Skip to Content

Thursday, March 28th, 2024
چەند ساتێ پێش کۆتایی … نەوزاد بەندى

چەند ساتێ پێش کۆتایی … نەوزاد بەندى

Closed

 

 

 

 

 

 

کە ئەستێرە خانەنشین ئەکرێ ،

ئەکشێ ..

کە فرمێسک پەیمانگاى گریان تەواو ئەکا ،

ئەڕژێ ..

*   *   * 

پێش ئەوەى بتبینم ،

کۆتاییت هات …

تەمى بەیانییەکى زستان بووى ،

کەس نەیزانى چیت بەسەر هات …

( لە لاپەڕەى یەکەمینى چیرۆکێکا ،

ڕێکەوتم کردى و ..

دیار نەماى ..

منیش پیاوێکى دڵڕەق بووم ..

هەنگاوێکم بەسەردا ناى ..) 

*  *   *  

ڕەنگە بڵێم ،

دواى تێپەڕ بوونى ساڵەها ،

ئاوڕێکم بۆ دایتەوە ..

( ئەیشمزانى تۆ نەماوى ..

بە عەقڵى پوتى ئەو کاتە ،

وامئەزانى ،

لە دیار کۆپلە شیعرێکم ، مۆمیا کراوى .. )

 

*  *   *  

نەمزانى وا زوو پیر ئەبم ،

ئەگینا کۆمەڵێ ساتى تۆم ،

ئەخستە بەفر گرەوە ..

 *   *   *  

کە گەڵا خانەنشین ئەبێ ،

کراسێکى زەرد ئەپۆشێ و

بە هێواشیى دێتە خوارێ ..

کە بەفر خانەنشین ئەبێ ،

ئەبێ بە کانى و قەڵبەزە و

ئەڕواتە کۆشى بەهارێ

 

Previous
Next
This site is registered on wpml.org as a development site.