داخباران … نەوزاد بەندى

 

 

 

 

 

 

-1-

هاوڕێیەکى دێرینم دى ،

باوەشى پیا کردم و

بە گریانەوە وتى :

ئازیزم ! 

دینار چ خەسارەتێکى لێ داین..

 

-2-

ویستم یەخەى پاڵتۆکەم ،

نەهێڵێ باران بچێتە پشت ملم ..

( باران عاجز بوو ..

ئەو ڕۆشتنەى ڕۆى ،

نەگەڕایەوە .. )

 

-3-

لە وێستگەى خەوێکا ..

لە کەلاوەى داڕوخاوى شەوێکا ..

چوومە (سەرە)وە ، بۆ بینینى ئەو ..

نەمبینیەوە ..

( وتیان مناڵیى لەگەڵ نوقوڵى ترش و شیرینا ڕۆى ..

لەگەڵ بۆنى مێخەکا ..

ڕۆیشت و ناگەڕێتەوە

ئەو ، ئەوەندە گەورەیە ،

نە لە خەوا ..

نە لە کەلاوەکانى شەوا ،

جێگاى نابیتەوە .. )

-4- 

دەفتەرێکم خستە ناو جانتایەکەوە ..

قەڵەمێکم  بە گیرفانى کراسەکەما هەڵواسى..

لەسەر تەختەیەکى دار دانیشتم ..

( ئەو نەهات و ئەو نەهات و  ئەو نەهات ..)

 

-5-

ئەو مردنە جەماعیە چییە ، شەو ڕوو دەدا ؟

( ئێشکگرەکان خۆیان بە مەغدوور ئەزانن ،

کە لەو مردنە جەماعیەدا ،

بەشدارى ناکەن )

 

-6-

نازانم بۆچى کە ئەمبینیت ،

ئەژنۆم وشک ئەبوو ؟

هەناسەم سوار ئەبوو ؟

ڕەنگم ئەبوو بە ڕەنگى توت فەڕەنگى ؟

( کە ڕۆیشتى ،

وشکبوونى ئەژنۆ و

سوار بوونى هەناسە و

توت فەڕەنگیبوونى ڕوخساریشمت ،

پێچایەوە و

خستتە ناو جانتاکەت .. )

ئەژنۆم تینووى وشک بوونە ..

هەناسەم تینوى سوار بوونە ..

ڕەنگم تینووى توت فەڕەنگیبوونە ..

( کەى دێیتەوە و

وشکبونى ئەژنۆم ئەدەیتەوە ؟

سواربوونى هەناسەم ئەدەیتەوە ؟

توت فەڕەنگیبوونى ڕوخسارم ئەدەیتەوە ؟

کەى ؟ )

 

-5-

تەنیاترم لە فلاش میمۆرى ..

پڕ ئەبم لە وێنە و دەنگ و ڕەنگ و وشە ..

بە هیچ کۆمپیوتەرێکیش ناکرێمەوە..

 

-6-

ببم بە حوکمەت ،

کڵاشینکۆفەکان ئەتوێنمەوە ،

گەورەترین کورسى – کورسى لە جیهاندا دروست ئەکەم ..

ناوى ئەنێم : چاوى یار !

 

-7-

کێ هەیە گریانى پیاو ببینێت و

موچڕکە نەیلەرزێنێ ؟

کێ هەیە سەردانى بەفر بکا و

تۆپەڵێک ،

سەرى پەنجەکانى نەتەزێنێ ؟

کێ هەیە بێتە دنیا و

بستە خاکێک ،

سەرتاپاى نەڕزێنێ ؟

 

 

 

nawzadbandy@yahoo.com