Skip to Content

Sunday, June 23rd, 2024
دووبارە بوونەوەی رابردوو بەهەمان عەقلیەت، مەهزەلەکان زیاتر دەکاتەوە…

دووبارە بوونەوەی رابردوو بەهەمان عەقلیەت، مەهزەلەکان زیاتر دەکاتەوە…

Closed
by January 17, 2014 گشتی

 

 

 

 

 

مرۆڤ تا گەورە دەبێت هەر تەمەنی گەورە نابێت، بەلکو ئەزموونی لە ژیان زۆر دەبێت و(عەقل)ی فروانتر دەبێت، لەدەرئەنجامی شارەزابوونیش لە ژیاندا ئەزموون لە هەڵەکانی وەردەگرێت، (عەقل)یش ناهێڵێت دووبارە بوونەوەی هەڵەکان ببێتە خوازیارێکی سەرەکی، بەڵام ئەگەر (عەقل) نەتوانێت بەسەر جەستەدا سەروەر بێت هەڵسوکەوت نەهامەتی بۆ مرۆڤەکان دێنێت، بەداخەوە لە کوردستاندا (عەقل) لە هاوسەنگی هاوکێشە سیاسیەکان سەروەر نیە، هەمیشە پێشکەوتن وهاتنە پێشەوەی گۆڕانکاریەکان زادەی (عەقل)و (مەنتیق) ێکی تۆکمەدارن، ناکرێت ئەزموونەکەمان وەکو منداڵێکی لاسار گەورە نەبێت و(عەقل)ی نەفامی لەدەست نەدات، ئەو ئەزمونەی لەو هەرێمەدا هەیە تا دێت قۆناغەکانی تەمەنی گەورە بوونی تەواو نابێت ورابردووش بە هەمان فۆڕمی خراپ دووبارە دەکاتەوە…

  دەسەڵات بەرپرسیارە لەوەی خەڵک گەشبین نابێت بە ئایندە، چونکە ئەو هەول نادات رابردوو بەهەڵەو کارەساتە رەشەکانی لە عەقلیەتی کۆمەڵگادا رەش بکاتەوە، هەروەها لە کاتێک بەرژەوەندیە تایبەتیەکانیان دەکەونە بەردەم بەربەست و ئاستەنگێک، ئێستاو ئایندە دەخەنە خزمەتی خۆیان ودەگەڕێنەوە سەر ئەسلی پێشوویان، دیارە (دەسەڵات)یش تا ئێستا هەر خۆی لە نێوان هەر ئەو دوو هێزە دەسوڕێتەوە (پ.د.ک) و(ی.ن.ک)،هەروەها لە هەندێک بڕیاریشدا (ئۆپۆزیسیۆن) هاوکارو بەشدارە ، بۆ سەرکەوتن وپیادە بوونی بەرنامەکانی ئەوان بە شێوەیەکی راستەوخۆ یان ناراستەوخۆ..

ئەوەی ئێستالە شاری (کەرکووک)دا روودەدات جگە لە دووبارە بوونەوەی هەمان عەقلیەتی (شەڕی ناوخۆ)و دووبارە بوونەوەی (مەهزەلە)ی مێژوویی ٣١ ی ئاب نەبێت چی رادەگەیەنێت، کاتێک ئەو شارە لە هەموو کاتێک زیاتر پێویستی بە یەکریزی ویەکبوونی بڕیاری کوردی یە، نەک ناتەبا بوون ولەیەکدابڕ بوون، (پارتی) دێت وبە بەهانەی (پارێزگارێک)ی نادادپەروەرەوە ئەو ریزبەندی یە تێک دەدات، لێرەوە دەکرێت بپرسین لێکترازانی کورد لە (کەرکووک)دا لە خزمەتی سیاسەتی کێ دایە ؟

هەموومان دەزانین ئەو شارە گۆرەپانێکی راستەوخۆی رووبەروو بوونەوەی کورد بووە، بەرامبەر نەیارە مێژوویی و نەیارە تازەکانی هەر لەوێشدا نەیارەکانی دەرەوە(وڵاتە ئیقلیمیەکان) بەتایبەتی (تورکیا) رۆلێکی سەرەکی دەبینێت، هەروەها نەیارەکانی ناوەخۆش (تورکمان -عارەب) کە خۆیان لە پێکهاتەی ئەو شارە دەبیننەوە، تا ئێستا هەر ئەوان سوودمەندن بە پلە یەک نەک کورد، لەو شارەدا هەر ریزبەندیەکی ئیرادەی کوردی خەونی نەیارەکانی کورد تێک دەدات، هەر لێکترازانێکیش خەونی کورد لەبار دەبات..

هێزەکانی ناو دەسەڵاتی هەرێم بە (گۆڕان)یشەوە، لەجیاتی ئەوەی لەو رووبەرەدا ببنە یەک دەنگ تا رووبەرووی نەیارەکانمان ببینەوە، جارێکی دیکە بە عەقلی لەکار کەوتووی رابردوو رووبەرووی یەکتر دەبنەوە، (پارتی) ئەوە باش دەزانێت ئەگەر (کەرکووک) دڵی (کوردستان)یش بێت نابێتە دڵی (پارتی) کەوابوو ئەو شەڕە بۆچی ولەپێناو کێ دەیکات، من ناتوانم باوەڕ بەوە بهێنم ئەو شەڕە بۆ خۆی وکەم تا زۆر بۆ زیاد کردنی دەنگەکانی خۆی بێت چونکە چۆن ئەوە ساغ بۆتەوە کە (دهۆک) نابێتە رووبەرێکی قەڵەمڕەوی (یەکێتی) هەرواش ئەو شارە نابێتە رووبەرێکی قەڵەمڕەوی (پارتی)، هەروەها ئاسانیش نیە بۆ (یەکێتی) دەست لەو دڵە هەڵبگرێت لەکاتێک ئەوە بە دڵی خۆ دەزانیت دوای ئەوەی (هەولێر) و(سلێمانی) لە دەست چوو نایەوێت جارێکی دیکە هەڵەیەکی تر دووبارە بکاتەوەو هەروا بە ئاسانی ئەو دڵەی لەدەست بچێت…

ئەو گەمە کردنەی بە سۆزی خەڵک، گەمە کردنە لە سەر پەتی سیاسەتی وڵاتە ئیقلیمیەکان، هاوکێشە نانیشتیمانیەکان ئەوە دەخوازن کە لە (کەرکوک) ئەوە روو بدات کە ، هەروەها لە بەرەئەنجامی ئەوەیدا کە (پارتی) ماوەیەکە بە هەناسەیەکی دیکە رەفتار لەگەل کۆنە هاوپەیمانەکەی (یەکێتی) دەکات، هەروەها(یەکێتی) ناتوانێت بە ژمارەی دەنگ وکورسیەکانی درێژە بە رابردووی خۆی بداتەوەو رازیش نابێت بەو ئەمری واقیعەی کە هەیە، بیر لە هەڵەو کارەساتێکی دیکە دەکاتەوە، دێت بە هەمان هەناسەو عەقلی(پارتی) لە دەرەوەی نیشتیماندا بەدوای نەیارێک دەگەڕێت تا ببێتە هاوپەیمان وناوبژی کارێکی باش ورێ بە هەبوونی رۆلی (ئێران) دەدات تا ببێتە ئەلتەرناتیفێک، بەڵام ئەلتەرناتیفێکی نیشتیمانی نا بەلکو نانیشتیمانی بۆ ئەوەی ئەگەر بتوانێت فامی تەبا بوونەوە جارێکی تر بگەڕێنێتەوە کۆشی هاوپەیمانە دێرینەکەی..

نازانم تاکەی عەقلیەتی سیاسی سەرکردەکانی هەرێم کورت دێنێت ولە ساغ کردنەوەی کێشە ناوەخۆییەکان، هەمیشە قاچێک وچاوێکی لە دەرەوەی وڵاتەو ئەوەندەش ملکەچ نابن بۆ ئیرادەو توانای خۆیان ئەوان (کە فام دەکەن ورق دەیانگرێت)، هاوکات مساوەمە کردنیشیان لەسەر بنچینەی بەرژەوەندیە باڵاکانی وڵات نین، بەلکو بەرژەوەندی تایبەتی خۆیان ونەیارەکانیان دابین دەکەن، هەروەها نازانم بۆ (یەکێتی) لەبڕی ئەوەی بەدوای چاککردنەوەی هەڵەکانی خۆی دابچێتەوە، بیر لە هەڵەیەکی دیکە دەکاتەوە، ئەو رازی نابێت بەو بەرئەنجامانەی دوای هەڵبژاردن بەدیهاتوون وهەول دەدات سەردەمێک کە گوزەری کردووە بیگەڕێنێتەوە، لە کاتێک هەموومان باش دەزانین لە سای ئەو سەردەمە خەلک ونەتەوەکەمان چەند زەرەرمەند وبێ ئومێدن، دووبارە بوونەوەی ئەو هەڵانەش دیسان گەڕانەوەی نەگبەتیەکانی ساڵی( ١٩٩٦ )ە کە جارێکی تر دەست تێوەردانی ئێرانی دێنێتەوە ناو رووداوەکانی ناوەخۆ، لەبڕی ئەوەی لە (کەرکووک) و(هەرێم)دا لەسەر یەک مێز دابنیشن لەسەر مێزەکانی(تاران) بەیەکەوە دادەنیشن..

ئایا ئەقلی کوردی لەوە زیاتر گەورە نابێت، یاخود عەقلیەتی سیاسیەکانی کورد هەر ئەوەندە بڕ دەکات وناهێڵێت عەقل گەورە بێت وئەزموون لە رابردوو وەرناگیرێت وبیر لە ئایندەیەکی دیکە ناکەنەوە تا رابردوومان لە بیر بچێتەوە بە برین وهەموو دژواریەکانی، ئەوەی (پارتی) لە(کەرکووک) کردی تەنیا خزمەتگوزاریەکە بە هاوپەیمانی خۆی ونەیارە سەرسەختەکەی کورد، هەروەها ئەوەی (یەکێتی) بردەوە (تاران)یش دووبارە بوونەوەی هەڵەکانی رابردووە نەک دەرباز بوون لە قەیرانەکانی، دیسان ئەویش خزمەتگوزاریەک پێشکەشی بە هاوپەیمانێکی خۆی دەکات ورۆلی نەیارێکی کوردیش زیاد دەکات لە ناوچەکەمان، لەهەردوولاشدا هەر نەتەوەی کورد زەرەرمەند دەبێت، هەروەها متمانە بوونیش بە خۆمان لە دەست دەچێت..

 

شوان عوسمان

هۆلەندە ١٥/١/٢٠١٤ 

 

Previous
Next
This site is registered on wpml.org as a development site.