پەڕاوێزخانە … نەوزاد بەندی

 

 

 

-1-

کە پێڵاوێ ئەکڕم ، 

هەر لە فرۆشگاکەدا لە پێی ئەکەم ..

کێ ئەڵێ پێنج دەقیقەی ماوە تەمەن ؟

با بە پێڵاوێکی تازەوە بمرم ..

 

-2-

کۆمەڵێک کەس ،

بە دوای ئەسپێکا ڕایانئەکرد ..

بۆ ئەوەی بیسەلمێنن ،

کە خۆیان کەر نین ..

 

-3-

پارەیەکی زۆریان کردە ناو

کۆمەڵێ گیرفانی دڕاوەوە ..

بۆ ئەوەی بیسەلمێنن ،

یەک فلس نەچۆتە گیرفانی کەسەوە ..

( ئیتر شەقام دز دەرچوو .. )

 

-4-

لە ژێر باراندا ،

کۆمەڵێک شەلاتی ، ئەیانخواردەوە ..

نەیانئەزانی باران بێ و وشکەساڵًیی ،

هیچ لە مەسەلەکە ناگۆڕێ ،

تازە ئەوان شەلاتین .. شەلاتی ..

 

-5-

زیندەوەرەکان یەکتری ئەخۆن ..

( من لەم موعادەلەیە تێناگەم .. )

 

-6-

بەردەوام جەژنەکان ،

لەسەر حیسابی خوێن و

کەرامەت و

شەهامەتی ئەوانی تر .. ئەڕازێنەوە ..

ئەو قازە گەورە سوور کراوەیەی

لەشەوی سەری ساڵدا ، لە دەوری کۆ ئەبنەوە ..

ئەو شلە پڕ گۆشتەی بەیانی جەژن ، لە دەوری کۆ ئەبینەوە ..

( ناکرێ بە بێ تاوان 

بە بێ ئازار

بە بێ خوێن ..

جەژنێک بەڕێکەین ؟؟ )

 

-7-

ئێستایش بۆنساردی خوێن ،

شەقام و مەیدانەکانی بەر نەداوە ..

 

-8-

پەرلەمانتار ئەو موچە زۆرەی بۆ چییە ؟

پارەی زۆر مرۆڤ ئەکات بە بازرگان ..

دووری ئەخاتەوە :

لە لێکدانەوە

لە بیر کردنەوە

لە نیشتمان ..

 

–9-

وڵات ،

کە سنوورەکانی بوون بە شورا ،

ئیدی ئەبێ بە زیندان ..

وەرزیری دارایی کە وەڵامی پێ نەما ،

ئیدی لە وەزارەت و مرۆفایەتی دەرئەچێ و

ئیدی ئەبێ بە گیرفان ..

 

-10-

بڕوانە !

یەک بستت نەماوەتەوە بۆ بەختەوەریی ..

ناچار هەمومانت کرد بە کۆیلەی بیرەوەریی ،

ئەی

نیشتمان ..

 

-11-

ستیانەکانت ،

کرانە ناو تەنکەر ..

نەمزانی مەمکەکانت ئەوەندە  گەورەن ،

سەدان هەزار تەنکەری پڕ کرد ..

ئەی نیشتمان .