە تەحەمولى کەرێتیەکانى ئێرەم ئەگرت و

نە تەحەمولى موعاناتەکانى غوربەت..

 

-2-

ئیتر

تۆیش جانتاکانت کۆ کەرەوە ..

لەوە زیاتر بە دیار پاییزەوە دامەنیشە ..

پەلکێشى بکە بۆ دادگا ..

لەوە زیاتر بە دیار شیعرەکانەوە دامەنیشە ،

لە هەتیوخانەیەک ناونوسیان کە ..

هەموى هەر کەلاوەیە ،

هیچت لێ نەبێ بە پەرستگا ..

جانتاکانت کۆ کەرەوە و

بڕۆرەوە بۆ مەنفا …….

 

-3-

بە منداڵیى ،

هەتا دەسکێشیان بۆ کڕیم ،

کانون  دەستى زبر کردم ..

ئێستایش کە دەسکێش ئەبینم ،

 دەستم شەقار – ش ەقار ئەبێ و

دڵۆپ – دڵۆپ خوێنى لێ ئەتکێ ..

 

-4-

ئەگەر لە یارییەکى لگاوا ،

مناڵیم بدۆڕاندایە ،

ئەوەندە ئەسەفى نەدەبوو ..

 

-5-

ئیتر ناڕۆمە دەرەوە ..

بزانم کێ زەرەر ئەکا ؟

 

Previous
Next
This site is registered on wpml.org as a development site.