وشکە ساڵیى شیعر … نەوزاد بەندى
ڕەنگە هەندێکتان بپرسن ،
بۆ شیعرى تازەت دیار نییە ؟
(ئەى نازانن ،
کە خوێنى قەڵەمێ ڕژا ،
ئیتر وشکە ساڵیى شیعرە و
بارانى سرووش داناکا ..؟
ئیتر قات و قڕیى شیعرە و
کەس مۆڵەتى قومێ وشە ،
بۆ گەواڵە هەورى ئیلهام ،
ئیمزا ناکا .. ؟)
* * *
( ئەى نازانن ،
کە نوسەرێ لە دار ئەدرێ ،
مەنعەتەجەولى هۆنراوەیە و
شەقامەکانى خەوبینین ،
پڕ ئەبن لە ئینزیبات و
ئیڤا و
کێبڵ ..
ئیتر حەملەى پاککردنەوەى هۆنراوەیە و
هەرچى چامە و
کۆپلە هەیە ،
ئەخرێنە گڵ ..
ئیتر کۆترى وەزن و قافیە ،
ئەخرێنە سەر برنجى
یانزە بیست و یەکى
چەکدارەکان ..
ئیتر قەڵەم بە بڕیارى چوارى تیرۆر ،
بە دادگایەکى سەربازى حوکم ئەدرێ و
بە قۆناغە تفەنگ ،
ئەخریتە بەر سێدارەکان …
* * *
ئەى نازانن ،
من شەرم لە شیعر ئەکەم و
شیعریش لە من ..
ئەو لەبەردەرگاى ماڵى خۆیان دانیشتوە و
منیش لە حەوشەى پشتەوەى ماڵى خۆمان ..
من ئەڕۆم بۆ بنکەى تەندوستى و،
ئەویش ئەڕوا بۆ هەرزان بازاڕى لەنگە ..
ئەو لە ناسینى من نائومێدە و
منیش لە نوسینەوەى ئەو …
