یاقوتی ڕژاو ….. عه‌لی پێنجوێنی
چۆله‌كه‌یه‌ك باران باڵی شكاندبو
به‌ده‌نوك په‌پوله‌یه‌كی خوارد
تافێری فڕینی بكاته‌وه
– – – – – – – – – – – – – – – –
تۆ له‌و سه‌ری دنیاوه
كه‌وچكێ گۆرانی بكه‌ره ، ده‌می باخێكه‌وه
دڵنیابه له‌م سه‌ری دنیاوه
گوڵێك من خه‌به‌ر ده‌كاته‌وه
– – – – – – – – – – – – – – – –
به‌جام شه‌و هه‌ڵئه‌گۆزم
ده‌یكه‌مه بن گوڵه شه‌وبۆكان
ئه‌گه‌ر به‌ڕۆژدا تینویان بو
چیبكه‌مه بنیان ؟؟
– – – – – – – – – – – – – – – –
بێده‌نگترین بونه‌وه‌ر له‌دنیادا ، گوڵه
كه‌چی كه‌سمان ، به‌م هه‌مو زۆر بڵێییه‌مانه‌وه
نه‌مان توانی
هێنده‌ی گوڵ جوان بدوێین
– – – – – – – – – – – – – – – –
هه‌موو دنیات به‌سه‌ر ئاوه‌كه‌دا په‌ڕانده‌وه
ڕۆشتیت و هیچ ئاوڕت نه‌دایه‌وه‌و
نه‌تپرسی
ئه‌ی كێ ئاوه‌كه بپه‌ڕێنێته‌وه ……؟
دایكم له‌سه‌ر به‌رگی سه‌رینه‌كه‌م
چه‌ند گوڵێكی زه‌ردی چنیبو
بۆیه له‌وه‌ته‌ی بیرم بێت
جگه له پایز
خه‌وم به هیچیتره‌وه نه‌بینیوه
– – – – – – – – – – – – – – – –
لێوی هه‌ردوكمان
به‌په‌رداخه‌كه‌وه جێما
دڵی من چوو بۆناو باخ و
دڵی تۆش بۆ به‌رده‌ڵان
– – – – – – – – – – – – – – – –
ئه‌وه‌نده‌ی به‌رد گیراوه‌ته دڵم
بگیرایه‌ته گڵۆپه‌كانی دنیا
ئێستا چاو چاوی نه‌ده‌بینی
– – – – – – – – – – – – – – – –
ده‌ستی هه‌ردوكمان یه‌ك ئاو بردی
ده‌ستی تۆ ماسی ڕاو كردو
ده‌ستی منیش به گۆرانی
برینی ماسیه‌كه‌ی تیمار ده‌كرد
– – – – – – – – – – – – – – – –
تینیۆتی له‌پی ده‌سته‌كانمی شه‌قار شه‌قار كردوه
كه‌چی تۆ له‌ژێر نینۆكه‌كانمه‌وه
دۆزه دۆزه‌ی ئاو ده‌كه‌یت
– – – – – – – – – – – – – – – –
ئه‌وه‌نده دایكمم خۆش ده‌وێ
كه هه‌رگیز
ناتوانم سه‌ردانی بكه‌م
– – – – – – – – – – – – – – – –
كه – با – ئه‌یدات له ده‌مو چاومان
گرژ ئه‌بین و ترشو تاڵیمان لێ ئه‌ڕژێ
كه – با – ئه‌یدات له‌ده‌م و چاوی باخچه
بۆنی یاسه‌مین ئه‌ڕژێ
– – – – – – – – – – – – – – – –
ئه‌گه‌ر ئه‌خلاقمان هه‌بێت
جوانی به‌شی هه‌موومان ده‌كات
– – – – – – – – – – – – – – – –
چه‌ند له‌یه‌كتر ئه‌چین
كه یه‌كتری نابینین
چه‌ند پێچه‌وانه‌ی یه‌كین
كه‌له باوه‌شی یه‌كترداین
– – – – – – – – – – – – – – – –
من له‌م سه‌ری دنیاوه ، لێو ده‌جوڵێنم
تۆله‌و سه‌ری دنیاوه ، ده‌زانی
به‌ته‌مام چ گۆرانیه‌ك بڵێم
كه‌چی ئێستا مه‌ودای نێوانمان
ئه‌مسه‌راو سه‌ری قه‌وسی كه‌مانچه‌یه‌كه
تۆ له‌ئاوازێك ده‌خوێنی و
منیش له ئاوازێكی تر
– – – – – – – – – – – – – – – –
سه‌رزه‌مینێكی پانو پۆڕ
ته‌نیا دوكه‌س جێگه‌یان نابێته‌وه تیایدا
ئینجانه‌یه‌ك هێنده‌ی جوگرافیای
له‌پی ده‌ستێك ده‌بێت
ده‌یان گه‌ڵا له ناویدا ، سه‌ریان كردوه به‌یه‌كداو
عه‌تری جوانی ده‌ڕێژن
– – – – – – – – – – – – – – – –
كه‌شه‌ق هه‌ڵئه‌ده‌ی له به‌ردێك
ته‌نیا هه‌ست به‌ئازاری قاچی خۆت ئه‌كه‌ی
چونكه كه‌س نازانێ دڵت له‌كوێ لێونبوه
بۆیه هه‌ست به‌ده‌نگی دڵی به‌رده‌كه ناكه‌یت
– – – – – – – – – – – – – – – –
هه‌موو باخه‌كانمان سوتاند
خودامان ڕاونا بۆ مزگه‌وته‌كان
هه‌رچی ده‌ڕۆم بۆ مزگه‌وت
ئه‌و له‌وێ نیه
ئاخر ئه‌و باخی به ماڵی خۆی ده‌زانی
– – – – – – – – – – – – – – – –
من ئیمانم به‌خنكاوی دۆزییه‌وه
چونكه ترانجاندبویانه ناو نوێژێكه‌وه
ئاسمانی نوێژ
زۆرله‌وه ته‌نگه‌به‌ر تره
ئیمان تیایدا ، له‌شه‌قه‌ی باڵ بدات .
خودا له‌ناو خوێنی دڵا هه‌ڵده‌گیرێت
نه‌ك له‌ناو
حه‌رف و ڕسته‌و كتێبا
– – – – – – – – – – – – – – – –
خودا مه‌یلی
بیستنی مۆسیقا ده‌كات
ته‌نیا له‌ناو شمشاڵه‌كه‌ی قاله مه‌ڕه‌دا
نه‌ك له‌هیچ جێگه‌یه‌كی تر
– – – – – – – – – – – – – – – –
له‌تاریكه شه‌وه كاندا له‌ناو دارستانه‌كانا
ئه‌سپ له ئێمه باشتر رێده‌كات
داره‌كان له‌چاوی ئه‌ودا ، ده‌بن به‌چرا
كه‌چی له‌چاوی ئێمه‌دا ،ده‌بنه تارمایی
ئێمه سروشتمان خۆشده‌وێ یان ئه‌سپ ….؟
– – – – – – – – – – – – – – – –
خودا نه حه‌رفه‌و نه كتێبه
نه له‌حه‌رفو نه‌له كتێبیشدا ، په‌یام نانێرێ
خودا ده‌نگه
هه‌ر له‌ناو مۆسیقاو گۆرانیدا پێمان ده‌گات
ده‌نگ و گۆرانی
نانوسرێته‌وه ، هه‌ر ده‌وترێته‌وه
– – – – – – – – – – – – – – – –
دایكم كه، شه‌و نوێژ ده‌كات
شه‌و ده‌گوشێته‌سه‌ر به‌رماڵه‌كه‌ی
من له‌م دیو ده‌رگاكه‌وه
په‌رداخه‌كه‌م پڕتر ده‌بێ ، له‌شه‌راب
به‌یانی ده‌زانم ، ئه‌وه‌ی من خواردومه‌ته‌وه
شه‌و بو ، نه‌ك شه‌راب
– – – – – – – – – – – – – – –
ئه‌وه‌ته‌ی دنیا هه‌یه
ماچێك به‌ڕێوه‌یه‌و هه‌ر ناگات
كه‌چی جنێو له‌فیشه‌ك خێراتر ده‌گات و
ته‌ختی ته‌وێڵمان ده‌پێكێ
– – – – – – – – – – – – – – – –
هیچ شتێك هێنده‌ی ئاگر وشك نییه
كه‌چی كه ئاگر ده‌گرین
ته‌ڕ ته‌ڕ ده‌بین به فرمێسك
– – – – – – – – – – – – – – – –
ئازارو گۆرانی زۆر له‌یه‌كتری ده‌چن
ئازار له جێگه‌یه‌كه‌و
زریكه‌كه‌ی له شوێنێكی تر
گۆرانی له شوێنێكه‌و
چریكه‌كه‌ی له جێگه‌یه‌كی تر
– – – – – – – – – – – – – – – –
هه‌ر دڵۆپه ئاوێك هاتبێته گه‌رومه‌وه
ده‌مو ده‌ست خۆی خنكاوه
بۆیه ئیتر ئاو نه‌یوێرا توخنم بكه‌وێ
دواجار خۆم له تینوانا خنكام
– – – – – – – – – – – – – – –
خودا به‌و گه‌ورییه‌یه‌وه ، بۆته شمشاڵ و
خۆی بۆش بۆش كردۆته‌وه
تا سوله‌یمان بتوانێ
به‌كه‌ماڵی ئیسراحه‌ت بیژه‌نێ
– – – – – – – – – – – – – – – –
نازانم له كه‌یه‌وه ….؟
دایكم گۆزه‌كه‌ی له كانی هێناوه‌ته‌وه
هه‌ر به‌تاڵی ده‌كاته‌وه و هه‌ر پڕ ده‌بێته‌وه
هه‌ر به‌تاڵی ده‌كاته‌وه و هه‌ر پڕ ده‌بێته‌وه
تومه‌ز مانگ له بنی گۆزه‌كه‌دا به‌جێماوه
– – – – – – – – – – – – – – – –
هه‌ندێك به‌یانی هه‌یه بۆم ڕێده‌كه‌وێت
سێبه‌ر به‌نانی تیریه‌وه ، ده‌خۆم
هه‌ندێك به‌یانی
دوا چۆڕی شه‌و كه‌له‌بنی پیاڵه‌كه‌مدا به‌جێماوه
هه‌ڵیده‌چۆڕێنمه قوڕگی مناڵه‌كه‌مه‌وه
ئه‌و به‌یانیانه من باشم
– – – – – – – – – – – – – – – –
هه‌میشه
ئاگات له دره‌خته‌كه‌ی حه‌وشه بێت
چونكه مانگه‌شه‌وێكی بریندار
تیایدا به‌جێماوه
– – – – – – – – – – – – – – – –
گریانێكم له‌ناو گڵی ئینجانه‌كه‌دا
شاردۆته‌وه
دڵنیام بیدۆزنه‌وه
ئینجانه‌كه‌شی پێوه له‌توپه‌ت ده‌كه‌ن
– – – – – – – – – – – – – – – –
پڵنگێك ته‌نیا به‌شی تێربون ڕاو ده‌كات
ئه‌وه‌ته‌ی دنیا هه‌یه
مرۆڤ ڕاو ده‌كات ، كه‌چی تێر نابێ
– – – – – – – – – – – – – – – –
خودایه
بۆچی موسیبه‌تی عه‌قڵت پێداین
بۆ ئه‌وه‌ی هه‌میشه
بیر له تۆڵه كردنه‌وه بكه‌ینه‌وه …..؟
– – – – – – – – – – – – – – – –
خودایه ، ئه‌گه‌ر مزگه‌وت ماڵی تۆیه
به‌به‌رچاوته‌وه ، ماڵه‌كانیان ڕوخاندی
نه‌وتوانی بیپارێزیت
ئه‌دی مینای دڵی ئه‌و هه‌موو مناڵه بێئاینده‌یه
چۆن ده‌پارێزی ….؟
ئه‌گه‌ر ماڵی تۆش ناو دڵه‌كانه
ئاخر ئه‌ی نابینی …..؟ !
دڵشكاندن و ئاو خواردنه‌وه ، وه‌كو یه‌كی لێهاتوه ؟!
– – – – – – – – – – – – – – – –
له‌گه‌ڵ باوكم
ئه‌وه‌نده دره‌نگ به‌یه‌ك گه‌یشتینه‌وه
نه‌مانزانی قسه له‌گه‌ڵ یه‌كتر بكه‌ین
بۆیه به‌بێ ده‌نگ
یه‌كترمان به‌جێهێشته‌وه
– – – – – – – – – – – – – – – –
كتێبخانه‌كه‌م سوتا
قرچه قرچی دڵم زیاتر بو له ، قرچه قرچی ئه‌و هه‌موو پیته
هه‌موو كتێبخانه‌كه‌م بو به خۆڵه‌مێش ، جگه له كۆمه‌ڵێك پیت
پیته‌كانم له‌ناو خۆڵه‌مێشه‌كه‌دا ده‌رهێنایه‌وه
دامنه پاڵ یه‌كو نوسرابو :-
خودایه ده‌ێت گفتوگۆ بكه‌ین
خودایه بۆ (هه‌شتاوهه‌شت)
خۆت شارده‌وه له گه‌رمیان ……؟
– – – – – – – – – – – – – – – –
هه‌ست ئه‌كه‌م زه‌وی پیر بوه
هه‌ست ئه‌كه‌م زه‌وی عه‌ماره‌پۆ بوه
زه‌وی درزی بردوه‌و
دواچۆڕی جواناوی لێ ئه‌چێ
خودایه كۆتایی پێبێنه
ئێمه‌ش و خۆشت ڕزگار بكه
له‌ده‌ست ئه‌م ئه‌ستێره برینداره‌ی
كه‌پێی ده‌ڵێن ژیان .
عه‌لی پێنجوێنی
